Eipraam​—Ohl Limpoak Men

Eipraam sohla kakohng eh pahtou. Eh pwoud kompoake, Sara melahr. E tamanda soahng tohto duwen Sara ni ahnsou me e sarepedi. Ni ahnsou me eh nsensuwedo laudla, pilen mese keredi. (Senesis 23:1, 2) Eh sengiseng sohte kanamenekihala, pwehki e wia kasalepen ehu eh irair kaselel me iei limpoak.

DAHKOT LIMPOAK? Limpoak iei pepehm en karanih emen de ahneki pepehm loal ong ih. Aramas limpoak men kin kasalehda eh pepehm kan ong irail kan me e poakohng ni eh mwekid kan mehnda ma e anahne wiahda tounmetei kan.

IA DUWEN EIPRAAM EH KASALEHDA LIMPOAK? Eipraam kasalehda me e poakohng eh peneinei. Eipraam uhdahn ohl kedirepw men. Ahpw, e sohte kin soukautihong apwalih anahn en eh peneinei arail pepehm oh nanpwungmwahu rehn Siohwa. Ni mehlel, pein Siohwa ketin mwahngih me Eipraam kin tiengla mwowe nan arail kaudok nin duwen tapwin peneinei. (Senesis 18:19) Patehng met, Siohwa ketin mahsanih duwen ahn Eipraam limpoak. Ni eh ketin mahseniong Eipraam, e mahsanihki Aisek nin duwen “noumw pwutak iehrosen, me ke kin kesempwalki.”​—Senesis 22:2.

Kitail pil kak pehm ahn Eipraam limpoak ni ahl me eh mwekidki mehlahn eh pwoud kompoake Sara. Eipraam mwahieiki Sara. Mendahki ih ohl kehlail men, e sohte masak en kasalehda eh pahtou. Eipraam kasalehda irair kaselel en kehlail oh limpoak ni ahnsoutehkis.

Eipraam kasalehda me e poakohng eh Koht. E kin kasalehda limpoak wet nan erein eh mour. Ia duwe? Kitail kak tamanda dahme Paipel mahsanih nan 1 Sohn 5:3: “Pwe iet duwen wehwehn poakohng Koht: kitail en peikiong sapwellime kosonned akan.” Eipraam kasalehda mehn kahlemeng kehlail ehu duwen limpoak ong Koht, me duwehte wehwehn iren Paipel wet.

Ahnsou koaros me Siohwa kin ketin mahseniong Eipraam en wia mehkot, e kin mwadangete kapwaiada. (Senesis 12:4; 17:22, 23; 21:12-14; 22:1-3) Sohte katepe ma e mengei de apwal, de ma Eipraam sehse ia kahrepen Siohwa kupwurki en peikiong. Ong Eipraam mepwukat sohte katepe. Ma Koht ketin kupwurki en wia mehkot, e kin perenki kapwaiada. Eipraam kin kilangwohng sapwellimen Koht kaweid kan nin duwen ahnsou mwahu en kasalehda eh limpoak ong Siohwa.

IA MEHN KASUKUHL KAN ONG KITAIL? Kitail kak alasang Eipraam sang ni atail kasalehda limpoak ong meteikan, ahpw mehlel tohn atail peneinei. Kitail sohte pahn men mweidohng atail pwunod kan en kihsang atail ahnsou ong irail akan me kitail poakohng.

E pil mwahu kitail en kakairada limpoak mehlel ong Siohwa. Soangen limpoak wet kin kamwakid kitail laud nan atail mour. Karasepe, e kak kamwakid kitail en wiahda wekidekla kan ni atail pepehm oh madamadau kan, atail lokaia, oh atail mwekid kan pwe kitail en kaperenda Koht.​—1 Piter 1:14-16.

Ni mehlel, peikiong sapwellimen Siohwa kaweid kan sohte mengei. Ahpw kitail kak kamehlele me Meno me sewese Eipraam, me ketin ekerki “kompoakepahi Eipraam,” pahn ahnsou koaros sewese kitail. (Aiseia 41:8) Sapwellime Mahsen, Paipel, inoukihda: “E pahn ketin . . . kakehlaikumwailda, oh poahsoaneikumwailda.” (1 Piter 5:10) Ia uwen kaperen en inou wet sang Kompoakepahn Eipraam likilik menet!

[Koakon nan pali 10]

Kasalepen Luwet Ma Ohl Emen Sengiseng?

Me tohto pahn nda ei. Ele re pahn pwuriamweikihla ar esehda me Paipel mahsanih me Eipraam iei emen ohl kan me kehlail oh lelepek me kin sengiseng ni ahnsou kansensuwed. Meteikan iangahki Sosep, Depit, wahnpoaron Piter, elder ko nan mwomwohdisohn Episos, oh pil Sises. (Senesis 50:1; 2 Samuel 18:33; Luk 22:61, 62; Sohn 11:35; Wiewia 20:36-38) E sansal me Paipel sohte padahngki me kasalepen luwet ma ohl emen sengiseng.