Momour nin Duwen Towe Mehlel en Wehio!

“Momourkihte soangen mour me konehng rongamwahu.”​—PIL. 1:27.

IA OMW PASAPENG?

Ihs me kak wia towe mehlel en Wehio?

Ia wehwehn en esehla lokaia, poadopoad oh kosonned en Wehio?

Ia duwen towe mehlel en Wehio ar kin kasalehda me re poakohng sapwellimen Koht kosonned kan?

1, 2. Dahme kahrehda “en pousehlahte momour nin duwen towe mehlel” kei kesempwal ong mwomwohdiso en Pilipai?

WAHNPOARON Pohl kangoange mwomwohdiso en Pilipai ren “momourkihte soangen mour me konehng rongamwahu.” (Wadek Pilipai 1:27.) Lepin lokaia wet “momourkihte” nan iretikitik wet kin wehwehki “en pousehlahte momour nin duwen towe mehlel” en wehi ehu. Wehwehpen lepin lokaia pwukat kin kesempwal ong mwomwohdiso en Pilipai. Dahme kahrehda? Pwehki e mwomwen me wehin Rom mweidada mehn Pilipai ko ren wia towe mehlel en wehi wet oh ale mehn perepe sang arail kosonned. Mehn Pilipai ko kin pohlki arail wia towe mehlel en Rom pwehki met kin kihong irail kamwahu kan me me malaulau ahneki nan ahnsowo.

² Mie kahrepe mwahu ehu me tohnmwomwohdiso en Pilipai en pohlki. Pohl katamankihong Kristian keidi ko: “A kitail, kitail uhdahn tohn nanleng mehlel.” (Pil. 3:20) Irail wia towe mehlel en Wehin Koht me lapalap sang koperment koaros en aramas. Wehin Koht kin kihong irail mehn perepe mwahu oh kamwahu kan me sohte ehu koperment kak kihda.​—Ep. 2:19-22.

3. (a) Ihs me kak wia towe mehlel en Wehio? (b) Dahme kitail pahn tehkpene nan iren onop wet?

³ Ahn Pohl kaweid “en pousehlahte momour nin duwen towe mehlel” kei kin dokedokehte irail kan me pahn iang Krais kaun nanleng. (Pil. 3:20) Ahpw, e kak pil dokedoke irail kan me pahn kousoan nin sampah pahn kaundahn Wehin Koht. Dahme kahrehda? Pwehki kitail koaros kin papah Nanmwarki tehmen, Siohwa, oh sapwellime koasoandi kan duwepenehte ong sapwellime ladu kan koaros. (Ep. 4:4-6) Rahnwet, aramas tohto kin doadoahk laud pwehn wiahla towe mehlel en wehi kepwehpwe ehu. Ahpw en wiahla towe mehlel kei en Wehin Koht kesempwalsang met. Pwehn sewese kitail en wehwehki mwahu ia uwen met eh inenen kesempwal, kitail pahn kapahrekihpene soahng kan me anahn pwehn wiahla towe mehlel en koperment ehu oh soahng kan me anahn pwehn wiahla towe mehlel en Wehin Koht. Kitail pahn tehkpene soahng siluh me kitail anahne wia ma kitail men pousehlahte wia towe mehlel en Wehio.

