Ia Duwen Atail Kak Kolokol Irair en Tounmetei?

1. Ia duwen Sises eh ketikihda mehn kahlemeng mwahu duwen tounmetei?

AHNSOU me Sises ketiket sampah, e ketikihda mehn kahlemeng mwahu duwen tounmetei. E kin ketin mwohneki kupwuren Koht laudsang pein nsene de dahme pahn mwahu ong pein ih. (Sohn 5:30) Sang ni eh ketin lelepek lao e ketin pwoula pohn tuhkehn kalokoloko, e ketin kadehdehda me sohte irepen sapwellime irair en tounmetei.​—Pil. 2:8.

2. Ia duwen atail kak ahneki irair en tounmetei? Dahme kahrehda kitail anahne ahneki irair wet?

² Nin duwen sapwellimen Sises tohnpadahk kan, kitail pil anahne kasalehda irair en tounmetei. Ia wehwehn en ahneki irair en tounmetei? E kin wehwehki me emen kin mendahkihla dahme e mwahuki pwehn sewese meteikan. E weksang roporop ong pein ih. (Wadek Madiu 16:24.) Atail sohte roporop kak sewese kitail en mwohneki pepehm oh nsenen meteikan laudsang pein atail. (Pil. 2:3, 4) Sises ketin padahngki me soh roporop iei me keieu kesempwal nan atail kaudok. Ia duwen? Limpoak en Kristian kin kamwakid kitail en ahneki irair en tounmetei. Limpoak wet iei kilelepen sapwellimen Sises tohnpadahk mehlel kan. (Sohn 13:34, 35) Medewehla kapai kan me kitail ahneki pwehki atail wia kisehn pirien en Kristian kan sampah pwon me kin kasalehda irair en tounmetei.

3. Dahme kak kaluwetehla atail irair en tounmetei?

³ Ahpw mie soangen pepehm ehu rehtail me rasehng imwintihti men me kak ekisekis kaluwetehla atail irair en tounmetei. Pepehm wet iei roporop. Tamanda me Adam oh Ihp kasalehda irair en roporop. Ihp kasalehda roporop ni eh men duwehla Koht. Adam kasalehda roporop ni eh men kaperenda eh pwoudo. (Sen. 3:5, 6) Mwurin Tepilo kahrehiong Adam oh Ihp en sohpeisang kaudok mehlel, e kin pousehlahte kasonge aramas akan ren kasalehda pepehm en roporop. E pil song en wia met ong Sises. (Mad. 4:1-9) Nan atail ahnsou, Sehdan kin pweida ni eh pitihedi pali laud en aramas akan oh kin kahrehiong irail en kasalehda roporop ni ahl tohto. Ma kitail sohte kanahieng, madamadau en roporop en sampah wet pil kak kamwakid kitail.​—Ep. 2:2.

4. (a) Kitail kak kihsang pepehm en roporop ahnsou wet? Menlau kawehwehda. (b) Peidek dah kan kitail pahn koasoiapene?

⁴ Roporop ele kak kapahrekiong mer. Ma mete ehu sohte nekinekla mwahu oh kin mi wasa wisekesek, e pahn tepida mer. E uhdahn keper en mweidohng mer en mihla ni mehkot me wiawihkihda mete pwehki e kak kahrehda meteo en mwerpeseng. Pil duwehte, mendahki ahnsou wet kitail sohte kak kihsang atail soh unsek oh pepehm en roporop, kitail anahne pousehlahte pelian. Ma kitail sohte kanahieng, atail irair en tounmetei pahn ohla. (1 Kor. 9:26, 27) Ia duwen atail kak esehda me mie pepehm en roporop rehtail? Ia duwen atail kak kamwahwihala atail irair en tounmetei?

DOADOAHNGKI PAIPEL PWEHN TEHK IRAIR EN ROPOROP

5. (a) Ia duwen Paipel eh duwehte kilahs en ireirong? (Menlau kilang tepin kilel.) (b) Ni atail kin tehk ma kitail ahneki irair en roporop, dahme kitail en dehr wia?

