Kolokolte Lamalam en Krais
“Eri, kumwail uhdahn pahn ahnekihla soangen lamalamohte me Krais Sises ketin sapwellimanki.”—PIL. 2:5.
1. Dahme kahrehda kitail en nantihong ahnekihla sapwellimen Krais lamalam?
SISES mahsanih: “Kumwail kohdo rehi, . . . kumwail padahngki sang ie, pwe I me opampap oh nan kapehd karakarahk; kumwail ahpw pahn diar kommoalpen ngenomwail [“amwail mour,” NW] kan.” (Mad. 11:28, 29) Luhk wet kasalehda sapwellimen Sises lamalam en limpoak. Ih me ketin wia mehn kahlemeng me keieu mwahu en idawehn. Mendahki ih me sapwellimen Koht Ohl oh sapwellimaniki manaman laud, Sises kin ketin pehmitikiong oh nsenohki meteikan, ahpw mehlel irail kan me mi nan lokolok.
2. Ire dah kan me pid sapwellimen Sises lamalam me kitail pahn tehk?
2 Nan iren onop wet oh me riau kan mwuhr, kitail pahn tehk ia duwen atail kak kakairada oh kolokol lamalam me duwehte sapwellimen Sises oh alasang “kupwur en Krais” nan atail mour. (1 Kor. 2:16) Kitail pahn onopki ire limau: sapwellimen Sises opampap oh karakarahk, kadek, peikiong Koht, eimah oh limpoak me sohte kin wekila.
Padahngki Sang Sapwellimen Krais Opampap
3. (a) Ia mehn kasukuhl me Sises ketin padahkihong sapwellime tohnpadahk ko duwen karakarahk? (b) Ia duwen Sises eh ketin mwekidki luwet en sapwellime tohnpadahk ko?
3 Sises, sapwellimen Koht Ohl me unsek, kupwurki ketido sampah pwehn papah nanpwungen aramas soh unsek oh dipan akan. Ekei irail pahn kemehla ih mwuhr. Ahpw ahnsou koaros Sises kin ketin kolokol peren oh kanengamah. (1 Pit. 2:21-23) En “kainenehiongete kapehditail kan” ong sapwellimen Sises mehn kahlemeng kak sewese kitail en pil kolokol peren oh kanengamah ni atail kilang sapwung oh soh unsek en meteikan. (Ipru 12:2) Sises ketin luke sapwellime tohnpadahk ko en iang ih kapaikada sapwellime mehn wisik oh padahngki sang ih. (Mad. 11:29) Dahme irail kak sukuhlki? Ire ehu me re kak sukuhlki iei me Sises kin ketin opampap oh kanengamahiong sapwellime tohnpadahk ko mendahki re kin wia sapwung. Ni pwohng mwohnte Sises pwoula, e ketin widen patehnehrail kan, oh padahkihong irail mehn kasukuhl duwen “nan kapehd karakarahk” me re sohte pahn manokehla. (Wadek Sohn 13:14-17.) Mwuhr, ni ahnsou me Piter, Seims, oh Sohn sohte kak iang “pepehd,” Sises ni kadek ketin pohnese ar luwet kan. E ketin keinemwe: “Saimon, ke memeir?” Oh e mahsanih: “Kumwail iang pepehd oh kapakap pwe kumwail dehr lohdiong nan songosong. Pwe ngehn [“lamalam,” NW] me peik, a paliwar me luwet.”—Mark 14:32-38.
4, 5. Ia duwen sapwellimen Sises mehn kahlemeng eh kin sewese kitail en kilangwohng irair suwed en meteikan?
4 Ia duwen atail kin mwekidki ma riatail kan kin akutuhwahu, mwadang en mwakar, de pwand en kapwaiada kaweid sang elder kan de “ladu lelepek oh loalokong”? (Luk 12:42-44) Kitail mwein kin kasik oh mahkohng irair en soh unsek en aramas akan en ahn Sehdan sampah, ahpw ni ahnsou me riatail kan kin kasalehda soangen irair pwukat, kitail mwein apwalki mahkohng irail. Ma kitail kin nsensuwedkihla ahn meteikan ar irair suwed, kitail anahne idek rehtail, ‘Ia duwen ei kak kasalehda “kupwur en Krais”?’ Nantihong tamataman me Sises sohte kin ketin engiengda pahn sapwellime tohnpadahk ko, mendahki re sohte kin kasalehda “kupwur en Krais.”
