Eipraam​—Ohl Eimah Men

Eipraam kilang eh peneinei oh nah ladu kan ni arail kaukaunop en kohla Kenan. (Senesis 12:1-5) Ni eh kilikilang lapalahn pwihn wet me e anahne apwalih, Eipraam pehmada eh pwukoahki irail. Ia duwen eh pahn apwalih arail anahn akan ni arail mihmi nan sahpw ehu me re sehse? E sou pahn mengei en apwalih irail nan Ur, wasa me paiamwahu, mie mwaht laud, pwelmwahu oh diren pihl? Ia duwen ma e pahn soumwahuda de mehla nan sahpw me re pahn keseula ie? Ihs me pahn apwalih eh peneinei? Ma Eipraam ahneki soangen pwunod pwukat, e sohte mweidohng met en kauhdi ih. E koasoanehdi teng en peikiong dahme Koht ketin padahkihong ih en wia sohte lipilipil dahme pahn wiawi. Met wia kasalepen eimah ni mehlel.

DAHKOT EIMAH? Emen me kin eimah kin kehlail oh kommwad, sohte kin namenek de masepwehk. Atail kin eimah sohte wehwehki me kitail sohte douluhl masak. Emen me ahneki eimah me kohsang rehn Koht kin wia dahme e anahne wia mendahki eh masepwehk.

IA DUWEN EIPRAAM EH KASALEHDA EIMAH? Eipraam sohte masak en weksang meteikan. Eipraam tikida wasa ehu me aramas tohto kin kaudokiong soangsoangen koht akan oh sansal kan. Ahpw e sohte masak dahme meteikan pahn medewe oh uhdihsang eh wia dahme e ese me pwung. Ni eimah e pilada en weksang meteikan oh kaudokiongete Koht metehmen, “Koht Wasa Lapalahpie” iei Siohwa.​—Senesis 14:21, 22.

Eipraam mwohneki eh kaudokiong Koht mehlelo laud sang kepwe kan. E perenki tounmeteikihla eh mour nsenamwahu nan Ur oh kohkohla nan sapwtehn ehu. E uhdahn kamehlele me Siohwa pahn ketin apwalih eh anahn akan. Mwein erein sounpar kei, Eipraam kin medewe duwen ekei soahng kansenamwahu kan me e ahneki nan Ur. Ahpw e kin kamehlele me Siohwa pahn ketin ahnsou koaros apwalih ih oh eh peneinei. Pwehki Eipraam kin tengediong Siohwa nin duwen emen me keieu kesempwal nan eh mour, e kak ahneki eimah pwehn peikiong sapwellimen Koht mahsen kan.

IA MEHN KASUKUHL KAN ONG KITAIL? Kitail kak kahlemengih Eipraam sang ni atail kin kakairada eimah pwehn peikiong Siohwa mehnda ma meteikan sohte kin wia met. Karasepe, Paipel kin padahngki me irail kan me kin tengediong dahme re kamehlele duwen Siohwa kin lelohng uhwong kan, mwein sang kompoakparail kan me kin nsenohkin irail de kisehrail kan. (Sohn 15:20) Ahpw ni atail kin kamehlele dahme kitail kin sukuhlki duwen Siohwa, kitail pahn kawehwehda met ni wahu.​—1 Piter 3:15, 16.

Kitail pil kak kamehlele sapwellimen Koht inou me e pahn ketikihong irail kan me kin pwoson ih. Met kin kihong kitail eimah pwe kitail en mwohneki soahng kan me pid kaudok nan atail mour a kaidehn kepwe kan. (Madiu 6:33) Tehk ia duwen ehu peneinei arail wia met.

Mendahki mie neira pwutak pwulopwul riemen, Doug oh Becky men keseula nan sahpw ehu me mie anahn laud en sounkalohki rongamwahu en Paipel kan. Mwurin ara wia roporop mwahu oh kapakap ngidingid, ira koasoanehdi en kapwaiada ara koasoandio. Doug nda: “Se anahne eimah en kaunopada seri ko oh mwesel mendahki se sehse dahme pahn wiawihong kiht. Ahpw ni at koasoiapene pilipil wet, se kin medewe duwen mehn kahlemeng en Eipraam oh Sara. At kin medemedewe ia duwen ara kin likih Siohwa oh Siohwa eh kin ketin sewese ira ahnsou koaros kin uhdahn sewese kiht.”

