Likihong Ohl Lelepek kan Mepwukat

1, 2. Ia duwen aramas akan ar kin kilangwohng arail doadoahk?

ARAMAS tohto kin medewe me re kesempwal de sohte kesempwal nan pwukoa me re kin wia. Nan ekei sahpw, ma aramas emen me men esehla emen, re pahn idek: “Soangen doadoahk dah me ke kin wia?”

² kei pak Paipel kin kawehwehda duwen aramas emen sang ni soangen doadoahk dah me aramaso kin wia. Karasepe, e koasoia me “Madiu, sounrik daksis,” “ohl me kin wiahda kilin kou me pil adaneki Saimon,” oh “Luk, kompoakepatail toahkte.” (Mad. 10:3; Wiewia 10:6; Kol. 4:14) Ekei ahnsou, Paipel pil koasoia duwen pwukoa kan me aramas akan ahneki nan sapwellimen Siohwa doadoahk. Medewehla Nanmwarki Depit, soukohp Elaisa, oh wahnpoaron Pohl. Ohl pwukat kesempwalki pwukoa me Siohwa ketikihong irail. Pil duwehte kitail, kitail anahne kesempwalki sohte lipilipil soangen pwukoa dah me kitail ahneki nan sapwellimen Siohwa doadoahk.

3. Dahme kahrehda me mah kan anahne kaiahne me pwulopwul kan? (Menlau kilang tepin kilel.)

³ Kitail kin poakohng Siohwa oh kesempwalki atail pwukoa kan. Tohto kitail kin perenki atail doadoahk oh koapworopworki me kitail pahn pousehlahte wiewia met. Ahpw e kansensuwed pwe ni aramas akan ar kin mahla, re solahr kak wia soahng koaros me re kin wia duwehte mahso ni arail pwulopwul. (Ekl. 1:4) Met kin kahrehda kahpwal laud kan ong sapwellimen Siohwa aramas akan. Rahnwet, doadoahk en kalohk kin pousehlahte kekeirda oh sapwellimen Siohwa pwihn kin doadoahngki dipwisou kan pwehn ehukihong rongamwahwo uwen tohtohn aramas me re kak. Ahpw ekei pak e kak apwal ong me mah kan en sukuhlki wiepe kapw kan pwehn wia soahng kan. (Luk 5:39) E pil sohte wia mehkot kapwuriamwei me aramas akan sohla kehlail oh roson ni arail mahla. (Lep. Pad. 20:29) Eri, e wia elen limpoak oh katapan ni me mah kan ar kin kaiahne me pwulopwul kan en ale pwukoa teikan nan sapwellimen Siohwa pwihn.​—Wadek Melkahka 71:18.

4. Dahme kahrehda e apwal ong ekei en kihong meteikan pwukoa kan? (Menlau kilang koakon me oaralape “Dahme Kahrehda E Kakete Apwal en Kihong Meteikan Pwukoa.”)

⁴ E sohte kin ahnsou koaros mengei ong irail kan me ahneki manaman en kihong me pwulopwul kan doadoahk. E kak kahrehiong brother kan en nsensuwed ni arail medewehla arail pahn luhssang pwukoa me re uhdahn perenki. Ele re kak nsensuwedkihla ni arail medewehla me irail anahne uhdihsang wia doadoahk tohrohr me re kin perenki wia. De ele re kin pwunodki ma re sohte kaweid doadoahko, e sohte pahn pweida mwahu. Mwein ekei medewe me sohte arail ahnsou en kaiahne meteikan. Ni ahnsowohte, me pwulopwul kan anahne kanengamah ma re sohte alehdi pwukoa teikan.

5. Peidek dah kan me kitail pahn koasoiapene nan iren onop wet?

⁵ Eri dahme kahrehda e kesempwal ong me mah kan en sewese me pwulopwul kan en ale pwukoa teikan? Ia duwen arail kak wia met? (2 Tim. 2:2) Oh dahme kahrehda me pwulopwul kan anahne ahneki madamadau pwung ni arail kin iang brother mah oh koahiek kan doadoahk oh ale kaiahn? Kitail pahn kilang ia duwen Nanmwarki Depit eh kaunopada nah pwutako ong doadoahk ehu me inenen kesempwal.

