Alasang Meno me Ketin Inoukihda Mour Soutuk

1. Soangen koahiek dah me kak sewese kitail en alasang Siohwa?

SIOHWA ketin kapikada kitail en ahneki koahiek en wehwehki ia ahn meteikan ar pepehm, mehnda ma kitail saikinte lelohng arail irairo. (Wadek Episos 5:1, 2.) Ia duwen koahiek wet eh kak sewese kitail en alasang Siohwa? Oh dahme kahrehda kitail anahne kanahieng mwomwen atail kin doadoahngki koahiek wet?

2. Ia sapwellimen Siohwa pepehm ong ahnsou kan me kitail kin lokolok?

² Siohwa ketin inoukihongehr kitail duwen ahnsou kaselel ehu me kohkohdo me sohte pahn mie lokolok. Koaros me keidi kan oh pil “sihpw teikan” kak kasik mour soutuk, sohte lipilipil ma nanleng de nin sampah. (Sohn 10:16, NW; 17:2, 3; 1 Kor. 15:53) Siohwa ketin mwahngih duwen medek me kitail kin lelohng ahnsou me soahng suwed kan kin wiawiong kitail rahnpwukat. Mahso, Siohwa ketin kupwurtoutoukihla ahnsou me sapwellime aramas akan lokolok nan Isip. Paipel mahsanih: “E kin iang ketin lokolongki.” (Ais. 63:9, NW) Oh mwuhr, ni sapwellime aramas akan ar pwurehng kauwada sapwellime tehnpaso oh kin masak arail imwintihti kan, Siohwa ketin mwahngih arail pepehm. E ketin mahsanihong irail: “Mehmen me pahn sair kumwail pahn sair mehkot me keieu kesempwal rehi.” (Sek. 2:8) Duwehte nohno men me kin poakohng nah serio, Siohwa ketin poakohng sapwellime ladu kan oh kupwurki sewese irail. (Ais. 49:15) Kitail kin alasang sapwellimen Siohwa limpoak ni atail kin song en wehwehki pepehm en meteikan oh medewehla pein kitail nan arail irairo.​—Mel. 103:13, 14.

SISES KETIN ALASANG SIOHWA OH POAKOHNG ARAMAS

3. Ia sapwellimen Sises pepehm ong aramas akan?

³ Sises ketin wehwehki ahn aramas akan arail pepehm ni ahnsou me re kin lokolok, mendahki e saikinte ketin lelohng arail irairo. Karasepe, e mwahngih me mouren aramas tohto kin apwal. Kaunen pelien lamalam akan pitihiraildi oh wiahda kosonned tohto me sohte pwilisang rehn Koht. Aramas akan kin masak kaun pwukat. (Mad. 23:4; Mark 7:1-5; Sohn 7:13) Mendahki Sises sohte ketin masak kaun pwukat oh sohte ketin kamehlele arail likamw kan, e kak ketin wehwehki ia ahn aramas ako arail pepehm. Sises kupwurtoutoukihla eh mahsanihada soahng suwed kan me wiawihong aramas ako. Sohte epwelparail, re “rasehng sihpw kei me sohte silepahr.” (Mad. 9:36) Sises ketin sukuhlkihsang Semeo duwen en poakohng aramas oh kasalehda “kalahngan oh limpoak.”​—Mel. 103:8.

4. Ni Sises eh ketin mahsanihada ahn aramas akan ar lokolok, ia duwen eh ketin mwekidki met?

⁴ Ni Sises eh ketin mahsanihada aramas akan ar wie lokolok, e ketin sewese irail pwehki e ketin poakohng irail. E duwehte Semeo. Karasepe, ehu ahnsou me Sises oh sapwellime wahnpoaron ko seiloakla wasa doh pwehn kalohk, irail pwangada oh anahne kommoaldi ni wasa meleilei ehu. Ahpw Sises mahsanihada aramas tohto me awiawih ih. E mwahngih me re anahne sapwellime sawas, eri mendahki eh ketin pwangada, e ketin “tapihada kawehwehiong irail soahng tohto.”​—Mark 6:30, 31, 34.

KASALEHDA LIMPOAK DUWEHTE SIOHWA

5, 6. Ma kitail men kasalehda limpoak duwehte Siohwa, dahme kitail anahne wia? Menlau kihda ehu karasaras. (Menlau kilang tepin kilel.)

