Uhdahn Ihs Sises Krais?

“Ni Sises eh ketilong nan Serusalem, tohn kahnimwo pwon mwoarongada oh idihdek, ‘Ihs ohl menet?’ A pokono ahpw kin sapengkin irail, ‘Soukohp Siseso met, mehn Nasaret wehin Kalili.’”—MADIU 21:10, 11.

DAHME kahrehda rahn me Sises Kraisa ketilong nan Serusalem nan pahr 33 kahrehda mwoarong laud? Me tohto nan kahnimwo kin rong duwen Sises oh soahng kapwuriamwei kan me e ketin wiahdahr. Irail kin ndindaiong meteikan duwen ih. (Sohn 12:17-19) Ahpw pokono sehse me ohl menet pahn kamwakid mouren aramas tohto nin sampah pwon leledo atail ahnsou!

Tehk ekei karasepe kan duwen Sises eh kin kamwakid laud poadopoad en aramas akan.

▪ Kalendar me wasa tohto nin sampah kin doadoahngki kin poahsoankihda pahr me aramas kin medewe me Sises ketin ipwidi.

▪ Kereniong aramas rielik (2,000,000,000) nan sampah kin nda me irail Kristian.

▪ Palien lamalam en Islam, me towe kan tohtohsang aramas lik, kin padahngki me Sises wia “soukohp men me lapalapasang Eipraam, Noha oh Moses.”

▪ Sapwellimen Sises mahsen tohto kin wia kisehn en aramas koasoi en ehuehu rahn. Iet ekei sapwellime mahsen kan:

Mweidohng en pil pohr apali mesomwen.—MADIU 5:39.

Omw Ei en Ei oh omw Soh en Soh.—MADIU 5:37.

“Sohte aramas emen kak liduwih soumas riemen.”—MADIU 6:24.

“Kumwail letelet, e ahpw pahn ritidahng kumwail.”—MADIU 7:7.

“Kumwail wiahiong meteikan me kumwail kin anahne aramas akan en kin wiahiong kumwail.”—MADIU 7:12.

“Kihwei kaperen sang ale.”—WIEWIA 20:35.

E sansal me Sises ketin kamwakid laud mouren aramas tohto. Ahpw aramas kin ahneki soangen madamadau oh padahk tohto duwen ih. Kahrehda mwein ke pahn medewe, ‘Uhdahn Ihs Sises Krais?’ Paipel kelehpw kin padahkihong kitail ia wasa Sises ketisang ie, ia mwomwen sapwellime mour, oh dahme kahrehda e ketin pwoukihla. Omw pahn esehla dahme mehlel duwen ih kak kamwakid laud omw mour met oh pil ni ahnsou kohkohdo.

[Nting tikitik me mi pah]