Kolokol Pwoson Kehlail Sang Pein Onop
1 Duwehte mwenge mwahu eh kin kesempwal ong roson mwahu, onop en Paipel pil kin kesempwal ong atail ahneki nanpwungmwahu rehn Koht oh ahneki pwoson kehlail. Ke sohte kak ahneki nanpwungmwahu rehn Koht ma ke sohte kin kaukaule wia pein omw onop en Paipel. Patehng met, koasoandi mwahu en onop kin kahrehiong kitail en kolokol pwoson kehlail oh pil perekitailsang kesik keteu kisiniei en Sehdan me duwehte kalokolok, ineng en kepwehpwehla, oh kasongosong kan en wia me suwed.—Ep. 6:16.
2 Katepen Pein Onop: Pein onop kin kalaudehla atail wehwehki iren Paipel kan. E kin sewese kitail en ahneki pwoson kehlail oh dehdehki ia uwen tehlap oh reirei oh ile oh loal en limpoak en Krais. (Rom 11:33; Ep. 3:16-19) Nin duwen wahn sapwellimen Koht manaman, pwoson kin wia kehl ehu me kin kamwakid atail mour. E kin sewese kitail en pwuhriong mour kapw oh momour nin duwen aramas me kin mourki sapwellimen Siohwa koasoandi kan oh dahme e ketin kesempwalki. (Kal. 5:22, 23; Ep. 4:24) Kitail kin kaunopada mwahu pwe kitail en kak powehdi pein atail kahpwal kan. Kitail kak mendahkihla sapwung en meteikan oh sewese mwomwohdiso en ahneki popohl oh minimin. (Kol. 3:10, 13, 14) Mepwukat koaros kak kansenamwahu ong kitail oh pil meteikan.
3 Pein onop pil kin sewese kitail en kaunopada mwahu pwehn sewese irail kan me kin men rong me kitail tuhwong nan kalohk. Kitail uhdahn pahn kak ‘sapeng mehmen me peki rehtail kitail en kawehwehiong koapworopwor me mi rehtail.’ (1 Pit. 3:15) Duwehte Krais Sises me ketin wia mehn kahlemeng ong kitail, kitail kak koasoi nin duwen emen me ahneki manaman, ese kupwuren Siohwa ni pwung oh pil kak kasalehda ni sansal dahme Paipel padahngki.—Mad. 7:28, 29.
4 Iahd oh Ia Duwen en Onop: Atail mehn akadei anahne laud sang wadekete iren onop kan. Anahne ahnsou en medemedewe dahme kitail wadek. Pein idek rehmw: Ia duwen ei kak doadoahngki iren onop wet? Dahme met kin kasalehda duwen Siohwa, sapwellime irair kan, oh sapwellime ahl en wia soahng kan? Ia duwen ei kak doadoahngki ire wet pwehn sewese meteikan? Ia duwen met eh pid dahme I sukuhlkier duwen ire wet? Sang ni atail kin wia roporop pwehn sapengala peidek kan me kohda, kitail pahn kalaudehla atail wehwehki iren onopo oh esehla ia duwen met eh pahrekiong padahk mehlel pwon. Ih duwen atail pahn wehwehkihla.—Lep. Pad. 4:5.
5 Kitail anahne koasoanehdi ahnsou ong onop oh nantihong doadoahngki ahnsowo ongete onop pwehn wia koasoandi en onop mwahu ehu. Paipel mahsanih “nantihlahte mwowe nin duwen kosonned akan [“koasoandi kan,” NW] me kitail ideidawehnehr lao lel met.” (Pil. 3:16) Ekei kin apwalki wia met, ahpw e pahn mengeila mwurin arail kin nannanti. Met pahn wia kapai ehu. Mwein ke kak onop mwohn omw pahn meirla. Ekei kin mwahuki sangkenei pirida pwe ren doadoahngki ahnsou me meleilei. Ekei kin doadoahngki ahnsoun kommoal ni souwas ni wasahn doadoahk. Ahnsou koaros, rapahki wasa me keieu mwahu en onop. Met pahn kahrehda ken loalenohng dahme ke sukuhlki. Eri, mohngiongomw kak mwekid ni ahl pwung.
6 Dahme Kitail Pahn Onop: Kaunopada ong atail mihting limau en ehuehu wihk anahne wia mehkot kesempwal nan pein atail onop. Patehng kaunopada Kahn Iroir oh Onop en Paipel en Mwomwohdiso, ke kin uhdahn paiekihda padahk kan en Sukuhl ong Sapwellimen Koht Doadoahk? Nantihong idawehn koasoandi en wadawad en Paipel oh wia roporop ong ire kesempwal kan sang wadawad en Paipel nan neitail pwuhken sawaspen Paipel kan. Ma ke kousapahlih audepen padahk keriau oh kesiluh mwohn mihting, ke pahn uhdahn perenki rong padahk kan nan sukuhlo. Ke uhdahn pahn tamataman kaweid kesempwal kan en Paipel.
7 Kitail sohte anahne doadoahngki ahnsou laud ong kaunopada Mihting en Kalohk nan pein atail onop, ahpw met pil pahn mi nan atail koasoandi en onop. Ma ke doadoahngki minit kei ehuehu wihk pwehn kousapahlih padahk kan nan Atail Doadoahk ong Wehio, met pahn sewese iuk ken kolokol pwoson kehlail oh kasalehiong meteikan omw pwoson nan kalohk.
8 Wia koasoandi toupahrek nan pein omw onop pahn ‘kakehlakahda loalomw.’ (Ep. 3:16) Ei, pwoson kehlail, kaloalehla omw limpoak ong Siohwa oh Krais Sises, kalaudehla omw loalokong, oh omw kin pweida nan kalohk, kapai pwukat koaros oh pil me laudsang met kin kahrehda pein onop eh katapan. Mie omw koasoandi mwahu ong pein onop?