Nsenohki Ngehno Oh Ale Mour!

“Imwilahn nsenohki ngehno iei mour.”​—ROMANS 8:6, New World Translation.

1, 2. Iaduwen Pwuhk Sarawi kin kawehwehda duwen wekpeseng “uduk” oh “ngehn”?

E SOHTE mengei en kolokolete tiahk mwakelekel mwohn silangin Koht nan sampah suwed wet me kin men kaunsekihala ineng suwed en war. Ahpw, Pwuhk Sarawi kin katohrohrpeseng “uduk” oh “ngehn” ni e kin kawehwehda, ni sansal, imwila suwed kan me kin wiawi ma emen pahn mweidong ineng en uduk en powehdi ih oh pil imwila mwahu kan me kin wiawi ma emen pahn mweidong sapwellimen Koht ngehn sarawi en kamwekidada eh mour.

² Karasepe ieu, Sises Krais mahsanih: “Ngehnen Koht me kin kihong mour, a uduk en aramas iei mehkot mwahl. Mahsen kan me I kin padahkihong kumwail iei ngehn oh mour.” (Sohn 6:63, NW) Ong Kristian akan nan Kalesia, wahnpoaron Pohl ntingihdi: “Pwe ineng en uduk kin uhwong ngehno, oh ngehno kin uhwong ineng en uduk, oh soahng riau pwukat kin imwintihtipene; eri, met wehwehki me kumwail sohte kak wia dahme kumwail inengieng.” (Kalesia 5:17) Pohl pil mahsanih: “Ma e padokedi nan mwetuwel en paliwere ineng en paliwar, e pahn dolungasang mehla; a ma e padokedi nan mwetuwel en ngehn, e pahn dolungasang rehn ngehno mour soutuk.”​—Kalesia 6:8.

3. Dahme pahn kak sewese kitail en saledeksang ineng suwed akan?

³ Sapwellimen Siohwa ngehn sarawi​—sapwellime manaman—​kak kauwehla “ineng en uduk” oh pil kak kauwehla ineng en wia dihp me kin kak kaunda aramas. (1 Piter 2:11) Pwehn saledeksang wiahla lidu en ineng suwed akan, e kesempwal kitail en alehdi sawas sang sapwellimen Koht ngehn sarawi, pwe Pohl ntingihdi: “Imwilahn nsenohki kapwaiada ineng en uduk iei mehla; ahpw imwilahn nsenohki ngehno iei mour oh popohl.” (Rom 8:6, NW) Ia wehwehn “nsenohki ngehno”?

“Nsenohki Ngehno”

4. Ia wehwehn “nsenohki ngehno”?

⁴ Ni ahnsou me Pohl ntingihdi duwen “nsenohki ngehno,” e doadoahngki lepin lokaiahn Krihk ieu me kin wehwehki “elen madamadau, koasoanehdiong lamalam, mehn akadei.” Pil ehu lepin lokaia me kin pahrekiong lepin lokaia wet kin wehwehki “en medemedewe, en nsenohki ni ahl ehu me koasoanehdier.” Eri, nsenohki ngehno kin wehwehki me kitail pahn mweidong sapwellimen Siohwa manaman soh-sansal en kahluwa kitail nan atail mour. E wehwehki me kitail kin perenki mweidong sapwellimen Koht ngehn sarawi en kahre atail madamadau kan, ineng kan, pilipil kan oh mehn akadei kan.

5. Ia uwen laud kitail en mweidong ngehn sarawi en kaunda kitail?

⁵ Pohl kasansalehda ia uwen laud me kitail pahn mweidong ngehn sarawi en kaunda kitail ni e mahsanih me kitail kin wiahla ‘lidun ngehno.’ (Rom 7:6) Poahsoanda pohn ahr pwoson tomw meirong en Sises, Kristian akan me saledeksang dihp oh “mehlasangehr” dihp, oh irail solahr kin wia lidun dihp. (Rom 6:2, 11) Irail akan me kin mehla ni ahl wet, kin momour ni pali uduk ahnsouwet oh irail saledeklaher oh irail kak idawehnla Krais nin duwen “lidun pwung.”​—Rom 6:18-20.

