Dehr Kansensuwedihada Sapwellimen Siohwa Manaman

“Kumwail dehr pil kin kansensuwedihada sapwellimen Koht manaman, pwe kumwail kin kilelkidier manaman wet ong rahn en kamaiau sang ni tomw.”—EP. 4:30, NW.

1. Dahme Siohwa ketin wiahda ong aramas rar kei? Pwukoa dahieu me re ahneki?

SIOHWA ketin wiahda mehkot kaselel ong aramas rar kei me momour nan sampah suwed wet. E ketin kahrehiong irail en kak karanihala ih sang ni eh ketin doadoahngki sapwellime Iehros, Sises Krais. (Sohn 6:44) Ma ke inoukihong Koht omw mour oh mourki inou wet, kowe emen irail. Nin duwen emen me papidaisla ni mwaren sapwellimen Koht manaman, ke ahneki pwukoa en mourki mour me pahrekiong kaweid en manaman wet.—Mad. 28:19.

2. Peidek dah kan me kitail pahn tehkpene?

² Kitail me “kin padokekihdi sapwellimen Koht manaman” kin pwuhriong irair en mour kapw. (Kal. 6:8, NW; Ep. 4:17-24) Ahpw wahnpoaron Pohl kihong kitail kaweid oh peneu en dehr kansensuwedihada sapwellimen Koht manaman. (Ep. 4:25-32) Kitail pahn tehk kanahieng kaweid en Pohl. Ia wehwehn dahme Pohl koasoia duwen en kansensuwedihada sapwellimen Koht manaman? Ia duwen emen me inoudahr rehn Siohwa eh kak kansensuwedihada sapwellime manaman? Oh ia duwen atail en dehr kansensuwedihada sapwellimen Siohwa manaman?

Wehwehpen Dahme Pohl Koasoia

3. Ia duwen omw pahn kawehwehda Episos 4:30?

³ Keieu, kitail tehk dahme Pohl koasoia nan Episos 4:30 (NW). E ntingihedi: “Kumwail dehr pil kin kansensuwedihada sapwellimen Koht manaman, pwe kumwail kin kilelkidier manaman wet ong rahn en kamaiau sang ni tomw.” Pohl sohte men ienge Kristian kan ren kauwehla arail nanpwungmwahu rehn Koht. Sapwellimen Siohwa manaman iei me irail “kin kilelkidier . . . ong rahn en kamaiau sang ni tomw.” Manamano kin wiewiahte kilel, de “kadehdepen mehkoaros me e ketin nekinekidohng” me keidi lelepek kan. (2 Kor. 1:22) Kilelo kin kasalehda me Koht sapwellimankin irail oh re pahn ale mour nanleng. Nempe en irail me kileldier iei 144,000.—Kaud. 7:2-4.

4. Dahme kahrehda e kesempwal kitail en dehr kansensuwedihada sapwellimen Koht manaman?

⁴ Kansensuwedihada sapwellimen Koht manaman kakete wia keieun kahk en kahrehda manamano eh sohla kamwakid mour en Kristian men. Met kak wiawi. E sansal sang dahme Depit koasoia mwurin eh wia dihp rehn Padsipa. Depit koluhla oh peki rehn Siohwa: “Komw dehr ketin keseieweisang mwohn silangomwi; komw dehr ketikihsang ie [“sapwellimomwi manaman,” NW].” (Mel. 51:11) Ihte irail me keidi kan me kadehdehda arail loalopwoat lao lel mehla pahn ale “nihnen” mour soutuk nanleng. (Kaud. 2:10; 1 Kor. 15:53) Kristian akan me ahneki koapworopwor nin sampah pil anahne sapwellimen Koht manaman pwe ren kin loalopwoatohng Koht oh ni imwila re pahn ale sapwellime kisakis en mour me poahsoankihda arail pwoson sapwellimen Krais meirong en tomw. (Sohn 3:36; Rom 5:8; 6:23) Ihme kahrehda kitail koaros anahne pere kitail en dehr kansensuwedihada sapwellimen Koht manaman.