Me pid duwen arail mour nan ehu sahpw tohrohr, Doug nda: “Se kin ale kapai kan ni ahl kaselel.” E kawehwehda: “Pwehki at mour solahr kedirepwki soahng kan me sohte kesempwal, se kak doadoahngki pali laud en at ahnsou ong ehupene en at peneinei ehuehu rahn, me duwehte kalohk, koasoakoasoipene oh mwadongehng nait pwutak ko. E apwal en kawehwehda soangen pepehm en saledek oh nsenamwahu me se ahneki.”

Mehlel kaidehn koaros kak wiahda soangen wekidekla laud kan. Ahpw kitail koaros kak alasang mehn kahlemeng en Eipraam sang ni atail kin mwohneki atail kaudok ong Koht oh likih me e pahn ketin sewese kitail. Ni atail kin wia met, kitail kin kapwaiada kaweid en Paipel en “eimah oh patohwan, ‘Kaun-o, iei sawasepei, I sohte pahn masak! Dahme aramas kak wiahiong ie?’”​—Ipru 13:5, 6.

[Koakon/Kilel nan pali 7]

Lih Pwopwoud Kesempwal Men me Kin Kaperenda Koht

Sara pwoudiki ohl men me ahneki pwoson laud. Ahpw lih pwoson menet pil wia mehn kahlemeng me inenen mwahu. Ni mehlel pak siluh Paipel kasalehda edeo nin duwen mehn kahlemeng mwahu me lih pwoson kan en alasang. (Aiseia 51:1, 2; Ipru 11:11; 1 Piter 3:3-6) Mendahki iren Paipel kan sohte nohn kasalehda duwen lih mwahu menet, kitail kak kilang me e ahneki irair kaselel kan.

Karasepe, medewehla ia duwen Sara eh mwekidki Eipraam eh padahkihong ih me Koht mahsanihong ira en kohkohsang Ur. Ia duwe, Sara medemedewe ia wasa ira pahn kohla ie oh dahme kahrehda? E kin pwunodki ara anahn en kepwe kan? E nsensuwedkihla eh pahn kohkohsang kompoakepah kan oh eh peneinei oh eh sehse iahd de ma e pahn kak pwurehng tuhwong irail? E sansal me e medemedewe soahng pwukat. Ahpw e perenki kohkohsang Ur oh likih me Siohwa pahn ketin kapaiada ih pwehki eh kin peik.​—Wiewia 7:2, 3.

Patehng eh wia sapwellimen Koht ladu peik men, Sara pil wia lih pwopwoud mwahu men. E sohte kin siaiong eh pwoud pwehn ahneki manaman nan eh peneinei. Sara kin kakairada eh wauneki mehlel eh pwoud oh ni limpoak utung eh pwoudo ni eh kin kaweid ara peneinei. Ni ahl wet Sara kin kasalehda eh irair kaselel kan oh e kin kalinganahla pein ih.​—1 Piter 3:1-6.

Ia duwe, irair pwukat kak wia kamwahu ong lih pwopwoud kan rahnwet? Lih emen me adaneki Jill me pwopwoudkier daulih sounpar 30 oh kin nsenamwahu koasoia: “Mehn kahlemeng en Sara kin padahkihong ie me I anahne koasoi oh kasalehda ei madamadau ni saledek ong ei pwoud.” E doula koasoia: “Ahpw ni ahnsowohte, nin duwen tapwin peneinei, ei pwoud me pwukoahki wiahda pilipil kan. Ma e wiadahr ehu pilipil, ei pwukoa iei en wia uwen ei kak pwe pilipilo en pweida.”

Mwein mehn kasukuhl en Sara me keieu kamwakid kitail iei: Mendahki e wia lih masamwahu men, Sara sohte kin mweidohng met en kahrehiong eh pohnmwahso. (Senesis 12:10-13) Ahpw e kin utung Eipraam ni aktikitik nan ahnsou mwahu oh apwal kan nan ara mour. Kitail kak kamehlele me Eipraam oh Sara wia pwopwoud lelepek, aktikitik oh limpoak ehu me uhdahn kin wia kapai ong emenemen.