“Met Komw Ketin Wiahda Sang ni Pein Mwekid en nan Kupwuromwi”

1. Dahme kamwakid Sises en ketin “direkihla peren laud en nan kupwure” pwehki sapwellimen Koht manaman? (Menlau kilang tepin kilel.)

KE KAK medewehla ia mwomwen Sises Krais eh ketin “direkihla peren laud en nan kupwure” pwehki sapwellimen Koht manaman? Ele ke kilang pohn meseo eh ketin sirei oh silangiho eh perenda. Dahme kamwakidada ih? E ahpwtehn ketin poaronehla sapwellime tohnpadahk 70a pwehn kalohki rongamwahu en Wehin Koht. E uhdahn kupwurki mwahngih ia duwen arail pahn kapwaiada arail pwukoa. Mie imwintihti lapalap tohto me kailongki rongamwahwo, duwehte sounkawehwehn kosonned ko oh Parisi ko me loalokong oh ale kasukuhl laud. Irail kin kangoange me tohto en kilangdiohng Sises nin duwen emen me wiahte kapinte men oh pil kilangwohng sapwellime tohnpadahk ko nin duwen aramas kei me “sohte wad oh pil sohte iang sukuhl.” (Wiewia 4:13; Mark 6:3) Ahpw mendahki met, tohnpadahk ko pwurasang arail doadoahko uhdahn peren. Re kalohk mendahki uhwong kan sang aramas oh pil ngehn saut kan. Dahme kahrehiong ren peren oh eimah?​—Wadek Luk 10:1, 17-21.

2. (a) Ia duwen sapwellimen Sises tohnpadahk kan ar mwomwen duwehte seri kei? (b) Dahme kahrehiong sapwellimen Sises tohnpadahk kan en kak wehwehkihla padahk mehlel kan?

² Tehk dahme Sises patohwanohng Siohwa: “Semei, Kaunen nanleng oh sampah! I kapingahkin komwi omwi ketin kasalehiong me soaloalokong kan [“seri kan,” NW] mehkan me komw ketin ekihsang me koahiek oh loalokong en sampah kan. Ei, Maing Semei, met wiawiher sang ni pein kupwuromwi.” (Mad. 11:25, 26) Sises sohte mahmahsanih me sapwellime tohnpadahk ko wia seri kei. Ahpw, kapahrekihong irail kan me loalokong oh ale kasukuhl laud me kin pein medewe me re loalokong, Sises mwahngih me sapwellime tohnpadahk ko kin mwomwen duwehte seri kei. Kesempwal sang met, Sises ketin padahkihong sapwellime tohnpadahk ko ren duwehte seri kan me kin aktikitik oh perenki ale kasukuhl. (Mad. 18:1-4) Ia duwen arail paiekihda arail kin aktikitik? Siohwa ketin doadoahngki sapwellime manaman en sewese irail en wehwehkihla padahk mehlel kesempwal kan. Ahpw irail me loalokong ko, me kin mwamwahliki tohnpadahk ko, re mweidohng arail pohnmwahso oh pil Sehdan en karotongehla irail.

3. Dahme kitail pahn koasoiapene nan iren onop wet?

³ Ihme kahrehda Sises uhdahn ketin perenda! E perenki ni eh kilang ahl me Siohwa ketin doadoahngki pwehn kasalehda padahk mehlel loal kan ong aramas aktikitik koaros, sohte lipilipil ma re loalokong, de ale kasukuhl laud de soh. E perenkihda me Semeo kin ketin kupwurki elen kasukuhl wet. Ia duwe, Siohwa ketin wekila? Ia duwen eh ketin kasalehda me e kupwurkihte elen kasukuhl wet? Ni atail pahn tehkpene pasapengpen met, kitail pahn diarada me elen kasukuhl wet kin wahdo peren, duwehte eh kaperenda Sises.

KAWEHWE PADAHK MEHLEL LOAL KAN PWE KOAROS EN KAK WEHWEHKI

4. Ia duwen Kahn Iroir me doadoahngki lokaia mengei eh wia kisakis kaselel ehu?

⁴ Nan sounpar kan me kerendo, kaweid me sapwellimen Koht pwihn kihda kin kalaudehla kesempwalpen elen kasukuhl me mengei oh sansal sang mahs. Kitail tehkpene karasaras siluh. Keieu iei neitail Kahn Iroir me doadoahngki lokaia mengei (simplified edition).b Kahn Iroir wet wia kisakis kaselel ehu ong irail kan me kin apwalki wehwehki de wadek ehu lokaia tohrohr. Tapwin peneinei kan diarada me neirail seri kan kin kalapw kihda pasapeng tohtohsang mahs ni arail onopki Kahn Iroir wet. Kisin pwuhk wet iei elen sawas me kitail kin keieu doadoahngki pwehn sewese kitail wehwehkihla padahk mehlel. Aramas tohto ntingihda ia uwen arail kalahnganki met. Emen sister ntingihdi me e kin pweiek en pasapeng ni ahnsoun Onop en Kahn Iroir mahso. E nda: “I kin namenek oh sohte men pasapeng.” Ahpw met e solahr namenek. Mwurin eh doadoahngki Kahn Iroir me doadoahngki lokaia mengei, e ntingihdi: “Met I kin pasapeng tohtohsang pak ehu, oh I solahr masak! I kalahngankihong Siohwa oh pil kumwail.”