ANAHN KAN ONG TOWE MEHLEL KAN

4. Dahkot lokaia min? Ia wehwehn en lokaiahki lokaia min wet?

⁴ Sukuhlki lokaiahn sahpwo. Ekei koperment kin anahne irail kan me men wiahla towe mehlel en sapwarail ren esehla lokaiahn sahpwo. Ekei aramas kin doadoahk laud ahnsou reirei pwehn esehla mwahu lokaiao mehnda ma mwurin ar wialahr towe mehlel kei. Ele re kin mwadang koledi mwomwen lepin lokaia kan ahpw re anahne ahnsou laud pwehn maila lokaiahki lokaiao. Wehin Koht pil anahne irail kan me men wiahla towe mehlel kei en esehla lokaia kapw ehu. Paipel kin kahdaneki lokaia wet “lokaia min.” (Wadek Sepanaia 3:9.a) Soangen lokaia dahieu met? Iei padahk mehlel me Paipel kin padahngki duwen Koht oh kupwure kan. Lokaiahki lokaia min wet kin wehwehki peikiong sapwellimen Koht kosonned kan oh kaweid kan. Nin duwen towe mehlel kei en Wehin Koht, ele kitail kin mwadang koledi padahk mengei kan en Paipel oh papidaisla. Ahpw mwurin atail papidaisla, kitail anahne doadoahk laud pwehn kamwahwihala atail lokaiahki lokaia min. Ia duwen atail kak wia met? Emenemen kitail anahne pousehlahte nantihong doadoahngki dahme kitail sukuhlki sang nan Paipel.

5. Dahme kahrehda kitail anahne sukuhlki duwen poadopoad en sapwellimen Siohwa aramas akan uwen atail kak?

⁵ Sukuhlki poadopoad en sahpwo. Emen me men wiahla towe mehlel en sahpw ehu ele anahne sukuhlki poadopoad en koperment en sahpwo. Pwehki kitail men wia towe mehlel en Wehin Koht, kitail anahne sukuhlki duwen eh poadopoad uwen atail kak. Kitail anahne alasang mehn kahlemeng en nein Kora pwutak ko nan Israel. Re poakohng Serusalem oh eh wasahn kaudok oh kin perenki koasoia duwen poadopoad en kahnimwo, kaidehn pwehki eh kaselel ahpw pwehki ih me “kahnimw en nanmwarki lapalapo.” Wasahn kaudok nan Serusalem iei wasa me aramas ko kin sukuhlki duwen sapwellimen Siohwa Kosonned kan oh kaudokiong ih ie. Irail me mi pahn kaundahn Siohwa, Nanmwarki en Serusalem, iei irail kan me e kin ketin pwungki oh poakohng. (Wadek Melkahka 48:1, 2, 9, 12, 13.) Nan atail ahnsou, Koht pil ketin sapwellimanki pwihn en aramas ehu nin sampah. Duwehte nein Kora pwutak ko, kitail pil anahne men sukuhlki oh padahkihong meteikan duwen poadopoad en sapwellimen Koht aramas akan. Uwen laud en atail esehla sapwellimen Koht aramas akan oh duwen eh ketin sewese irail, ih uwen laud en atail kamehlele Wehin Koht. Met pahn kakehlakahla atail ineng en kalohki rongamwahu en Wehio.​—Ser. 9:24; Luk 4:43.

6. Dahme kahrehda kitail kak kasik me Siohwa ketin kupwurki kitail en sukuhlki oh peikiong sapwellime kosonned oh kaweid kan?

⁶ Ese kosonned en sahpwo. Koperment en aramas kin anahne towe kan ren esehla oh peikiong kosonned en sapwarail. Kahrehda kitail kak kasik me Siohwa ketin kupwurki towe mehlel koaros en sapwellime Wehi en sukuhlki oh peikiong sapwellime kosonned oh kaweid kan. (Ais. 2:3; Sohn 15:10; 1 Sohn 5:3) Kosonned en aramas sohte unsek oh sapahrek. Ahpw “kosonned en KAUN-O me unsek mehlel.” (Mel. 19:7) Ke kin perenki wadek Paipel ehuehu rahn oh sukuhlki duwen sapwellimen Koht kosonned oh kaweid kan? (Mel. 1:1, 2) Emenemen kitail anahne nantihong en sukuhlki sapwellimen Koht kosonned kan. Sohte emen kak wia met ong kitail.

