Perenki Atail Koapworopwor

“[Mie] koapworopwor en mour soutuk. Koht, me sohte kin ketin likamw, ketin inoukihongkitailehr mour wet mwohn tepin kawa.”​—TAITUS 1:2.

KE KAK SAPENG?

Dahme kahrehda kitail ese me mie peren laud nanleng ni emen me keidi eh kin kolokol eh lelepek lao e mehla?

Ia duwen koapworopwor en sihpw teikan eh kin dokedoke koapworopwor en me keidi kan?

Ma kitail men atail koapworopwor en pweida, ia duwen atail kak mourki mour me kin “mwakelekel oh kasarawihong Koht”?

1. Ia duwen koapworopwor me Siohwa ketikihong kitail eh kak sewese kitail en dadaur?

WAHNPOARON Pohl koasoia me Siohwa me kin ketikihda koapworopwor. Pohl pil nda me Siohwa kak ketikihong kitail peren oh popohl pwe atail koapworopwor en kak kehlailkihda sapwellimen Koht manaman. (Rom 15:13) Ma kitail kin kolokol koapworopwor wet nan atail madamadau, kitail pahn kak dadaurete nan irair apwal akan oh kolokol atail peren oh popohl. Irair apwal akan rasehng melimel. Nan soangen ahnsou pwukat nan atail mour, atail koapworopwor “rasehng peipwung ehu nan kapehditail kan, me teng,” mehnda ma kitail me keidi kan de sihpw teikan. (Ipru 6:18, 19) Sang ni atail pahn kolokol atail koapworopwor, kitail sohte pahn “katihasang.” Atail koapworopwor pahn sewese kitail en kolokol atail pwoson kehlail oh kitail sohte pahn ahneki peikasal.​—Wadek Ipru 2:1; 6:11.

2. Koapworopwor riau dah me Kristian akan rahnwet ahneki? Dahme kahrehda “sihpw teikan” men ese duwen koapworopwor en me keidi kan?

² Kristian akan me momour ni imwin rahnpwukat ahneki koapworopwor riau. Irail “pwihn tikitik” me mi nin sampah ahneki koapworopwor en ahneki mour me sohte kak mehla nanleng. Irail pahn wia nanmwarki oh samworo kei rehn Krais nan sapwellime Wehio. (Luk 12:32, NW; Kaud. 5:9, 10) A “sihpw teikan” me inenen tohtohie ahneki koapworopwor en mour nan paradais nin sampah me Wehin Mesaia pahn kaunda. (Kaud. 7:9, 10; Sohn 10:16, NW) Sihpw teikan sohte pahn manokehla me re anahne utung rien Krais me keidi kan me mihmihte nin sampah pwe ren komourla. (Mad. 25:34-40) Me keidi kan pahn ale ketingparail, oh sihpw teikan pil uhdahn pahn ale ketingparail. (Wadek Ipru 11:39, 40.) Eri keieu, kitail pahn kalaudehla atail wehwehki koapworopwor me Koht ketikihong me keidi kan.

KOAPWOROPWOR EN ME KEIDI KAN

3, 4. Ia duwen Siohwa eh ketikihong me keidi kan “mour kapw” me kahrehiong irail en ahneki koapworopwor? Koapworopwor dahieu met?

³ Wahnpoaron Piter ntingihedi kisinlikou riau ong Kristian me keidi kan. E kahdaneki me keidi kan “aramas pilipil kan.” (1 Pit. 1:1) Nein Piter kisinlikou ko kin sewese kitail en kalaudehla atail wehwehki koapworopwor kaselel me pwihn tikitik ahneki. Nan keieun kisinlikowo, e ntingihedi: “Kitail kapingkalahngan ong Koht, Semen atail Kaun Sises Krais, pwehki sapwellime kalahngan lapalap en mour kapw me e ketikihong kitail ni eh ketin kaiasada Sises Krais sang me melahr akan. Met kadirehkinkitaillahr koapworopwor laud ehu, iei me kitail kasikasingkiher me kitail pahn iang paieki kapai laud me Koht ketin nekinekidohng sapwellime kan. Ei, e ketin nekinekidohng kumwail kapai pwukat nanleng, wasa me re sohte kak ohla, de mwerpeseng, de sohrala ie. Kapai pwukat uhdahn amwail, kumwail kan me aleier silasil mwahu pahn manaman en Koht pwehki amwail pwoson, nindokon amwail awiawih komourpamwail me nektehn sansalda ni imwilahn ahnsou. Eri, kumwail perenda.”​—1 Pit. 1:3-6.