⁵ Ma kitail men kasalehda limpoak duwehte Siohwa, dahme kitail anahne wia? Medewehla irair wet. Mie brother pwulopwul men me adaneki Alan. E kin medemedewe duwen brother mah men me sohte kak alu mwahu oh sohte nohn kak kilang wasa. Alan tamanda sapwellimen Sises mahsen ko: “Duwen me ke men aramas en wiahiong uhk, ih duwen me ke pahn wiahiong irail.” (Luk 6:31) Eri Alan pein idek reh, ‘Dahme I men meteikan en wiahiong ie?’ E nda, ‘I uhdahn men ren iang ie mwadong!’ Ahpw ohl mah menet sohte kak tangseli oh mwadongseli. Eri, dahme Alan uhdahn anahne idek reh iei, ‘Ma ngehi brothero, dahme I pahn men meteikan en wiahiong ie?’

⁶ Mehnda ma Alan pwulopwulte, e kin song en medewehla ia pahn eh pepehm ma ih emen me mah. E kin kihong ahnsou ong brother maho oh kin rong mwahu ni ohlo eh kin koasoakoasoi. Ih eri tepida wehwehki me e apwal ong brothero en wadek Paipel oh pil alu sang ihmw lel ihmw nan kalohk. Alan esehda ia duwen eh kak sewese ohlo oh men wia dahme e kak. Ni atail wehwehkihda ahn meteikan ar pepehm oh kasalehiong irail limpoak, kitail pahn duwehte Siohwa.​—1 Kor. 12:26.

7. Ia duwen atail kak wehwehki dahme riatail Kristian kan kin lelohng?

⁷ E sohte kin mengei ahnsou koaros en wehwehki dahme meteikan kin lelohng, ahpw keieu ma kitail saikinte lelohng arail irairo. Karasepe, riatail Kristian tohto kin weirek pwehki re soumwahu de re ohla de re wie mahmahlahr. Ekei kin uhdahn lokolok pwehki nsensuwed laud, pwunod laud de mie me wiekauwe irail mahs. Meteikan kin kelehpw apwalihada neirail seri kan de mie arail peneinei me sohte kin papah Siohwa. Aramas koaros mie arail kahpwal kan, oh pali laud en arail kahpwal kan kin weksang atail. Ahpw kitail men kasalehiong meteikan limpoak oh sewese irail. Eri, dahme kitail kak wia? Emenemen ele anahne mehkot tohrohr. Eri ma kitail kin rong kanahieng oh kin songosong en wehwehkihla ahn aramaso pepehm, kitail pahn ese ia ahl me keieu mwahu en sewese ih. Ele kitail kak katamanohng aramaso ia sapwellimen Siohwa pepehm ong eh irairo. De kitail ele kak sewese ih ni ahl teikan. Ma kitail wia met, kitail kin alasang Siohwa.​—Wadek Rom 12:15; 1 Piter 3:8.

KASALEHDA KADEK DUWEHTE SIOHWA

8. Dahme sewese Sises en ketin kasalehda kadek?

⁸ Siohwa ketin kadek ong aramas koaros. (Luk 6:35) Oh Sises pil duwehte Semeo. Dahme sewese Sises en ketin kasalehda kadek ong aramas ni eh ketiket sampah? E kin ketin medewehla ia duwen sapwellime mahsen oh wiewia kan ar pahn kamwakid irail. Karasepe, lih emen me wiadahr soahng suwed tohto patohdo rehn Sises. Liho wie sengiseng oh kawisekesekehkihla pilen mese aluweluwen Sises ko. Sises kak mwahngih me liho uhdahn nsensuwedkihla soahng suwed kan me e wiahda oh e koluhkihlahr. Sises mwahngih me ma e sohte ketin kadekohng liho, liho pahn mworuskihla. Sises eri ketin kapingahki liho soahng mwahu kan me e wiahda oh ketin mahkohng. Sises pil ketin mahsen ni kadek ong Parisi men me sohte pwungki dahme e ketin wia ong lih menet.​—Luk 7:36-48.

9. Dahme kak sewese kitail en kasalehda kadek duwehte Siohwa? Menlau kihda ehu karasaras.

⁹ Ia duwen atail kak kasalehda kadek duwehte Siohwa? Kitail kin anahne medewe mahs mwohn atail pahn wia de nda mehkot pwe kitail en kasalehda kadek ong meteikan oh sohte kamedekihala irail. Pohl ntingihdi me Kristian men “en dehr akamai. E pahn kin kadek ong aramas koaros.” (2 Tim. 2:24) Karasepe, medewehla ia duwen omw kak kasalehda kadek nan irair pwukat: Ma omw kaun en doadoahko sohte kin wie eh doadoahk mwahu, dahme ke pahn wia? Ma riatail Kristian men sohla kohla ni Wasahn Kaudok erein sounpwong tohto ahpw kohdo iang mihting, dahme ke pahn ndaiong? Ma ke wie kalokalohk a emen nda me e nohn kedirepw en koasoiong uhk, ia duwen omw kak kasalehda kadek ong ih? Ma omw pwoudo idek rehmw dahme kahrehda ke sohte padahkihong ih duwen koasoandi kan me ke wiahda, ke pahn koasoiong ih ni ahl kadek? Kitail anahne medewehla ahn meteikan ar pepehm oh ia duwen atail koasoi kin kamwakid irail. Eri kitail pahn ese dahme kitail pahn nda oh wia pwehn kasalehda kadek duwehte Siohwa.​—Wadek Lepin Padahk 15:28.