⁵ Duwehte atail kin irongen nan kilahs ehu pwehn kilang mwomwatail, kitail pil kak doadoahngki Paipel pwehn tehk mwomwatail oh kapwungala soahng sapwung kan rehtail. (Wadek Seims 1:22-25.) Ahpw kilahs ehu pahn sewese kitail kamwahwihala mwomwatail ihte ma kitail doadoahngki ni pwung. Karasepe, ma kitail irongen nan kilahs ehu ahnsou kiste, ele kitail sohte pahn tehkada soahng tikitik ehu me kakete kamwomwsuwedihala mwomwatail. De ma kitail kilang sang ni keimwen kilahso, kitail pahn uhd kilangada emen tohrohr. Pil duwehte, pwehn doadoahngki Paipel pwehn tehk kahpwal ehu, me duwehte irair en roporop rehtail, kitail anahne wia laudsang ihte wadek ahnsou kiste de wadek pwehn kilangki ahn meteikan sapwung.

6. Ia duwen atail kin dadaurete kosonned unseko?

⁶ Karasepe, kitail kak wadek Mahsen en Koht rahn koaros ahpw sohte uhdahn kilang pepehm en roporop me wie kekeirda loalatail. Ia duwen met eh kak wiawi? Medewehla met: Nan karasaras en ohl me irongen nan kilahs oh kin “kilang uhdahn mwomwen pein ih,” wahnpoaron Seims doadoahngki lepin lokaiahn Krihk ehu me wehwehki en tehk kanahieng. Eri, ohlo kin tehk kanahieng ni eh irongen nan kilahso, ahpw pil miehte kahpwal ehu. Seims doula nda: “A ni eh kin keisang ni kilahso, e kin mwadang manokehla mwomwe.” Ei, e sohte wiahiong mehkot mwomweo ni eh keisang kilahso. Weksang met, ohl me pweidao sohte kin ihte “tehk mwahu kosonned unseko” ahpw e pil kin “dadaurete” kosonnedo. Eri e sohte kin manokehla kosonned unsek en Mahsen en Koht, ahpw e kin “dadaurete,” de pousehlahte idawehn padahk kan sang loale. Sises pil ketin kasalehda ire ehu me duwehte met ni eh mahsanih: “Ma kumwail pahn peikiong [“dadaurete,” NW] ei padahk kan, kumwail uhdahn pahn wiahla nei tohnpadahk mehlel.”​—Sohn 8:31.

7. Ia duwen atail kak doadoahngki Paipel pwehn tehk ma mie pepehm en roporop rehtail?

⁷ Eri pwehn pelianda pepehm en roporop, ke anahne mahs wadek kanahieng Mahsen en Koht. Met ele kak seweseiuk kilangada dahme ke anahne kamwahwihala. Ahpw ke anahne wia laud sang met. Ke anahne kasawih dahme ke wadek Ni omw wadek poadopoad en Paipel ehu, medewehla me ke mi mwo. Idek rehmw soangen peidek pwukat: ‘Dahme I pahn wia nan soangen irairo? I pahn wia dahme pwung?’ Keieu kesempwal, mwurin omw doudouloale dahme ke wadek, wia uwen omw kak pwehn kapwaiada. (Mad. 7:24, 25) Kitail pahn kilang ia duwen koasoipen Nanmwarki Sohl oh wahnpoaron Piter eh kak sewese kitail en kolokol irair en tounmetei.