5. Ia ekei kamwahu kan sang neitail kawehwehn Paipel kapwo (New World Translation of the Holy Scriptures)?

⁵ Keriau, mie neitail kawehwehn Paipel kapw (New World Translation of the Holy Scriptures) me pwurehng wiawihda ni ahl me mengei en wehwehki. Pwuhk wet wiawihda ni lokaiahn wai oh e kohpeseng ni atail mihting en pahr me wiawi October 5, 2013.c Mie iretikitik tohto me met doadoahngki lepin lokaia malaulaute, ahpw wehwehn ire ko sohte wekila oh pil e mengei en wehwehki. Karasepe, Sohp 10:1 doadoahngki lepin lokaia 27 mwoweo, ahpw met lepin lokaia 19 te. Lepin Padahk 8:6 doadoahngki lepin lokaia 20, ahpw met meh 13 te. Nan kawehwehn Paipel kapw wet, iretikitik riau pwukat sansalla sang mwoweo. Ni mehlel, emen brother me keidi me kin papah Siohwa ni loalopwoat erein ahnsou reirei nda: “I ahpwtehn wadekala pwuhken Sohp nan Paipel kapw wet oh I pehm me I ahpwtehn wehwehkihla!” Me tohto pil nda soahngohte.

6. Ia omw madamadau ong wekidekla kan me pid atail wehwehkihla Madiu 24:45-47?

⁶ Kesiluh, medewehla ekei wekidekla kan me wiawi kerendo me pid atail wehwehkihla padahk mehlel. Karasepe, kitail perenkihda atail wehwehkihla ni sansal ihs “ladu lelepek oh loalokongo” me mi nan neitail Kahn Iroir en July 1, 2013. (Mad. 24:45-47, NW) Kahn Iroiro kawehwehda me ladu lelepeko iei Pwihn me Kin Apwalih Mwomwohdiso nan Sampah Pwon, oh “papah teikan” iei koaros me kin sukusukuhlki padahk mehlel, sohte lipilipil ma re keidi de irail “sihpw teikan.” (Sohn 10:16, NW) Ia uwen kaperen en sukuhlki padahk mehlel pwukat oh padahkihong irail me kapw kan! Ni ahl dah teikan me Siohwa ketin kasalehda me e kin kupwurki elen kasukuhl me mengei oh sansal?

WEHWEHKIHLA KOASOIPEN PAIPEL KAN NI AHL ME MENGEI OH SANSAL

7, 8. Ia ekei karasaras en kokohp kan nan Paipel?

⁷ Ma ke papahkier Siohwa erein sounpar tohto, ele ke kin tehk duwen wekidekla kan me ekisekis wiawi ong mwomwen neitail sawaspen Paipel kan ar kawehwehda koasoipen Paipel tohto. Ia duwen? Mahso, neitail pwuhk kan kin kalapw kawehwehda dahme wiawi mahs me kileldi nan Paipel oh dahme soahng pwukat kin mwuhr karasaraskihong. Ia duwe, Paipel kin doadoahngki wiepe wet? Ei. Karasepe, Sises mahsanih duwen “manaman [“kilel,” NW] en soukohp Sona.” (Wadek Madiu 12:39, 40.) Sises ketin kawehwehda me ahnsowo me Sona mihmi nan kapehden mwahmwo kin karasaraskihong ahnsowo me e ketiket nan sousou.

⁸ Pil mie karasaras en kokohp teikan me mi nan Paipel. Wahnpoaron Pohl koasoiahda ekei. Karasepe, nanpwungen Eipraam, Akar oh Sara kin karasahiong kokohp me pid nanpwungen Siohwa, wehin Israel oh sapwellimen Koht pwihn nanleng. (Kal. 4:22-26) Duwehte met, impwal sarawio oh tehnpas sarawio, Rahnen Tomw, samworo lapalapo, oh soahng teikan me mi nan Kosonned en Moseso kin “wia kamwomwada soh dehde ehu en kamwahu kan me pahn kohdo.” (Ipru 9:23-25; 10:1) Atail onopki karasaras en kokohp pwukat kin kaperen oh pil kin kalaudehla atail pwoson. Ahpw ia duwe, kitail kak nda me aramas, dipwisou de mwekid koaros nan koasoipen Paipelo kin mwete aramas men de soahng ehu?

