Dahme Kahrehda Kitail en “Mwasamwasahn”?

1. Menlau karasahda duwen dahme kahrehda e kesempwal kitail en tetehk ahnsou oh dahme kin wiewiawi. (Menlau kilang tepin kilel.)

MIHTING tohrohro kereniong pahn tepida. Brothero me wia chairman aluhdahlahr pohn mwoahlo oh kasamwo koaros. Ngilen keseng pahn tepidahr. Towe kan ese me iei ahnsou me irail pahn mwohndi. Irail men rong ngilen keseng kaselel ko oh re kasikasik padahk kan me pahn wiawi. Ahpw ele mie ekei me sohte tetehk chairmano de tehk me ngilen kesengo tepidahr. Eri re sehse me mihting tohrohro tepidahr. Re alialuhselihte de koasoakoasoiohngete kompoakparail kan. Soangen irair wet kin kasalehda dahme kak wiawi ma kitail sohte kin tetehk ahnsou de dahme wiewiawi. Met wia mehn kasukuhl mwahu ong kitail pwehki ahnsou keren mie mehkot laudsang met me pahn wiawi, oh kitail anahne kaunopada. Dahme pahn wiawi?

2. Dahme kahrehda Sises mahsanihong sapwellime tohnpadahk kan ren “mwasamwasahn”?

² Sises Krais ketin mahsanihong sapwellime tohnpadahk kan duwen anahnepen en kin pepehd oh kaunopada ong kaimwiseklahn imwin koasoandi wet. E mahsanihong irail: “Kumwail mwasamwasahn oh pepehd, pwe kumwail sehse ahnsawi.” Ih eri pil pwurepwurehng mahsanih: “Kumwail mwasamwasahn.” (Mad. 24:3; wadek Mark 13:32-37.) Pwuhk en Madiu pil kasalehda me Sises ketin katamankihong sapwellime tohnpadahk ko duwen met pak tohto. E mahsanihong irail: “Kumwail eri mwasamwasahn pwe kumwail sehse rahn me amwail Kaun-o pahn ketido.” E pil pwurehng katamankihong irail: “Kumwail en pil onohnop ahnsou koaros, pwe Nein-Aramas pahn ketido ni awa me kumwail pahn sasairki.” E pil pwurehng mahsanih: “Kumwail eri mwasamwasahn pwe kumwail sehse rahno de awao.”​—Mad. 24:42-44; 25:13.

3. Dahme kahrehda kitail kin tetehk sapwellimen Sises kehkehliko?

³ Sounkadehdehn Siohwa kan kin tetehk kehkehliko me Sises ketikihda. Kitail ese me kitail mi “ni ahnsou me sampah pahn imwisekla” oh me ‘kahn kamakam kowahlapo’ pahn kereniong tepida! (Dan. 12:4; Mad. 24:21, NW) Duwehte me Sises ketin kohpada, sapwellimen Siohwa aramas akan kin kalokalohki rongamwahu duwen Wehio nan sampah pwon. Pil ni ahnsowohte, kitail kin kilang mahwen, soumwahu lusulus, rerrer en sahpw kan, oh lehk lapalap nan wasa tohto. Mie pingiping nan pelien lamalam kan oh wiewiahn mwersuwed oh tiahk lemei kin tohtohsang mahso. (Mad. 24:7, 11, 12, 14; Luk 21:11) Met kitail kin uhdahn kasikasik ahnsowo me Sises pahn ketido oh kapwaiada kupwuren Semeo.​—Mark 13:26, 27.

RAHNO KERENDOHR!

4. (a) Dahme kahrehda kitail kak kamehlele me ahnsou wet Sises mwahngih iahd me Armakedon pahn tepida? (b) Mendahte atail sehse iahd kahn kamakam kowahlapo pahn tepida, dahme kitail kak kamehlele?

⁴ Ni atail kohla ni mihting tohrohr ehu, kitail kin ese iahd me ehuehu prokram ko pahn tepida. Ahpw, kitail sohte kak uhdahn ese iahd me kahn kamakam kowahlapo pahn tepida. Sises mahsanih: “Duwen rahno oh ahnsowo, sohte emen me ese iahd e pahn leledo, oh tohnleng en nanleng kan, pil Sapwellimen Sahmo sohte mwahngih, Sahmohte me mwahngih.” (Mad. 24:36) Pwehki Sises iei me pahn ketin kahluwa mahwen en Armakedon, ahnsou wet e mwahngih duwen iahd me mahwen wet pahn tepida. (Kaud. 19:11-16) Ahpw kitail sehse iahd rahno de ahnsou me imwio pahn leledo. Ihme kahrehda e inenen kesempwal ong kitail en mwasamwasahn. Siohwa ketin koasoanehdier iahd me kahn kamakam kowahlapo pahn tepida, oh ehuehu rahn kitail kin kerekerenlahng ahnsowo. “E sohte pahn pwand.” (Wadek Apakuk 2:1-3.) Dahme kahrehda kitail kak kamehlele met?

