Wehin Koht​—Koperment Ehu me Sohte Mie Wiewiahn Mwersuwed

Ke seu pahn medewe me ma aramas akan kin mwersuwed, eri arail koperment kan pahn pil kasalehda wiewiahn mwersuwed? Ma ih duwen met, eri koperment ehu me sohte kin kasalehda wiewiahn mwersuwed anahne kohsang ehu wasa tohrohr me kaidehn ahn aramas. Paipel mahsanih duwen soangen koperment wet. Koperment wet iei Wehin Koht me Sises ketin padahkihong sapwellime kan ren kapakapki.​—Madiu 6:9, 10.

Wehin Koht uhdahn koperment ehu me wie kakaun sang nanleng. E pahn wiliandi koperment kan koaros en aramas. (Melkahka 2:8, 9; Kaudiahl 16:14; 19:19-21) Pil ehu kapai me Wehio pahn wahdo iei e pahn kihsang wiewiahn mwersuwed nan koperment. Tehk soahng weneu duwen Wehin Koht me pahn kapwaiada met.

1. MANAMAN

KAHPWALO: Mwohni me koperment kan en aramas kin doadoahngki kin kohsang towe kan, pali laud sang ni pweinen tax oh pil tax me pesines kan kin pwain ong koperment kan. Elen ale mwohni wet kin kasonge ekei kaun akan en pirapa. Ekei kaun kin ale mwohni sang meteikan me men kaun ako en katikitikihala pweinen arail tax, de pil dahme irail anahne pwainohng arail koperment. Eri met kahrehda kahpwal. Kopermento kin kaiada pweinen tax pwehn kaitarala soangen luhslahn mwohni pwukat, oh met kin kalaudehla wiewiahn mwersuwed. Nan soangen irair wet, ele irail me kin mehlel ong arail doadoahk iei me kin keieu lokolongki kahpwal wet.

DAHME PAHN KAMWAHWIHALA: Manaman me Wehin Koht ahneki kin kohsang rehn Koht Wasa Lapalahpie, Siohwa.a (Kaudiahl 11:15) Wehi wet sohte anahne rik pweinen tax sang rehn aramas akan pwehn pwain eh wie doadoahk. Ahpw, “lapalap en sapwellime [Koht] manaman” oh sapwellime kadek sapan kin kamehlelehiong kitail me Wehi wet pahn kihda ni sapan dahme towe kan koaros anahne.​—Aiseia 40:26; Melkahka 145:16.

2. KAUN

KAHPWALO: Susan Rose-Ackerman, me kitail koasoia nan oaralap en mwoweo, nda me pwehn nantihong kihsang wiewiahn mwersuwed, kitail “anahne tepisang keieu powe.” Aramas akan sohla kin likih koperment kan ma koperment ko song en kihsang wiewiahn mwersuwed rehn polis kan oh tohndoadoahk teikan ahpw ni ahnsowohte mweidada kaun akan en mwersuwed. Pil kaun emen me keieu mwahu sohte unsek. Nin duwen me Paipel mahsanih, “sohte aramas emen nin sampah me kin wia me pwung ahnsou koaros.”​—Eklesiasdes 7:20.

DAHME PAHN KAMWAHWIHALA: Weksang aramas soh unsek kan, Sises Krais, me Koht ketin pilada en wia Kaun en Wehio, sohte kak lohdi pahn kasongosong en wia dahme sapwung. Sises ketin kasalehda met ni eh ketin soikala wiewiahn mwersuwed me keieu laud me kaun en sampah wet, Tepilo, wiahiong ih, me iei en patohwanohng Sises “wehi koaros en sampah oh duwen ar lingan” ma Sises ketin poaridi oh pwongih ih. (Madiu 4:8-10; Sohn 14:30) Pil ni Sises eh ketin lokolok mwohn eh pwoula, e uhdahn ketin koasoanehdi teng en kolokol sapwellime lelepek oh soikala wain me pahn kak kasohla eh medek ahpw me pil kakete kihsang sapwellime kehl en madamadau. (Madiu 27:34) Met ni Koht eh ketin kaiasada ih ong mour nanleng, Sises ketin kadehdedahr me e uhdahn ketin warohng kaunda Wehin Koht.​—Pilipai 2:8-11.

