Kitail en “Kalohki Mahseno”
1 E kin mehlel dahme Pwuhk Sarawi kin nda duwen “imwin rahn akan,” pwe e kin nda me rahnwet aramas tohto kin liksansalmwahuki arail pelien lamalam.” (2 Tim. 3:1, 5) Met pwehki kaunen pelien lamalam kan sohte kin kaweid neirail aramas kan ni ahl pwung en pali ngehn. Kaun en Kristendom kan sohte kin utungada Pwuhk Sarawi. Irail kin mwahuki padahk duwen lamalam en aramas oh ire kan me pid aramas oh politik kan, ahpw irail sohte kin padahk duwen Mahsen en Koht. Tohto kaun en pelien lamalam kan sohte kin kamehlele Pwuhk Sarawi. Irail kin lemeleme me Pwuhk Sarawi sohte katepe ong kitail rahnwet, oh irail kin uhki padahk me aramas kohsang mahn monkey (evolution) oh sohte kin padahkihong aramas padahk me kohsang nan Pwuhk Sarawi me mie Sounkapikada Lapalapie me kapikada kitail. Pali laud en kaun en pelien lamalam kan sohte kin doadoahngki mwaren Koht, oh irail sohte kin uhwong ma Sounkawehwehn Pwuhk Sarawi kan men kihsang mwaren Koht sang nan Paipel.
2 Duwehte kaun en pelien lamalam kan nan mwehin Sises, kaun en pelien lamalam kan en rahnwet kin padahk ahpw sohte katepe. (Madiu 15:8, 9) E duwehte kokohp en Eimwos. “Aramas akan pahn duhpekla, ahpw kaidehk duhpek en men kang pilawa; re pahn men nimpilda; ahpw kaidehk duhpek en pihl. Pwe re pahn men tungoalehda oh nim ehu mahsen en sang rehn Kauno, Ngehi, Kauno, Wasa Lapalapie, me mahmahsen.” (Eimwos 8:11) Laud sang soahng teikan koaros, aramas anahne mwengen ngehn sang nan Mahsen en Koht.
3 Iaduwen Kaitarala Ahn Aramas Anahn en Pali Ngehn: Pohl padahkiong Timoty en tengediong “padahk sarawi kan, me kak kasalehong uhk erpit me kak kahluweiukalahng nan mour soutuk,” oh e kehkehlikiong ih en “kalohkiseli mahseno” ong mehteikan. (2 Tim. 3:14, 15; 4:2) Nin duwen Sounkadehde kan en Siohwa, kitail anahne tengediong dahme Pwuhk Sarawi kin padahkiong kitail ahnsou me kitail kin kalohk, oh alasang Sises me mahsanih: “Kaidehn pein ei padahk me I kin kihda, ahpw sapwellimen Koht me ketin kadariehdo.” (Sohn 7:16) Kitail kin poasoanehda atail padahk kan pohn Mahsen en Koht pwe kitail wehwehki me e in audaudki erpit sang powe, oh kitail mwahuki aramas en wehwehki me atail padahk kan kin kohsang nan Pwuhk Sarawi.—1 Kor. 2:4-7.
4 Aramas anahne rong mahs padahk mehlel sang nan Pwuhk Sarawi ma irail men sukuhliki duwen Siohwa oh pwosonla ih. Pohl ntingihdi: “Iaduwen arail pahn kak pwoson, ma re sohte rong mahsenpe? Oh iaduwen arail pahn kak rong, ma mahsenpe sohte pahn wiawihong irail?” (Rom 10:14) Ni atail kin kalohki Mahsen en Koht, kitail kak sewese mehteikan kakehlail arail pwoson ki sukuhliki loalokong pwung. Loalokong pwung wet kak en sewese aramas en kawukila arail mour oh arail mour pahn mwahusang mahs. Emen soun nting me kohsang England, Charles Dickens ntingihdi duwen Pwuhk Sarawi: “E wia pwuhk ehu me keieu mwahu sang mahs lel met nan sampah pwon, pwehki e kin padahkiong uhk mehn kaweid kan me keieu kesempwal ong aramas pwehn mour mehlel oh lelepek.”
5 Irail me kin men padahngki padahk mehlel kin wehwehki me Mahsen en Koht kin utungada padahk mehlel. Nan pahr 1913, emen kihong Frederick W. Franz, me wia tohnsukuhl en sukuhl laud (college) ahnsouo, booklet me adaneki Where Are The Dead? Ahnsouo me e wadek dahme Pwuhk Sarawi mahsanih duwen peideko, e wehkada, “Iei me padahk mehlel.” Irail rar rar kei me rapahki padahk mehlel kin anehki pepehm duwehte ih. Kitail en nantiong kalohki Mahseno ni ngoang oh iang rong mehteikan pil nda, “Iei me padahk mehlel.”