MEHN KAHLEMENG EN NANMWARKI SOHL WIA MEHN KATAMAN

8. Ni Sohl eh tepida wia nanmwarki men, soangen irair dah me e ahneki? Ia duwen eh kasalehda met?

⁸ Mehn kahlemeng en Nanmwarki Sohl wia mehn kataman ehu ong kitail duwen roporop eh kak kauwehla atail irair en tounmetei. Ni Sohl eh tepida wia nanmwarki men, e kin aktikitik oh pohnese eh soh itar kan. (1 Sam. 9:21) “Nin duwen emen me sehsehlahr lokaia,” e pilada ni aktikitik en sohte kaloke ekei mehn Israel ko me kauwe eh kaunda mendahki arail pelianda manaman me Koht ketikihong ih. (1 Sam. 10:27, NW) Nanmwarki Sohl mweidohng sapwellimen Koht manaman en kaweid ih ni eh kahluwa mehn Israel kan oh mahweniong mehn Amon kan oh kana. Mwurin mwo, e kasalehda ni aktikitik me Siohwa kelehpw me warohng ale kaping pwehki arail kana.​—1 Sam. 11:6, 11-13.

9. Ia duwen Sohl eh kakairada irair en roporop?

⁹ Mwuhr, Sohl mweidohng madamadau en roporop oh pohnmwahso en kekeirda nan eh mohngiong, duwehte mer eh kin kaluwetehla mete. Ni eh kalowehdi mehn Amalek ko nan mahwen, e nsenohkihte dahme e mwahuki laudsang eh peikiong Siohwa. Pwehki eh noahrok, e sohte kasohrehla ahn mehn Amalek ko kepwe kan nin duwen me Koht ketin kehkehlingkihong, ahpw e uhd koledi. Sohl uhdahn pohnmwahso me kahrehda en wiahiong ih sansal takai ehu. (1 Sam. 15:3, 9, 12) Ahnsou me soukohp Samuel padahkihong me Siohwa sohte kupwurki dahme e wiahdao, Sohl kihda kahrepe kan oh koasoiahte wasa kan me e kapwaiada nan sapwellimen Koht kehkehliko. E pil kapwukoahki meteikan eh sapwungo. (1 Sam. 15:16-21) En Sohl eh pohnmwahso kahrehiong ih en nsenohkihte eh adamwahu laudsang eh nanpwungmwahu rehn Koht. (1 Sam. 15:30) Ia duwen atail kak doadoahngki mehn kahlemeng en Sohl nin duwen kilahs en ireirong ehu pwehn sewese kitail kolokol atail irair en tounmetei?

10, 11. (a) Dahme mehn kahlemeng en Sohl padahkihong kitail duwen atail en kolokol irair en tounmetei? (b) Ia duwen atail kak soikala mehn kahlemeng suwed en Sohl?

¹⁰ Keieu, dahme wiawihong Sohl padahkihong kitail en dehr nohn koapworopworki pein kitail. Irair en tounmetei sohte kin pein miehla, ihme kahrehda ahnsou koaros kitail anahne nantihong kamwahwihala. (1 Tim. 4:10) Tamataman me Sohl mwahu nin tapio oh erein ahnsou ehu, e kaperenda kupwuren Koht. Ahpw e sohte nantihong kihsang eh pepehm en roporop me e tepida ahneki. Mwuhr, Siohwa sohla ketin kupwurki Sohl pwehki eh sapeik.

¹¹ Keriau, kitail en dehr kilangwohngete soahng mwahu kan me kitail wiewia oh pohnsehsehla soahng kan me kitail anahne kamwahwihala. Met pahn duwehte omw doadoahngki kilahs en ireirong ehu pwehn kilangki omw likou kaselel ehu ahpw sohte tehk me mie kisin pwehl kis pohn mesomw. Mehnda ma kitail sohte kin pohnmwahso de nohn koapworopworki pein kitail duwehte Sohl, kitail en soikala soangen pepehm koaros me kakete kahrehiong kitail en lelohng nan soangen imwila suwedohte. Ma kitail ale kaweid, dehr duwehte Sohl me kihda kahrepe kan de kapwukoahki emen tohrohr. E uhdahn mwahu ma ke kin men ale kaweid kan.​—Wadek Lepin Padahk 25:12.

