Sapwellimen Krais Limpoak Kin Kamwakid Kitail en Limpoak

“Sises . . . kin ketin loalloale sapwellime kan me mihmi nin sampah, oh e ketin loalloale irail lel ni imwi.”—SOHN 13:1.

1, 2. (a) Ia duwen sapwellimen Sises limpoak eh kin siksang ahn meteikan? (b) Soangen ire dah kan duwen limpoak me kitail pahn koasoiapene nan iren onop wet?

SISES ketikihda mehn kahlemeng unsek en limpoak. Soahng koaros me e kin ketin wia oh mahsanih, sapwellime padahk oh pwoula ni tounmetei kin kasalehda sapwellime limpoak. Sises ketin kasalehda limpoak ong irail kan me e ketin tuhwong ahpw mehlel ong sapwellime tohnpadahk ko lao lel imwin sapwellime mour nin sampah.

² Sises ketikihda mehn kahlemeng en limpoak me keieu mwahu ong sapwellime tohnpadahk ko en idawehn. E pil kamwakid kitail en kasalehda soangen limpoakohte ong riatail kan nan mwomwohdiso oh meteikan. Nan iren onop wet, kitail pahn tehk dahme elder kan nan mwomwohdiso kak sukuhlki sang Sises duwen limpoak ong irail kan me wiahda sapwung kan oh dihp laud. Kitail pahn pil koasoia duwen sapwellimen Sises limpoak me kamwakid Kristian kan en sewese riatail kan oh meteikan ni ahnsoun kahpwal en mwohni, kahpwal laud pwehki melimel de rerrer en sahpw ape oh soumwahu.

3. Dahme Sises ketin wiahiong Piter mendahki e wiahda sapwung laud?

³ Ni pwohngo mwohn Sises pwoula, sapwellime wahnpoaron Piter kahmahmkihla ih pak siluh. (Mark 14:66-72) Ahpw ni en Piter koluhla [sang eh sapwung], duwen me Sises ketin kohpadahr, Sises ketin mahkohng ih. Sises ketin likih Piter oh ketikihong pwukoa kesempwal kan. (Luk 22:32; Wiewia 2:14; 8:14-17; 10:44, 45) Dahme kitail sukuhlki sang sapwellimen Sises lamalam ong irail kan me wiahda dihp laud?

Kasalehda Limpoak Duwehte Krais ong me Wiahda Dihp Laud

4. Soangen ahnsou dah me kitail anahne kasalehda limpoak duwehte Krais?

⁴ Ehu ahnsou me keieu apwal en kasalehda sapwellimen Krais limpoak iei ni ahnsou me ekei nan peneinei de nan mwomwohdiso kin wiahda dihp laud. E kansensuwed pwe ni imwin rahn akan en ahn Sehdan koasoandi wet eh kereniong nek, suwed oh lokolok kin lalaudla nin sampah wet. Madamadau suwed de soukautih en sampah wet ong dahme pwung oh sapwung kak kaluwetehla atail kin koasoanehdi teng en wia dahme pwung. Ni mwehin tepin Kristian akan, ekei anahne piskensang nan mwomwohdiso en Kristian oh meteikan kin ale kaweid kehlail. Pil duwehte rahnwet. (1 Kor. 5:11-13; 1 Tim. 5:20) Ahpw ni en elder kan me kin apwalih ire pwukat kin kasalehda limpoak duwehte Krais, met kak uhdahn sewese irail me wiahda dihp laud.

5. Ia duwen elder kan arail anahne alasang limpoak duwehte Krais ong irail kan me wiahda dihp laud?

⁵ Duwehte Sises, elder kan anahne utungada sapwellimen Siohwa koasoandi pwung kan ahnsou koaros. Ni ar wia met, re kasalehda sapwellimen Siohwa mpahi, kadek oh limpoak. Ni ahnsou me emen kin uhdahn koluhla, “nan kapehd tikitiklahr,” oh “sohla ar koapworopwor” pwehki eh dihp, e sohte apwal ong elder kan en ‘kapwungala. Ahpw re pahn kamantik.’ (Mel. 34:18; Kal. 6:1) Ahpw ia duwen arail pahn apwalih ekei me kin uhwong oh sohte kasalehda ar koluhla?