Wekidekla Laud Ehu

6. Wekidekla dahieu kin wiaiong irail akan me pahn wiahla “lidun pwung akan”?

⁶ Wekidekla laud ehu kin wiawi ni ahnsou me emen me kin wiahla “lidun dihp” oh mwuhr uhd papah Koht nin duwen “lidun pwung kan.” Pohl ntingwohng irail akan me iang wekidekla laud wet: ‘Ahpw met kumwail mwakelekelsangehr dihp, oh kasarawihongehr Koht, oh pwunglahr rehn Koht ni mwaren atail Kaun Sises Krais oh ni ngenen atail Koht.’​—Rom 6:17, 18; 1 Korint 6:11.

7. Dahme kahrehda e kesempwal kitail en esehla kupwuren Siohwa?

⁷ Ma pein kitail men wia soangen wekidekla laud wet, kitail anahne sukuhliki duwen kupwuren Siohwa. Sounpar epwiki kei samwalahro, sounmelkakao Depit ngidingidki kapakap ong Koht: “Maing Kaun, komw ketin padahkihong ie, . . . Komw ketin padahkihong ie duwen ei pahn momourki sapwellimomwi mehlel.” (Melkahka 25:4, 5) Siohwa karonge kapakap en Depit, oh E pil kak sapeng kapakap kan en sapwellime ladu kan nan atail ahnsou. Ma kitail pahn lelohng kasongosong ehu en kapwaiada ineng en uduk, e pahn wia sawas laud ong kitail en doudouloale duwen sapwellimen Koht wiewia kan oh padahk mehlel me min oh sarawi.

Pwukoa Kesempwal en Sapwellimen Koht Mahsen

8. Dahme kahrehda e kesempwal kitail en onop Pwuhk Sarawi?

⁸ Sapwellimen Koht Mahsen, Pwuhk Sarawi, me wiawikihda menemen en sapwellime ngehn sarawi. Ihme kahrehda, ehu ahl kesempwal en mweidong ngehno en kahre kitail iei sang ni atail kin wadek oh onop Pwuhk Sarawi​—rahn koaros ma kak. (1 Korint 2:10, 11; Episos 5:18) Ma kitail kin audaudkihda atail madamadau kan oh mongiongatail kan padahk mehlel kan oh kosonned akan en Pwuhk Sarawi, e pahn kak sewese kitail en tengla nan padahk mehlel ni ahnsou me kitail kin lelohng kasongosong kan. Ei, ni ahnsou me kitail kin lelohng kasongosong kan, sapwellimen Koht ngehn sarawi pahn kak katamankin kitail duwen mehn kataman kan nan Pwuhk Sarawi oh padahk kan me pahn kak sewese kitail en kolokolete atail inou en kapwaiada kupwuren Koht. (Melkahka 119:1, 2, 99; Sohn 14:26) Ihme kahrehda, sohte me pahn kak pitih kitail en keid nan ahl me sapwung.​—2 Korint 11:3.

9. Iaduwen wia onop en Pwuhk Sarawi kin kak kakehle atail nanpwung mwahu rehn Siohwa?

⁹ Ni atail kin mehlel ong oh ngoangki atail onopki Pwuhk Sarawi oh pil doadoahngki sawaspen Pwuhk Sarawi kan, sapwellimen Koht ngehn sarawi kin kamwekidada atail madamadau kan oh mongiongatail kan, oh met kin kakehlailih atail wauneki sapwellimen Siohwa kosonned akan. Atail nanpwung mwahu rehn Koht kin wia mehkot me keieu kesempwal nan atail mour. Ni ahnsou me kitail pahn lelohng kasongosong kan, kitail sohte pahn medemedewe duwen ia uwen kaperen tiahk suwed akan. Ahpw, kitail pahn keieu nsenohki atail kolokolete atail lelepek ong Siohwa. Ma kitail kin kesempwaliki atail nanpwung mwahu rehn Koht, met pahn kak sewese kitail en powehdi ineng suwed kan me kakete kauwehla atail nanpwung mwahu reh.

