Dahme Kitail Sukuhlki Sang Sises

Duwen “Imwin Sampah”

Dahme pahn imwisekla?

Sapwellimen Sises tohnpadahk ko patohwanohng ih: “Komw ketin mahsanihong kiht . . . kilel da kei me pahn kasalehda ahnsoun omwi pahn ketido oh imwin sampah.” (Madiu 24:3) Ni eh ketin sapeng irail, Sises sohte ketin mahsanih me sampah wet pahn sohrala. Mwoweo, e ketin mahsanih duwen “imwin kawa” oh e ketin kasalehda me lepin lokaia pwukat kin pid koasoandi en aramas akan me iangahki palien politik, pesines, oh pelien lamalam kan me Sehdan kin kaunda. (Madiu 13:22, 40, 49) Eri, ih koasoandi wet me e ketin medemedewe ni ahnsou me e mahsanih: “Imwin sampah ahpw pahn kohdo.”—Madiu 24:14.

Ia duwen Sises ketin kawehwehdi imwin koasoandi wet?

Imwin koasoandi suwed wet kin wia “rongamwahu.” Sises mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah [“koasoandi wet,” NW] ahpw pahn kohdo.” Sises ketin kawehwehda duwen imwin koasoandi wet ni eh mahsanih: “Pwe apwal en ni ahnsowo pahn laudsang apwal me kin wiawi sang mahs kohdo lel met; pil sohte me pahn duwe sang met kohla. Koht eri ketin kamalaulaulahr rahn ako; eri, ma e sohte ketin wia met, sohte aramas emen pahn pitla.”—Madiu 24:14, 21, 22.

Ihs me pahn kasohrala?

Irail kante me sohte kin poakohng oh papah Siohwa oh Sises me pahn kasohrala. Irail pwukat sohte kin peikiong Koht. Sises mahsanih: “Ketidohn Nein-Aramas pahn duwehte me wiawiher ni mwehin Nohao. . . . Re ahpw sasairki nohliko, e lao komwopwirailla koaruhsie.” (Madiu 24:36-39) Sises mahsanih me aramas tohto kin kekeid nan ahl ehu me pahn kohkohlahng kasohrala. Ahpw e pil ketin mahsanih me mie ahl wetikitik “me kolahng mour.”—Madiu 7:13, 14.

Iahd imwin koasoandi wet pahn imwisekla?

Ni ahnsou me irail men ese kilelepen eh pahn ketier nan mwoale “oh imwin sampah [“koasoandi wet,” NW],” Sises mahsanih: “Ehu sahpw pahn uhwong ehu sahpw, ehu wehi pahn mahweniong ehu wehi. Wasa koaros lehk lapalap oh rerrer en sahpw pahn wiawi. . . . Pwehki me suwed eh pahn paraparala wasa kan, limpoak en me tohto pahn tikitikla.” (Madiu 24:3-12) Ihme kahrehda rohng kansensuwed kan en rahnpwukat kin wehwehki me ni ahnsou keren, Wehin Koht, me iei koperment en Koht, pahn wahdo meleilei ong aramas peik kan. Sises mahsanih: “Ni amwail pahn kilang mepwukat ar pahn wiawi, kumwail pahn esehki me Wehin Koht kerendohr.”—Luk 21:31.

Dahme ke pahn anahne wia?

Sises mahsanih me Koht “ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Pwehn pwoson Koht oh sapwellime Ohl, ke anahne esehla ira ni mehlel. Kahrehda Sises mahsanih: “Oh iet mour: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”—Sohn 17:3.

Ke anahne kanahieng pwe ken dehr soupisengkihla pwunod oh kahpwal kan me kak kihsang omw ahnsou en sukuhlki ia duwen ke pahn kasalehda omw limpoakohng Koht. Sises mahsanih: “Kumwail pein mwasamwasahn kumwail. Kumwail dehr kedirepwehkin kumwail . . . pwunod kan en sampah wet; pwe Rahno kakete leledohng kumwail ni ahnsou mwadang.” Ma ke pahn peikiong sapwellimen Sises kaweid wet, ke pahn kak “pitsang mepwukat koaros me pahn wiawi.”—Luk 21:34-36.

Pwehn kalaudehla omw wehwehki ire wet, kilang irelaud 9 en pwuhken Dahme Paipel Uhdahn Padahngki?a, “Kitail Kin Momour ni ‘Imwin Rahn akan’?”

[Nting tikitik me mi pah]