Ia Duwen Kristian Emen Eh Kak Kansensuwedihada Sapwellimen Koht Manaman?

5, 6. Ia duwen emen Kristian eh kak kansensuwedihada sapwellimen Siohwa manaman?

⁵ Nin duwen Kristian akan me inoudahr, kitail en dehr kansensuwedihada sapwellimen Koht manaman. Kitail kak wia met ma kitail kin weweidki oh mourki sapwellime manamano, eri, kitail pahn powehdi ineng suwed en uduk oh sohte pahn kasalehda irair suwed kan. (Kal. 5:16, 25, 26) Ahpw met kak wekila. Kitail kak kansensuwedihada sapwellimen Koht manaman sang ni atail mweidohng kitail en ekis ekis kohkohlahng wia mehkot me Mahsen en Koht kasalehda me e suwed.

⁶ Ma kitail pousehlahte uhwong kaweid en sapwellimen Koht manaman, kitail pahn kansensuwedihada manamano, me wehwehki kitail pahn kansensuwedihala Siohwa me wia utupen manaman wet. En kasawih Episos 4:25-32 pahn kasalehiong kitail ia duwen atail anahne mwekidki, oh e kak sewese kitail en dehr kansensuwedihada sapwellimen Koht manaman.

Ia Duwen en Dehr Kansensuwedihada Sapwellimen Koht Manaman?

7, 8. Dahme kahrehda kitail kin anahne mehlel?

⁷ Kitail anahne kin mehlel. Nin duwen Episos 4:25, Pohl ntingihedi: ‘Eri, kumwail kesehla amwail likamw akan, oh emenemen kumwail en kin lokaia mehlel ong rie Kristian, pwe kitail koaros wia kisehn paliwarteieu rehn Krais.’ Pwehki atail miniminpene eh “wia kisehn paliwarteieu,” kitail en dehr mwersuwed de nsenki song en pitihdi iengetail tohnkaudok kan, pwe met duwehte atail kin likamw ong irail. Mehmen me kin usehlahte nan wiewia wet pahn imwikihla eh solahr ahneki nanpwungmwahu rehn Koht.​—Wadek Lepin Padahk 6:16-19.

⁸ Lokaia oh wiewia widing kan kak kauwehla minimin en mwomwohdiso. Ihme kahrehda kitail anahne duwehte Daniel me wia soukohp likilik men me meteikan sohte kak diarada sapwung de mehkot suwed reh. (Dan. 6:4) Oh kitail anahne tamataman kaweid en Pohl ong Kristian akan me ahneki koapworopwor en nanleng me emenemen irail me wia “paliwar en Krais” kin kisehn meteikan koaros oh anahne miniminpene nin duwen iengen Sises me keidi mehlel kan. (Ep. 4:11, 12) Ma kitail kin koapworopworki mour kohkohlahte nin sampah, kitail pil anahne lokaia mehlel, eri met kin sewese miniminpenehn riatail kan nan sampah pwon.

9. Dahme kahrehda e kesempwal kitail en kapwaiada Episos 4:26, 27?

⁹ Kitail anahne pelianda Tepil, dehr kihong ih eh ahnsou mwahu en kahrehiong kitail en wia mehkot me uhwong kupwuren Koht. (Seims 4:7) Sapwellimen Koht manaman kin sewese kitail en pelianda Sehdan. Karasepe, kitail kak wia met sang ni atail sohte kin lingeringer. Pohl ntingihedi: “Ma kumwail pil lingeringer, kumwail dehr mweidohng amwail lingeringer en kahrehiong kumwail nan dihp; pil dehr kolokol amwail lingeringer rahn ehu pwon. Kumwail dehr kihong Tepil eh ahnsou mwahu.” (Ep. 4:26, 27) Ma kitail lingeringer pwehki kahrepe pwung, kitail en mwadang kapakap nan mohngiongitail. Met kak sewese kitail en meleilei, kasalehda kanengamah a kaidehn en wia mehkot me kak kansensuwedihada sapwellimen Koht manaman. (Lep. Pad. 17:27) Eri, kitail en dehr kolokol atail lingeringer oh kihong Sehdan ahnsou mwahu en kasonge kitail en wia mehkot suwed. (Mel. 37:8, 9) Ehu ahl en pelianda ih iei en mwadang kapwungala nanpwung suwed kan sang ni atail doadoahngki sapwellimen Sises kaweid.​—Mad. 5:23, 24; 18:15-17.

