PEIDEK KAN SANG SOUNWADAWAD KAN
Soupoad kan oh pwuhk kan likin Paipel kin utung me Pontius Pailet uhdahn mie mahso?
Sounwadawad kan en Paipel ese ihs Pontius Pailet pwehki dahme e wiahda ni ahnsou me Sises ketin ale kopwung oh kamakamla. (Madiu 27:1, 2, 24-26) Edeo pil sansalda pak tohto nan pwuhken poadopoad kan me wiawihda kerendo. Nin duwen me ehu pwuhk kasalehda, kisin doaropwe oh pwuhken poadopoad kan kin kasalehda duwen ih “laudsang oh pisetik sang kepina en Rom kan koaros nan Sudia.”—The Anchor Bible Dictionary.
Eden Pailet kin keieu kalapw pwarada nan nein Josephus, soupoad en Suhs, nah pwuhk kan. Ohl menet ntingihdi duwen irair siluh me pidada kahpwal kan me Pailet lelohng ni eh kakaun nan Sudia. Soupoad en Suhs me ede Philo pil kilelehdi kapahieu en irair me lelohng Pailet. Sounnting en Rom Tacitus, me ntingihdi poadopoad en nanmwarki kan en Rom, kadehdehda me Pontius Pailet kamanahla kamakamlahn Sises ni mwehin kaundahn Daipirius.
Nan pahr 1961, sounsukuhlki dipwisou kan en mahs me weir pwehl wasahn mwadong en mahs en Rom nan Sesaria, Israel, diarada kisin takai kis me kasalehda ni sansal eden Pailet ni lokaiahn Latin. Re kamehlele me lepin nting pwukat me mi ni kisin takai wet (nan kilel), uhdahn koasoia: “Pontius Pailet, Kepinahn Sudea, pahn kaundahn Daipirius, kihong met ong koht kan.” Ele dahme ntingdi kin dokedoke tehnpas sarawi ehu me wiawihda pwehn kawauwih Nanmwarki Daipirius en Rom.
Ia duwe, sounkalohk sister men anahne koaduhpwel ni eh wia onop en Paipel rehn emen ma sounkalohk brother men iang ih?
Nan oaralap “Peidek kan Sang Sounwadawad kan” me mi nan Kahn Iroir (lokaiahn wai) en July 15, 2002, e koasoia me sister kan anahne doadoahngki koaduhpwel ni ar wia onop en Paipel rehn emen ma brother men iang irail, sohte lipilipil ma brothero papidais de soh. Ahpw petehkpen ire wet wiawi mwuhr oh kasalehda me mie anahnepen wekidekla ehu ong kaweid wet.
Ma sister men wia onop en Paipel rehn emen oh sounkalohk brother men me papidaisehr iang ih, sistero uhdahn pahn men doadoahngki koaduhpwel. Eri, sistero kin kasalehda eh wauneki sapwellimen Siohwa koasoandi en tapwi nan mwomwohdisohn Kristian pwehki e wiewia pwukoa ehu me kin kalapw kohwong brother kan. (1 Kor. 11:5, 6, 10) De sistero kak peki rehn brothero en wia onop en Paipelo ma brothero koahiek oh pil kak wia.
Ahpw, ma sister men wia onop en Paipel rehn emen oh sounkalohk brother men iang ih ahpw brothero kaidehn eh pwoud oh e pil saikinte papidaisla, Paipel sohte kaweidki me sistero anahne doadoahngki koaduhpwel. Mendahki met, kadeikpen loalen ekei sister ele kamwakid irail en doadoahngki koaduhpwel pil nan soangen irair pwukat.