Keperpen Wiewiahn Mwersuwed nan Koperment

Wiewiahn mwersuwed nan koperment wehwehki doadoahngki ni ahl sapwung ar manaman en kaunda ong pein kamwahuparail. Soangen wiewiahn mwersuwed wet wiawiher sangete mahs nan poadopoad. Karasepe, nan palien mwoalen kopwung, Paipel kihda kosonned me kaleke aramas akan ren dehr alehsang emen de kihong emen kisakis ehu de pweinen arail en wia me sapwung. Met kasalehda me tiahk wet kin kalapw wiawi sounpar 3,500 samwalahr ako. (Eksodus 23:8) Mehlel me wiewiahn mwersuwed kin pidada laudsang met. Kaun mwersuwed kan ekei pak kin pirapa kepwe kan, isanekihla sawas kan me sohte pwung ren ahneki, de pil pirapa sawas en mwohni kan me kohda. Re ele pil kin doadoahngki arail manaman ni sapahrek pwehn kin sewese kompoakparail kan oh arail peneinei kan.

Mendahki wiewiahn mwersuwed kak mie wasa koaros, e mwomwen me wiewiahn mwersuwed nan palien koperment me keieu suwed. Ripoht ehu sang Global Corruption Barometer en pahr 2013, me Transparency International wiahda kasalehda me aramas nan sampah pwon kin leme me wasa limau me wiewiahn mwersuwed keieu wiawi iei nan palien politik, palien polis, kaun en wehi kan, palien sounkou kosonned oh palien mwoalen kopwung. Tehk ekei ripoht kan me kasalehda kahpwal wet.

• APERIKA: Nan pahr 2013, nan Palieir en Aperika, kaun en wehi meh 22,000 samwa selikihdi arail wiewiahn mwersuwed kan.

• PALIEIR EN AMERIKA: Nan Brazil pahr 2012, aramas riehk limen me dierekda doadoahngkihla mwohni ong wehi pokon pwehn pwainda utuht sang palien politik. Nanpwungen irail pwukat iei kaun me wia keriaun lapalap nan sahpwo, me kin kakaun nein arail president en mahso (2003-05) nah tohndoadoahk kan.

• EISIA: Nan Seoul, Palieir en Korea, aramas 502 mehla nan sidohwa laud ehu me pwupwudi nan pahr 1995. Polis kan diarada me me lapalap kan wasao alehdi mwohni pwehn mweidohng sounkou ihmw ko en doadoahngki siment me luwet oh kauwehla kosonned me pid perehsang keper nan wasahn doadoahk.

• IUROP: Emen lapalap sang European Commission Home Affairs me adaneki Cecilia Malmström nda: “Uwen laud en kahpwal wet [wiewiahn mwersuwed nan Iurop] inenen kapwuriamwei.” E pil nda me “palien politik mwomwen sohte kin wia arail pwukoa en uhdahn kihsang wiewiahn mwersuwed.”

E uhdahn apwal aramas en kihsang wiewiahn mwersuwed nan koperment. Emen me samanih petehkpen tiahk wet, Professor Susan Rose-Ackerman, ntingihedi me “wekidekla kesempwal kan ni mwomwen ahn koperment kan kin wia pesines” uhdahn anahne wiawi pwe kahpwal wet en mwahula. Mehnda ma irairo mwomwen sohte mie koapworopwor, Paipel kasalehda me wekidekla laud kan kaidehn ihte kak wiawi ahpw e uhdahn pahn pweida.