9. Ia duwen atail kawehwehda koasoipen Napod nan Paipel mahso?

⁹ Kitail kin kalapw doadoahngki wiepe wet mahso. Karasepe, medewehla koasoipen Napod, me lih nanmwarki suwedo Sesepel wiahiong kopwung sapahrek oh kemehla pwe en Sesepel pwoudo, Eihap, en kak ahnekihla eh mwetuwel en waino. (1 Nan. 21:1-16) Nan pahr 1932, koasoipen Paipel wet kin kawehwehdi nin duwen karasaras en kokohp ehu. Eihap oh Sesepel kin karasaraskihong Sehdan oh eh pwihn; Napod karasaraskihong Sises; eri, kamakamlahn Napod kin karasaraskihong kamakamlahn Sises. Ahpw, pwuhk me wiawihda nan pahr 1961 (“Let Your Name Be Sanctified”) kasalehda me Napod kin karasaraskihong me keidi kan, oh Sesepel karasaraskihong pwihn en Kristian likamw kan. Eri, kalokolok me Sesepel wiahiong Napod kin karasaraskihong kalokolok me me keidi kan lelohng erein imwin rahn akan. Erein sounpar tohto, sapwellimen Koht aramas akan kin medewe me wiepe wet en kawehwehdi koasoipen Paipel kin kalaudehla arail pwoson. Eri, dahme kahrehda mie wekidekla kan?

10. (a) Ni ahl dah kei “ladu lelepek oh loalokongo” kin kanahieng laudsang mahs ni eh kin kawehwehda koasoipen Paipel kan? (b) Dahme neitail sawaspen Paipel kan kin kalapw kasalehda rahnpwukat?

¹⁰ Erein sounpar kan me dower powe, Siohwa ketin sewese “ladu lelepek oh loalokongo” en kin kanahieng laudsang mahs. Ni ahl dah? Met ladu lelepeko kin kanahieng eh nda me koasoipen Paipel ehu kin karasaraskihong mehkot laudsang, ihte ma mie kahrepe mwahu ehu me poahsoankihda Paipel en wia met. Patehng met, ladu lelepek oh loalokongo pil esehda me me tohto kin apwalki wehwehkihla ekei wiepen kawehwehn mahs me pid dahme wiawi mahs me kileldi nan Paipel oh dahme soahng pwukat kin karasaraskihong. Soahng pisetik kan en soangen padahk pwukat, duwehte ihs me karasaraso kin dokedoke oh dahme kahrehda, kak apwal en wehwehki, tamataman oh doadoahngki. Ahpw keieu kesempwal, ni atail nohnla nantihong wehwehkihla ia duwen karasaras pwukat ar kak pweida, mehn kasukuhl en koasoipen Paipelo ele sohla nohn sansal, de sohla mie. Kahrehda, rahnpwukat kitail kilang me neitail sawaspen Paipel kan kin kalapw kasalehda iren mehn kasukuhl me mengei oh mwahu ong kitail duwen pwoson, dadaur, poadidiong Koht, oh pil irair kaselel teikan me kitail kak sukuhlki sang koasoipen Paipel kan.d

11. (a) Ia duwen atail en wehwehki koasoipen Napod ahnsou wet? Dahme kahrehda eh mehn kahlemeng kak kamwakid kitail? (b) Dahme kahrehda neitail sawaspen Paipel kan rahnpwukat sohla kin kalapw koasoia dahme wiawi mahs me kileldi nan Paipel oh dahme soahng pwuko kin karasaraskihong?

¹¹ Eri, ia duwen atail en wehwehki koasoipen Napod ahnsou wet? Kitail en wehwehki ni ahl me sansal oh mengei. Ohl pwung menet mehla, kaidehn pwehki e wia karasaras en kokohp ehu duwen Sises de me keidi kan, ahpw pwehki eh kin lelepek. E peikihong sapwellimen Siohwa Kosonned ni eh lelohng wiewia sapahrek me uhdahn suwed. (Nemp. 36:7; 1 Nan. 21:3) Eri, eh mehn kahlemeng kak kamwakid kitail pwehki kitail koaros ele kak lelohng kalokolok pwehki soangen wiewia sapahrekohte me lelohng ih. (Wadek 2 Timoty 3:12.) Aramas sang wasa koaros kak mwadang wehwehki, tamataman, oh doadoahngki mehn kasukuhl wet me kak kalaudehla arail pwoson.

12. (a) Dahme kitail en dehr medewe me pid koasoipen Paipel kan? (b) Dahme kahrehda kitail kak wehwehkihla ni sansal padahk loal kan? (Menlau kilang nting tikitik kan.)

