Eipraam​—Ohl Aktikitik Men

Eipraam mwomwohd nan imwe ihmw likowo, nsensenamwahuki mwetehn imweo eh perehsang ih karakar en rahno. Ni eh kilangla wasa doh, Eipraam kilangada ohl silimen kohkohdo wasao.a E mwadangete tangala tuhwong irail, oh peki rehrail ren kohla kommoaldi reh. E ahpw kaunopada diren mwenge me iangahki pilawa me ahpwtehn umwda, pwete, milik, oh uduk me mwahu. Ni eh kihong kanarail mwenge, Eipraam sohte kasamwohte irail ahpw e pil kasalehda irair ieu me kitail pahn koasoiapene me iei aktikitik mehlel.​—Senesis 18:1-8.

DAHKOT AKTIKITIK? Aktikitik pelien pohnmwahso oh aklapalap. Emen me kin aktikitik kin pohnese me aramas koaros mwahusang ih ni soangsoangen ahl akan. (Pilipai 2:3) E kin rong kaweid en meteikan, oh e kin perenki wia doadoahk kan me aramas sohte kin perenki wia pwehn wia kamwahu ong irail.

IA DUWEN EIPRAAM EH KASALEHDA AKTIKITIK? Eipraam kin perenki papah meteikan. Nin duwen atail koasoiapenehr, ni Eipraam eh kilangada ohl silimeno, e mwadangete kaunopada dahme re anahne. Eh pwoud Sara pil mwadangete kaunopada mwenge kan. Ahpw tehk ihs me pil wiewia pali laud en doadoahko: Eipraam me tangala oh tuhwong irail, ih me kisekisehkin irail kisin mwenge, ih me tangala oh pilada mahn me re pahn kang, oh ih me koasoanehdi mwenge ko mwohrail. E sohte ndaiong nah ladu ko en wia doadoahk koaros, a ohl aktikitik menet me pein wia soahng koaros me anahn, soangen doadoahk me me tohto sohte perenki wia. E sohte medewe me e nohn lapalap en wia soangen doadoahko.

Eipraam kin rong kaweid en irail ko me mi pahn eh manaman. Ekeite pak me Paipel kasalehda Eipraam oh Sara ara kin koasoakoasoipene. Ahpw, pak riau kitail diar me Eipraam rong ahn Sara madamadau oh kapwaiada. (Senesis 16:2; 21:8-14) Ehu ahnsou ko, dahme Sara ndao “kapwunodehda kowahlap Eipraam.” Ahpw ni Siohwa eh ketin mahseniong Eipraam, e tehkada me ahn Sara madamadauo pwung, oh ni aktikitik rong oh kapwaiada dahme liho ndao.

IA MEHN KASUKUHL KAN ONG KITAIL? Ma kitail kin uhdahn aktikitik, kitail pahn perenki papah meteikan. Kitail pahn diar peren ni atail kin wia uwen atail kak en kahrehiong arail mour en nsenamwahu.

Ele kitail pil kin kasalehda aktikitik sang ni mwomwen atail rong ahn meteikan ar madamadau. Kitail sohte kin soikala madamadau ehu pwehki kaidehn atail madamadau mwo, ahpw ele ni erpit kitail pahn perenki ale kaweid sang meteikan. (Lepin Padahk 15:22) Soangen madamadau wet kin keieu mwahu ong irail akan me ahneki manaman pohn meteikan. Sounapwalih koahiek men me adaneki John nda: “I diarada me sounapwalih mwahu men kin kahrehiong aramas akan en kak kasalehda arail madamadau oh pepehm ni saledek.” E doula koasoia: “Aktikitik kin anahn pwehn pohnese me emen me mi pahn omw manaman kak kihda kaweid me kak mwahusang ahmw. Ahpw sohte emen, pil iangahki sounapwalih men kak kelehpw ahneki madamadau pwung.”

Ni atail kin alasang Eipraam oh rong kaweid en meteikan oh pil wia soangen doadoahk me aramas sohte kin perenki wia pwehn wia kamwahu ong irail, kitail pahn alehdi sapwellimen Siohwa kupwuramwahu. Pwe “Koht kin ketin pelianda me aklapalap akan, a e ketikihong sapwellime kalahngan me karakarahk kan.”​—1 Piter 5:5.

[Nting tikitik me mi pah]