TOWE MEHLEL EN WEHIN KOHT KIN POAKOHNG SAPWELLIME KOSONNED KAN

7. Dahme kahrehda towe mehlel en Wehio kin peikiong sapwellimen Koht kosonned kan?

⁷ Pwehn pousehlahte wia towe mehlel en Wehio, kitail anahne esehla oh poakohng sapwellimen Koht kosonned kan. Tohto towe mehlel en koperment kan en aramas kin nda me re pwungki kosonned en sapwarail. Ahpw ni ahnsou me re kin sapwungki kosonned ehu oh medewe me sohte aramas kilikilang irail, re kin sapeikiong. Re kin kalapw peikiong kosonned kan ihte pwehn kenikenla rehn aramas. (Kol. 3:22) Ahpw towe mehlel en Wehio kin peikiong sapwellimen Koht kosonned kan ong ni kahrepe tohrohr. Kitail kin poakohng Siohwa. Ihme kahrehda kitail kin peikiong sapwellime kosonned kan mehnda ma sohte me kilikilang kitail.​—Seims 4:12; wadek Luk 10:27.

8, 9. Ia duwen omw kak ese ma ke uhdahn poakohng sapwellimen Koht kosonned kan?

⁸ Ia duwen omw kak ese ma ke uhdahn poakohng sapwellimen Koht kosonned kan? Sang ni omw kin medewe mwomwen omw kin mwekidki mehkot. Karasepe, medewehla mwomwen omw mwekid ni omw kin ale kaweid. Mwein e pid soahng kan me ke pehm me kowe me pahn pein pilada, duwehte mwomwen omw kin likouda. Mwohn omw esehla padahk mehlel, mwein ke sohte kin nsenohki mwomwomw de mwein ke kin likouda ni mwohmw ehu me kak kahrehda meteikan ren ahneki madamadau samin. Ni ahnsou me omw limpoak ong Siohwa kin lalaudla, ke kin sukuhlki ken likouda ni ahl ehu me kin kawauwih ih. (1 Tim. 2:9, 10; 1 Pit. 3:3, 4) Mwein met ke kin medewe me mwomwen omw likouda sohte sapwung. Ahpw ia duwen omw pahn mwekidki ma elder men padahkihong uhk me me tohto nan mwomwohdiso kin medewe me mwomwen omw likouda sohte konehng? Ke pahn kihda kahrepe kan, lingeringerda, de sohte men wiahda wekidekla kan? Ehu kosonned me keieu kesempwal ong towe mehlel en Wehio me re anahne peikiong iei en alasang Krais. (1 Pit. 2:21) Pohl koasoia me “Krais sohte ketin kupwurohkihte pein ih” oh ni ahlohte, emenemen kitail anahne “kaparanih riatail . . . kan ni wiewia mwahu ong irail, pwe kitail en seweseirailda nan ar pwoson.” (Rom 15:2, 3) Pwehn kolokol popohl nan mwomwohdiso, Kristian koahiek men anahne ahnsou koaros sohte men wia soahng kan me kin kansensuwedihala kadeikpen loalen meteikan.​—Rom 14:19-21.

⁹ Ia omw madamadau duwen pwopwoud oh nsenen pwopwoud? Irail kan me kaidehn towe mehlel en Wehin Koht ele kin medewe me ohl mwahuki ohl oh lih mwahuki lih, kilel oh kasdo suwed kan, kamwahl, oh mweipeseng en pwopwoud sohte sapwung. Ahpw towe mehlel en Wehin Koht kin sukuhlki ren medewe imwilahn arail wiewia kan oh pil ia duwen arail wiewia kan ar pahn kamwakid meteikan. Mwohn arail esehla padahk mehlel, tohto irail kin mourki mouren tiahk samin. Re esehier me pwopwoud oh nsenen pwopwoud wia kisakis kei sang rehn Koht. Re poakohng sapwellimen Siohwa kosonned kan oh ese me irail kan me sapeikiong sapwellime kosonned kan duwen pwopwoud oh nsenen pwopwoud sohte kak wia towe mehlel en Wehin Koht. (1 Kor. 6:9-11) Ahpw re pil pohnese me mohngiongirail kak kahrehda ren wiahda soahng sapwung kan. (Ser. 17:9) Eri re kin kalahnganki arail kin alehdi kaweid oaritik kan me kin sewese irail en pousehlahte peikiong sapwellimen Koht kosonned kan.

