Kakairada Omw Nanpwungmwahu Rehn Siohwa
1. Dahme kahrehda e kesempwal en kakairada nanpwungmwahu rehn Siohwa?
1 Kitail kin anahne nantihong pwe kitail en kakairada nanpwungmwahu rehn Siohwa. Met kin pidada laudsang atail en ihte idawehn koasoandi kan me kitail kin wia nin duwen Kristian kan. Ma kitail sohte kin kaukaule kapakap ong Siohwa, ehu rahn E pahn ketin duwehla kompoakpatail men me mahso kitail kin karanih ahpw met solahr kin koasoiong. (Kaud. 2:4) Kitail en tehkpene ia duwen atail pein onopki Paipel oh kapakap ara kak sewese kitail en kakairada nanpwungmwahu rehn Siohwa.—Mel. 25:14.
2. Ia mwomwen atail pahn wia pein atail onop Paipel pwehn sewese kitail en karanihala Koht?
2 Kapakap oh Doudouloale Kin Kesempwal: Soangen onop en Paipel me kin kangoange loalatail kin pidada laudsang en ihte lainihala ire kesempwal kan nan pwuhk me kitail onopki oh pil wadek iren Paipel kan. Kitail anahne medewe dahme ireo kin koasoia duwen sapwellimen Siohwa ahl akan, koasoandi kan oh soangen Koht dah men ih. (Eks. 33:13) Atail wehwehkihla mehkan me pidada Koht kin sair loalatail oh kamwakid kitail en medewe duwen pein atail mour. (Mel. 119:35, 111) Atail mehn akadei ahnsou me kitail kin wia pein atail onop Paipel iei en karanihala Siohwa. (Seims 4:8) En wia onop mwahu, kitail anahne koasoanehdi ahnsou, wasa me konehng, oh kaiahne kitail en kaukaule onop. (Dan. 6:10) Mendahki ke kin soupisek, ke kin koasoanehdi ahnsou pwe ken doudouloale sapwellimen Siohwa irair kaselel kan ehuehu rahn?—Mel. 119:147, 148; 143:5.
3. Ia duwen kapakap me iangete pein atail onop Paipel eh kin sewese kitail en kakairada nanpwungmwahu rehn Siohwa?
3 Kapakap sang mohngiongitail kin kesempwal pwe pein atail onop Paipel en mie katepe. Pwe padahk mehlel en Paipel en kamwakid kitail en “kapinga Koht oh pwongih ni wahu oh lemmwin,” kitail anahne sapwellimen Koht manaman. (Ipru 12:28) Ihme kahrehda, kitail anahne tepikihda ehuehu ahnsoun onop kapakap pwehn peki rehn Siohwa sapwellime manaman. (Luk 11:13) Ni atail kin medemedewe iren Paipel kan oh doadoahngki sawaspen Paipel kan me sapwellimen Siohwa pwihn kin wiahda, kitail kin kasalehiong Siohwa dahme mi loalatail. (Mel. 62:8) Atail wia onop ni ahl wet iei ehu elen kaudok me kitail kin wia pwehn kasalehda atail poadidi ong Siohwa oh kin kakehlaka atail karanihala ih.—Sud 20, 21.
4. Dahme kahrehda e kesempwal kitail en doudouloale Mahsen en Koht ehuehu rahn?
4 Duwehte nanpwungen kompoakepah mwahu kan, kitail anahne pousehlahte apwalih atail nanpwungmwahu rehn Siohwa pwe nanpwungmwahu wet en wie kekeirda nan atail mour. Eri, kitail anahne isaneki ahnsou mwahu koaros ehuehu rahn en karanihala Koht, oh ese me e pahn pil ketin karanihala kitail.—Mel. 1:2, 3; Ep. 5:15, 16.