5 Medewehla dahme wiawi ong wahnpoaron Piter. Ni ahnsou me Sises ketin luke Piter en doudi sang pwohto oh patolahng Reh pohn pihl, Piter alu pohn pihlo ni ahnsou kis. Ahpw ni Piter eh kilang melimelo, e tapihada kihrla. Ia duwe, Sises ketin angiangihada oh mahsanihong ih: “Iao, kowe me pein kahrehda ken lelohng men! Ke anahne sukuhlki sang met”? Soh! “Ni ahnsowohte Sises ketin kapahla limeo oh ketin kolada, mahsanih, ‘Ke meid pwoson tikitik! Dahme ke peikasalki?’” (Mad. 14:28-31) Duwehte Sises me ketin kapahla lime pwehn sewese Piter, ia duwe, kitail pil kak ni kadek sewese riatail men me anahne kalaudehla eh pwoson? Met uhdahn wia mehn kasukuhl mwahu duwen sapwellimen Sises opampap ong Piter.
6. Dahme Sises ketin padahkihong sapwellime wahnpoaron ko me pid en men lapalapala?
6 Piter pil kin iang akamai me kin wiawi nanpwungen wahnpoaron ko duwen ihs me keieu lapalap nanpwungarail. Seims oh Sohn men mwohndi ni palimaun de ni palimeing en Sises nan sapwellime Wehio. Ni ahnsou me Piter oh wahnpoaron teiko esehda met, re lingeringerda. Sises mwahngih me re ahneki lamalam en akutuhwahu pwehki wasa me re tikida ie. E malipeirailpene oh mahsanih: “Kumwail ese duwen nin sampah wet kaun kan kin ahneki manaman en kaunda tohn ar wehi kan, oh me lapalap akan ar kin kakaun irail. A e sohte pahn duwehte rehmwail. Mehmen me men lapalap rehmwail, e pahn papah meteikan; a mehmen rehmwail me men soumasala, e uhdahn pahn wiahla lidu.” Sises eri ketin kasalehda sapwellime mehn kahlemeng: “Duwehte Nein-Aramas me ketido, kaidehn pwe aramas akan en papah, a pwe en papah aramas akan; oh pwe en tounmeteikihla moure, pwe me ngeder en maiauda.”—Mad. 20:20-28.
7. Ia duwen emenemen kitail eh kak sewese miniminpene nan mwomwohdiso?
7 En medemedewe duwen sapwellimen Sises karakarahk kak sewese kitail en wia “me keieu tikitik” nanpwungen riatail kan. (Luk 9:46-48) Met pahn sewese kaminiminpene kitail. Duwehte sahm men nan peneinei laud ehu, Siohwa kin kupwurki sapwellime seri kan en “kin miniminpene.” (Mel. 133:1) Sises ketin kapakap ong Semeo duwen Kristian mehlel kan koaros, mahsanih: “Ngehi rehrail oh komwi rehi, pwe irail en uhdahn wiahkihla ehu, pwe sampah wet en ese me komwi me ketin poaroneiehdo, oh komw ketin loalloale irail duwehte omwi ketin loalloale ie.” (Sohn 17:23) Eri, atail miniminpene kin kasalehda me kitail kin idawehn Krais. Pwehn perenki soangen miniminpene wet, kitail anahne kilangwohng soh unsek en meteikan duwehte Krais kin ketin wia. Sises kin ketin kasalehda mahk, oh kin ketin padahngki me kitail kak ale mahk ihte ma kitail kin mahkohng meteikan.—Wadek Madiu 6:14, 15.