6. Dahme elder kan en dehr wia ni ahnsou me re apwalih irail kan me wiahda dihp laud? Dahme kahrehda?

⁶ Ni ahnsou me emen me wiahda dihp laud soikala kaweid en Paipel de song en kapwukoahki meteikan duwen eh dihp, elder kan oh meteikan kakete mwehlda. Pwehki re ese suwed me aramaso kahrehda, mwein re men kasalehda ar pepehm ni ar wiewia kan. Ahpw lingeringer kin kahrehda suwed oh sohte kasalehda “kupwur en Krais.” (1 Kor. 2:16; wadek Seims 1:19, 20.) Sises ketin panawih ekei ni sansal, ahpw sohte pak ehu e mahsanih mehkot me suwed de kamedek. (1 Pit. 2:23) Ahpw sang ni sapwellime mahsen oh wiewia kan, e kin ketin kasalehiong me dipan akan me re kak koluhla oh pwurodo rehn Siohwa. Mehlel, ehu kahrepe kesempwal me Sises ketidohng sampah iei “en komourala me dipan akan.”—1 Tim. 1:15.

7, 8. Dahme anahne kaweidih elder kan ni ar kin apwalih dihp laud nan mwomwohdiso?

⁷ Ia duwen sapwellimen Sises mehn kahlemeng me pid ire wet eh kamwakid atail kin kilangwohng irail kan me anahne ale kaweid kehlail sang mwomwohdiso? Tamataman me kaweid en Paipel me pid dihp laud nan mwomwohdiso kin pere tohnmwomwohdiso oh kakete kamwakid me wiahda dihp laud en koluhla. (2 Kor. 2:6-8) E kansensuwed me ekei sohte kin koluhla oh anahne piskenla, ahpw e kaperen en kilang me tohto irail pwukat pwurehng pwurodo rehn Siohwa oh nan sapwellime mwomwohdiso. Ni ahnsou me elder kan kin kasalehda limpoak duwehte Krais, re kamengeila ong aramaso en koluhla oh kedekedeo pwurodohng mwomwohdiso. Mwuhr, ekei irail me piskenla pahn tamanda en elder kan kin wauneki irail oh kasalehda limpoak duwehte Krais, oh met pahn kamwakid irail en pwurodohng nan mwomwohdiso, mehnda ma re sohte taman kaweid en Paipel kan koaros me elder ko kihong irail.

⁸ Eri, elder kan anahne kasalehda “wahn sapwellimen Koht manaman,” keieu limpoak duwehte Krais, mehnda ma irail me wiahda dihp laud sohte men ale kaweid en Paipel. (Kal. 5:22, 23, NW) Re en dehr karuwaru en piskensang me wiahda dihp laudo nan mwomwohdiso. Re anahne kasalehda me re men irail me wiahda dihp laud kan en pwurodo rehn Siohwa. Eri, mwuhr ni me dipan men eh koluhla, duwehte me tohto kin wia, e pahn uhdahn kalahngankihong Siohwa oh “kisakis kan [“kisakis en ohl akan,” NW]” me duwehte elder kan, me kin kamengeila ih en pwurodohng nan mwomwohdiso.—Ep. 4:8, 11, 12.