5. Menlau kihda ehu karasaras me kasalehda me sapwellimen Siohwa kokohp kan kin ahnsou koaros pweida ni ahnsawi.

⁵ Sapwellimen Siohwa kokohp kan kin ahnsou koaros pweida ni ahnsawi! Karasepe, medewehla duwen rahno me e ketin kapitasang Isip sapwellime aramas akan. Rahno iei Nisan 14 en pahr 1513 mwohn Krais. Mwuhr, Moses ntingihedi duwen rahno: “Nin rahn me kaimwisekla sounpar pahpwiki silihseko kadaudok en sapwellimen KAUN-O aramas koaros wiahkinteieu mweselsang Isip.” (Eks. 12:40-42) Ni Nisan 14 en pahr 1943 mwohn Krais, sounpar 430 mwohn mehn Israel ko saledekla, sapwellimen Siohwa inou me e pahn ketin kapaiada kadaudoken Eipraam kan tepida wiawi. (Kal. 3:17, 18) Ahnsou kei mwurin mwo, Siohwa mahsanihong Eipraam: “Kadaudokomw kan pahn keikeiruseli nan sapwen wai ehu; re pahn wiahla lidu wasao oh ale lokolok erein sounpar 400.” (Sen. 15:13; Wiewia 7:6) Sounpar pahpwikio tepida nan pahr 1913 mwohn Krais ni ahnsou me Ismael tepida wiakauwe Aisek. Imwilahn sounpar pahpwikio iei rahno me Siohwa ketin kapitala mehn Israel kan sang Isip. (Sen. 21:8-10; Kal. 4:22-29) Ei, sounpar epwiki kei mwohn mwo, Siohwa ketin koasoanehdier rahno me e pahn ketin kapitala sapwellime aramas akan!

6. Dahme kahrehda kitail kak kamehlele me Siohwa pahn ketin doarehla sapwellime aramas akan?

⁶ Sosua iei emen mehn Israel ko me iang saledekla sang Isip. Sounpar tohto mwuri, e katamankihong aramas ako: “Emenemen kumwail patohwan ese nan mohngiongimwail oh [“mourimwail,” NW] me KAUN-O amwail Koht ketikihong kumwail soahng mwahu koaros me e ketin inoukidahr. E ketin kapwaiadahr inou koaros me e ketin wiahda, sohte ehu me sapwungala.” (Sos. 23:2, 14) Siohwa ketin inoukihda en ketin doarehla sapwellimen aramas akan erein kahn kamakam kowahlapo oh ketikihong irail mour soutik nan sampah kapwo. Oh kitail kak kamehlele me sapwellime inowo pahn pweida. Eri ma kitail men mi nan sampah kapwo, kitail anahne mwasamwasahn.

MWASAMWASAHN PWE KEN KAK PITLA

7, 8. (a) Ia pwukoahn sounsilasil men mahsie, oh dahme kitail kak sukuhlkihsang met? (b) Menlau karasahda dahme kakete wiawi ni sounsilasil men eh meirla nan eh doadoahko.

⁷ Kitail kak sukuhlkihsang sounsile kahnimw kan mahsie. Dihd ileile kan kin kapilpene tohtohn kahnimw pwukat, duwehte Serusalem, pwe imwintihti kan sohte pahn kak pedolong. Sounsilasil kan kin kesihnen pohn dihd pwukat, oh sang wasao, re kak kilang wasa koaros me kapilpene kahnimwo. Sounsilasil teikan kin kesihnen ni ewen kehl kan en kahnimwo. Re anahne mwasamwasahn nipwong oh ni rahn, oh ma re kilangada imwintihti kan kohkohdo, re anahne padahkihong aramas ako nan kahnimwo. (Ais. 62:6) Irail ese uwen kesempwal en kin pepehd oh tetehk kanahieng dahme kin wiewiawi. Ma re sohte wia met, aramas tohto kak mehla.​—Esek. 33:6.

⁸ Josephus, me ntingihedi duwen poadopoad en mehn Suhs kan, kawehwehda ia duwen mehn Rom ko ar kak pedolong nan Serusalem nan pahr 70 mwurin Krais. Sounsilasil ko me sile ehu wasa nan kahnimwo meirla. Pwehki met, sounpei en Rom ko kak pedolong nan kahnimwo. Re kohla ni tehnpaso, isikada, oh kasohrehla Serusalem. Iei met me kaimwisekala kahpwal me keieu laud me mehn Suhs ko lelohng.