10, 11. Dahme kahrehda kitail en dehr pirap de pil mwersuwed?

¹⁰ Kitail en dehr lohdi pahn kasongosong en pirap de mwersuwed. Pohl ntingihedi duwen pirap: “Aramas me kin epwehnki pirap, en tokedihsang eh pirap, oh en tapihada wia ehu soangen doadoahk me e kak momourki oh kak sewesehki me semwehmwe kan.” (Ep. 4:28) Ma Kristian men me inoudahr kin pirap, e pahn ni mehlel ‘kasaminehla mwaren Koht.’ (Lep. Pad. 30:7-9) Semwehmwe sohte kihda kahrepe pwung en pirap. Irail me poakohng Koht oh mehn mparail kan kin pohnese me sohte kahrepe pwung ehu mie pwehn pirap.—Mark 12:28-31.

¹¹ Pohl sohte koasoiahte dahme kitail en dehr wia, ahpw e pil koasoia dahme kitail anahne wia. Ma kitail kin momourki oh kekeidki sapwellimen Koht manaman, kitail pahn kin doadoahk laud pwehn kak apwalih atail peneinei oh pil “sewesehki me semwehmwe kan.” (1 Tim. 5:8) Sises oh sapwellime wahnpoaron kan kin katohrehla kisin mwohni pwehn sewesehki me semwehmwe kan, ahpw Sudas Iskariot me pangala Sises kin kihkihsang mwohnio. (Sohn 12:4-6) E uhdahn sohte kin kekeidki sapwellimen Koht manaman. Ma kitail kin mweidohng sapwellimen Koht manaman en kaweid kitail, kitail “kin men wia dahme pwung ahnsou koaros” duwehte Pohl. (Ipru 13:18) Kahrehda kitail sohte kin kansensuwedihada sapwellimen Siohwa manaman.

Ahl Teikan en Dehr Kansensuwedihada Sapwellimen Koht Manaman

12, 13. (a) Soangen lokaia dah me Episos 4:29 kaweidki kitail en dehr nda? (b) Ia mwomwen atail pahn kin koasoi?

¹² Kitail en kanahieng atail koasoi. Pohl koasoia: “Dehr mweidohng lokaia samin en kohsang nan awamwail, ahpw soangen lokaia sohte lipilipil me mwahu ong kangoang ni ahnsou me anahn, oh ele kihda dahme mwahu ong irail me rongorong kan.” (Ep. 4:29, NW) Wahnpoarono sohte pwurehng ndahte dahme kitail en dehr wia, ahpw e pil padahkihong kitail dahme kitail anahne wia. Sapwellimen Koht manaman kin kamwakid kitail en doadoahngki ‘soangen lokaia sohte lipilipil me mwahu ong kangoang oh ele kihda dahme mwahu ong irail me rongorong kan.’ Patehng met, kitail anahne dehr mweidohng “lokaia samin” en kohsang nan awatail. Lepin lokaiahn Krihk “samin” kin kadoadoahk ong wahntuhke mwokuhr de mwahmw oh uduk me matalahr. Duwehte atail kin sautki soahng pwukat, ih duwen atail pahn kin tatki soangen lokaia me Siohwa kin kupwursuwedki.

