Ia Duwen Omw Kak Wehwehkihla Paipel?

3. Ale Sawas Sang Meteikan

Ohl emen me adaneki Edward John Eyre wia seiloak ehu me pahn kotehla ehu sapwtehn laud me adaneki Nullarbor nan Australia. E mweidohng pwilidak en wasao en padahkihong ih ia duwen eh pahn ale pihl sang uluhl en pihk kan nan sapwtehno oh pil limwahn tuhke me adaneki eucalyptus. Eh alehdi sawas sang rehrail doarehla eh mour nan sapwtehno.

DUWEHTE me karasaras wet kasalehda, emen anahne sawas sang rehn emen me koahiek pwehn kak pweida nan doadoahk apwal ehu. Met pil duwehte ni omw pahn kin medewehda en wadek Paipel.

Sises sohte ketin kasik sapwellime tohnpadahk kan en pein wehwehkihla Paipel ni ar sohte pahn ale sawas sang meteikan. Ehu ahnsou, e “ketin kamarainihada kapehdirail ko pwe re en dehdehkihla Pwuhk Sarawi.” (Luk 24:45) Sises mwahngih me irail kan me kin wadek Paipel anahne sawas pwe ren kak wehwehkihla padahk kan en Paipel.

Sawas Sang Rehn Ihs?

Sises ketin kehkehlikihong sapwellime tohnpadahk mehlel kan en kihda sawas wet. Mwohn e ketidahla nanleng, Sises mahsanih: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: . . . oh kehkehlingkihong irail re en peikiong mehkoaros me I koasoanediong kumwail.” (Madiu 28:19, 20) Pwukoa me keieu kesempwal ong Kristian akan iei en kin padahk, oh met kin pid en kawehwe ia duwen aramas ar kak doadoahngki kaweid kan en Paipel nan arail mour. Eri, Kristian mehlel kan kin sewese meteikan en wehwehkihla Paipel.

Mwurinte Sises ketikihong sapwellime tohnpadahk ko kehkehlik wet, mehkot kapwuriamwei wiawi. Paipel mahsanih me ohl kesempwal men sang Idiopia kin wadewadek kokohp ehu nan pwuhken Aiseia. Ohlo wadewadek oh lel ire kei me e sohte kak wehwehki. Ire me ohlo apwalki wehwehki iei me mahsanih: “E rasehng sihpw men me pakahrlahng en kamakamala, e rasehng sihmpwul me sohte kin weriwer ni ahnsou me wune kan pahn seiseisang. E sohte kin nda mehkot. Aramas akan kasarowehdi, oh re sohte wiahiong me pwung. Sohte me kak koasoia duwen kadaudoke kan, pwehki eh mour nin sampah wet ididier.”—Wiewia 8:32, 33; Aiseia 53:7, 8.

Ohlo eri idek rehn Pilip, iei Kristian koahiek men me wehwehkihlahr Paipel: “Komw padahkihong ie, ihs me soukohpo koasoakoasoia duwe? Ma pein ih de emen tohrohr?” (Wiewia 8:34) Ohlen Idiopia menet pwurasang eh kohla kaudok nan Serusalem, oh ele e kapakapki sawas. E sansal me ni eh kin wadek Paipel, e kin ngoangki en wehwehkihla oh e pil kin karakarahk. Ahpw e sohte wehwehki dahme e wie wadewadek. Eri, ni karakarahk e peki rehn Pilip en sewese ih. Pilip eri kawehwehiong ih ire ko oh ohlo perenda oh wiahla emen Kristian.—Wiewia 8:35-39.

Sounkadehdehn Siohwa kan kin pousehla doadoahk me Pilip oh tepin Kristian kan kin wia. Nan sahpw daulih 235, Sounkadehdehn Siohwa kan kin toukihda arail ahnsou pwehn sewese aramas akan en wehwehki dahme Paipel uhdahn padahngki. Irail kin wia met ni arail kin wia koasoandi en onop Paipel. Koasoandi wet kin pid en tehk dahme Paipel mahsanih duwen ehuehu ire kan.a—Kilang Koakon “Pasapeng Mwahu ong Peidek kan.”

“Ei Peidek Koaros Kin Pasapengla”

Steven, Valvanera, oh Jo-Anne me koasoiepe pwarada nan makasihn wet pil iang onopki Paipel rehn Sounkadehdehn Siohwa kan. Steven koasoia: “I pwuriamwei pwehki pasapeng koaros kin dierek sang kan nan Paipel. Mwohn ei tepida onop Paipel rehn Sounkadehdehn Siohwa kan, sohte me kin kasalehiong ie duwen ei pahn diar pasapeng kan sang Paipel. E kansenamwahu en ese me kitail sohte anahne akupwungki madamadau kan me kin uhpene me pid Koht oh Paipel.”

Valvanera pil koasoia: “Soahng koaros me I sukuhlki sang rehn Sounkadehdehn Siohwa kan kin sansal oh pwung. I wehwehkidahr me I sohte anahne kamehlele ire kan pwehki ei pelien lamalam kin padahngki, ahpw mie kawehwe mwahu ong soahng koaros.” Jo-Anne koasoia: “Paipel kin sapengla ei peidek kan koaros. Met kahrehda ei waunekihla Koht pwehki e mwahngih atail peidek kan oh e ketin kilelehdi pasapeng kan nan Paipel.”

Mie Sounkadehdehn Siohwa men me ke ese? Ma ei, eri ke sou peki reh en kasalehda ia duwen omw kak wia onop en Paipel? Ma ke sohte ese Sounkadehdehn Siohwa kan, a ke kak ntinglahng ehu adres me kileldi nan pali 2 en makasihn wet. Menlau ale sawas sang ni sapwellimen Koht manaman oh dehr mwadang koasoanehdi dahme ke men kamehlele duwen Paipel. Ale sawas sang rehn emen me koahiek pwehn wehwehkihla Paipel. Ma ke pahn wia mepwukat, ke pahn kak wehwehkihla audepen Paipel!

[Nting tikitik me mi pah]

[Kawehwehpen kilel kan nan ehu ehu pali 8]

Pasapeng Mwahu ong Peidek kan

Ire kan me ke kak sukuhlki sang omw onop en Paipel rehn Sounkadehdehn Siohwa kan:

• Ia sapwellimen Koht koasoandi ong sampah?

• Ia irail me melahr akan?

• Kitail kin momour ni “imwin rahn akan”?

• Dahme kahrehda Koht ketin mweidohngki lokolok en mihmihte?

• Ia duwen I kak wiahiong mour en ei peneinei en nsenamwahu?

[Kawehwehpen kilel kan nan ehu ehu pali 7]

Pwehn wehwehkihla Paipel . . . kapakapki sapwellimen Koht manaman, ahneki madamadau pwung, oh ale sawas sang meteikan