8. Dahme kitail kak sukuhlki sang mehn kahlemeng en irail kan me kin papah Koht sounpar tohto?
8 Kitail pil kak sukuhlki sang ni atail pahn kahlemengih pwoson en irail kan me kin alasang Krais sounpar tohto. Duwehte Sises, irail ladu en Koht pwukat kin kalapw wehwehki soh unsek en meteikan. Re sukuhlki me en poakehla aramas duwehte me Krais kin ketin wia kin kamwakid kitail en “sewese me luwet akan ni arail katoutou kan” oh pil kin sewese kaminiminpene kitail. Patehng met, e kin kangoange tohnmwomwohdiso pwon en kasalehda lamalam en Krais. Re men riarail kan en kasalehda soangen madamadauohte oh imwihla mwahu duwehte me wahnpoaron Pohl mwahuki Kristian akan nan Rom en wia: “Koht me tepin kanengamah oh kakehlepen loalatail, en ketin kaminiminihkinkumwailpene lamalamteieu ni amwail kin kahlemengih Krais Sises, pwe kumwail koaros en ehupene kapinga Koht, Semen atail Kaun Sises Krais ni ngihlteieu.” (Rom 15:1, 5, 6) Ei, atail miniminpene nan atail kaudok kin wahdo kaping ong Siohwa.
9. Dahme kahrehda kitail anahne sapwellimen Koht manaman pwehn kahlemengih Sises?
9 Sises kin ketin karasahiong “nan kapehd karakarahk” ong opampap me wia kisehn wahn sapwellimen Koht manaman. Ihme kahrehda, patehng sukuhlki sapwellimen Sises mehn kahlemeng, kitail anahne sapwellimen Siohwa manaman pwe kitail en kak alasang mehn kahlemeng wet ni ahl me konehng. Kitail anahne kapakapki sapwellimen Koht manaman oh nantihong kakairada wah kan me duwehte “limpoak, peren, popohl, kanengamah, kadek, loalopwoat, opampap, oh liksang me suwed.” (Kal. 5:22, 23) Ni atail kin idawehn sapwellimen Sises mehn kahlemeng en karakarahk oh opampap, kitail pahn kaperenda Samatail nanleng, Siohwa.
Sises Ketin Kadek ong Meteikan
10. Ia duwen Sises eh kin ketin kasalehda kadek?
10 Kadek iei ehu kisehn wahn sapwellimen Koht manaman. Sises kin ketin kadek ong meteikan ahnsou koaros. Koaros me kin patohla rehn Sises kin kilang me e kin “ketin kasamwo irail ni kadek.” (Luk 9:11, NW) Dahme kitail kak sukuhlki sang sapwellimen Sises kadek? Aramas kadek men kin mengei ong meteikan en patehng ih oh kin mwahu oh poakehla meteikan. Sises kin ketin wia met. E ketin poakehla aramas akan “pwehki ar pwunod akan oh sohte epwelparail, pwe re rasehng sihpw kei me sohte silepahr.”—Mad. 9:35, 36.
11, 12. (a) Menlau kasalehda ehu karasepen sapwellimen Sises wiewia me pid poakehla meteikan. (b) Dahme kitail kak sukuhlki sang mehn kahlemeng wet?
11 Sises sohte kin ketin poakelahte aramas akan ahpw e pil kin ketin wia uwen me e kak pwehn sewese irail. Medewehla ehu karasepe. Emen lih kin lokolongki eh kohwahki mehn warmwowi erein sounpar 12. E wehwehki me nan Kosonned en Moses, eh irairo kahrehiong ih oh meteikan me sair ih en sohte kak iang wia arail pwukoa nan arail kaudok. (Lip. 15:25-27) Mendahki met, sapwellimen Sises wiewia kan ong aramas ele kamehlelehiong liho me Sises ketin kak oh pahn kupwurki kamwahwihala ih. E kin mengimengloalki: “Ma ihte sapwellime likou me I pahn doahke, I uhdahn pahn kehlailda.” Ni eimah, e wia met oh mwadangete kehnda me e mwahula sang eh soumwahwo.
