Paipel Duwehte Pwuhk Teikan?

“Pwe audepen Pwuhk Sarawi unsek pwilisang rehn Koht, oh e mwahu . . . pwe irail kan me kin papah Koht en kak wia oh koahiekla ni soangen wiewia mwahu koaros.”​—2 TIMOTY 3:16, 17

EKEI aramas sohte kin pwungki me Paipel kin mwahu ong mehkoaros. A ia duwen kowe? Mehnia ire kan me kileldi pah pahn keieu pwungiong dahme ke kin medewehki Paipelo?

• Pwuhk kaselel ehu

• Pwuhk ehu me kesempwal duwehte pwuhk teikan me sarawi

• Pwuhk en poadopoad ehu me audaudki kosonned me pid tiahk mwahu de tiahk suwed

• Mahsen en Koht

Peidek ehu me pidada mepwukat iei, E kesempwal dahme ke kin kamehlele? Medewe dahme Paipel pein mahsanih: “Pwe mehkoaros me ntingdier nan Pwuhk Sarawi e ntingdier pwe en padahkih kitail, pwe kitail en ahneki koapworopwor sang ni kanengamah oh kakehlepen loalatail me Pwuhk Sarawi kin ketikihong kitail.” (Rom 15:4) Eri, Paipel pein mahsanih me kahrepen eh wiawihda iei en padahkih kitail, kakehlaka loalatail oh kihong kitail koapworopwor.

Ahpw ma Paipel wiahte pwuhk kaselel ehu de ehu pwuhk kan me sarawi, ke pahn likih me e pahn padahki oh kaweid omw peneinei, ahpw mehlel ma eh kaweid kan kin weksang dahme ke medewe me pwung? Ma Paipel wiahte pwuhk en soai kan, ke pahn ale kakehlepen loalomw oh koapworopwor sang dahme e inoukihda?

Ni pali teio, aramas rar kei me sukuhlki duwen Paipel kamehlelehier me ihete me Mahsen en Koht. Dahme kahrehda? Dahme kin kasalehda me Paipel weksang pwuhk teikan koaros? Se luke iuk ken tehk ire limau kan me kasalehda Paipel eh weksang pwuhk teikan nan iren mwuhr kan.