⁴ Siohwa ketikihong “mour kapw” Kristian malaulaute me e ketin pilada en iang Krais kaun nanleng. Siohwa ketin doadoahngki sapwellime manaman pwehn pwekirailda nin duwen sapwellime kan oh ketin idihirailda nin duwen nanmwarki oh samworo kei me pahn iang Krais nanleng ahnsou kohkohdo. (Kaud. 20:6) “Mour kapw” wet kahrehiong irail en ahneki koapworopwor. Koapworopwor dahieu met? Piter koasoia me iei soangen mour soutuk me sohte me kak kauwehla oh kin nekinek ong irail nanleng. Koapworopwor kaselel wet kihong me keidi kan kahrepe mwahu en perenda. Ahpw arail koapworopwor kak pweida ihte ma re kin kolokol arail lelepek.

5, 6. Dahme kahrehda Kristian me keidi kan en kolokol arail lelepek?

⁵ Nan nah keriaun kisinlikowo, Piter padahkihong Kristian me keidi kan en wia uwen arail kak koaros pwe ren kolokol arail lelepek, eri re pahn kak ale ketingparail nanleng. (2 Pit. 1:10) Re anahne kasalehda ahnsou koaros soangen irair kan me duwehte pwoson, poadidiong Koht, nsenoh oh kadek ong riarail Kristian kan, oh limpoak. Piter nda: “Ma wiewia mwahu pwukat pahn wiahla amwail oh kekeirda nanpwungamwail, kumwail pahn loalokongkihla . . . pwe loalokong wet pahn kahrehda amwail mour eh pahn wah mwahu oh pweida.”​—Wadek 2 Piter 1:5-8.

⁶ Krais mahsanihong elder me keidi kan nan mwomwohdisohn Piladelpia nan Eisia: “Pwehki omw kapwaiadahr ei padahk en kanengamah ni ahnsou apwal, I pahn pil silehsang uhk apwal en songosong kan me pahn lelohng sampah pwon pwe en song tohn sampah kan koaros. I pahn pwarowei mwadang. Nekinekid mwahu dahme ke kolokol met pwe emen dehr adihasang uhk ketingpen omw powehdi.” (Kaud. 3:10, 11) “Mwar lingan ehu” inoudahr ong aramas pilipilda kei me pahn kolokol arail lelepek lao re mehla. Ma Kristian me keidi men sohla lelepek, e sohte kak alehdi mwar lingan wet.​—1 Pit. 5:4; Kaud. 2:10.

ELEN PEDOLONG NAN WEHIO

7. Koapworopwor kaselel dahieu me Sud koasoia nan nah kisinlikowo?

⁷ Mpen pahr 65, rien Sises Sud ntingihedi kisinlikou ehu ong Kristian me keidi kan. E koasoia me irail “me Koht ketin malipeier.” (Sud 1; pil kilang Ipru 3:1.) Nin tapio, e men ntingkihlahng irail duwen koapworopwor en komourala me Kristian me keidi koaros ahneki. (Sud 3) Ahpw, e anahne ntingkihlahng irail duwen ire kei me karuwaru. Eri e uhd kaimwisekihla nah kisinlikowo ni eh koasoia duwen koapworopwor kaselel ong Kristian me keidi kan. E ntingihedi: “Ong ih me manaman en kasilehsang kumwail nan dihp, oh ketikinkumwailla ni min oh mwakelekel oh diren peren mwohn silangi lingaling​—ong ihete Koht, atail Sounkomour, pwehki Sises Krais atail Kaun, kaping, oh wahu, roson oh manaman, en kohieng sang mwohn tepin kawa lel met, oh pil erein dih koaros kohkohlahte!”​—Sud 24, 25.

8. Dahme kahrehda kitail ese me mie diren peren nanleng ni emen me keidi eh kin kolokol eh lelepek lao e mehla?

⁸ Uhdahn emenemen Kristian me keidi lelepek kan men Koht en ketin kasilehsang irail “nan dihp,” de sang mehkot me kak kahrehiong en sohla lelepek oh imwikihla kasohrala. Koapworopwor en me keidi kan iei me Sises Krais pahn ketin kaiasirailda ong ni ngehn unsek kan. Met pahn mweidohng irail en kak mi mwohn silangin Koht. Ni emen me keidi eh kin lelepek lao e mehla, ni soh peikasal e pahn iasada “wiahla paliwar ehu me kisehn ngehn” oh “solahr kak mehla de mwerpeseng” oh “lingaling.” (1 Kor. 15:42-44) Ma “nanleng pahn perenkihda koluhla oh wiliakapwalahn me dipan emen,” medewehla uwen peren me kin wiawi nanleng ni emen rien Krais ko eh kin kolokol eh lelepek lao e mehla. (Luk 15:7) Siohwa oh tohnleng lelepek kan iang me keidio me alehdier ketingpe peren laud.​—Wadek 1 Sohn 3:2.

