Aramas Sapan Pahn Ale Kupwuramwahu

EREIN ahnsou reirei, meirong kan kin wia kisehn kaudok mehlel. Mehn Israel ko kin meirongki mahn akan, oh me tohto kin ese duwen Kristian kan ar kin kihda arail “meirong en kaping.” Ahpw mie meirong teikan me Koht pil kin ketin kupwurperenki. (Ipru 13:15, 16) Meirong pwukat kin wahdo peren oh kapai, nin duwen me karasaras pwukat pah kasalehda.

Ana, emen ladu lelepek en mahso, uhdahn men naineki emen pwutak ahpw e sohte kak naineki seri. Nan eh kapakap, e inoukihong Siohwa me ma e pahn nainekihda pwutak emen, e pahn “kasarawihong komwi [Siohwa] erein eh mour unsek.” (1 Sam. 1:10, 11) Kedekedeo, Ana liseianda oh naitikidi kisin pwutak kis me adaneki Samuel. Mwurin Samuel mweisang dihdi, Ana wahla ih nan impwal sarawio nin duwen me e inoukihda. Siohwa ketin kapaiahda Ana pwehki eh meirong en tounmetei. Mwuhr Ana pil nainekihda seri limen, oh Samuel wiahla soukohp oh sounnting en Paipel men.—1 Sam. 2:21.

Duwehte Ana oh Samuel, Kristian kan rahnwet ahneki pwais kaselel en doadoahngki arail mour pwehn papah Sounkapikparail. Sises ketin inoukihda me sohte lipilipil soangen meirong dah me kitail wiahda pwehn kaudokiong Siohwa, kitail pahn ale keting laud.—Mark 10:28-30.

Ni mwehin wahnpoaron ko, mie lih Kristian men me adaneki Dorkas. Me tohto kin ese ih pwehki eh kin “wiewia mwahu oh sewese” meteikan ni tounmetei. Ahpw e “soumwahuda oh mehla,” oh tohn mwomwohdiso pwon pahtoula. Ni tohnpadahk ko ar rongada me Piter mi karanih arail wasao, re peki ih en menlau mwadangala rehrail. Medewehla uwen arail peren ahnsou me Piter lella mwo oh kaiasada Dorkas. Met wia keieun kaiasada me wahnpoaron men wiahda! (Wiewia 9:36-41) Koht sohte ketin meliehla wiewiahn tounmetei kan me Dorkas wiahda. (Ipru 6:10) Eh wiewia sapan kan kileldi nan Paipel nin duwen mehn kahlemeng mwahu kei me kitail en alasang.

Wahnpoaron Pohl pil wia mehn kahlemeng mwahu nin duwen emen me kin kihda eh ahnsou oh nsenohki meteikan. Ni eh ntinglahng rie Kristian ko nan Korint, Pohl nda: “Ngehi I pahn netikihla mehkoaros me I ahneki, pil pein ngehi, pwe I en sewesehkin kumwail.” (2 Kor. 12:15) Pohl sukuhlki sang dahme e kin lelohng me en tounmeteikihla pein ih ong meteikan kin wahdo kaidehn ihte nsenamwahu ahpw, kesempwal sang met, kapai oh kupwuramwahu sang rehn Siohwa.—Wiewia 20:24, 35.

Eri e sansal me Siohwa kin ketin kupwurperenki atail doadoahngki atail ahnsou oh kehl pwehn utungada doadoahk en Wehio oh sewese riatail Kristian kan. Ahpw ia duwe, mie ahl teikan me kitail kak sewesehki doadoahk wet? Ei! Patehng atail doadoahngki atail ahnsou oh kehl, kitail kak kawauwih Koht sang ni atail toukihda sawas en mwohni oh kepwe kan. Sawas pwukat kin sewese doadoahk en kalohk me kin wiawi nan sampah pwon, me iangahki sewese misineri kan oh irail tohrohr teikan me kin doadoahngki pali laud en ar ahnsou ong papah Koht. Patehng met, atail pein toukihda sawas pwukat pil kin sewese kawehwehpen oh wiawihdahn sawaspen Paipel kan, sewese wasa kan me lelohng kahpwal kan duwehte melimel ape, oh pil kokoudahn Wasahn Kaudok kapw kan. Kitail kak kamehlele me aramas “sapan . . . pahn alehki kupwuramwahu” arail wiewia kan. Laudsang met, ni atail kin patohwanohng Siohwa soahng kesempwal kan me kitail ahneki, kitail kin kawauwih ih.—Lep. Pad. 3:9; 22:9.

