OARALAP | IA DUWE, KOHT KETIN NSENOHKIN UHK
Koht Ketin Wehwehkin Uhk
“Maing Kaun, komw ketin kasawih ie, eri, komw ketin mwahngih ie.”—MELKAHKA 139:1.
DAHME KAHREHDA EKEI KIN PEIKASAL: Aramas tohto kin leme me Koht kin ketin ihte kilangwohng aramas akan nin duwen me dipan ekei—samin oh sohte warohng Koht en ketin tehk irail. Kendra, me ahneki pwunod laud, nsensuwed laud pwehki e pehm me e sohte kak wia soahng koaros me Koht ketin kupwurki en wia. Imwilahn met e nda: “I solahr kin kapakap.”
DAHME MAHSEN EN KOHT KIN PADAHNGKI: Siohwa sohte kin tetehk atail soh unsek kan ahpw e kin ketin wehwehki uhdahn soangen aramas dah kitail. Paipel mahsanih: “Pwe e mwahngih dahme kitail wiawihkihda; e pil ketin tamataman me kitail uhdahn pwehl.” Ahpw laudsang met, e sohte kin ketin dupukohng kitail “nin duwen dipatail kan,” ahpw e kin ketin mahkohng kitail ni atail kin koluhla.—Melkahka 103:10, 14.
Medewehla nanmwarki en Israel Depit me kitail koasoiahier nin tepin oaralap pwukat. Ni eh kapakap ong Koht, Depit nda: “Komw ketin mahsanihieier mwohn ei ipwidi. Rahn akan en mouriet kileldi nan sapwellimomwi pwuhk . . . Maing Koht, komw ketin kasawih ie, pwe komwi en mwahngih mohngiongiet. (Mel. 139:16, 23) Ei, Depit uhdahn kamehlele me mendahki ma e dipada, pil ekei pak inenen laud, Siohwa Koht kak ketin mwahngih me e koluhla mehlel.
Siohwa ketin wehwehkin uhk laudsang aramas akan kin wia. Paipel mahsanih: “Aramas kin kasawih mwomwen aramas, ahpw ngehi, I kin kasawih nan mohngiong en aramas akan.” (1 Sam. 16:7) Koht ketin mwahngih kahrepen mwomwen omw mwekid kan—dahme ke sohsohki, mwomwen omw kekeirda, soangen wasa me ke keirda ie, oh soangen aramas dah kowe. E ketin mahsanih oh ketin kesempwalki soangen aramas dah me ke nanti en wiahla, mendahki ma ke kin wiahda sapwung.
Eri ia duwen Koht eh kin ketin doadoahngki ire kan me e mwahngih duwen kowe pwehn kamweitala iuk?