KASALEHDA ERPIT DUWEHTE SIOHWA

10, 11. Dahme kak sewese kitail en alasang sapwellimen Koht erpit? Menlau kihda ehu karasaras.

¹⁰ Siohwa uhdahn sapwellimanki erpit, oh e kak ketin pilada en mwahngih dahme pahn wiawi ni ahnsou kohkohdo. Mendahki kitail sehse dahme pahn wiawi ni ahnsou kohkohdo, kitail pil kak ahneki erpit. Ia duwen? Mwohn atail wiahda pilipil ehu, kitail kak medewehla ia duwen pilipilo eh kak kamwakid kitail de meteikan. Kitail en dehr duwehte mehn Israel ko. Re sohte medewehla dahme pahn wiawihong irail ma re sohte peikiong Siohwa. Oh re sohte medewe duwen arail nanpwungmwahu reh oh soahng koaros me e ketin wiahiong irail. Pwehki Moses pohnese met, e ese me mehn Israel ko pahn wia dahme suwed. E nda: “Israel iei wehi ehu me sohte audepe; wehi ehu me uhdahn soaloalokong. Re sohte ese dahme re lohkihdi; re sohte kak dehdehki dahme wiawihong irail.”​—Deud. 31:29, 30; 32:28, 29.

¹¹ Karasepe, ma ke kin pehsehiong emen me ke men pwoudiki, tamataman me ni ahnsou me ke kin lelki emen, e kin apwal ken kaunda omw pepehm kan oh ineng en wia nsenen pwopwoud. Eri dehr wia mehkot me kak kauwehla omw nanpwungmwahu rehn Siohwa! Ahpw kasalehda erpit oh soikala dahme keper. Rong sapwellimen Siohwa kaweid me erpit: “Aramas me eh lamalam mie kak kilangada kahpwal me kohkohdo oh wetsang; ahpw aramas tohto kin inenwohngete, ahpw nsensuwedkihla mwuhr.”​—Lep. Pad. 22:3.

KAUNDA OMW MADAMADAU

12. Ia duwen dahme kitail kin medewe eh kak kamedekihala kitail?

¹² Aramas loalokong men kin kaunda eh madamadau. Atail madamadau kak sewese kitail de kamedekihala kitail, duwehte kisiniei me kak sewese kitail de kamedekihala kitail. Ni atail kanahieng mwomwen atail doadoahngki kisiniei, kitail kak doadoahngki pwehn kukihada mwenge. Ahpw ma kitail sohte kanahieng, kisinieio kak isikada imwatailo oh pil kemeikitailla. Met duwehte atail madamadau. Ni atail kin medewehla duwen soahng kan me kitail sukuhlkihsang Siohwa, e kin mwahu ong kitail. Ahpw ma kitail kin medemedewehte duwen tiahk samin me pid wia nsenen pwopwoud oh medewehla kitail wiewia soahng suwed kan, kitail pahn inangihada soahng pwukat oh kitail kakete uhdahn wiahda. Met kak kauwehla atail nanpwungmwahu rehn Siohwa.​—Wadek Seims 1:14, 15.

13. Dahme Ihp medewehla duwen eh mour?

¹³ Kitail kak sukuhlkihsang dahme wiawihong tepin liho, Ihp. Siohwa ketin kehkehlikihong Adam oh Ihp ira en dehr kang “wahntuhkehn kehsehki aramas dahme mwahu oh dahme suwed.” (Sen. 2:16, 17) Ahpw Sehdan ndaiong Ihp: “Kumwa sohte pahn mehla. Koht mahsanih men pwehki eh mwahngih me ni ahnsowohte me kumwa pahn tungoale wahntuhkehn, kumwa pahn marainla oh duwehla Koht, pwe kumwa pahn esehla dahme mwahu oh dahme suwed.” Ihp medewehla ia pahn mwahu en eh mour ma e kak pein wiahda eh pilipil kan ong dahme mwahu oh dahme suwed. E kin medemedewehte met oh “lingankihda tuhkeo oh men tungoalehda wah ko.” Eri dahme wiawi? “Ih eri dolung wahntuhkeo oh tungoale. E ahpw pil kihong eh pwoudo pwe en pil iang tungoale. Eh pwoudo ahpw pil iang tungoale.” (Sen. 3:1-6) Imwilahn met, “dihp tepidohng sampah sang rehn aramas tehmen, ahpw tialahng mehla.” (Rom 5:12) Ihp anahne uhdihsang medemedewehte wia dahme suwed!