DEPIT KAUNOPADA SOLOMON

6. Dahme Nanmwarki Depit men wia? Dahme Siohwa ketin mahsanihong ih?

⁶ Sounpar tohto, Depit kin lelohng lokolok oh anahne keseuseli. Ahpw mwurin eh wiahla nanmwarki, e kin kousoan nan ihmw kaselel ehu. Eri e ndaiong soukohp Nadan: “Kilang, met I mihmi nan ihmw ehu me wiawihkihda tuhke sidar, a Kohpwahn Inoun KAUN-O wie nekinek nan impwal ehu!” Depit uhdahn men kauwada tehnpas kaselel ehu ong Siohwa. Nadan ndaiong: “Komw ketin wiahda dahme komw ketin kupwukupwure, pwe KAUN-O kin ketin ieiang komwi.” Ahpw Siohwa sohte ketin kupwurki met. E mahsanihong Nadan en ndaiong Depit: “Kaidehn komwi me pahn wiahda tehnpesei me I pahn ketiket loale.” Depit esehda me emen nah pwutak ko me pahn kauwada tehnpaso. Siohwa ketin inoukihong Depit me e pahn ahnsou koaros ketin ieiang ih. Ia duwen Depit eh mwekidki met?​—1 Kron. 17:1-4, 8, 11, 12; 29:1.

7. Ia duwen Depit eh mwekidki sapwellimen Siohwa kaweid?

⁷ Depit uhdahn men kauwada tehnpas en Siohwa, eri mwein e uhdahn nsensuwedla. Ahpw e utungte doadoahk me nah pwutako Solomon pahn wia. Depit sewese koasoanehdi tohndoadoahk kan oh kihpene mete, prons, silper, kohl, oh tuhke kan. E sohte pwunodki ihs me pahn adamwahukihla kokoudahn tehnpaso, me mwuhr adanekihla tehnpesen Solomon. Ahpw, e kangoange Solomon ni eh nda: “Eri, samwa, KAUN-O omw Koht en ketin ieiang uhk, oh en ketin kapwaiada sapwellime inou me pid kokoudahn ehu tehnpas ong ih.”​—1 Kron. 22:11, 14-16.

8. Dahme kahrehda Depit ele medewe me Solomon sohte koahiek en kauwada tehnpaso? Ahpw dahme Depit wia?

⁸ Wadek 1 Kronikel 22:5. Ele Depit medewe me Solomon saikinte onopadahng kaweid doadoahk kesempwal wet. Tehnpaso anahne “lingan oh ndand,” ahpw Solomon “pwulopwul oh soakoahiek.” Ahpw Depit ese me Siohwa pahn ketin sewese Solomon en wia doadoahk tohrohr wet. Eri Depit wia uwen eh kak koaros pwehn sewese ih kaunopada ong doadoahk laud wet.

PERENKI KAIAHNE METEIKAN

9. Ia duwen me mah kan ar kak perenki ar kihong meteikan pwukoa kan? Menlau kihda ehu karasaras.

⁹ Brother mah kan en dehr nsensuwedla ni arail kin anahne kihong brother pwulopwul kan ekei pwukoa. Kitail koaros ese me dahme keieu kesempwal rahnwet iei sapwellimen Siohwa doadoahk. En kaiahne brother pwulopwul kan en apwalihala pwukoa kan pahn sewese doadoahk wet en pweida. Nna medewehla met. Ni ahnsou me ke tikitik, ele ke kin kilang mwomwen omw pahpao eh kin tangahki sidohsa. Ni omw laudla, e kawehwehiong uhk dahme e kin wiewia. Mwuhr, ke ale noumw laisin oh tepida pein tangahki sidohsao. Mendahki met, omw pahpao kin kaukaweidihukete. Ekei pak kumwa kin wilian emenemen tangahki sidohsao. Ahpw ni omw pahpao mahla, kowe me kin kalapw tangahki sidohsao. Ia duwe, omw pahpao nsensuwedla? Soh, mwein e perenki omw kak tangahkihla ih wasa kan. Ni ahlohte, brother mah kan kin peren ni arail kilang brother pwulopwul kan me irail kaiahnehda ar kaunopada en ale pwukoa kan nan sapwellimen Siohwa pwihn.