“Ia Uwen Ei Poakohng Sapwellimomwi Kosonned akan!”

10. Dahme kahrehda e kesempwal kitail en peikiong sapwellimen Siohwa kosonned akan ma kitail kin nsenohki ngehno?

¹⁰ Ma kitail pahn nsenohki ngehno, loalokongkihla Mahsen en Koht sohte pahn itar. Nanmwarki Solomon kin inenen wehwehki duwen sapwellimen Siohwa kosonned akan, ahpw ni ahnsou me e mahlahr, e sohte kin kapwaiada kosonned pwukat. (1 Nanmwarki 4:29, 30; 11:1-6) Ma kitail kin kehlail ni pali ngehn, kitail sohte pahn ihte men esehla duwen dahme Pwuhk Sarawi mahsanih, ahpw kitail pil men peikiong sapwellimen Koht kosonned akan sang mongiongatail unsek. Kitail anahne nantihong onop mwahu sapwellimen Siohwa kosonned akan oh nantihong en kapwaiada kosonned pwukat. Sounmelkahkao ahneki soangen madamadau wet. E koulki: “Ia uwen ei poakohng sapwellimomwi kosonned akan! I kin medemedewe sang nimenseng lel nipwong.” (Melkahka 119:97) Ni ahnsou me kitail, ni mehlel, nsenohki duwen kapwaiada sapwellimen Koht kosonned akan, met pahn kamwekid kitail en doadoahngki sapwellimen Koht irair akan nan atail mour. (Episos 5:1, 2) Kitail sohte pahn perenki wia dahme suwed, ahpw kitail pahn kasalehda wahn ngehn akan, oh kitail pahn men kaperenda Siohwa oh mehpwukat pahn sewese kitail en kadohwanewei sang kitail “doadoahk kan en uduk.”​—Kalesia 5:16, 19-23; Melkahka 15:1, 2.

11. Iaduwen ke pahn kawehwe me sapwellimen Siohwa kosonnedo me pid duwen liksang dipen nenek oh kamwahl kin wia mehn perepe ong kitail?

¹¹ Iaduwen kitail kak kekeirada loalatail limpoak oh wauneki sapwellimen Siohwa kosonned akan? Ehu ahl en wia met iei sang ni atail pahn kin tehk duwen kesempwalpen sapwellime kosonned akan. Ni ahnsouwet, se pahn koasoia duwen sapwellimen Koht kosonned me kin mweidong pwopwoud kante en wia nsen en pwopwoud ong pein arail pwoud oh e kin keinapwidi aramas en dehr wia dipen nenek oh kamwahl. (Ipru 13:4) Ma kitail pahn peikiong kosonned wet, kitail pahn katiasang mehkot mwahu? Samatail limpoak me kin ketiket nanleng pahn kakete wiahda kosonned ehu me pahn kihsang rehtail mehkot me kitail pahn kak paiekihda? Uhdahn soh! Menlau tehk dahme aramas akan me sohte kin kapwaiada sapwellimen Siohwa kosonned akan me pid tiahk mwakelekel kin lelohng. Liseian en kiripw kin pali laud en ahnsou imwikihla kauwehla liseian de ekei pak kin mwadang pwopwoudla ni ara saikinte kaunopada oh imwikihla soangen pwopwoud me soan suwed. Me tohto kin anahne apwalihada neirail seri ahpw sohte ahr werek ohl de lih. Oh pil, irail akan me kin wia dipen nenek kakete alehda soumwahu en kaparapar kan. (1 Korint 6:18) Ma emen me wia sapwellimen Siohwa ladu wia dipen nenek, e pahn pwunod laud oh e pahn lelohng kahpwal akan pwehki met. Ma e pahn songen ekihla met mendahki e kin lidere laud eh nsen mwakelekel, e pahn tihwohkihla met oh pahn nsensuwed ahnsou koaros oh sohte kak meir mwahu ni pwong. (Melkahka 32:3, 4; 51:3) E soh sansal ong kitail me sapwellimen Siohwa kosonned me kin pid liksang dipen nenek oh kamwahl wiawihda pwehn pere kitail? Ei, kapai tohto me pahn kohwong kitail ma kitail kin kolokolete tiahk mwakelekel!

