Dahme Kristian kan Anahne Wia Rahnwet?
RAHNWET, Kristian mehlel kan sohte kin iang pidada palien politik. Dahme kahrehda? Pwehki re kin idawehn sapwellimen Sises mehn kahlemeng. E mahsanihki pein ih: “Ngehi me kaidehn kisehn sampah.” Me pid duwen sapwellime tohnpadahk ko, e mahsanih: “Kaidehn kumwail kisehn sampah.” (Sohn 15:19; 17:14) Tehk ekei kahrepe kan me Kristian kan en dehr pidada palien politik.
1. Koahiek en aramas sohte itar. Paipel mahsanih me aramas akan sohte ahneki koahiek de pwuhng en kaunda pein irail. Soukohp Seremaia ntingihedi: “Sohte aramas emen me kaunda pein eh mour.”—Seremaia 10:23.
Duwehte aramas akan arail sohte wiawihda pwe ren kak pihrki pein arail kehl, eri re sohte pil wiawihda pwe ren kak kaunda pein irail. Emen soupoad me adaneki David Fromkin koasoiahki sou itar en koperment oh nda: “Koperment wiawihkihda aramas akan, kahrehda re kin wiahda sapwung oh dahme re kin koasoia me pahn wiawi sohte kin pweida. Re ahneki manaman, ahpw e sohte itar.” (The Question of Government) Ihme kahrehda Paipel katamankin kitail en dehr koapworopworki aramas.—Melkahka 146:3.
2. Ngehn suwed akan me ahneki manaman met. Ni Sehdan eh men kihong Sises manaman en kaunda sampah, Sises sohte ketin sapwungki me Tepil ahneki manaman en kihong ih wehi koaros en sampah. Ni mehlel, ehu pak Sises ketin kahdaneki Sehdan “kaunen sampah wet.” Sounpar kei mwuri, wahnpoaron Pohl kawehwehda Sehdan nin duwen “koht suwed en sampah wet.” (Sohn 14:30; 2 Korint 4:4) Pohl ntinglahng ienge Kristian ko: “Kitail mahweniong . . . manaman en ngehn suwed kan en pahnlahng . . . oh pil ong koht akan me kaunda dih rotorot wet.” (Episos 6:12) Ni soh sansal, ngehn suwed akan me uhdahn kaunda sampah wet. Ia duwen ire mehlel wet eh pahn kamwakid atail kilangwohng palien politik?
Song medewehla karasaras wet: Duwehte kisin pwoht kan ar kin peila nan ahd kehlail en nansed, palien politik kin mihla pahn manaman en ngehn suwed akan. Oh pil duwehte me dake pwoht ko ar sohte kak wia mehkot pwehn kauhdi ahd kehlailo, palien politik sohte kak wekidala manaman en ngehn saut pwukat. “Meid suwediong sampah” pwehki ngehn suwed pwukat koasoanedier ren kasuwedihla oh kauwehla aramas akan. (Kaudiahl 12:12) Ihme kahrehda mehtehmen me kehlail sang Sehdan oh ienge ngehn saut akan me kak kauhdi soahng suwed kan. Menet iei Siohwa Koht.—Melkahka 83:18; Seremaia 10:7, 10.
3. Kristian mehlel akan kin utungada sapwellimen Koht Wehio kelehpw. Sises oh sapwellime tohnpadahk ko ese me ahnsou ehu me koasoandier, Koht pahn ketin kauwada koperment ehu nanleng me pahn kaunda sampah. Paipel kin kahdaneki koperment wet Wehin Koht oh e kasalehda me Sises Krais me idihdidahr pwehn wia Nanmwarki. (Kaudiahl 11:15) Pwehki Wehi wet eh pidada aramas koaros, Sises ketin wiahki “Rongamwahu en Wehin Koht” oaralap en sapwellime padahk kan. (Luk 4:43) E pil ketin padahkihong sapwellime tohnpadahk ko ren kapakapki: “Mweimwi en pweida wasa koaros.” Dahme kahrehda? Pwehki pahn kaundahn Wehio, kupwuren Koht uhdahn pahn wiawi nin sampah duwehte eh wiawiher nanleng.—Madiu 6:9, 10.
Eri, dahme pahn wiawihong koperment kan en aramas? Paipel kasalehda me koperment “en sampah pwon” pahn kasohrala. (Kaudiahl 16:14; 19:19-21) Ma emen uhdahn kin kamehlele me Wehin Koht pahn kereniong kihsang palien politik koaros, e sohte pahn utungada palien politik pwukat. Pwe ma e pahn song en utungada koperment en aramas pwukat me pahn kereniong ohla, e kin uhwongada Koht.
[Blurb nan pali 6]
Sounkadehdehn Siohwa kan kin uhki Wehin Koht a kaidehn palien politik