10. Ia ahn Moses madamadau ong alehdi wahu oh ahneki manaman?

¹⁰ Kitail anahne kanahieng en dehr peirinki ahn meteikan pwukoa. Kitail kak sukuhlkihsang dahme Moses wia ni ekei mehn Israel ko ar tepida mwomwen soukohp kei. (Wadek Nempe 11:24-29.) Sosua men kauhdi irail, ahpw Moses nda: “Dah? Kowe me pahn kaweid ie? I ahpw men KAUN-O en ketin audehki aramas koaros sapwellime [“manaman,”NW] pwe re en pil kokohp ni ngihl laud!” Moses ese me Siohwa me ketin kaukaweid doadoahko. Moses sohte men wahu en kohwong ih kelehpw, ahpw e men sapwellimen Siohwa ladu kan koaros en ahneki pwukoa kan. Ia duwen kitail? Kitail kin peren ni meteikan ar ale pwukoa kan nan sapwellimen Siohwa doadoahk?

11. Dahme emen brother nda duwen kihong pwukoa kan ong meteikan?

¹¹ Mie brother tohto me kin doadoahk laud nan sapwellimen Siohwa doadoahk erein sounpar tohto oh kaiahnehda brother pwulopwul kan en alehdi pwukoa teikan. Karasepe, kitail tehk duwen emen brother me adaneki Peter. E doadoahngki pali laud en eh ahnsou ong papah Siohwa erein sounpar 74. Erein sounpar 74 ko, e papah nan ohpis en Sounkadehdehn Siohwa kan nan Iurop erein sounpar 35. Ahnsou werei, e kin wia sounapwalih en Pali en Kalohk. Eri pwukoa wet uhd kohwong Paul, emen brother pwulopwul me Peter kaiahnehda. Ia duwe, Peter nsensuwedkihla wekidekla wet? Soh. E nda: “I uhdahn perenki me mie brother kan me kin kaiahnda pwehn alehdi pwukoa laud kan oh pil kin pweida mwahu ni arail kin apwalih doadoahko.”

KESEMPWALKI ME MAH KAN

12. Dahme kitail kak sukuhlkihsang mehn kahlemeng en Reopoham?

¹² Ni ahnsou me nein Solomon pwutako Reopoham nanmwarkihla, e peki kaweid sang ohl mah kan ong ia duwen eh pahn apwalihala eh pwukoa kapwo. Ahpw e soikala arail kaweid! E idawehn kaweid kan sang rehn mwahnakapw ko me e tikida rehrail. Met uhdahn imwila suwed. (2 Kron. 10:6-11, 19) Dahme kitail kak sukuhlkihsang met? E wia elen loalokong en peki kaweid sang irail kan me mah sang oh koahiek sang kitail. Me pwulopwul kan en dehr pehm me re anahne wia soangen doadoahk ehu ni ahlohte me kin wiawi mahso. Ahpw, re anahne uhdahn wauneki kaweid kan en me mah kan oh dehr mwadang en medewe me mwomwen ahn me mah ko ar kin wia soahng kan sohte pahn doadoahk mwahu.

13. Ia duwen me pwulopwul kan ar pahn iang me mah kan doadoahkpene?

¹³ Ekei pak, pwukoa kan kin kohwong me pwulopwul kan pwe ren apwalih doadoahk en brother mah oh uhdahn koahiek kan. E wia elen loalokong irail en ale kasukuhl sang me mah pwukat. Nan karasaras me kitail koasoia mwoweo, mwurin Paul wiliandi Peter nin duwen emen sounapwalih nan Pedel, e nda, “I kin nsenohki ale kaweid sang Peter, oh I kangoange meteikan wasao en pil wia duwehte.”

14. Dahme kitail sukuhlkihsang mwomwen Timoty oh wahnpoaron Pohl ara kin doadoahkpene?

¹⁴ Timoty uhdahn pwulopwul sang wahnpoaron Pohl, oh ira kin doadoahkpene erein sounpar tohto. (Wadek Pilipai 2:20-22.) Pohl ndaiong mehn Korint kan: “Ih met kahrepen ei kadarewei Timoty rehmwail. Pwe ih nei seri kompoake mehlel, oh loalopwoat rehn atail Kaun. Ih me pahn katamankin kumwail wiepen mour kapw rehn Krais Sises me I kin wiewia oh pil padapadahkihong . . . wasa koaros nan mwomwohdiso kan.” (1 Kor. 4:17) Sang ire pwukat, kitail kak kilang ni sansal me Pohl oh Timoty kin doadoahkpene oh sewese emenemen. Pohl kin nsenohki padahkihong Timoty “wiepen mour kapw rehn Krais Sises” me e kin wiewia, oh Timoty esehla mwahu met. Pohl kin uhdahn perenki Timoty oh kamehlele me e pahn apwalih mwahu Kristian kan nan Korint. Elder kan kak alasang wahnpoaron Pohl ni arail kaiahne brother teikan pwe ren tiengla mwowe nan mwomwohdiso!