12. Ia duwen irair en tounmetei eh kak sewese kitail ma kitail wiahda dihp laud ehu?

¹² Ahpw ia duwen ma kitail wiahda dihp laud ehu? Sohl men kolokolte eh adamwahu oh met irehsang ih en kamwahwihala eh nanpwungmwahu rehn Siohwa. Weksang met, irair en tounmetei kak kamwakid kitail en ale sawas sohte lipilipil ma met wia mehkot kanamenek ong kitail. (Lep. Pad. 28:13; Seims 5:14-16) Karasepe, emen brother tepida kilang kilel suwed ni eh sounpar 12 oh e pousehlahte wia met ni rir dauliher sounpar eisek. E nda: “E uhdahn apwal en wehkohng ei pwoudo oh elder ko dahme I wiewia. Ahpw met pwehki ahi ndaiong irail, I pehm me I solahr weuwa mehkot toutou. Ekei kompoakepahi ko nsensuwedkihla ei sohla wia sounsawas men nan mwomwohdiso, mwomwen me I sohte wiahda dahme re kasik sang ie. Ahpw I ese me Siohwa ketin kupwurperenki ei papah ih met laudsang ni ahnsou me I kin kilikilang kasdo suwed. Kupwure iei me keieu kesempwal ong ie.”

AHN PITER MEHN KAHLEMENG KIN KANGOANGE KITAIL

13, 14. Ia duwen Piter eh kasalehda irair en roporop?

¹³ Wahnpoaron Piter kasalehda irair en tounmetei erein Sises eh ketin padahkih ih. (Luk 5:3-11) Ahpw e pil anahne pwurepwurehng pelian eh pepehm en roporop. Karasepe, e lingeringerda ahnsou me wahnpoaron Seims oh Sohn peki rehn Sises dewera nan Wehin Koht. Ele Piter leme me ih me pahn alehdi wasa pwukat pwehki Sises ketin padahkihongehr ih me e pahn alehdi pwukoa kesempwal ehu. (Mad. 16:18, 19) Sises ketin katamankihong Seims, Sohn, Piter oh wahnpoaron teikan ren dehr roporop oh medewe me re mwahusang riarail kan.​—Mark 10:35-45.

¹⁴ Mendahki mwurin Sises song en ketin kapwungala ahn Piter madamadau, Piter kasalehdahte pepehm en roporop. Ni Sises eh ketin padahkihong wahnpoaron ako me irail pahn tangasang ih ahnsou kis, Piter nda me ih kelehpw me sohte pahn tangasang. E mwomwen wia me e mwahusang meteiko. (Mad. 26:31-33) E sapwung en koapworopworki pein ih pwehki ni pwongohte, Piter sohte kasalehda irair en tounmetei. Pwehn pere pein ih, pak siluh e kahmahmkihla me e ese Sises.—Mad. 26:69-75.

15. Dahme kahrehda ahn Piter mehn kahlemeng kin kangoange kitail?

¹⁵ Mendahki Piter ekei pak kin nannanti ahpw sohte pweida, eh mehn kahlemeng kin kangoange kitail. Pwehki eh nannanti oh pil sawas sang sapwellimen Koht manaman, Piter kak powehdi eh pepehm en roporop. Mwuhr e kasalehda kanengamah oh limpoak me poahsoankihda irair en tounmetei. (Kal. 5:22, 23) E dadaur pahn kahpwal tohto me ele mwoweo e sohte kakohng. Karasepe, ni wahnpoaron Pohl eh panawih laud Piter mwohn meteiko, Piter kasalehda aktikitik. (Kal. 2:11-14) Mwurin e alehdi kaweid, Piter sohte kolokol eh mwakar pahn Pohl oh pehm me e adsuwedla. Ahpw e pousehlahte koasoiong Pohl nin duwen ‘rie kompoakepah.’ (2 Pit. 3:15) Ahn Piter mehn kahlemeng kin sewese kitail en kalaudehla atail irair en tounmetei.

