Ia Duwen Omw Kak Wehwehkihla Paipel?

1. Peki Rehn Koht en Ketin Sewese Iuk

Ninfa me kin kousoan nan Italy koasoia: “Mie ahnsou ehu me I kin wadek Paipel mwohn ei kin meirla. I kin wia met mendahki met sohte kaperen ahpw I ese me Paipel iei Mahsen en Koht oh I men ese dahme E ketin kilelehdi loale. I medewehda ien wadekala pwon. Nin tepio, e mengei ahpw mwuhr, ni ei lel wasa kan me apwal en wehwehki, I sohla kin wadek.”

KE KAK wehwehki en Ninfa pepehm? Aramas tohto kak wehwehki. Ahpw, nan iren mwowe, kitail sukuhlkier me Siohwa Koht kin kupwurki ken wehwehkihla sapwellime Mahsen. Eri, ia duwen omw pahn kak wehwehkihla Paipel? Keieu, ke anahne peki rehn Koht en ketin sewese iuk.

Aramas kin wiahki sapwellimen Sises wahnpoaron kan aramas kei me “sohte wad oh pil sohte iang sukuhl” pwehki re sohte iang towehda sukuhl en pelien lamalam en mehn Suhs akan. (Wiewia 4:13) Sises ketin kamehlelehiong irail me re pahn kak wehwehkihla Mahsen en Koht. Ahpw ia duwen ar pahn kak wehwehkihla? Sises ketin kawehwehda: “Sounsawaso, Ngehn Sarawi [“sapwellimen Koht manaman,” NW], me Semei pahn poaronehdo ni edei, iei ih me pahn kawehwehiong kumwail mehkan koaros.” (Sohn 14:26) Koht kin ketin doadoahngki sapwellime manaman pwehn kapikada sampah oh audepe kan koaros. (Senesis 1:2) E pil ketin doadoahngki manamanohte pwehn kamwakid ohl 40 en ntingihdi sapwellime madamadau nan Paipel. (2 Piter 1:20, 21) Manaman wet kak sewese aramas akan me kin nantihong en wehwehkihla Paipel.

Ia duwen omw kak alehdi sapwellimen Koht manaman? Ke anahne peki ni pwoson oh ni ngidingid. Sises mahsanih: “Kumwail peki, e ahpw pahn kohieng kumwail; . . . Eri, mehnda ma kumwail aramas sapwung kei, a kumwail ese kihong noumwail seri kan dahme mwahu ong irail. Eri, Samamwail me ketiket nanleng soh pahn ketikihong Ngehn Sarawi [“sapwellime manaman,” NW] irail kan me kin peki reh?” (Luk 11:9, 13) Siohwa pahn kupwurki ketikihong sapwellime manaman irail kan me kin peki ni mehlel. Manaman wet kak sewese iuk en wehwehkihla mahsen kan me ntingdi nan Paipel sounpar kid kei samwalahro. Sapwellimen Koht manaman pil kak sewese iuk en esehla ia duwen omw pahn kak doadoahngki kaweid en Paipel kan nan omw mour.—Ipru 4:12; Seims 1:5, 6.

Ehuehu ahnsou me ke pahn wadek Paipel, ke kak kapakapohng Koht oh peki sapwellime manaman en sewese iuk en kak wehwehkihla sapwellime Mahsen.