12 Sises mwahngih me mie me doahke ih, e ahpw ketin sohpeiseli pwehn mahsanih ihs me wia met. Liho masepwehkada pwe e de lipwoar pwehki e kauwehla kosonnedo, ih eri rerrer oh poaridi mwohn aluweluwen Sises kan oh patohwanohng ih soahng koaros ni mehlel. Ia duwe, Sises ketin angiangihada lih soumwahu menet? Uhdahn soh! E mahsanih: “Nei serepein, omw pwoson me kakehlaiukada. Eri, kohkohwei ni popohl, pwe ke kehlaildahsangehr omw soumwahwen.” (Mark 5:25-34) Ia uwen kansenamwahu ong liho en rong soangen mahsen kadek pwukat!
13. (a) Ia duwen sapwellimen Sises wiewia kan eh kin weksang en Parisi ko? (b) Ia mwomwen sapwellimen Sises wiewia ong seri kan?
13 Krais sohte kin ketin duwehte Parisi sempoak kan me kin doadoahngki ar manaman pwehn kalaudehla kahpwal kan en meteikan. (Mad. 23:4) Weksang met, e kin ni kadek oh kanengamah ketin padahki meteikan duwen sapwellimen Siohwa ahl akan. Sises kin ketin wia kompoakepah mwahu oh mehlel men ong sapwellime tohnpadahk kan oh ahnsou koaros e kin ketin kasalehda limpoak oh kadek. (Lep. Pad. 17:17; Sohn 15:11-15) Seri kan kin perenki pato reh, oh e pil kin ketin perenki irail. Mendahki Sises eh kin ketin soupisek, ahpw e kin ketikihong sapwellime ahnsou ong seri kan. Mie ahnsou me sapwellime tohnpadahk kan nantihong irehdi aramas akan en dehr patohwando neirail seri kan reh pwe en ketin doahke irail. Met pwehki re kin ahneki madamadau me re kesempwal duwehte kaunen pelien lamalam kan en ahnsowo. Ahpw, Sises sohte kupwurki dahme re wia. E mahsanihong irail: “Kumwail pweisang kisin seri kan pwe re en kohdo rehi. Kumwail dehr ireiraildi; pwe irail kan me rasehng kisin seri pwukat, iei arail wehi, Wehin Koht.” Ih eri ketin doadoahngki seri ko pwehn padahkihong sapwellime tohnpadahk kan kaweid kesempwal ehu oh mahsanih: “I men kumwail en ese pwe mehmen me sohte pahn ale Wehin Koht rasehng kisin seri men, e sohte pahn pedolong loale.”—Mark 10:13-15.
14. Ia kapai kan me seri kan kin alehdi sang nsenoh en meteikan?
14 Medewehla pepehm en ekei seri ko ni ar pahn laudla, re pahn tamanda en Sises Krais kin ketin ‘pwoalehdi irail oh ketikidahng lime ko pohn emenemen irail oh kupwuramwahwihirailla.’ (Mark 10:16) Rahnwet seri kan me kin paiekihda ahn elder kan oh meteikan ar kin nsenohki irail pahn peren ni ar pahn tamanda mepwukat mwuhr. Kesempwal sang met, sangete ni arail tikitik, seri kan me kin alehdi soangen nsenoh mehlel duwehte met nan mwomwohdiso kin esehla me sapwellimen Siohwa manaman kin ieiang sapwellime aramas akan.
Kasalehda Kadek nan Sampah Ehu me Soh Kadek
15. Dahme kahrehda kitail sohte kin pwuriamweikihla soh kadek en aramas rahnwet?
15 Aramas tohto rahnwet pehm me sohte arail ahnsou en kasalehda kadek ong meteikan. Kahrehda, re sohte kin kadek ong sapwellimen Siohwa aramas akan nan sukuhl, wasahn doadoahk, ni arail kin seiloak, de nan kalohk rahn koaros. Wiewia soh kadek ele kin kansensuwedihala kitail, ahpw kitail sohte kin pwuriamweikihla. Siohwa ketin doadoahngki Pohl en kohpada ong kitail me mour ni ahnsou apwal ni “imwin rahn akan” pahn kahrehda Kristian mehlel kan en tuhwong irail kan me kin “roporop ong pein irail, . . . sempoak.”—2 Tim. 3:1-3.
