“Iet Mour Soutuk”

“Oh iet mour [“mour soutuk,” NW]: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”​—SOHN 17:3.

LOALOKONG kak doarehla mour. Ni ahnsou me Nouhou sounpwong eisek e soumwahuda. Eh nohno kin doadoahk wasahn apwalih soumwahu kan nan Niger oh e ese dahme e pahn wia. E wiahda nimen serio mehkot me doalkihda suke, soahl oh pihl mwakelekel pwehn kak kapwurehiong pihl nan paliweren serio. Ohpis ehu me adaneki UNICEF koasoia me pwehki eh “mwadang mwekid” oh kak ese duwen epwelpen soumwahu kan, nah serio mwadang mwahula.”

Loalokong sang nan Paipel pil kak doarehla mour. Tepin sounnting en Paipel Moses koasoia: “Kaidehk padahk me sohte audepe kei met. Ih amwail mour unsek met. Kumwail peikiong padahk pwukat, kumwail ahpw pahn mour werei.” (Deuderonomi 32:47) Ia duwe, Paipel uhdahn kak kareireiihala atail mour? Ni ahl dah me met kin wehwehki atail mour?

Ire limau me pwaradahr mwoweo kasalehda me Paipel iei pwuhk ehu me sohte pahrekiong pwuhk teikan me ke kak likih duwen eh kokohp, poadopoad, pwungiong sains, audepe pwon uhdahn ehupene oh kihda kaweid mwahu. Met kasalehda me Paipel weksang pwuhk teikan. Eri, ni Paipel eh kin kasalehda elen mour werei me iei mour soutuk, ke sou pahn men tehk kanahieng dahme e mahsanih?

Se kangoange iuk ken sukuhlki ia duwen loalokong pwung en Paipel eh kak kahrehiong uhk ken ahneki madamadau meleilei ni ahnsou wet oh peren ni ahnsou kohkohdo. Sounkadehdehn Siohwa kan pahn perenki kasalehiong uhk ia duwen omw kak alehdi loalokong wet.

[Koakon/Kilel nan pali 9]

Paipel pil weksang pwuhk teikan pwehki ih kelehpw me kin kihda pasapeng konehng kan ong peidek kesempwal kan me kitail kin idek:

• Dahme kahrehda kitail miehki?

• Dahme kahrehda miehki lokolok laud?

• Mie koapworopwor ong kompoakepahi me melahr akan?

Ke kak diar pasapengpen peidek pwukat nan pwuhk wet, Dahme Paipel Uhdahn Padahngki?, me Sounkadehdehn Siohwa kan wiahda.