Dahme Kahrehda Mwersuwed Kin Wie Tohtohla?

“Ke dehr ale Kisakis ieu sang emen pwe en pwain ohng uhk ke en wia mehkot me sohte pwung, pwe soangen kisakis wet kin karotongehla aramas ohng dahme pwung oh kin kauwehla pwung en irail kan me sohte diparail.”​—Eksodus 23:8.

SOUNPAR silikid limepwiki samwalahro, Kosonned en Moses kin uhwong tiahk en natih. Sounpar epwiki kei dower powe, kosonned kan me kin uhwong tiahk en natih kin wie tohto mwadang. Mendahki met, wiawihdahn kosonned kan sohte kin kak kihsang mwersuwed. Tiahk en natih rar kei kin wiawihda rahn koaros, oh aramas dep samwa kin lokolongki imwilahn met.

Mwersuwed kin wie kekeirada wasa tohto nan sampah oh wiepenla me kahrehda e wiaher keper ehu ong koasoandi en aramas. Nan ekei sahpw, sohte mehkot kak wiawihda lao ma e natih me lapalap kan. A natinat ong me lapalapo pahn sewese ih en kak pahs test ehu, de ale laisen en dake sidohsa, de alehda contract ehu, de kana nan kopwung. Arnaud Montebourg, emen lawyer en Paris, koasoia: “Mwersuwed kin rasehng samin me katoutouwihla oh kansensuwedihla ngehnin aramas akan.”

Tiahk en natinat kin keieu tohto nan wiewia kan me pid pisnes. Ekei kompani kan kin nekidala silikis ehu en arail wihn kan koaros pwehn pwainkihla koperment mwersuwed kan. Nin duwen me makisihn en British The Economist koasoia, me persent 10 en tala lik pak 25 me kin kadoadoahkohng nan sounpar koaros ong ni pali en pisines me kin wiawi nan sampah pwon me kin pid pweipweidahn dipwisou en mahwen kin kohda pwehn natih irail kan me pahn pwainda dipwisoun mahwen kan. Nindoken soangen mwersuwed wet kin wie kekeirada, imwilahn met kin inenen suwed. Erein imwin sounpar eisek samwalahro, lepin lokaiahn wai “crony capitalism” me kin kadoadoahkohng wiewiahn pisnes mwersuwed kan me kin mwahu ong ekeite aramas pai kan kak kahluwa irail ong ihs me ren natih oh met kin kauwehla paien wehi en sahpw tohto.

Irail kan me keieu ale kalokolok laud sang mwersuwed oh ohlahn pali en paien wehi iei me semwehmwe kan​—irail kan me sohte kak natih aramas. Nin duwen me makasihno The Economist koasoia: “mwersuwed iei ehu mwomwen kalokolok.” Soangen kalokolok wet kak kohsang, de aramas solahr kak pitsang mwersuwed? Pwehn sapengla peidek wet, kitail en keieu kasawihada ekei kahrepe kan en mwersuwed.

Dahme kin Kahrehda Mwersuwed?

Dahme kahrehda aramas kan kin pilada ren mwersuwed ahpw kaidehn ren mehlel? Ong ekei, mwersuwed kin kamengei ong irail soahng tohto​—de ihte ahlo met—​en alehda dahme re mwahuki. Ekei pak, tiahk en natih kin perehsang emen en dehr ale kalokepen sapwung me e wiahda. Me tohto me kin kilang sounpolitik kan, polis kan, oh sounkopwung kan me kin mwomwen pohnsowehla mwersuwed de pein irail kin mwersuwed kin alasang irail pwukat.

Nindoken mwersuwed kin wie lalaudla, aramas uhd pwungkihla lao e wialahr elen mour. Aramas kan me pweinarail tikitik kin pehm me solahr arail pilipil. Re pahn ngidingidki ale natinat ma re men mour mwahu. Oh ni ahnsou me irail kan me kin alehda natinat kan de natih pwehn ale kamwahu kan sohte kin ale kalokparail, me malaulau kin men uhwong mwersuwed. Nanmwarki Solomon mahsanih: “Dahme aramas kan kin mengeiki wiahda sapwung laud? Pwehki ar sohte kin mwadangete ale kalokepe.”​—Eklesiasdes 8:11.

Kehl laud riau me kin kakakehlailih mwersuwed: roporop oh noahrok. Pwehki roporop, aramas mwersuwed kan kin pohnsowehla lokolok me arail mwersuwed wiahiong meteikan, oh re kin koasoia me dene natinat me pwung pwehki re kin paikihda. Uwen tohto kepwe kan me re kihpene, arail noahrok pil kin laudla. Solomon mahsanih: “Ma ke pahn poakohng mwohni, ke sohte mwahn pahn itarki; ma ke inengieng kepwehpwehla, ke sohte kak alehdi mehkoaros me ke anahne.” (Eklesiasdes 5:10) Mehlel, noahrok kin mwahuong wiahda mwohni, ahpw e kin kahrehda mwersuwed oh uhwong kosonned.

Ehu ire me kitail en dehr pohnsowehla iei pwukoa en kaun soh sansal en sampah wet, me Paipel kin kasalehda me iei Sehdan me Tepil. (1 Sohn 5:19; Kaudial 12:9) Sehdan me kin kahrehda mwersuwed. Natih me keieu laud iei me Sehdan wiahiong Krais. ‘Mepwukat koaros I pahn kihong komwi, ma komw pahn poaridi oh pwongih ie.’​—Madiu 4:8, 9.

Ahpw, Sises, sohte kin wiahda tiahk en mwersuwed, oh e sukuhlikihong sapwellime werek kan en dehr mwersuwed. Sapwellimen Krais padahk kan kak wia mehn doadoahk lipwalipw en peiong mwersuwed nan rahnwet? Artikel en mwuhr pahn kasawihada peidek wet.