9. Dahme pali laud en aramas akan rahnwet sohte ese duwe?

⁹ Pali laud en koperment kan rahnwet kin kadarala neirail sounpei kan, iangahki dipwisou kan me keieu kapw pwehn sile irepen sapwarailo. Sounsilasil pwukat kin tetehk aramas de mehkot me kakete wia keper ehu ong sapwarailo. Ahpw koperment pwukat sohte ese me mie ehu koperment nanleng me Krais Sises ketin kakaun me pil kehlail sang. Koperment wet pahn kereniong mahweniong koperment kan koaros nin sampah. (Ais. 9:6, 7; 56:10; Dan. 2:44) Kitail kin kasikasik rahno en leledo oh men kaunopadahng. Eri kitail kin tetehk kokohp kan nan Paipel oh pousehlahte papah Siohwa ni lelepek.​—Mel. 130:6.

DEHR MWEIDOHNG MEHKOT EN KEREMPWAIUKALA

10, 11. (a) Dahme kitail anahne kanahieng, oh dahme kahrehda? (b) Dahme kahrehda ke kamehlele me Tepilo kin kahrehiong aramas akan en soikala kokohp en Paipel?

¹⁰ Medewehla sounsilasil men me wie pepehd pwohng ehu pwon. Erein awa ko ni imwin eh sile wasao, e kin apwalla ong ih en wie pepehd pwehki e uhdahn pwangadahr. Duwehte met, kitail miher ni imwin rahn akan en koasoandi wet. Oh ni atail kerekerenlahng ni imwio, e pil apwalla ong kitail en wie pepehd. Ia uwen kansensuwed ma kitail sohte kin mwasamwasahn! Kitail pahn koasoiapene soahng siluh me kakete kauhdi kitail sang atail en wie pepehd.

¹¹ Tepilo kin pitihedi aramas. Iei ih “kaunen sampah wet.” Mwohnte Sises pwoula, e ketin katamankihong sapwellime tohnpadahk ko pak siluh duwen ire wet. (Sohn 12:31; 14:30; 16:11) Tepilo kin doadoahngki pelien lamalam likamw kan en pitihedi aramas. Ihme kahrehda aramas tohto rahnwet kin soikala kokohp kan en Paipel me kin kasalehda ni sansal me imwin sampah wet uhdahn kerendohr. (Sep. 1:14) E sansal me Sehdan karotongehla irail kan me sohte kin pwoson. (2 Kor. 4:3-6) Pwehki met, ni atail kin song en padahkihong aramas akan me imwin sampah wet kerendohr oh me Krais ketin kakaun ahnsou wet, tohtohn irail sohte mwahuki rong. Re kin kalapw nda, “I sohte men rong.”

12. Dahme kahrehda kitail en dehr mweidohng Tepilo en pitihkitaildi?

¹² Mendahki me tohto sohte men ese duwen kokohp kan en Paipel, kitail en dehr mweidohng arail madamadauo en kamworuseikitailla. Kitail ese dahme kahrehda e kesempwal kitail en mwasamwasahn. Pohl padahkihong rie Kristian ko: “Pein kumwail inenen ese mwahu duwen Rahnen Kaun-o eh pahn leledo rasehng lipirap emen me kin pwarodo nipwong.” (Wadek 1 Deselonika 5:1-6.) Sises ketin katamankihong kitail: “Kumwail pil onohnop, pwe Nein-Aramas pahn pwarodo ahnsou me kumwail sasairki.” (Luk 12:39, 40) Ahnsou keren, Sehdan pahn pil pitihedi aramas akan sang ni eh pahn kahrehiong irail en medewe me “mehkoaros meleilei oh mwahu” nin sampah. Eri, rahnen Siohwa pahn mwadangete wiawi, oh re uhdahn pahn pwuriamweila. Ia duwen kitail? Ma kitail men kaunopada ong rahno oh sohte duwehte meteikan koaros me Sehdan pitihedi, kitail anahne “pepehd oh onohnop” ahnsou wet. Ihme kahrehda kitail anahne wadek Mahsen en Koht rahn koaros oh doudouloale dahme Siohwa ketin mahsanihong kitail.