¹² Ia duwe, kitail en medewe me koasoipen Paipel kan kin wiahte mehn kasukuhl mwahu ehu ahpw sohte pil ehu wehwe tohrohr? Soh. Rahnpwukat neitail pwuhk kan kin padahngki me koasoipen Paipel ehu kin katamankihong kitail mehkot, de karasaraskihong mehkot. Pwuhk pwukat sohla nohn koasoia ni ahl me apwal dahme wiawi mahs me kileldi nan Paipel oh dahme soahng pwuko kin karasaraskihong. Karasepe, kitail kak koasoia ni pwung me lelepek en Napod ni ahnsoun kalokolok oh pil eh mehlao kin katamankihong kitail sapwellimen Krais lelepek oh pil lelepek en sapwellime me keidi kan. Kitail pil kak tamanda duwen lelepek en irail me tohto me wia sapwellimen Kauno “sihpw teikan.” Elen kapahrekihpene wet kin sansal oh mengei oh wia kilelepen sapwellimen Koht kasukuhl.e

WEHWEHKI NI AHL MENGEI SAPWELLIMEN SISES KARASARAS KAN

13. Dahme kasalehda me met kitail kin kawehwehda ekei sapwellimen Sises karasaras kan ni ahl me mengei oh sansal?

¹³ Sises Krais iei Sounpadahk me keieu lapalap nin sampah. Wiepen kasukuhl me e kin keieu ketin perenki wia iei en doadoahngki karasaras kan. (Mad. 13:34) E mwahu en doadoahngki karasaras kan pwehki re kin kawehwehda ire apwal kan ni ahl me mengei me kak kamwakid atail madamadau oh sair mohngiongitail. Ia duwe, neitail pwuhk kan pil kin kawehwehda sapwellimen Sises karasaras kan ni ahl me mengei oh sansal nan sounpar kan me dower powe? Ei, uhdahn! Kitail seu perenkihda atail alehdi kawehwe sansal duwen sapwellimen Sises karasaras kan me pid ihso, weren tuhke mustard, oh uhko nan Kahn Iroir en July 1, 2008? Met kitail kak wehwehkihla mwahu me karasaras pwukat kin dokedoke Wehin Koht oh pweida laud en doadoahk en katohrehla sapwellimen Krais tohnpadahk kan sang sampah suwed wet.

14. (a) Ia duwen atail kawehwe karasaras en ohl en Sameriao mahso? (b) Ia duwen atail wehwehki sapwellimen Sises karasaras wet ahnsou wet?

¹⁴ Ahpw, ia duwen koasoi de karasaras pisetik kan me Sises ketin mahsanih duwe? Mehlel, ekei kin wia karasaras kei de pil kin pidada kokohp kan, oh ekei kin kasalehda mehn kasukuhl mwahu kan me kitail kak sukuhlki. Ahpw mehnia rehrail me wia karasaras ehu, kokohp ehu, de mehn kasukuhl ehu? Erein sounpar tohto, pasapengpen met kin ekisekis sansalla. Karasepe, medewehla mwomwen atail kawehwehda sapwellimen Sises karasaras duwen ohl en Sameriao. (Luk 10:30-37) Nan pahr 1924, Kahn Iroir koasoia me ohl en Sameriao kin karasaraskihong Sises; ahl me kohsang Serusalem kohlahng Seriko, me kohdi ni ukada ehu, kin karasaraskihong elen mouren aramas eh wie kohkohdi sangete ahnsou me mwekid en uhwong wiawi nan Ihden; lipirap ko nanialo karasaraskihong pesines laud kan oh me mwersuwed kan nan pesines; oh samworo oh mehn Lipaio karasaraskihong Pwihn en Kristian likamw kan. Rahnwet, neitail pwuhk kan kin doadoahngki karasaras wet pwehn katamankihong Kristian koaros me ren dehr lipilipilki aramas ni arail kin sewese me anahne sawas, ahpw mehlel ni arail kin sewese meteikan en sukuhlki padahk mehlel duwen Koht. E seu kin kaperen en kilang me Siohwa kin ketin kamengeila sapwellime padahk kan ong kitail?

15. Dahme kitail pahn koasoiapene nan iren onop en mwuhr?

¹⁵ Nan iren onop en mwuhr, kitail pahn koasoiapene pil ehu sapwellimen Sises karasaras, me iei serepein meipwon ehk ko. (Mad. 25:1-13) Ia duwen Sises eh kupwurki sapwellime kan ni imwin rahnpwukat en wehwehki karasaras wet? Ia duwe, aramas, dipwisou de mwekid koaros nan karasaraso kin karasaraskihong aramas emen de mehkot me laudsang? De, Sises ketin kupwurki irail en doadoahngki karasaraso nin duwen mehn kasukuhl mwahu ehu pwehn kaweid irail ni imwin rahn pwukat? Kitail pahn kilang.