¹³ Atail koasoi kan anahne en mwakelekel, kadek oh “katapan oh kansenamwahu.” (Kol. 3:8-10; 4:6) Aramas akan anahne wehwehki me kitail weksang meteikan ni arail kin rong dahme kitail kin koasoia. Eri, kitail en ahnsou koaros koasoiong meteikan ni lokaiahn “kangoang,” oh atail pepehm pahn duwehte sounmelkahkao me koulki: “Maing KAUN, komwi me silepei oh sounkomourpei, komw ketin kupwurehla ei pato oh ei lamalam!”​—Mel. 19:14.

14. Dahme Episos 4:30, 31 kaweidki kitail en kadohwanewei sang kitail?

¹⁴ Kitail anahne kadohwanewei sang kitail lingeringer, mwakar, lokaia kamedek oh soangen suwed koaros. Mwurin Pohl eh kaweidkin kitail en dehr kansensuwedihada sapwellimen Koht manaman, e ntingihedi: “Kumwail kadohwanewei sang kumwail soangen kailok koaros, oh lingeringer koaros oh mwakar koaros oh men pei koaros oh lokaia kamedek koaros iangahki soahng suwed koaros.” (Ep. 4:30, 31, NW) Nin duwen aramas soh unsek kei, kitail koaros anahne nantihong kaunda atail madamadau oh wiewia kan. Ma kitail kin mweidala kitail en kin wia “soangen mwersuwed koaros, oh lingeringer koaros oh mwakar koaros,” kitail pahn kansensuwedihada sapwellimen Koht manaman. E pil duwehte atail kin kolokol soangen suwed kan me aramas kin wiahiong kitail, kasalehda atail nsensuwed pahrail, oh sohte men kamwahwihala nanpwung suwed rehrail. Ma kitail tapiada pohnsehsehla kaweid en Paipel wet oh pil kaweid teikan me duwehte met, kitail kakete kakairada soangen irair kan me kak kahrehiong kitail en dipada ong sapwellimen Koht manaman oh kitail kakete kesehla Siohwa.

15. Ma emen wiahda sapwung ong kitail, dahme kitail anahne wia?

¹⁵ Kitail en kin kadek, poakepoake aramas oh kin kasalehda mahk. Pohl ntingihedi: “A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.” (Ep. 4:32) Mehnda ma kitail kin nsensuwedla rehn ekei, kitail en mahkohng irail duwehte me Koht kin ketin wia. (Luk 11:4) Ia duwen ma iengetail Kristian emen kauwe kitail? Kitail kin kohla reh pwehn nantihong kapwungala. Ih eri koluhkihla dahme e nda oh peki mahk. Kitail anahne wia laudsang en ihte mahkohng ih. Lipai 19:18 mahsanih: “Dehr dupungki me suwed ong emen eh wia suwed ong uhk, de kadakadaur omw kailongki, ahpw ke en poakohng mehn mpomw duwehte omw kin poakohng pein uhk. Ngehi me KAUN-O.”

Kitail Anahne Mwasamwasahn

16. Menlau kihda ehu karasaras me kasalehda atail anahne wiahda wekidekla kan pwehn dehr kansensuwedihada sapwellimen Koht manaman.

¹⁶ Mehnda ma kitail kelekelehpw, kitail kakete ale kasongosong en wia mehkot me kin kansensuwedihala Koht. Karasepe, emen brother ele kin rongorong koul me sohte konehng Kristian akan. Kadeikpen loale tapiada suwedkihda eh pohnsehsehla kaweid en Paipel me mi nan pwuhk kan me kohsang “ladu lelepek oh loalokong.” (Luk 12:42) Ele e kapakapki duwen kahpwal wet oh tamanda dahme Pohl koasoia nan Episos 4:30. Ni eh koasoanehdi teng en dehr kansensuwedihada sapwellimen Koht manaman, e solahr rong koul kan me sohte konehng Kristian akan. Siohwa pahn kapaiahda soangen madamadau me brothero ahneki. Kahrehda, ahnsou koaros kitail en kin pere kitail en dehr kansensuwedihada sapwellimen Koht manaman.