Kasalehda Limpoak Duwehte Krais nan Imwin Ahnsou

9. Ia duwen Sises eh ketin kasalehda limpoak ong sapwellime tohnpadahk ko?

⁹ Luk ntingihdi duwen ehu mehn kahlemeng mwahu en limpoak me Sises kin ketin kasalehda. Krais mwahngih me kereniong sounpei kan en Rom pahn kapilpene kahnimw en Serusalem pwe aramas en dehr tangasang wasao. Ni limpoak, Sises ketin kaweidih sapwellime tohnpadahk ko: “Ni amwail pahn kilang karis en sounpei kei me kapilpenehr Serusalem, kumwail pahn esehki me ahnsoun eh ohla kerendohr.” Dahme re anahne wia? Sises ketikihongehr irail kaweid kan ni sansal oh ni oaritik. “Eri, ni ahnsowo irail kan me mihmi nan Sudia, re en sopolahng pohn dohl kan; oh me mihmi nan kahnimwo, re en sopohsang loale; oh me mihmi nansapw, re dehpa pwurolong nan kahnimwo. Pwe rahn pwuko, iei ‘Rahnen Kalokolok,’ ahnsou me mehkoaros me ntingdier nan Pwuhk Sarawi pahn pweida.” (Luk 21:20-22) Mwurin sounpei kan en Rom kapilpene Serusalem nan pahr 66, irail kohkohsang wasao, eri irail me peik kan kapwaiada kaweid pwukat.

10, 11. Ia duwen atail tehk duwen en tepin Kristian kan ar tangasang nan Serusalem kak sewese kitail kaunopada ong “kahn kamakam kowahlap”?

¹⁰ Ni ar tangasang Serusalem, Kristian kan anahne kasalehda limpoak ong emenemen duwehte Krais kin ketin kasalehiong irail. Irail anahne ehukihpene sohte lipilipil dahme re ahneki. Ahpw wehwehn sapwellimen Sises kokohpo kin pidada laudsang ohlahn kahnimwo. E ketin kohpada: “Pwe apwal en ni ahnsowo [“kahn kamakam kowahlap,” NW] pahn laudsang apwal me kin wiawi sang mahs kohdo lel met; pil sohte me pahn duwe sang met kohla.” (Mad. 24:17, 18, 21) Mwohn oh erein “kahn kamakam kowahlap” me pahn leledo, kitail pil kak lelohng kahpwal kan. En ahneki limpoak me duwehte Krais pahn sewese kitail en dadaurete.

¹¹ Ni ahnsowo, kitail pahn anahne kahlemengih Sises oh kasalehda limpoak soh roporop. Pohl kaweidki: “Emenemen kitail uhdahn pahn kaparanih riatail [Kristian] kan ni wiewia mwahu ong irail, pwe kitail en seweseirailda nan ar pwoson. Pwe Krais sohte ketin kupwurohkihte pein ih. . . . Eri, Koht me tepin kanengamah oh kakehlepen loalatail, en ketin kaminiminihkinkumwailpene lamalamteieu ni amwail kin kahlemengih Krais Sises.”—Rom 15:2, 3, 5.

12. Soangen limpoak dahieu me kitail anahne kakairada met? Dahme kahrehda?

¹² Piter me paiekihda sapwellimen Sises limpoak, pil kangoange Kristian kan en kakairada ‘limpoak mehlel ong riarail [Kristian] kan’ oh “peikiong me mehlelo.” Kristian kan anahne en ‘limpoakpene sang nan kapehdarail unsek.’ (1 Pit. 1:22) Rahnwet, kitail anahne kakairada sapwellimen Krais irair kan laudsang mahs. Kahpwal kan lalaudlahr ong sapwellimen Koht aramas kan koaros. Kitail en dehr likih mehkot nin sampah wet pwehki rahnpwukat, e sansal me eh koasoandi me pid mwohni kin uhdahn pingiping. (Wadek 1 Sohn 2:15-17.) Ahpw, ni imwin koasoandi wet eh kerendohr, kitail en nantihong karanihala Siohwa oh emenemen oh kakairada nanpwungmwahu nan mwomwohdiso. Pohl kaweidki: “Kumwail limpoakpene nin duwen limpoak en [Kristian]; oh kumwail wahupene nanpwungamwail.” (Rom 12:10) Piter pil kasalehda kesempwalpen ireo ni eh koasoia: “Mwohn mehkoaros kumwail nantihong en limpoakpene, pwe limpoak kin mahkohng soahng tohto.”—1 Pit. 4:8.