Ia Duwen Ekei Ar Kin Kihda Sawas Ong Doadoahk En Kalohk Sampah Pwon

Duwehte Kristian ko ni mwehin wahnpoaron kan, me tohto rahnwet kin “katohrehsang ekis mwohni” oh kihong nan koakon en sawas en mwomwohdiso me nda “Sawas ong Doadoahk en Kalohk Sampah Pwon.” (1 Kor. 16:2) Sounpwong koaros, mwomwohdiso kan kin kadarala sawas pwukat ni ohpis en Sounkadehdehn Siohwa kan me kin apwalih arail mwomwohdiso. Ke pil kak kadarala sawas en mwohni ni ehu ohpis en sawaspen kosonned kan me Sounkadehdehn Siohwa kan en sahpwo kin doadoahngki. Pwehn ese eden ohpis pwukat, menlau ideklahng ohpis en Sounkadehdehn Siohwa me kin apwalih mwomwohdiso me ke kin iang. Ke pil kak diarada adres en wasa pwukat nan www.jw.org. Eri iet soangen sawas kan me ke kak kadarala:

MWOHNI DE DIPWISOU KESEMPWAL KAN

Doadoahngki Internet ni omw kadar sent sang pangk, debit card, de credit card. Nan ekei ohpis en Sounkadehdehn Siohwa kan, met kak wiawi ni omw doadoahngki jw.org de ehu website me pilipildahr.
Sawas en mwohni, mehn kapwat, de omw dipwisou kesempwal teikan. Ntingihada kisinlikou ehu me kasalehda me mwohnio de dipwisowo wia sawas kei.

SAWAS ME ONG AHNSOU EHU

Sawas en mwohni me pahn kak kapwurpwurdo ni ahnsou me ke anahne.
Ntingihada kisinlikou ehu me kawehwehda me mwohnio ongete ahnsou ehu.

AHL TEIKAN ME KE KAK KIHDA OMW SAWAS

Mie ahl teikan me kileldi pah me ke kak doadoahngki pwehn kihda sawas ong doadoahk en kalohk sampah pwon. Mwohn omw pahn kihda sawas, menlau ideklahng ohpis en Sounkadehdehn Siohwa kan me apwalih mwomwohdiso me ke kin iang pwehn kilang wiepen kihda sawas dahieu me ke kak wia. Kosonned kan oh kosonned en daksis kan wasa koaros sohte duwepenehte, kahrehda peki emen me samanih soangen palien kosonned pwukat mwohn omw pahn wiahda de kihda omw sawas.

Mwohni en Insurance oh Retirement: Ma mie koasoandi en insurance me ke naineki, de koasoandi en ale mwohni mwurin omw kommoal sang doadoahk pwehki omw mahla (retirement), ke kak sawaskihda met ni omw pahn kilelehdi pohn koasoandi pwukat eden ehu ohpis en sawas en kosonned kan me Sounkadehdehn Siohwa kan kin doadoahngki.

Sent nan Pangk: Nin duwen kosonned en pangk en omw wasa, ke kak wiahda koasoandi en nekidala sent, certificate en deposit, de mwohni me ke kin aliale sang palien omw doadoahk (retirement) oh kihdi nan pangko. Ke pil kak kilelehdi me ehu ohpis en sawas en kosonned me Sounkadehdehn Siohwa kan kin doadoahngki iei me pahn ale mwohnio mwurin omw mehla.

Wihn en Mwohni sang Pesines kan: Ke kak kihda nin duwen sawas en mwohni ehu wihn en pesines kan me ke ahneki de pwainda. Ke pil kak ntingihedi koasoandi ehu me kasalehda me mwurin omw mehla, wihn pwukat pahn kohwong ehu ohpis en sawas en kosonned me Sounkadehdehn Siohwa kan kin doadoahngki.

Ihmw oh Sahpw: Pesines en netiki ihmw oh sahpw kan kak netila oh mwohnio kak kohwong ehu ohpis en sawas en kosonned me Sounkadehdehn Siohwa kan kin doadoahngki. Ma ke kin kousoan nan ehu ihmw de sahpw pwukat, ke kak wiahda koasoandi en pousehlahte kousoan wasa ko lao ke mehla.

Sohso oh Soahng Kesempwal kan me Nekinekla nan Pangk: Ihmw, sahpw de mwohni kak kohwong ehu ohpis en sawas en kosonned me Sounkadehdehn Siohwa kan kin doadoahngki nin duwen sohso ehu, de ke kak wiahda kisinlikou nin duwen kosonned me ohpis wet iei me pahn aliale dahme ke nekidala nan pangk kan. Koasoandi wet kak seweseiuk paiekihda ekei kamwahupen palien daksis kan.

Ke kak pil kalaudehla omw ese wiepen kihda sawas ong doadoahk en Sounkadehdehn Siohwa kan sampah pwon ni omw wadek kisin pwuhko Charitable Planning to Benefit Kingdom Service Worldwide, me wiawihda ni lokaiahn wai oh Spain. Kisin pwuhk wet audaudki ire kan me pid soangsoangen ahl akan me emen kak kihda sawas de kisakis. Audepen pwuhk wet ele sohte pahn kadoadoahk ong omw irairo pwehki kosonned en daksis de kosonned teikan en sahpw me ke kousoan ie. Eri mwurin omw wadekala pwuhko, ke anahne tuhwong oh koasoiong emen me samanih palien kosonned oh kosonned en daksis kan. Aramas tohto sewesehier atail doadoahk en kalohk sampah pwon oh kin paiekihda kamwahu kan me palien daksis kin kihda sang ni arail doadoahngki wiepe pwukat. Ma mie kisin pwuhk wet nan sahpw me ke mi ie, ke kak ale pein noumw sang rehn sekteri en omw mwomwohdiso.

Pwehn kalaudehla omw esehla duwen met, menlau kohla jw.org oh padik link wet “Kihda Sawas en Mwohni ong Atail Doadoahk en Sampah Pwon” me kileldi pah nan pali koaros en website wet, de eker ohpis en Sounkadehdehn Siohwa kan.