3. SOHTE KAK WEKILA

KAHPWALO: Sahpw tohto kin kalapw wia usuhs, me dene kin mweidohng aramas akan en kihsang nan ohpis kaun mwersuwed kan. Ahpw ni mehlelo, kampein oh usuhs kan kin kasalehda wiewiahn mwersuwed, pil nan sahpw kan me dene kin kekeirda laud. Me kepwehpwe kan kak kamwakid laud irail kan me wie kakaun oh me pil pahn wiahla kaun kan sang ni arail kin kihda sawas ong kampein oh pil mwekid teikan.

Sounkopwung John Paul Stevens sang Mwoalen Kopwung Lapalap nan wehin Amerika ntingihdi me soangen mwekid wet kin keper ong “kaidehn ihte dahme pwung ong kosonned oh soahng mwahu kan en Koperment ahpw pil ong likilik me aramas akan ahneki ong kopermento.” Eri e sohte kapwuriamwei me aramas tohto nan sampah pwon kin medewe me palien politik iei me keieu mwersuwed nan wasahn doadoahk koaros.

DAHME PAHN KAMWAHWIHALA: Wehin Koht sohte kin mweidada kampein oh usuhs mwersuwed kan en wiawi pwehki e wia kaunda ehu me poatopoat oh sohte kak wekila. (Daniel 7:13, 14) Pwehki Koht me ketin idihada Kaun en sapwellime Wehi, wehi wet sohte anahne usuhs sang aramas akan oh aramas sohte kak kauwehla. Eh sohte kak wekila kin sewese kamehlelehiong kitail me dahme e pahn wia kin ahnsou koaros wia kamwahu ong towe kan kohkohlahte.

4. KOSONNED KAN

KAHPWALO: Ni tapio, mwein ke medewe me en wiahda kosonned kapw kan kak kamwahwihala irairo. Ahpw me saman kan diarada me dahme kin kalapw wiawi iei ma kosonned tohto wiawihda, met kin ihte kamengeihala wiewiahn mwersuwed. Patehng met, kosonned kan me wiawihda pwehn katikala wiewiahn mwersuwed kin kalapw doadoahngkihla mwohni laud ahpw sohte kin uhdahn kamwahwihala kahpwalo.

DAHME PAHN KAMWAHWIHALA: Kosonned kan en Wehin Koht inenen ileilehsang kosonned en koperment kan en aramas. Karasepe, Sises sohte ketin wiahda de ntingihdi kosonned tohto me pid dahme kitail en wia de dehr wia. Ahpw Sises ketikihda kaweid me pid atail wiewia ong meteikan. E mahsanih: “Eri, kumwail wiahiong meteikan me kumwail kin anahne aramas akan en kin wiahiong kumwail.” (Madiu 7:12) Ele kesempwalsang met, kosonned en Wehio kin dokedoke atail wiewia oh kahrepen atail wiewiao. Sises mahsanih: “Ke pahn poakohng mehn mpomw duwen omw kin poakohng pein uhk.” (Madiu 22:39) Koht kak ketin mahsanihong kitail en wia met pwehki e ketin mwahngih mohngiongitail.​—1 Samuel 16:7.

5. DAHME KIN KAMWAKID ATAIL WIEWIA KAN

KAHPWALO: Dahme kin kamwakid wiewiahn mwersuwed iei noahrok oh roporop. Kaun en koperment kan oh pil towe kan kin kalapw kasalehda soangen irair suwed pwukat. Me pid sidohwao me pwupwudi nan Seoul me kitail koasoia nan oaralap en mwoweo, kaun kan en kopermento alehdi mwohni sang sounkou ihmw ko me ese me en pwain kaun pwuko pahn pwei tikitiksang arail doadoahngki kepwehn doadoahk mwahu kan oh kapwaiada ni pwung koasoandi en kou ihmw me re uhdahn anahne idawehn.

