“Doadoahk Wet me Pahn Wiawi me Laud”

E LELEHR ahnsou ong tuhpene tohrohr kesempwal ehu nan Serusalem. Nanmwarki Depit ekerpenehier nah soupeidi kan, kaun lapalap akan oh sounpei kehlail kan. Re perenkihda rong pakair kesempwal ehu. Siohwa ketin koasoanehdier me nein Depit pwutako Solomon pahn kauwada tehnpas lapala ehu pwehn wia wasahn kaudok ong Koht mehlelo. Koht ketikihong nanmwarki Depit koasoandi de pilahn en kauwada tehnpas wet oh Depit kihongehr Solomon. Depit nda: “Doadoahk wet me pahn wiawi me laud oh kesempwal, pwe kaidehn imwen aramas, ahpw tehnpesen KAUN-O Koht.”​—1 Kron. 28:1, 2, 6, 11, 12; 29:1.

Mwuhr Depit idek: “Eri, ihs me inengieng kihda meirong ni kapehd mwakelekel ong KAUN-O?” (1 Kron. 29:5) Ma ke mi wasao ahnsowo, dahme ke pahn wia? Ke pahn mwekidkihda oh men utungada doadoahk kesempwal wet? Mehn Israel ko mwadangete wia met. Ei, re “patohwanda dipwisou kan sang ni pein nsenarail ong KAUN-O, oh re perenkihda ar patohwanda uwe ieu me inenen laud.”​—1 Kron. 29:9.

Sounpar tohto mwuri, Siohwa ketin wiahdahr koasoandi ehu me lapalap sang koasoandi en tehnpas sarawio. E ketin wiahda koasoandi kapw ehu ong kaudok, me iei aramas akan en kaudokiong ih poahsoankihda meirong en Sises. (Ipru 9:11, 12) Ia duwen Siohwa eh ketin sewesewese aramas akan rahnwet en wekila sang ni imwintihti en Koht ong kompoakepah? E ketin wia met sang ni atail doadoahk en katohnpadahk. (Mad. 28:19, 20) Pwehki doadoahk wet, onop en Paipel rehn aramas rar rar kei kin wiawi sounpar koaros, tohn sukuhl en Paipel kid kid kei kin papidaisla, oh mwomwohdiso kapw tohtohie kin wiawihda.

Met pil kahrehda en mie anahnepen wiawihdahn sawaspen Paipel kan, anahnepen kokoudahn oh apwalih Wasahn Kaudok kan, oh pil alahldahn wasahn mihting tohrohr kan. Ke sou pwungki me atail doadoahk en lohkiseli rongamwahwo kin kesempwal oh wia kapai laud ehu?​—Mad. 24:14.

Limpoak ong Koht oh mehn mparail kan oh pil ahneki madamadau karuwaru en kalohki duwen Wehio kin kamwakid sapwellimen Koht aramas akan en “inengieng kihda meirong . . . ong KAUN-O” sang ni arail kin pein toukihda sawas en mwohni oh soahng teikan. Ia uwen kaperen en “wauneki Siohwa ni omw pahn meirongkihong omw dipwisou kesempwal kan” oh kilang ia duwen meirong pwukat ar kin kadoadoahk ni elen loalokong oh lelepek pwehn wia doadoahk me keieu kesempwal nan poadopoad en aramas!​—Lep. Pad. 3:9, NW.