13-15. Ia duwen ekei riatail kan arail kin kasalehda limpoak me duwehte Krais mwurin melimel laud ehu?

¹³ Nan sampah pwon, aramas kin esehki Sounkadehdehn Siohwa kan ar kin kasalehda limpoak mehlel. Medewehla Sounkadehde kan me kihda arail sawas mwurin melimel laud ehu kauwehla wasa laud ni palieir en Wehin Amerika nan pahr 2005. Pwehki re mwekidki limpoak me duwehte Sises, Sounkadehde kan me tohto sang rienen (20,000) pwilikihdi ar doadoahk mwahu oh imwarail kan pwehn kohla oh sewese riarail kan me lelohng kahpwal wet.

¹⁴ Nan ehu wasa, melimel wet kahrehda sehd oh iloak me ilehki piht 30 en lella nansapw mwail 50 sang ni oaroahr. Ni pihlo eh madada, silikis ehu en ihmw akan oh pil ihmw poasoake kan uhdahn ohla. Sounkadehde kan sang sahpw teikan wahdo ar dipwisou en doadoahk, kepwehn kauwada ihmw, oh doadoahngki arail koahiek oh kin men wia sohte lipilipil soangen doadoahk dah me anahn. Liohdi riemen me wia pirien ehu, kihpene ara kepwe kan nan sidohsa pwoat oh tangahki mwail 2,000 pwehn iang sawas. Emen rehra mihla wasao oh kin sewese pwihn en brother kan me kin apwalih soangen kahpwalo, oh e pil wia Pioneer men.

¹⁵ Imwen Sounkadehde kan oh ihmw teikan me tohtohsang 5,600 pwurehng kokouda oh kamwahula. Ia pepehm en irail Sounkadehde kan wasao ni arail kilang kasalepen limpoak wet? Emen sister me imweo ohlahr anahne kasaula nan bus ehu me duwehte ihmw me mpwih oh sidohpo pil ohla. Brother ko eri kauwada ihmw ehu me tikitik ahpw kansenamwahu ong ih. Ni eh kesihnen likin ihmw kapw oh kaselel wet, e sengisengki eh kalahngan ong Siohwa oh brother ko. Pak tohto, Sounkadehde kan anahne kasaula oh kousoanla ahnsou kis nan ekei ihmw tohrohr. Mwurin imwarail kan wiawihda, re pilada ren mihmihte wasa ko erein sounpar ehu de daulih. Dahme kahrehda? Pwehki re men pwihn en tohndoadoahk ko en mihmi nan imwarail ihmw kapw ko erein re wie doadoahk. Ia uwen ar kin kasalehda limpoak me duwehte Krais!

Kasalehda Limpoak me Duwehte Krais ong me Soumwahu kan

16, 17. Ia duwen atail kak kasalehda limpoak me duwehte Krais ong me soumwahu kan?

¹⁶ Ele me malaulau rehtail lelohngehr soangen kahpwal en melimel laud me duwehte met. Ahpw kitail koaros kin lelohng soumwahu, ma kaidehn kitail a emen kisehtail. Limpoak me Sises ketin kasalehiong me soumwahu kan kin wia mehn kahlemeng ong kitail. Sapwellime limpoak kin kamwakid ih en ketin poakehla irail. Ni pokon akan kin patohwandohng reh me soumwahu kan, e kin “ketin kakehlahda me soumwahu koaros.”—Mad. 8:16; 14:14.

¹⁷ Rahnwet, Kristian akan sohte ahneki soangen manaman me Sises sapwellimaniki pwehn kamwahwihala me soumwahu kan, ahpw re ahneki soangen limpoak duwehte Sises. Ia duwen met eh kin sansalda? Ehu mehn kadehde me elder kan kin kasalehda me re ahneki limpoak me duwehte Krais iei ni ar koasoanehdi sawas kan pwehn apwalih me soumwahu kan nan mwomwohdiso oh tehk me koasoandi pwukat kin pweida. Re kin idawehn kaweid me kileldi nan Madiu 25:39, 40. (Wadek.)