EMENEMEN KITAIL AHNEKI PWUKOA KESEMPWAL EHU

15. Ia duwen Rom 12:3-5 eh kak sewese kitail en dadaur pahn wekidekla kan?

¹⁵ Kitail mi ni ahnsou kesempwal kei. Sapwellimen Siohwa pwihn nin sampah kin wie kekeirda ni ahl tohto. Met wehwehki me soahng kan pahn wie wekiwekila. Ekei wekidekla pwukat kin kamwakid atail mour oh e kin apwal en dadaur pahn mepwukat. E pahn sawas ma kitail kin aktikitik oh medemedewehte dahme mwahu ong doadoahk en Wehio a kaidehn dahme kitail ele mwahuki. Ni atail wia met, kitail pahn kolokol atail miniminpene. Pohl ntinglahng Kristian kan nan Rom oh nda: “I ndaiong kumwail koaros: kumwail dehr medemedewe me kumwail me lapalap.” Ih eri kawehwehda me duwehte doadoahk en ehuehu kakon kan en paliwaratail ar kin wekpeseng, pwukoahn emenemen nan mwomwohdiso pil kin wekpeseng.​—Rom 12:3-5.

16. Dahme emenemen Kristian kak wia pwehn kolokolete popohl oh minimin nan sapwellimen Siohwa pwihn?

¹⁶ Sapwellimen Siohwa aramas akan koaros kin men utung Wehio oh wia pwukoa kan me kohwong irail. Brother mah kan kak kaiahne me pwulopwul kan. Ni mpahi oh wahu, brother pwulopwul kan kak alehdi pwukoa teikan. Oh brother koaros kin kalahnganki ni arail pwoud ko kin utung irail pil ni ahnsou me irair kan wekila. Lih pwukat kak alasang Persila, me ni lelepek iang eh pwoudo Akwila doadoahk.​—Wiewia 18:2.

17. Dahme Sises ketin mwahngih me sapwellime tohnpadahk kan kak wia ni ahnsou kohkohdo? Doadoahk dahieu me e ketin kaiahne irail en wia?

¹⁷ Sises ketikihda mehn kahlemeng me keieu mwahu en nsenohki kaiahne meteikan. Sises mwahngih me ni ahnsou me e sohla ketiket sampah, meteikan pahn anahne pousehlahte wia sapwellime doadoahk. E uhdahn mwahngih me sapwellime tohnpadahk ko sohte unsek. Ahpw e ketin kamehlele me re kak wia doadoahk en kalohki rongamwahwo laudsang me e ketin wia. (Sohn 14:12) E ketin kaiahneirailda mwahu, oh re kak wia doadoahk wet.​—Kol. 1:23.

18. Soangen doadoahk dah me kitail pahn ahneki ni ahnsou kohkohdo? Soangen doadoahk dah me kitail ahneki ahnsou wet?

¹⁸ Mwurin Sises pwoula, Siohwa ketin kaiasada ih oh ketikihong ih pwukoa tohto oh pil manaman “pohnangin kaun akan oh me lapalap akan oh me manaman akan oh soumas en nanleng koaros.” (Ep. 1:19-21) Mehnda ma kitail mehla nin duwen sapwellimen Siohwa ladu lelepek kei mwohn Armakedon, kitail pahn pwurehng mour oh ahneki doadoahk me mwahu oh katapan tohto nan sampah kapwo. Oh ni ahnsou wet kitail koaros ahneki pwukoa kaperen en kalohki rongamwahu oh katohnpadahk. Eri mehnda ma kitail pwulopwul de mah, emenemen kitail kak pousehlahte ‘loalenohng atail doadoahk ong Kaun-o ahnsou koaros.’​—1 Kor. 15:58.