Eri, pwehn kihsang wiewiahn mwersuwed, aramas akan anahne sukuhlki ia duwen arail pahn powehdi soangen irair suwed pwukat duwehte noahrok oh roporop. Ahpw, koperment en aramas sohte ahneki ineng oh koahiek pwehn kihda soangen prokram en kasukuhl wet.

DAHME PAHN KAMWAHWIHALA: Wehin Koht kin kihsang wiewiahn mwersuwed sang ni eh pahn kasukuhlih aramas akan ia duwen arail pahn powehdi ineng sapwung kan me kahrehiong ren mwersuwed.b Kasukuhl wet kin sewese ‘mohngiongirail oh arail lamalam’ en onohnsapahlda. (Episos 4:23) Re sukuhlki ren kihsang noahrok oh roporop rehrail oh uhd wiliankihdi nsenamwahu oh en nsenohki meteikan.​—Pilipai 2:4; 1 Timoty 6:6.

6. TOWE KAN

KAHPWALO: Ekei aramas pahn pilada ren likamw oh mwersuwed mehnda ma wasao uhdahn mwahu oh kin kihda kasukuhl me keieu mwahu ong tiahk mwahu. Me saman kan wehkada me ih kahrepe wet me koperment kan sohte kak kihsang wiewiahn mwersuwed. Koperment kan kin koapworopworki me re kak katikala wiewiahn mwersuwed oh pil kauhdi imwila suwed en wiewia wet.

DAHME PAHN KAMWAHWIHALA: Palien U.N (United Nations Convention Against Corruption) koasoia me en kihsang wiewiahn mwersuwed, koperment kan anahne kangoange irair en “lelepek, mehlel oh koahiek.” Mendahte mehn akadei wet uhdahn mwahu, Wehin Koht kin wia laudsang. E kin kangoange irair pwukat oh pil kasik me towe kan anahne kasalehda. Paipel mahsanih me “me noahroke kepwe kan” oh “me likamw koaros” sohte pahn kak sohsohki Wehin Koht.​—1 Korint 6:9-11; Kaudiahl 21:8.

Aramas akan kak sukuhlki en kapwaiada irair kaselel pwukat, nin duwen me Kristian en mahs kan wia. Karasepe, ni emen tohnpadahk ko me ede Saimon men song en pwainsang wahnpoaron ko sapwellimen Koht manaman me re ahneki, wahnpoaron ko sohte dukiong oh ndaiong: “Koluhkihla omw lamalam suweden.” Ni Saimon eh esehda keperpen eh ineng sapwungo, e peki rehn wahnpoaron ko ren kapakapki ih pwe en kak powehdi eh kahpwalo.​—Wiewia 8:18-24.

IA DUWEN ATAIL KAK WIAHLA TOHN WEHIN KOHT

Sohte lipilipil mehnia sahpw me ke kohsang ie, ke ahneki ahnsou mwahu en wiahla tohn Wehin Koht. (Wiewia 10:34, 35) Prokram en kasukuhl me Wehio kihda, me wiewiawi nan sampah pwon met, pahn kasalehiong uhk ia duwen omw kak wia met. Sounkadehdehn Siohwa kan pahn perenki kasalehiong uhk koasoandi en onopki Paipel ni soh isepe, me kak reireikihte minit eisek nan ehuehu wihk. Pil patehng met, ke kak kalaudehla omw sukuhlki duwen “Rongamwahu en Wehin Koht” oh pil mwomwen eh pahn kihsang wiewiahn mwersuwed nan koperment kan. (Luk 4:43) Se luke iuk en eker de tuhwong Sounkadehde kan ni omw wasa de kohla ni arail Web site, jw.org.