18. Ia duwen sister riemen ara kasalehda limpoak mehlel ong emen sister? Ia imwilahn met?

¹⁸ Mehlel, emen sohte anahne en wia elder men pwehn kadek ong meteikan. Medewehla Charlene, me sounpar 44 oh ahneki soumwahu en kanser, oh esehda me e pahn momourki rahn eisek. Ni Sharon oh Nicolette ara kilang duwen sistero eh kin anahne sawas, oh pil doadoahk laud oh pwunod me eh pwoudo kin ahneki pwehn apwahpwalih ih, ira eri toukihda pali laud en ara ahnsou pwehn sewese Charlene ni imwilahn eh mour. Sharon oh Nicolette kasalehda ara limpoak oh kin apwahpwalih Charlene kaidehn rahn eisek te, ahpw erein wihk weneu lao e mehla. Sharon koasoia: “E inenen apwal en kilang emen me soumwahu oh ese me e sohte pahn mwahula. Ahpw Siohwa kin ketin kakehle kiht. Met kin kakaranihala kiht rehn Siohwa oh pil rehra.” En Charlene eh pwoudo koasoia: “I pahn tamatamante kadek oh sawas me sister riemenet wiahiong kiht. Ara kin men sawas oh ara madamadau mwahu kin kamengeihala kahpwalo ong ei pwoud lelepek Charlene oh kakehle ie oh pil sewese kihsang kapwunod me I ahneki. I pahn kin kalahnganki ong ira kohkohlahte. Ara tounmetei kin kakehlaka ei pwoson Siohwa oh ei limpoak ong riei kan koaros nan sampah pwon.”

19, 20. (a) Ire limau dah kan me pid sapwellimen Krais lamalam me kitail tehkpeneier? (b) Dahme ke koasoanehdi teng en wia?

¹⁹ Nan iren onop siluh me kitail sukuhlkier, kitail tehkpeneier ire limau duwen sapwellimen Sises lamalam, oh ia duwen atail lamalam oh wiewia en duwehte ih. Kitail en kin “opampap oh nan kapehd karakarahk” duwehte Sises. (Mad. 11:29) Kitail en pil nantihong kadek ong meteikan, mehnda ma ar soh unsek oh luwet akan kin sansalda. Kitail en eimah oh peikiong kupwuren Siohwa kan koaros, mendahki kitail mi pahn lokolok de kahpwal kan.

²⁰ Eri, kitail en kasalehda limpoak ong riatail kan koaros duwehte Krais, “lao lel imwi.” Soangen limpoak wet kin kadehdehda me kitail iei sapwellimen Krais tohnpadahk mehlel. (Sohn 13:1, 34, 35) Ei, ‘kitail dadaurete atail limpoakpenehn [Kristian].’ (Ipru 13:1) Dehr pweiek! Koasoanehdi teng en doadoahngki omw mour pwehn kapinga Siohwa oh pil sewese meteikan! Siohwa pahn ketin kapaiada omw kin nannanti ni mehlel.

Ke Kak Kawehwehda?

• Ia duwen elder kan arail kin kasalehda limpoak duwehte Krais ong me wiahda dihp laud?

• Dahme kahrehda e kesempwal en alasang limpoak duwehte Krais ni ahnsou en imwi wet?

• Ia duwen atail kak kasalehda limpoak duwehte Krais ong irail kan me soumwahu?

[Kawehwehpen kilel kan nan ehu ehu pali 20]

Elder kan kin men irail me wiahda dihp laud en pwurodo rehn Siohwa

[Kawehwehpen kilel kan nan ehu ehu pali 21]

Ia duwen Kristian kan me tangasang Serusalem arail kin kasalehda limpoak duwehte Krais?

[Kawehwehpen kilel kan nan ehu ehu pali 22]

Aramas kin esehki Sounkadehdehn Siohwa kan ar kin kasalehda limpoak mehlel