9. Ia wehwehn Kristian me keidi lelepek kan arail kak “ahnekihla pwung unsek” en pedolong nan Wehio? Ia duwen koapworopwor wet eh kin kamwakid me keidi kan me mihmihte sampah?

⁹ Duwehte Sud, Piter ntinglahng Kristian me keidi kan duwen ketingparail me re pahn alehdi ma re kolokol arail lelepek. E padahkihong irail: “Ih duwen met amwail pahn ahnekihla pwung unsek en pedolong nan wehi soutuk en atail Kaun oh Sounkomour Sises Krais.” (2 Pit. 1:10, 11) Ni Piter eh nda me irail pahn “ahnekihla pwung unsek” en pedolong nan Wehio, e kakete koasoakoasoia ire mehlel me re pahn pedolong nanleng ni lingaling. Mwein e pil koasoakoasoia kapai tohto me re pahn alehdi nanleng. Me keidi kan pahn ahneki peren laud oh kalahngan ni arail medemedewe arail lelepek me re kin kasalehda. Koapworopwor wet kin kakehlaka Kristian me keidi kan en kolokol arail lelepek ni arail mihmihte sampah.​—1 Pit. 1:13.

“KOAPWOROPWOR” ONG SIHPW TEIKAN

10, 11. (a) Koapworopwor dahieu me sihpw teikan ahneki? (b) Ia duwen koapworopwor en mour nin sampah eh kin dokedoke Krais oh Koht eh “pahn ketin kasalehda irail kan me sapwellime”?

¹⁰ Wahnpoaron Pohl ntingkihlahng sapwellimen Koht me keidi kan duwen arail koapworopwor kaselel en “iang Krais paieki dahme Koht ketin nekinekidohng” irail. Mwurin mwo e koasoia duwen koapworopwor kaselel me Siohwa ketikihong sihpw teikan me inenen tohtohie: “Audepen lahng oh sampah koaros kin kasikasik ahnsou me Koht pahn ketin kasalehda irail kan me sapwellime. Pwe wiepen lahng oh sampah pwupwsangehr koasoandihpe, kaidehk sang ni pein nsenarail, ahpw pwehki kupwur en Koht. Ahpw mie koapworopwor wet: ehu rahn audepen lahng oh sampah uhdahn pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan.”​—Rom 8:14-21.

¹¹ Siohwa ketikihong aramas akan poahsoanpen “koapworopwor” ni eh ketin inoukihda en kasaledekirail sang Sehdan me Tepil sang ni eh ketin doadoahngki kadaudoko me inoupe mie. (Kaud. 12:9; Sen. 3:15) Kadaudoko kin keieu pidada Sises Krais. (Kal. 3:16) Sapwellimen Sises pwoula oh iasada kahrehiong aramas en kak ahneki koapworopwor en saledek sang dihp oh mehla. Koapworopwor wet kin dokedoke Koht eh “pahn ketin kasalehda irail kan me sapwellime,” iei me keidi kan. Irail pwukat pil kisehn kadaudoko. Irail me keidi kan nanleng pahn kasansalda, de sansalda nin duwen nanmwarki kei rehn Krais ni arail pahn sewese Krais en ketin kasohrehla ahn Sehdan koasoandi suwed wet. (Kaud. 2:26, 27) Met pahn imwikihla komourala ong sihpw teikan me pitsang kahn kamakam kowahlap.​—Kaud. 7:9, 10, 14.

12. Kapai kaselel dah kan me kasansaladahn me keidi kan wiahiong tohnsampah?

¹² Pahr kid en sapwellimen Krais mwehi pahn imwikihla kamaiau laud ong aramas akan! Erein ahnsowo, “Koht pahn ketin kasalehda irail kan me sapwellime” ni ehu ahl tohrohr. Re pahn wia samworo kei rehn Krais oh sewese tohnsampah ren ale kapaipen sapwellime meirongo. Ni ahnsou me sapwellimen Koht Wehio pahn kaunda sampah, aramas peik kan pahn ekisekis “maiaudahsang mouren liduwih mehla.” Re pahn maiaudahsang kasuwedpen dihp oh mehla. Ma re pahn lelepek ong Siohwa erein pahr kido oh pil ni kaimwiseklahn kasongosongo, adarail kan pahn ntingdi nan “pwuhken me momour kan” kohkohlahte. Re “pahn iang sapwellimen Koht seri kan nan arail saledek lingan.” (Kaud. 20:7, 8, 11, 12) Met uhdahn wia koapworopwor kaselel ehu!