14. Mehn kataman dah kan me Paipel kihda ong kitail duwen tiahk samin me pid wia nsenen pwopwoud?

¹⁴ Ei mehlel, dipen Ihp sohte pidada wia tiahk samin me pid wia nsenen pwopwoud. Ahpw Paipel ni sansal katamankihong kitail en dehr medewehla kitail wiewia soangen tiahk samin koaros me pid wia nsenen pwopwoud. Sises mahsanih: “Mehmen me pahn kilikilang lih emen oh men dihpki, nahn e wiadahr dipen kamwahl nan kapehde.” (Mad. 5:28) Pohl pil katamankihong kitail: “Tokedihsang amwail ngoangki kapwaiada amwail ineng suwed kan.”​—Rom 13:14.

15. Soangen pai dah kan me kitail anahne medemedewehte, oh dahme kahrehda?

¹⁵ Paipel pil mahsanih me kitail en kilangwohngete en kaperenda Siohwa oh dehr medemedewe en kepwehpwehla. Mehnda ma emen kepwehpwe, nah mwohni ko sohte kak uhdahn doarehla ih. (Lep. Pad. 18:11) Sises mahsanih me e wia elen pweipwei ma emen kin koasoakepene ong pein ih kepwehn sampah ahpw sohte kin mwohneki mahs Siohwa nan eh mour. E “semwehmwe mwohn silangin Koht.” (Luk 12:16-21) Ni atail kin koasoakepene ong pein kitail “paien nanleng” sang ni atail wiewia soahng kan me Siohwa ketin kupwurki, kitail kin kaperenda ih oh pil kitail. (Mad. 6:20; Lep. Pad. 27:11) Atail nanpwungmwahu rehn Siohwa uhdahn kesempwal sang soahng teikan koaros.

DEHR KIN PWUNOD

16. Dahme kak sewese kitail ahnsou me kitail kin pwunod?

¹⁶ Ma kitail kin song en kepwehpwehla nan sampah wet, e pahn wahdo kapwunod tohto. (Mad. 6:19) Sises mahsanih me irail kan me kin ahnsou koaros pwunodki mwohni pahn diarada me e apwal en mwohneki mahs Wehin Koht nan arail mour. (Mad. 13:18, 19, 22) Oh pil, ekei aramas kin ahnsou koaros pwunodki duwen soahng suwed kan me kakete wiawiong irail. Ahpw ma kitail kin kalapw pwunod, kitail kakete soumwahuda de atail pwoson Siohwa tepida tikitikla. Kitail anahne likih me Siohwa pahn ketin sewese kitail. Paipel mahsanih me “pwunod pahn kak adihasang omw peren, ahpw lokaia kadek pahn kaperenihiukada.” (Lep. Pad. 12:25) Eri ma ke kin pwunodki mehkot, koasoiong emen me kin papah Siohwa oh me uhdahn ese iuk. Omw pahpa de nohno, omw pwoud, de kompoakepahmw mwahu men kak kangoange iuk en likih Siohwa oh pil sewese iuk en sohla nohn pwunod.

17. Ia duwen Siohwa eh kak ketin sewese kitail ahnsou me kitail kin pwunod?

¹⁷ Siohwa ketin mwahngih laudsang meteikan atail pepehm kan oh e kak ketin sewese kitail en ahneki meleilei ni ahnsou me kitail kin pwunod. Pohl ntingihdi: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pil. 4:6, 7) Eri ahnsou me ke kin pwunod, medewehla duwen sawas me Siohwa ketikihong uhk pwehn kolokol omw nanpwungmwahu reh en kehlail, duwehte sawas sang riomw Kristian kan, elder kan, ladu lelepek oh loalokongo, tohnleng kan, oh pil Sises.

18. Ia duwen atail koahiek en medewehla soahng kan eh kak sewese kitail?

¹⁸ Nin duwen dahme kitail sukuhlkier, kitail kin alasang Siohwa ni atail doadoahngki atail koahiek en wehwehki ahn meteikan ar pepehm. (1 Tim. 1:11; 1 Sohn 4:8) Kitail pahn peren ni atail kin kasalehiong meteikan limpoak oh kadek, ni atail kin medewehla imwilahn atail wiewia kan, oh ni atail kin soikala kapwunod kan me kin kihsang atail peren. Kitail song medewehla ia pahn mwomwen mour pahn kaundahn Wehio oh wia uwen atail kak en alasang Siohwa.​—Rom 12:12.