17. Dahme kak wiawi ma kitail sohte kin mwasamwasahn oh kapakap?

¹⁷ Ma kitail sohte kin mwasamwasahn oh kapakap, kitail kak lohdiong nan tiahk samin de sapwung kan me pahn kansensuwedihada sapwellimen Koht manaman. Pwehki sapwellimen Koht manaman kin kapwarehda irair kan me samatail nanleng kin sapwellimaniki, ni atail kin kansensuwedihala manamano, kitail kin kansensuwedihala Siohwa. Uhdahn kitail sohte men wia met. (Ep. 4:30) Sounkawehwehn Kosonned en mehn Suhs kan wiahki sapwellimen Sises manaman kan me iei manaman en Sehdan. (Wadek Mark 3:22-30.) Imwintihti en Krais pwukat kin “lahlahwe” sapwellimen Koht manaman oh re wiahda dihp me sohte mahkpe mie. Eri kitail dehpa lelohng met!

18. Ia duwen atail kak ese ma kitail saikinte wiahda dihp me sohte mahkpe mie?

¹⁸ Kitail anahne tamataman dahme Pohl koasoia me pid duwen en dehr kansensuwedihada sapwellimen Koht manaman pwehki kitail sohte men wiahda dihp me sohte mahkpe mie. Ahpw ia duwen ma kitail wiahda dihp laud? Ma kitail koluhla oh ale sawas sang elder kan, kitail kak kamehlele me Koht kin ketin mahkohngehr kitail oh kitail sohte dipada ong sapwellimen Koht manaman. Koht kin ketin sewese kitail pwe kitail en dehr kansensuwedihada sapwellime manaman ni ahl sohte lipilipil.

19, 20. (a) Soahng dah kan me kitail en dehr wia? (b) Dahme kitail anahne koasoanehdi teng en wia?

¹⁹ Koht kin ketikihda sapwellime manaman pwe sapwellime aramas akan en kin limpoakpene, peren oh miniminpene. (Mel. 133:1-3) Kahrehda kitail anahne irekitail sang kansensuwedihada sapwellimen Koht manaman ni atail en dehr lipahned de koasoia mehkot me kin kauwehla wahu en soun silepe kan me sapwellimen Koht manaman idihada. (Wiewia 20:28; Sud 8) Ahpw kitail anahne miniminpene oh wahupene nan mwomwohdiso. Kitail en dehr wiahda pwihn kan me kin katohre kitail sang meteikan nan sapwellimen Koht aramas akan. Pohl ntingihedi: “Riei ko, ni mwaren atail kaun Sises Krais, I peki ni ngidingid rehmwail, kumwail koaros en pwungkipene dahme kumwail kin patohwanda, a ieremen kumwail mweidohng saminimin en kin mie nanpwungamwail; pwe e konehng kumwail en kin ahnekipene lamalamteieu oh kupwurteieu.”​—1 Kor. 1:10.

²⁰ Siohwa kin kupwurperenki oh kak sewese kitail pwe kitail en dehr kansensuwedihada sapwellime manaman. Eri kitail en kin pousehlahte kapakapki sapwellime manaman oh koasoanehdi teng en dehr kansensuwedihada. Kitail en pil pousehlahte “padokekihdi sapwellimen Koht manaman” oh nantihong rapahki kaweid en manamano met oh pil kohkohlahte.

Ia Duwen Omw Pahn Sapeng?

• Ia wehwehn kansensuwedihada sapwellimen Koht manaman?

• Ia duwen emen me inoukihong Siohwa eh mour eh kak kansensuwedihada sapwellime manaman?

• Ni ahl dah kei kitail en dehr kansensuwedihada sapwellimen Koht manaman?

[Kilel nan pali 30]

Mwadang kapwungala nanpwung suwed

[Kilel nan pali 31]

Mehnia wahntuhke me keieu karasahda omw lokaia?