KOLOKOLETE OMW KOAPWOROPWOR

13. Dahme kahrehda kitail kak ahneki koapworopwor? Iahd Krais pahn “ketido”?

¹³ Dahme Piter ntingihedi nan nah kisinlikou riau ko kin sewese me keidi kan oh sihpw teikan ren kolokolete arail koapworopwor. E kawehwehda me irail kak ahneki koapworopwor pwehki sapwellimen Siohwa kadek sapan a kaidehn arail wiewia kan. E ntingihedi: “Kumwail kaunopada oh koasoanehdi mwahu amwail lamalam akan. Kumwail mwasamwasahn oh koapworopworkihte kapai kan [“kadek sapan,” NW] me kumwail pahn ale ahnsou me Sises Krais pahn ketin pwarodo.” (1 Pit. 1:13) “Kaun Sises eh pahn ketido” ni eh pahn ketin katingih sapwellime me lelepek kan oh kasohrehla me suwed kan.​—Wadek 2 Deselonika 1:6-10.

14, 15. (a) Dahme kitail anahne wia pwehn kolokolete atail koapworopwor? (b) Dahme Piter koasoia kitail anahne wia?

¹⁴ Pwe kitail en kolokolete atail koapworopwor, ahnsou koaros kitail anahne tamataman me rahnen Siohwa kerendohr. Madamadau oh pepehm wet anahne kamwakid atail mour unsek. Siohwa pahn ketin kasohrehla koperment en sampah me iei “lahng” oh aramas suwed kan me iei “sampah” oh “audepe kan.” Piter ntingihedi: “Soangen mour dah me konehng kumwail en weweidki? Amwail mour uhdahn pahn konehng en kin mwakelekel oh kasarawihong Koht, nindoken amwail kasikasik sapwellimen Koht Rahno, oh wia uwen me kumwail kak pwe en kamwadangahdo—Rahno me lahng pahn roangala oh ohkihla kisiniei, oh audepen pahnlahng pahn peikipeseng karakar mwuledek.”​—2 Pit. 3:10-12.

¹⁵ Eri e pahn mie “lahng kapw oh sampah kapw.” Sapwellimen Krais koperment oh towe mehlel kan me kin kasalehda irair pwung pahn uhd wiliandi koperment en aramas oh aramas suwed koaros. (2 Pit. 3:13) Piter padahkihong kitail ni sansal dahme kitail anahne wia pwehn pousehlahte “kasikasik” inoun koapworopwor en lahng oh sampah kapw, de kolokolete koapworopwor wet. E nda: “Eri, kompoakepahi ko, nindokon amwail kasikasik Rahno, kumwail wia uwen me kumwail kak pwe kumwail en kin mwakelekel oh pwung mwohn silangin Koht ni kapehd popohl.”​—2 Pit. 3:14.

KASALEHDA OMW KOLOKOLETE OMW KOAPWOROPWOR

16, 17. (a) Ia duwen atail kak mourki mour me kin “mwakelekel oh kasarawihong Koht”? (b) Ia duwen atail koapworopwor eh pahn pweida?

¹⁶ Kitail kin kasalehda me kitail kolokolete atail koapworopwor sang ni mwomwen atail mour. Nin duwen Piter eh katamankin kitail, kitail anahne uhdahn tehk mwahu ma kitail kin wia soangen aramas akan me Siohwa kin ketin kupwurperenki. ‘Atail mour uhdahn pahn konehng en kin mwakelekel oh kasarawihong Koht’ oh met iangahki atail kolokol tiahk mwahu “nanpwungen me rotorot akan” sang ni atail kin wia dahme Koht ketin mahsanih me pwung. (2 Pit. 3:11; 1 Pit. 2:12) Kitail anahne poakohng riatail Kristian koaros nan sampah pwon. Met iangahki atail wia uwen atail kak en kolokol minimin nan atail mwomwohdiso. (Sohn 13:35) Piter pil koasoia wiewia kan me “kasarawihong Koht” me iei soahng kan me kitail kin wia pwehn wiahiong atail nanpwungmwahu rehn Siohwa en kin kehlail. Met akan iangahki kapakap kan sang mohngiongitail, wadek Paipel rahn koaros, wia pein atail onop oh doudouloale, kaudok en peneinei, oh kaukaule iang doadoahk en kalohki “Rongamwahu en Wehin Koht.”​—Mad. 24:14.

¹⁷ Emenemen kitail men wia soangen aramas me Siohwa kin ketin kupwurperenki oh pahn ketin komourala ni eh pahn ketin kasohrehla koasoandi suwed wet. Ma kitail wia soangen aramaso, atail koapworopwor me iei “koapworopwor en mour soutuk,” me “Koht, me sohte kin ketin likamw, ketin inoukihongkitailehr . . . mwohn tepin kawa” pahn pweida.​—Taitus 1:2.

[Kilel nan pali 22]

Kristian me keidi kan kin ale “mour kapw” me kahrehiong irail en ahneki koapworopwor

[Kilel nan pali 24]

Kolokolete amwail koapworopwor nan amwail peneinei