Ihs me Pahn Padahkihong Seri kan Duwen Koht?

“Sohte tohnpadahk men kin lapalapasang eh sounpadahk; ahpw tohnpadahk koaros, ni ar pahn deila mehlel, re pahn kin duwehla ar sounpadahk kan.”—LUK 6:40.

EKEI pahpa nohno kin pehm me re sohte warohng padahkihong neirail seri kan duwen Koht. Mwein re kin medewe me sohte itar arail sukuhl de sohte itar arail ese Pwuhk Sarawi pwehn wia sounpadahk mwahu men. Pwehki met, irail kin medewe me kisehrail kan de kaunen pelien lamalam kan me pahn wia pwukoa kesempwal wet.

Ahpw ihs me keieu konehng en padahkihong seri kan duwen Koht oh tiahk mwahu kan? Kilang dahme Paipel mahsanih duwen ire wet oh karasahiong dahme irail soun roporop kan diarada.

Ia Pwukoahn Pahpa Men?

Dahme Paipel kin padahngki: “Kumwail sahm . . . kan, kumwail dehr kamwakara mwahl noumwail seri kan. A kumwail kaiahneirailda nan padahk en [Kristian] oh dahme re uhdahn pahn wia nin duwen [Kristian].”—Episos 6:4.

Dahme irail soun roporop kan diarada: Ia duwen pahpa kan ar kin paiekihda ma irail kin kakairada dahme irail kamehlele duwen Koht? Ehu kisin pwuhk me wiawihda nan pahr 2009 koasoia: “En iang ehu pelien lamalam kak sewese ohl akan en wiahla pahpa mwahu kei. Pelien lamalam kin kamwahwihala en emen eh kin miniminiong meteikan, eh tiahk, oh kin kihda padahk oh kaweid kan ong eh mour.”—Fathers’ Religious Involvement and Early Childhood Behavior.

Paipel kin kasalehda laud kesempwalpen pwukoahn pahpa men ong duwen kakairada oh kaiahne seri kan. (Lepin Padahk 4:1; Kolose 3:21; Ipru 12:9) Ahpw ia duwen, kaweid wet kin doadoahk nan ahnsou pwukat? Nan pahr 2009, ehu wasahn sukuhl laud en Florida wiahda kisin pwuhk ehu me koasoia duwen wiewia en pahpa kan eh kin kamwakid neirail seri kan. Soun roporop pwukat diarada me seri me arail pahpa kan kin iang apwalihirailada kin ese poakehla aramas akan oh pil kin pehm me mie kateparail. Pwutak kan sohte kin nohn ketihwo oh serepein kan kin koahiek en madamadau. Ei, kaweid en Paipel kin wie doadoahkte nan ahnsou pwukat.

Ia Uwen Kesempwal en Pwukoahn Nohno Men?

Dahme Paipel kin padahngki: “Rong kanahieng padahk en omw nohno.”—Lepin Padahk 1:8.

Dahme irail soun roporop kan diarada: Nan pahr 2006, pwuhk ehu me adaneki Handbook of Child Psychology koasoia me nohno kan kin kihong arail ahnsou laudsang pahpa kan pwe ren koasoiong oh kin mihmi rehn emenemen neirail seri kan. Met pil kin wiawi nan wasa tohto. En nohno men eh koasoi, wiewia, oh madamadau kin kamwakid laud kekeiradahn serio pwehki uwen ahnsou me irail kin kihong serio.

Pahpa oh nohno me kin padahkihong neirail seri kan duwen dahme mehlel duwen Koht kin kihong irail kisakis kesempwal riau. Keieu, seri kan kin ahneki ahnsou mwahu en kompoakepahnkihla Samarail nanleng oh re kak paiekihda nanpwungmwahu wet erein arail mour. Keriau, seri kan kin sukuhlki sang dahme re kilang me pid ia duwen ohl pwopwoud men oh lih pwopwoud men ara pahn sawaspene pwe ira en lel ara mehn akadei kesempwal kan. (Kolose 3:18-20) Mehnda ma meteikan pil kak sewese pahpa oh nohno kan, ahpw pahpa oh nohno kan me pwukoahki padahkihong neirail seri kan duwen Koht oh ia kupwure ong kekeirdahn peneinei.

Ahpw ia duwen pahpa oh nohno kan ar kak padahki neirail seri kan? Mehnia wiepe kan me keieu mwahu?