TOWE MEHLEL EN WEHIO KIN KALAHNGANKI KAWEID KAN

10, 11. Kaweid kesempwal dah kan me Wehin Koht kihda ong kitail? Ia omw madamadau duwen soangen kaweid pwukat?

¹⁰ Koperment kan en aramas kin kaweidki towe mehlel en sapwarail duwen keperpen ekei soangen mwenge oh wini kan. Mehlel, kaidehn soangen mwenge oh wini koaros sakanakan. Ahpw ma mie mehkot kak keper ong irail, kopermento pahn padahkihong towe ko duwen keper wet pwehn pere irail. Kopermento me pwukoahki kihda kaweid kan. Wehin Koht pil kin kihda kaweid kan ong towe mehlel kan. E kin padahkihong kitail duwen soahng kan me kak kahrehiong kitail en sapeikiong sapwellimen Koht kosonned kan oh kauwehla atail nanpwungmwahu reh. Karasepe, me tohto kin doadoahngki Internet pwehn koasoiong meteikan, ale kasukuhl oh ale mehn kamweit. Sapwellimen Koht pwihn kin doadoahngki Internet pwehn wiahda soahng mwahu tohto. Ahpw Web site tohto nan Internet keper ong irail kan me men wiewiahte dahme mwahu. Web site kan me kin kasalehda kilel oh kasdo suwed kan uhdahn keper. Erein sounpar tohto, ladu lelepek oh loalokong kin padahkihong kitail duwen keperpen Web site pwukat oh kitail kin uhdahn kalahnganki kaweid pwukat.

¹¹ Ahnsou wet, me tohto kin doadoahngki soangen Web site tohrohr kei. Re kin kahdaneki mepwukat social networking. Re kak wia kamwahu kei ahpw pil kak kahrehda kahpwal laud. Eri kitail anahne uhdahn kanahieng ma kitail pilada en doadoahngki Web site pwukat. Kitail kakete koasoakoasoiong soangen aramas akan me wia werek suwed. (1 Kor. 15:33) Ihme kahrehda ladu lelepeko kin kihong kitail kaweid pwehn sewese kitail en ahneki madamadau pwung ong Web site pwukat. Ke wadekehr ire kan sang ladu lelepeko me pid duwen doadoahngki soangen Web site pwukat? E pahn keper en doadoahngki Web site pwukat ma ke sohte wadek ire pwukat.b E pahn duwehte omw kangala wini kehlail ehu ahpw sohte wadek kaweid me mi ni kilin pwoatolo.

12. Dahme kahrehda e wia elen pweipwei en pohnsehse kaweid kan?

¹² Irail kan me kin pohnsehsehla kaweid kan sang ladu lelepeko pahn kamedekeirailla oh pil irail kan me re poakohng. Ekei kin sohla kak uhdihsang kilang kilel oh kasdo suwed kan de wiahda tiahk samin oh kin medewe me Siohwa sohte kak ketin mwahngih dahme re wiewia. E wia mehkot pweipwei en medewe me kitail kak ekihsang Siohwa dahme kitail wia. (Lep. Pad. 15:3; wadek Ipru 4:13.) Siohwa sohte pahn ketin mweidohng irail kan me kin pohnsehse dahme e ketin kupwurki ren wia towe mehlel en sapwellime Wehio, duwehte koperment en aramas eh sohte kin mweidohng aramas me kin wiahda soangen tiahk suwed kan en wia towe mehlel kei.c (1 Kor. 5:11-13) Ahpw Siohwa kin ketin mahk oh kin ketin doadoahngki elder kan ren sewese irail kan me kin wiahda dihp. (Kal. 6:1) Irail kan me koluhla oh uhdihsang wiewia sapwung kan kak pwurehng wiahla kompoakepahn Siohwa oh pousehlahte wia towe mehlel en Wehio. (2 Kor. 2:5-8) E wia pwais kaselel ehu en papah soangen Nanmwarki limpoak menet!