13. Ia duwen manaman en sampah wet eh kin kamwakid aramas, oh ia duwen atail kak soikala madamadau keper wet?

¹³ Manaman en sampah wet kin kamwakid madamadau en aramas. Aramas tohto rahnwet kin medewe me re sohte anahne esehla Koht. (Mad. 5:3) Re kin doadoahngki pali laud en arail ahnsou oh kehl en alehda soahng tohto me sampah kin kihda. (1 Sohn 2:16) Patehng met, mie soangsoangen mehn kamweit kan me tohtohsang mahso me mwomwen kaperen oh lingan ong aramas oh kin kangoange ren perenki pein arail peren oh kaitarala arail ineng kan koaros. (2 Tim. 3:4) Soahng pwukat kin kerempwahla aramas sang dahme kesempwal, oh re sohte kin medemedewe duwen arail nanpwungmwahu rehn Koht. Ihme kahrehda Pohl katamankihong Kristian kan me re anahne ‘pirida sang arail meir’ ni arail sohte kin nsenohkihte en kaitarala arail ineng kan.​—Rom 13:11-14.

14. Mehn kataman dahieu me mi nan Luk 21:34, 35?

¹⁴ Kitail men sapwellimen Koht manaman en kamwakid mwomwen atail madamadau, a kaidehn elen madamadau en sampah wet. Siohwa ketin doadoahngki sapwellime manaman en sewese kitail en uhdahn wehwehki dahme pahn kereniong wiawi.^[1] (1 Kor. 2:12) Ahpw kitail anahne kanahieng. Pil soahng kan me kitail medewe me sohte nohn kesempwal rehtail kakete kerempwakitailla sang atail papah Siohwa. (Wadek Luk 21:34, 35.) Ele ekei pahn nda me kitail pweipwei en kamehlele me kitail miehier ni imwin koasoandi en sampah wet. (2 Pit. 3:3-7) Ahpw kitail en dehr mweidohng irail en kamworuseikitailla, pwehki mie mehn kadehde sansal me imwio kerendohr. Ma kitail men sapwellimen Koht manaman en kamwakid kitail, kitail anahne iang riatail Kristian kan kaukaule towehda mihting kan.

15. Dahme wiawihong Piter, Seims, oh Sohn, oh ia duwen met eh pil kak wiawihong kitail?

¹⁵ Atail soh unsek kin kahrehda e apwal en wie pepehd. Sises mwahngih me aramas akan sohte unsek oh luwet. Medewehla dahme wiawi pwohngo mwohnte e ketin pwoula. Mendahki Sises unsek, e mwahngih me e anahne kapakapohng Semeo pwehn ketin sewese ih en kolokolte eh lelepek. Sises mahsanihong sapwellime wahnpoaron ko Piter, Seims, oh Sohn ren pepehd erein eh wie loulou. Ahpw wahnpoaron ko sohte wehwehki uwen kesempwalpen arail en wie pepehd. Re pwangadahr oh eri meirla. Sises pil ketin ngiralahr, ahpw e ketin pepehd oh wie kapakapohng Semeo. Wahnpoaron ko pil anahne iang kapakap ni ahnsowo.​—Mark 14:32-41.

16. Nin duwen me Luk 21:36 kasalehda, ia duwen Sises eh ketin padahkihong kitail en wia “pepehd”?

¹⁶ Dahme pahn sewese kitail en “pepehd” oh kaunopadahng rahnen Siohwa? Kitail en uhdahn inengieng en pousehlahte wiewia dahme pwung. Ahpw met sohte itar. Rahn kei mwohn Sises pwoula, e mahsanihong sapwellime tohnpadahk ko me re anahne pousehlahte kapakapki sapwellimen Siohwa sawas. (Wadek Luk 21:36.) Pwehn pepehd ni ahnsoun imwi wet, kitail pil anahne kapakapohng Siohwa ahnsou koaros.​—1 Pit. 4:7.

KITAIL EN MWASAMWASAHN

17. Ia duwen atail kak tehk mwahu me kitail onopadahng dahme pahn wiawi ni ahnsou kohkohdo?

¹⁷ Sises mahsanih me imwio pahn leledo ‘ni awa me kitail pahn sasairki.’ (Mad. 24:44) Eri kitail anahne onohnop ahnsou koaros. Met kaidehn ahnsoun ahneki mwomwen mour me Sehdan oh eh sampah nda pahn wahdo nsenamwahu. Met wiahte ouraman ehu. Ahpw, Siohwa oh Sises ketin doadoahngki Paipel en padahkihong kitail ia duwen atail kak mwasamwasahn. Eri kitail en tehk mwahu kokohp kan en Paipel oh ia duwen kokohp pwukat ar pweidahr. Oh kitail en doulahte karanihala Siohwa oh mwohneki mahs sapwellime Wehio nan atail mour. Eri kitail pahn onopada ni imwio eh pahn leledo. (Kaud. 22:20) Atail mourla kin pidada met!