Peidek Kan En Paipel Pasapengla

Mie kahrepen sampah wet eh wiawihda?

Sampah wet wiawihda ni ahl ehu me mwahu ong mour. Pihl inenen laud oh met kesempwal ong mour. Piripir en sampah, eh kin pidakih ketipino oh pil mwomwen eh pangapang kin kahrehda nansed en dehr nohk lemwulemwurla oh kekeluwakala oh en pil dehr karakarala. Nan wehwe oh pil makinet me kapilpene sampah kin pere sang sampah ahng ehu (radiation) me keper ong mour. Mwomwen mahn akan oh tuhke oh dihpw kan ar kin anahne emenemen pwe ren wie momour nin sampah kin uhdahn kapwuriamwei. Kahrehda, me tohto kamehlele me mie kahrepen sampah wet eh wiawihda.​—Wadek Aiseia 45:18.

Ahpw ele ke medewe, ‘Met wehwehki me lokolok oh wiewia sapahrek wia kisehnte kahrepe wet?’​—Wadek Deuderonomi 32:4, 5.

Kahrepeo me sampah wiawihkihda pahn uhdahn pweida?

Sampah wet wiawihda pwehn wia wasahn kousoan mwahu ehu ong aramas me kin wauneki emenemen oh pil poakohng Sounkapikparail. Kahrehda, mouren aramas weksang mour en tuhke kan de mahn akan. Kitail kak wehwehki ihs Sounkapikpatail oh pil kak kalahnganki oh alasang sapwellime irair en limpoak oh pwung pahrek.​—Wadek Eklesiasdes 12:13; Maika 6:8.

Sounkapikpatail kak ketin kapwaiada soahng koaros me e ketin kupwurki wia. Eri kitail kak kamehlele me e pahn ketikihsang lokolok oh wiewia sapahrek oh ketin kahrehiong sampah wet en wiahla wasahn kousoan mwahu ehu ong aramas.​—Wadek Melkahka 37:11, 29; Aiseia 55:11.