Kapakapki Sapwellimen Siohwa Sawas

12, 13. Dahme kahrehda e kesempwal kitail en kapakap ni ahnsou me kasongosong en ineng en wia dihp lelohng kitail?

¹² Nsenohki ngehno kin pil wehwehki me emen anahne wia eh kapakap sang eh mongiong. E konehng en peki sawas sang rehn sapwellimen Koht ngehn sarawi, pwe Sises mahsanih: “Ma kumwail . . . ese kihong noumwail seri kan dahme mwahu ong irail, eri, Samamwail me ketiket nanleng soh pahn ketikihong ngehno irail kan me kin peki reh?” (Luk 11:13) Nan atail kapakap kan, kitail kak kasalehda atail kin likih me Siohwa pahn kadarodo sapwellime ngehn sarawi pwehn sewese kitail en powehdi atail luwet akan. (Rom 8:26, 27) Ma kitail ese me ineng en wia dihp kan de madamadau sapwung kan kin kaluwetala kitail, de ma iengatail limpoak men me kin iang padahk mehlel kin kehsehkin kitail me atail madamadau sapwung kak kaluwetala kitail, eri, e pahn konehng ma kitail pahn peki rehn Koht ni oaritik en ketin sewese kitail en powehdi ineng suwed pwukat de madamadau sapwung pwukat.

¹³ Siohwa kak sewese kitail en medemedewe duwen mehkan me pwung, mwakelekel, min, oh kaselel oh waun. Oh ia uwen konehng kitail en ngidingidki peki sawas pwe “sapwellimen Koht popohl” pahn kak nekinekid mohngiongitail oh pil atail lamalam kan! (Pilipai 4:6-8) Eri, kitail anahne kapakapki sapwellimen Siohwa sawas pwe kitail kak “nantihong audaudkihda pwung, lelepek ong Koht, pwoson, limpoak, kanengamahiong apwal, oh mpai.” (1 Timoty 6:11-14, NW) Ki sawas sang Samatail nanleng, atail pwunod akan oh kasongosong kan sohte pahn lalaudla lao lel kitail sohla pahn kakong. Ahpw, e pahn sansal me Koht kin ketikihong kitail popohl.

Dehr Kansensuwedihada Ngehno

14. Dahme kitail kak ndahki me sapwellimen Koht ngehn sarawi kin wia sawas ehu ong kitail ong dahme mwakelekel?

¹⁴ Sapwellimen Siohwa ladu kan me mah ni pali ngehn kin kapwaiada kaweid en Pohl: “Kumwail dehr kakundi kisiniei en ngehn sarawi rehmwail.” (1 Deselonika 5:19) Pwehki sapwellimen Koht ngehn sarawi iei “ngehn me sarawi,” e kin mwakelekel, min, sarawi. (Rom 1:4, NW) Ni ahnsou me ngehno kin doadoahk rehtail, e kin wia sawas ehu ong kitail ong dahme mwakelekel oh sarawi. E kin sewese kitail en mourki mour mwakelekel me sansalkihda atail kin peikiong Koht. (1 Piter 1:2) Wiewia samin kan kin kasalehda me emen kin soikala ngehno, oh met pahn kak imwikihla suwed. Iaduwen?

15, 16. (a) Iaduwen kitail kin kansensuwediada sapwellimen Koht ngehn? (b) Iaduwen kitail kak liksang kansensuwediada sapwellimen Siohwa ngehn sarawi?

¹⁵ Eri, Pohl ntingihdi met: “Kumwail dehr pil kin kansensuwedihada Ngehn Sarawi; pwe Ngehn Sarawi ih kilel en Koht rehmwail me e ketin sapwellimankin kumwail, kadehdepen Rahn ehu me pahn kohdo me e pahn ketin kamaiauwihkumwailda.” (Episos 4:30) Pwuhk Sarawi kin kasansalehda sapwellimen Siohwa ngehn sarawi nin duwen kilel ehu, de ‘kilel ong dahme pahn wiawihwong’ Kristian me keidi lelepek kan. Oh met iei mour soutuk nanleng. (2 Korint 1:22; 1 Korint 15:50-57; Kaudiahl 2:10) Sapwellimen Koht ngehn kin kak kahre irail me keidi kan oh iengarail kan me ahneki koapworopwor en mour nin sampah oh sewese irail en liksang wiewia suwed akan.

