Ia Duwen Atail Kak Wia Kristian Poadidi kan oh Towe Mehlel Mwahu kan?

SOAHNG riau dah me Sises ketin kasalehda nan sapwellime doadoahk en kalohk? Keieu, Sises ketin song wekidala mohngiong en aramas, a kaidehn pwihnen politik. Karasepe, tehk dahme Sises ketin nantihong kasalehda nan sapwellime Kapahrek en Pohn Dohl. Mwohnte eh mahsanih duwen ar anahne duwehte soahl oh marain, e mahsanihong me rongorong ko me nsenamwahu mehlel kin ongete “me kin ngoangki kapwaiada kupwur en Koht.” E pil mahsanih: “Meid pai me nan kapehd opampap akan; . . . me nan kapehd mwakelekel kan . . . me kin wia doadoahk en kamwahu [“wiahda popohl,” NW] nanpwungen aramas akan.” (Madiu 5:1-11) Sises ketin sewese sapwellime tohnpadahk ko ren wehwehki kesempwalpen ren wekidala arail madamadau oh pepehm pwehn pahrekiong kupwuren Koht ong dahme mwahu oh dahme suwed, oh pil kesempwalpen papah Koht ni mohngiong unsek.

Keriau, ni Sises eh mahsanihada kahpwal kan me aramas ahneki, e ketin poakeirailla oh met kamwakid en katikala arail kahpwal kan. Ahpw, e sohte ketin akadeiong en ketikihsang kahpwal koaros. (Madiu 20:30-34) E ketin kamwahwihala me soumwahu kan, ahpw soumwahu mihmihte. (Luk 6:17-19) E ketin kakehlakahda me nan kapehd tikitiklahr kan, ahpw koasoandi sapahrek kin doulahte kahrehda kahpwal. E ketin kamwengehda me men mwengedahr kan, ahpw duhpek kin doulahte kahpwalih tohnsampah.​—Mark 6:41-44.

Wekidala Mohngiong oh Katikala Kahpwal kan

Dahme kahrehda Sises ketin koasoanehdihte en ketin wekidala mohngiong oh katikala kahpwal, a kaidehn pwihnen politik oh ketin kasohrehla pahtou? Sises mwahngih me Koht ketin kupwuredahr en ketin doadoahngki Sapwellime Wehio ni ahnsou kohkohdo pwehn ketin kasohrehla koperment koaros en aramas oh ketikihsang soahng kan me kin kahrehda kahpwal koaros. (Luk 4:43; 8:1) Eri ni ahnsou me tohnpadahk ko kangoangehki Sises en ketin kamwakamwahwilahte me soumwahu kan, e mahsanihong irail: “Kitail douluhlwohng nan kousapw teikan oh kahnimw keren kan, pwe I en pil lohkiseli wasa ko Rongamwahu, pwe ihme I kohkihdo.” (Mark 1:32-38) Sises ketin katikala kahpwal en me tohto, ahpw dahme e ketin keieu kesempwalki iei en kalohki oh padahngki mahsen en Koht.

Rahnwet, Sounkadehdehn Siohwa kan kin nantihong alasang Sises nan arail doadoahk en kalohk. Re kin mwekidki ren katikala kahpwal kan sang ni arail kin kihda sawas me konehng emenemen. Ahpw Sounkadehdehn Siohwa kan sohte kin nantihong kasohrehla koasoandi sapahrek en sampah. Re kamehlele me Wehin Koht me pahn kasohrehla soahng kan me kin kahrehda kahpwal koaros. (Madiu 6:10) Duwehte Sises, re kin koasoanehdi wekidala mohngiong a kaidehn pwihn en politik. Ihme kak uhdahn wiawi pwehki ahn aramas akan kahpwal kin kohsang pein arail koasoandi en pilada dahme mwahu oh dahme suwed, a kaidehn palien politik.

Towe Mehlel Mwahu kan

Ni ahnsowohte, Sounkadehdehn Siohwa kan kin kamehlele me e wia arail pwukoahn Kristian en wia towe mehlel mwahu kei nan ehu sahpw. Ihme kahrehda re kin wauneki koasoandien koperment. Sang ni neirail sawasepen Paipel kan oh arail doadoahk en kalohk, re kin kangoangehki mehn mparail kan ren kin peikiong kosonned kan. Ahpw, ni ahnsou me koperment ehu kin wiahda kosonned me kin uhwong sapwellimen Koht kosonned, Sounkadehdehn Siohwa kan sohte kin kapwaiada. Re kin “peikiong Koht, a kaidehn aramas.”​—Wiewia 5:29; Rom 13:1-7.

Sounkadehdehn Siohwa kan kin kalohk ong aramas koaros nan arail wasahn kousoan kan pwehn wia onop en Paipel rehrail ni soh isepe. Imwilahn kasukuhl wet kahrehda aramas rar kei ar wekidala mohngiongirail. Nan ehuehu sounpar, aramas lopw kei kin alehdi sawas en powehdi wiewia kan me kin kauweirailla me duwehte simoak, kamam sakau, doadoahngki mehn kasahliel, pilein mwohni ape oh mouren nenek. Re wialahr towe mwahu kei en ehu sahpw pwehki re kin sukuhlki ren doadoahngki kaweid kan en Paipel nan arail mour.

Patehng met, kasukuhl en Paipel kin sewese tohnpeneinei kan ren kalaudehla arail wauneki emenemen oh kamwahwihala koasoakoasoipene nanpwungen pwopwoud kan, papah nohno oh seri kan oh pil seri kan. Ih mepwukat me kin kakehlakahda nanpwungmwahu nan peneinei kan. Oh soangen peneinei pwukat uhd kin wiahda nsenamwahu oh meleilei nan arail wasahn kousoan kan.

Mwurin omw tehkehr ire kan me sansaldahr nan iren onop pwukat, dahme ke medemedewe: Paipel kin pwungki irail me kin kapatapene pelien lamalam oh palien politik? Pasapengo sansal; e sohte kin. Ahpw, Kristian mehlel kan anahne wia towe mehlel mwahu en sahpw ehu? Ei, uhdahn. Ia duwen arail kak wia met? Sang ni arail pahn idawehn sapwellimen Sises kaweid me ren duwehte soahl oh marain en sampah.

Irail me kin nantihong en doadoahngki sapwellimen Krais kaweid mwahu pwukat pahn wahdohng irail kamwahu oh arail peneinei iangahki wasa me re kin kousoan ie. Sounkadehdehn Siohwa kan nan omw wasa pahn perenki ehukihong uhk duwen koasoandi en onopki Paipel me re kin wia nan omw wasahn kousoan.a

[Nting tikitik me mi pah]

[Blurb nan pali 7]

Sises kin ketin song en wekidala mohngiong en aramas akan, a kaidehn pwihnen politik

[Blurb nan pali 8]

Sounkadehdehn Siohwa kan kin kamehlele me e wia arail pwukoahn Kristian kei en wia towe mehlel mwahu en ehu sahpw