Ia Duwen Sises Eh Ketin Kilangwohng Palien Politik?
SOUNTING kan en Rongamwahwo kawehwehda soahng kei me wiawi nan sapwellimen Sises doadoahk en kalohk me kahrehiong eh ketin tuhwong irail me iang palien politik. Karasepe, mwurinte Sises eh ketin papidaisla mpen eh sounpar 30, Tepilo kasongehki en wiahla kaun en sampah. Mwuri, nan sapwellime doadoahk en kalohk, pokon ehu men en ketin wiahla arail nanmwarki. Pil mwurin mwo, aramas ako kasonge en ketin wiahla emen soun palien politik. Ia duwen Sises eh ketin mwekidki met? Kitail pahn tehkpene dahme wiawi.
Kaun en sampah. Rongamwahwo kasalehda me Tepilo kasongehki Sises en ketin kaunda “wehi koaros en sampah.” Song medewehla ia uwen eh pahn mwahu ma Sises kak apwalihala lokolok me tohnsampah ahneki ma e sapwellimanki manaman en kaunda sampah! Ia duwe, mie soun palien politik men me kin nsenohki mehlel kamwahulahn tohnsampah pahn kak soikala luhk wet? A Sises, e ketin soikala luhk wet. (Madiu 4:8-11.) Pwehki Sises ketin kasalehda me e uhdahn ketin nsenohki aramas akan, mie kahrepe mwahu me e ketin soikala ahn Sehdan luhko.
Nanmwarki. Tohto irail me momour ni ahnsou me Sises ketiket nin sampah uhdahn men ahneki kaun emen me kak apwalihala arail kahpwal en pai en wehi oh palien politik. Pwehki aramas akan kin pwuriamweikihla sapwellimen Sises koahiek kan, re men Sises en ketin iang pidada palien politik. Ia duwen eh ketin mwekidki met? Sounnting en Rongamwahwo Sohn ntingihedi: “Ni Sises eh ketin mwahngihada me irail pahn kodohng ale, pwe re en kasapwiladahng nanmwarki, e ahpw kelehpw ketila sang rehrail oh ketidalahng pohn nahnao.” (Sohn 6:10-15) Eri, e sansal me Sises sohte kupwurki iang pidada palien politik.
Soun palien politik. Tehk dahme wiawi rahn kei mwohn Sises eh ketin kamakamla. Iengen Parisi kan me kin pwungki uhtohrda sang mehn Rom kan, iang iengen Erod kan me kin pwungki mehn Rom kan kohla koasoiong Sises. Re men idingkihong en ketin iangala palien politik. Re idek reh ma mehn Suhs anahne pwain daksis ong mehn Rom.
Mark kilelehdi sapwellimen Sises pasapengo: “‘Dahme kumwail kodohn lidipihekin ie? Kumwail kasaledohng ie ehu mwohni silperen, pwe I en kilang.’ Irail eri kasalehiong mwohni silper ehu; e ahpw keinemwe, mahsanih, ‘Sansal en ihs oh eden ihs met?’ Irail ahpw patohwanohng, ‘Nanmwarki Sihsar.’ Sises eri mahsanih, ‘Eri, me mwahu; kumwail kihong Sihsar me uhdahn en Sihsar, a ong Koht me uhdahn sapwellimen Koht.’” (Mark 12:13-17) Pwuhk ehu kawehwehda wehwehn sapwellimen Sises pasapengo: “E sohte kupwurki en wia mesaia ong palien politik oh e uhdahn ketin kasalehda wekpeseng en dahme ahn Sihsar oh sapwellimen Koht.”—Church and State—The Story of Two Kingdoms.
Krais eh sohte ketin pidada palien politik sohte wehwehki me e sohte ketin nsenohki kahpwal kan me duwehte semwehmwe, wiewiahn mwersuwed en irail akan me ahneki manaman, oh soahng kan me sapwung oh sapahrek. Ni mehlel, Paipel kasalehda me e uhdahn ketin poakehla aramas akan me kin ahneki kahpwal kan. (Mark 6:33, 34) Ahpw, Sises sohte ketin wia mehkot pwehn kihsang soahng suwed kan en sampah, mendahki ekei nantihong kahrehiong en pidada soahng pwukat me kin wiewiawi nan ahnsowo.
Eri nin duwen karasepe pwukat ar kasalehda ni sansal, Sises sohte kupwurki iang pidada palien politik. Ahpw ia duwen Kristian akan rahnwet? Dahme re anahne wia?