¹⁶ Wahnpoaron Pohl kihda kaweid duwen atail pahn liksang likamw, pirap, tiahk kanamenek kan, oh soangen tiahk suwed pwukat. Ma kitail pahn mweidong kitail en perenkihda wiewia pwukat, met wehwehki me kitail kin uhwong sapwellimen Koht Mahsen en kaweid me kohkihdo menemen en ngehn sarawi. (Episos 4:17-29; 5:1-5) Ni ahl wet, emen kak kansensuwedihada sapwellimen Koht ngehn sarawi, ahpw kitail sohte men wia met. Eri, ma emen rehtail pahn tepida pohnsehsehla kaweid me kohsang sapwellimen Siohwa Mahsen, e pahn kak tepida ahnekihda madamadau kan de irair akan me pahn kak kahrehong ih en pein nsenekihda wiahda dihp oh kahrehda e solahr pahn keniken rehn Koht. (Ipru 6:4-6) Mehnda ma ni ahnsouwet kitail sohte kin wia dihp, ahpw kitail kak kohkohla oh lel nan irair me kitail kakete wiahda dihp. Ma kitail pahn pousehlahte uhwong sawas sang ngehno, kitail pahn kak kansensuwedihada sapwellimen Koht ngehn sarawi. Kitail pil kin uhwong oh kansensuwedihala Siohwa, pwe ih me utupen ngehn sarawi. Nin duwen aramas akan me kin poakohng Koht, kitail sohte men wia met. Ahpw, kitail men kapakapki sapwellimen Siohwa sawas pwehn sewese kitail en dehr kansensuwedihada ngehn sarawi, ahpw en kawauwihala mwar sarawio ni atail kin nantihong nsenohki ngehno.

Nantihong Nsenohki Ngehno

17. Ia ekei mehn akadei kan ni pali ngehn kitail kak wiahda, oh dahme kahrehda elen loalokong kitail en akadeiong met?

¹⁷ Ehu ahl me pahn sewese kitail en nsenohki ngehno iei ma kitail pahn wiahda mehn akadei ngehnin kan oh nantihong kapwaiada. Atail anahn akan oh irair akan kin wekpeseng, eri mwein atail mehn akadei kan pahn kak duwehte mehpwukat: kamwahuwihala atail onop kan, kalaudehla atail ahnsoun kalohk, nantihong en akadeiong pwais tohrohr kan duwehte doadoahk en Regular Pioneer, doadoahk nan Bethel, de doadoahk en misineri. Met pahn sewese kitail en audaudkihda nan atail madamadau kan mehkan me ngehnin oh sewese kitail en dehr lohdi pahn atail luwet akan en war de mehn akadei kan me noahrok en sampah suwed wet kin kalapw wiahda. E pahn wia elen loalokong ma kitail pahn wia soahng pwukat, pwe Sises kangoange kitail ni e mahsanih: “Kumwail dehr kin ngoangki kepwehpwehkihla kepwehn sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie. A kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie. Pwe ahnsou koaros kapehdamwail kin uhlahng wasa me amwail dipwisou kesempwal kan kin mi ie.”​—Madiu 6:19-21.