TOWE MEHLEL EN WEHIO KIN KESEMPWALKI SUKUHL

13. Ia duwen towe mehlel kan en Wehio ar kin kasalehda me re kesempwalki sukuhl?

¹³ Koperment tohto kin doadoahk laud pwehn kasukuhlih tohn arail wehio. Re kin wiahda wasahn kasukuhl kan me aramas kak sukuhlki soahng kan. Towe mehlel kan en Wehio kin kalahnganki sukuhl pwukat wasa me re kak sukuhlki en esehla wadawad oh nting oh sukuhlki koahiek kan me re pahn anahne ong doadoahk. Re kin wia uwen arail kak pwe ren paiekihda soangen kasukuhl wet. Ahpw arail kalahnganki kasukuhl me Siohwa ketikihong irail sang sapwellime pwihn laudsang met. Karasepe, sapwellime pwihn kin kangoange kitail en kin wadawad. E kin kangoange pahpa nohno kan ren kin wadawad ong neirail seri kan. Sounpwong koaros ladu lelepeko kin wiahda sawasepen Paipel kan. Ma ke kin wadek pali ehu de riau en pwuhk pwukat nan ehu rahn, ke kak pousehlahte paiekihda kasukuhl me Siohwa ketikihong kitail.

14. (a) Kasukuhl dah me kitail kin alehdi? (b) Sawas dah kan ong Kaudok en Peneinei nin soutik me ke doadoahngkihier?

¹⁴ Nan ehuehu wihk, towe mehlel kan en Wehio kin ale kasukuhl nan arail mihting kan en mwomwohdiso. Karasepe, tohtohsang sounpar 60, Sukuhl ong Sapwellimen Koht Doadoahk kin sewese tohnsukuhl tohto ren wiahla sounpadahk koahiek en Mahsen en Koht. Ke kin iang sukuhl wet? Ladu lelepeko pil kin kasalehiong kitail kesempwalpen wia Kaudok en Peneinei nin soutik nan wihk koaros. Onop wet kin sewese kalaudehla peneinei kan ren miniminpene. Mie pak ke doadoahngki sawas kan me kohda nan neitail pwuhk kan ong Kaudok en Peneinei nin soutik?d

15. Pwais kaselel dahieu me kitail ahneki?

¹⁵ Tohto towe mehlel en koperment kan en aramas kin song meteikan ren iang utung pwihnen politik. Ekei kin kohla ihmw lel ihmw pwehn wia met. Towe mehlel kan en Wehio nan sampah pwon kin kasalehda me re utung Wehin Koht sang arail kin kalohk ong aramas akan pohn ahl akan oh sang ihmw lel ihmw. Karasepe, kahrepen Kahn Iroir iei en pakairki Wehin Siohwa. Eri nin duwen eh sansalehr nan iren onop en mwoweo, Kahn Iroir me keieu kohpeseng laud nan sampah pwon. E wia pwais kaselel ehu en padahkihong meteikan duwen Wehin Koht. Ke kin ngoangki kalohki rongamwahu en Wehin Koht?​—Mad. 28:19, 20.

16. Ia duwen omw kak kadehdehda me ke wia towe mwahu men en Wehin

¹⁶ Ahnsou keren, Wehin Koht kelehpw pahn wia kopermento me pahn kaunda sampah. Kosonned en Wehio kelehpw me pahn kaweid aramas akan. Ke pahn wia towe mwahu men ni ahnsowo? Met iei ahnsou en kadehdehda me ke pahn. Nan pilipil koaros me ke kin wiahda ehuehu rahn, wia mehkoaros ong ni kalinganpen Siohwa oh kadehdehda me ke kin momour nin duwen towe mwahu men en Wehin Koht.​—1 Kor. 10:31.

[Nting tikitik kan me kileldi pah]

[Kilel nan pali 21]

Ke kin kapwaiada kaweid kan sang ladu lelepeko duwen Internet?

[Kilel nan pali 19]

Duwehte nein Kora pwutak ko, ke kin poakohng kaudok min oh eh poadopoad?

[Kilel nan pali 22]

Omw Kaudok en Peneinei nin soutik kak sewese kowe oh omw peneinei en wiahla towe mwahu kei en Wehio