16. Ia duwen atail kak kasalehda irair en tounmetei nan ahnsou apwal kan?

¹⁶ Medewehla ia duwen omw pahn mwekid nan ahnsou apwal kan. Ni Piter oh wahnpoaron teiko ar selidi nan imweteng oh wowoki pwehki arail doadoahk en kalohk, re perenkihda ar “lokolongki saroh” pwehki Sises. (Wiewia 5:41) Ni ahnsoun kalokolok kan, ke pil kak isaneki ahnsou ko en alasang Piter oh idawehn Sises ni omw kasalehda irair en tounmetei. (Wadek 1 Piter 2:20, 21.) Soangen madamadau wet kak pil seweseiuk ma ke ale peneu sang rehn elder kan. Dehr nsensuwedkihla, ahpw alasang ahn Piter mehn kahlemeng.​—Ekl. 7:9.

17, 18. (a) Peidek dah kan me kitail kak idek me pid atail mehn akadei kan? (b) Dahme kitail kak wia ma kitail tehkada me pepehm en roporop mi loalatail?

¹⁷ Ahn Piter mehn kahlemeng pil kak seweseiuk ken wiahda mehn akadei kan nan omw kaudokiong Siohwa. Ke kak nantihong lel mehn akadei pwukat ni omw kasalehda irair en tounmetei. Ahpw kanahieng ken dehr wiahda mehn akadei kan pwehki ke men wia aramas kesempwal men. Idek rehmw: ‘Dahme kahrehda I men kamwahwihala de kalaudehla ei papah Siohwa? I men wia met pwehn ale kaping sang meteikan de pwehn alehdi pwukoa laud, duwehte me Seims oh Sohn men wia?’

¹⁸ Ma ke tehkada me irair en roporop wie kekeirda loalomw, peki rehn Siohwa en ketin seweseiuk kapwungala omw madamadau oh pepehm. Kowe eri doadoahk laud ong ni kalinganpen Siohwa ahpw kaidehn ong uhk. (Mel. 86:11) Ke pil kak wiahda mehn akadei kan me sohte pahn wahdo kaping ong pein uhk. Karasepe, ke kak song en kamwahwihala omw kasalehda ehu irair en wahn sapwellimen Koht manaman ko me ke apwalki kasalehda. De ma ke kin doadoahk laud en wiahda omw padahk de kamwomwada kan nan mihting kan ahpw sohte perenki kamwakele Wasahn Kaudok, ke kak akadeiong ken kapwaiada kaweid en Rom 12:16.​—Wadek.

19. Dahme kitail kak wia pwe kitail en dehr nsensuwedkihla dahme kitail kilangada nan Mahsen en Koht me rasehng kilahs ehu?

¹⁹ Ni atail kin doadoahngki Mahsen en Koht, me rasehng kilahs en ireirong ehu, pwehn tehk kanahieng mwomwatail oh kilang sapwung kan de pepehm en roporop rehtail, kitail kakete nsensuwedla. Ma met wiawihong uhk, tamataman ahn Seims karasaras en ohl me pweidao. Seims sohte nda uwen mwadang en ohlo eh kamwahwihala kahpwal kan me e kilangada de eh kak kapwungala sapwung ko koaros. Ahpw Seims nda me ohlo dadaurete nan “kosonned unseko.” (Seims 1:25) Ohlo taman dahme e kilang nan kilahs en ireirongo oh nantihong kamwahwihala pein ih. Eri ken ahneki madamadau pwung duwen pein uhk oh tamataman me kitail koaros sohte unsek. (Wadek Eklesiasdes 7:20.) Siohwa ketin kupwurki seweseiuk ni ahlohte me e ketin sewese riatail Kristian tohto teikan. Ma ke idawehn padahk kan sang nan Paipel oh pousehlahte kasalehda irair en tounmetei, Koht pahn ketin kupwuramwahwihiuk oh kapaiaiukada.