18. Dahme kahrehda e kesempwal kitail en kaukaule nsenohki ngehno nan imwin rahn akan?

¹⁸ Nsenohki ngehno oh kihsang rehtail ineng suwed en sampah wet kin wia elen erpit nan “imwin rahn akan.” (2 Timoty 3:1-5) Pwe ni mehlel, “sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:15-17) Ma Kristian pwulopwul men kin nantihong en akadeiong doadoahk en kalohk kaukaule, met pahn kakete kahre ih ni ahnsou me e kin lelohng soangen sounpar apwal akan. Ni ahnsou me e pahn lelohng kasongosong, e pahn ahneki madamadau pwung ehu ong dahme e men kapwaiada nan sapwellimen Siohwa doadoahk. Aramas akan me kin kesempwaliki arail pali ngehn pahn kahng kesehla ahr mehn akadei en pali ngehn akan ong mehn akadei kan me pid mwohni kan de mehn kaperen kan. Tamanda me Moses, pwehki e kin wia emen me kin kesempwaliki ah pali ngehn, eri e ‘pilada iang sapwellimen Koht aramas akan lokolok sang perenki dihp ahnsou mwotomwot.’ (Ipru 11:24, 25) Mendahki ma kitail wia aramas pwulopwul de mah, kitail anahne wiahda atail pilipil en nsenohki ngehno oh en dehr nsenohki kapwaiada ineng en uduk.

19. Kapai dah kei kitail pahn paiekihda ma kitail pahn nantihong nsenohki ngehno?

¹⁹ “Aramas me kin nsenohki kapwaiada ineng en uduk me kin wiahla imwintihti en Koht” ahpw “imwilahn nsenohki ngehno iei mour oh popohl.” (Rom 8:6, 7) Ma kitail pahn kaukaule nsenohki ngehno, kitail pahn ahneki popohl. Mongiongatail kan oh atail madamadau kan pahn ale mehn perepe sang atail irairen dihp akan. Kitail pahn kak pelian kasongosong kan en wiahda dihp. Oh pil, kitail pahn ale sawas sang rehn Koht pwehn powehdi mahwen nanpwungen uduk oh ngehn me kin wiwiawi nan loalatail.

20. Dahme kahrehda kitail ese me kitail kak kana nan mahwen wet nanpwungen ineng en uduk oh ngehno?

²⁰ Sang ni atail kin kaukaule nsenohki ngehno, kitail kin kolokolete atail nanpwungmwahu rehn Siohwa, iei utupen mour oh ngehn sarawi. (Melkahka 36:9; 51:11) Sehdan me Tepil oh nah kan kin wia uwen me re kak en kauwehla atail nanpwung mwahu rehn Siohwa Koht. Re kin song en kaunda atail madamadau kan, pwe irail ese me ma kitail pahn lohdi, met pahn kahrehong kitail en wiahla imwintihti en Koht oh mehla. Ahpw, kitail kak kana nan mahwen nanpwungen uduk oh ngehn. Pohl pil kin lelohng met, pwe ni e ntingihdi duwen mahwen me kin wiawi loale, e wia peidek wet: “Ihs me pahn kapitiehla sang nan paliwar wet me kin kahluwalahng ie mehla?” Eri, mwuhr e kasalehda me e kak pitasang: “Kalahngan ong Koht, me kin ketin kapwaiada met rehn atail Kaun Sises Krais!” (Rom 7:21-25) Kitail pil kak kalahnganki Koht sang rehn Krais me e ketikihong kitail sawas en powehdi atail ineng en uduk kan oh kaukaule nsenohki ngehno oh koapworopwor kaselel en mour soutuk.​—Romans 6:23.

Ke Tamanda?

• Ia wehwehn nsenohki ngehno?

• Iaduwen kitail kak mweidong sapwellimen Siohwa ngehn en sewese kitail?

• Kawehwe dahme kahrehda e kesempwal kitail en onop Pwuhk Sarawi, peikiong sapwellimen Siohwa kosonnedo, oh kapakap ong Koht ni atail kin peiong atail ineng en wia dihp.

• Iaduwen atail kin wiahda mehn akadei kan en pali ngehn pahn kak sewese kitail en mih nan elen mour?

[Kilel nan pali 14]

Onop Pwuhk Sarawi kin sewese kitail en kehlail edetehn kitail kin lelohng kasongosong kan

[Kilel nan pali 15]

E konehng en kapakapki sapwellimen Siohwa sawas en sewese kitail powehdi ineng en wia dihp

[Kilel nan pali 16]

Atail mehn akadei kan en pali ngehn pahn kak sewese kitail en nsenohki ngehno