16. Ia duwen atail kak kalaudehla kadek nan mwomwohdiso duwehte Krais?
16 Ni pali teio, nan mwomwohdiso en Kristian mehlel kin uhdahn kansenamwahu oh weksang sampah soh kadek wet. Sang atail alasang Sises, emenemen kitail kin sewese kalaudehla irair wet. Ia duwen atail kak wia met? Pwehn tepiada met, tohto nan mwomwohdiso anahne atail sawas oh kangoang pwehki re ahneki soumwahu de soangen kahpwal teikan. Nan “imwin rahn akan,” soangen kahpwal pwukat kin lalaudla, ahpw met sohte wia mehkot kapw. Ni ahnsou kan me Paipel ntingdi, Kristian kan kin pil lelohng kahpwal pwukat. Kahrehda, e konehng kitail en kin kihda sawas duwehte me Kristian en mahs akan kin wia. Karasepe, Pohl kin kangoange Kristian kan en “kakehlaka irail kan me nan kapehd tikitik, kumwail sewese me luwet akan, oh kanengamahiong aramas koaros.” (1 Des. 5:14) Met kin pidada atail en kasalehda kadek me duwehte Krais.
17, 18. Ia duwen atail kak alasang sapwellimen Sises kadek?
17 Kristian kan ahneki pwukoa en sewese riarail kan ni kadek, en apwalih irail duwehte me Sises kin ketin wia, kasalehda nsenoh mehlel ong irail kan me kitail eseier de irail kan me kitail ahpwtehn tuhwong. (3 Sohn 5-8) Duwehte Sises, kitail anahne en tiengla mwowe oh poakehla oh kansenamwahwih meteikan ahnsou koaros.—Ais. 32:2; Mad. 11:28-30.
18 Emenemen kitail kak kasalehda kadek sang atail kin wia mehkot me pahn kasalehda atail nsenohkin irail oh kin wehwehki duwen arail kahpwal kan. Rapahki iahd oh ia duwen atail en wia met. Wia uwen atail kak! Pohl kangoange: ‘Kumwail limpoakpene nin duwen limpoak en Kristian,’ oh e kapatahiong: “Kumwail wahupene nanpwungamwail.” (Rom 12:10) Met wehwehki en kahlemengih Krais, kadek ong meteikan, sukuhlki en kasalehda “limpoak mehlel.” (2 Kor. 6:6) Pohl kawehwehda duwen limpoak me Krais sapwellimanki ni ahl wet: “E sohte kin peirin de aklapalap de pohnmwahso” (1 Kor. 13:4) Kitail en dehr kolokol atail nsensuwed rehn riatail Kristian akan ahpw kitail en kapwaiada kaweid wet: “Kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.”—Ep. 4:32.
19. Ia imwila mwahu kan ni atail kin kasalehda kadek duwehte Krais?
19 Atail kin nantihong en kakairada oh kasalehda sapwellimen Sises kadek ahnsou koaros oh pil ni irair koaros pahn imwikihla keting laud. Sapwellimen Siohwa manaman pahn sewese koaros nan mwomwohdiso en kakairada wahn sapwellime manaman. Patehng met, ahnsou me kitail kin idawehn sapwellimen Sises mehn kahlemeng oh sewese meteikan en pil wia met, atail peren oh miniminpene nan kaudok pahn kaperenda Koht. Kahrehda, ahnsou koaros kitail en nantihong kasalehda sapwellimen Sises opampap oh kadek nan atail wiewia ong meteikan.
Ke Kak Kawehwehda?
• Ia duwen Sises eh ketin kasalehda “opampap oh nan kapehd karakarahk”?
• Ia duwen Sises eh ketin kasalehda kadek?
• Nan sampah soh unsek wet, ia duwen atail kak kasalehda opampap oh kadek me duwehte Krais?
[Kawehwehpen kilel kan nan ehu ehu pali 11]
Ma emen riatail kin luwetala ni pwoson duwehte Piter, kitail pahn sewese ih?
[Kawehwehpen kilel kan nan ehu ehu pali 12]
Ia duwen atail kak sewese kakairada kadek nan mwomwohdiso?