Padahkiong Mehteikan Dahme Koht kin Kupwurki Kitail en Wia
1 Kitail kak diaradahte ekei aramas me duhpekla ni pali ngehn pwehki irail sohte kin “rong mahsen en Siohwa.” (Eimwos 8:11) Ekei aramas, mendahki irail kin kamehlele me Koht memourte, irail sehse kupwuren Koht. Ihme kahrehda e kesempwal kitail en padahkiong irail padahk mehlel duwen Wehio me pahn kak doareirailla. Ni atail kin kaunopada mwahu pwehn kalohk ni ahnsou soh lipilipil, kitail kak diarada irail me men sukuhliki dahme Siohwa kupwurki kitail en wia.
2 Nan sounpwong en May oh June, kitail pahn ale neitail Watchtower oh Awake! makasihn kan pwehn kihseli rehn aramas akan. Oh pil ehu, ih tepin atail pahn doadoahngki brochure Dahme Koht Kupwurki Kitail en Wia? Kilel kaselel kan oh peidek kan me kin kahrehda aramas en madamadau pahn kamwekid aramas en men ale brochure. Iet ekei mehn sawas kan me pahn sewese kitail en doadoahngki mwahu makasihn kan oh brochure kapwo.
3 Rapahki Aramas: Ni wasa kan me aramas sohte kin kalap mihmi nan ihmw ahnsou me kitail kin kohseli ihmw-lel-ihmw, e pahn mwahu en en rapahki aramas wasa kan me ke pahn diarada irail. Atail Doadoahk Ong Wehio November 1996 (insert) kin kangoange kitail en kalohki rongamwahu wasa koaros—nanial, nan taxi kan, nan wasahn mwemweit kan, nan wasahn peidi en sidohsa kan oh nan sidohwa akan. E pil kangoange kitail en medemedewe iawasa oh ahnsou dah kan me kitail kak kalohk ni ahnsou soh lipilipil. Karasepe ieu, emen sister me kin pioneer kohla ni zoo (wasao me mahn kan kin mihmi nan kehl kan) oh e wahda makasihn tohto me pid “Endangered Species—Why Be Concerned?” (August 8, 1996 Awake!). Erein awa ehu, e kihla makasihn 40 rehn aramas me kin perenki mahn! Ke kin pil pweida nin duwen ahmw kin men kalohki rongamwahu wasa koaros? Doadoahngki Watchtower oh Awake! oh pil brochure Kupwurki ni ahmw kin kalohk wasa koaros pwehki makisihn oh brochure pwukat kin kihda ire kan me kin kamwekid mongiong oh madamadau en aramas.
4 Ahnsou me Ke Tepin Koasoi Ong Aramas: Nan Atail Doadoahk Ong Wehio en November 1996 pali 8 kin kihda mehn sawas kan ong iaduwen kitail kak kaunopada doadoahngki makasihn kan Watchtower oh Awake! Oh pil, kitail kak doadoahngki mehn sawas pwukat ni ahnsou me ke kaunopada ahmw padahk en brochure Kupwurki. Dahme kitail nda pahn kakete mwotomwot (ekei sentence te) de kak reirei pwehn doadoahngki ehu ire sang nan Pwuhk Sarawi. E kesempwal en pilada mwahu dahme kitail pahn nda ni tepin atail koasoiong tohnihmwo, pwehki met pahn kahrehda tohnihmwo en rong de soh. Ekei kin diarada me aramas kin men rong ahnsou me sounkalohk kan kin tepin nda: “I wadek artikel wet me inenen kangoange ie, oh I men en kasaleong uhk.” De sounkalohk kan kak wia ehu peidek me pahn kahreong tohnihmwo en men rong.
5 Ma e konehng nan ahmw wasa, mwein ke kak doadoahngki peidek kan duwehte mehpwukat:
◼ “Rahnwet, kitail kin kilang aramas kin ntingihseli mwahl pohn dihd en ihmw de soahng soh lipilipil kan oh kihdseli mwahl kasaminehla sampah. Dahme pahn anahn pwe aramas en kamwakelehda sampah oh wiahda sampah pwehn wia wasa mwahu ehu en kousoan ie?” Mweidong tohnihmw en sapeng, oh mwurin mwo, kawehwehda me ke kin ese wasakis me kasalehda me ehu rahn sampah pahn paradaisla oh iaduwen met pahn wiawi. Kasalehda ehu ire kesempwal, oh ehu iren Paipel, oh ehu kilel me mih ni poh tohto me kin kohsang makasihn kapw ehu, oh mwurin mwo idek rehn tohnihmwo ma e men naineki makasihno pwehn wadek. Ke kak nda me aramas tohto me kin wadek neitail makasihn oh pwuhk kan kin kihda arail sawas, oh kitail kin perenki ale arail sawas ma irail men kihda pwehn sewese doadoahk en kalohk nan sampah pwon. Mwohn ke mweselsang ihmwo, koasoanehdi ehu ahnsou en pwurala.
◼ “Ke lemeleme Koht kupwurki aramas en mour nan soangen mour me kahpwal kan kin kapilpene irail duwehte rahnwet? Mwurin tohnihmwo sapengla peideko, ke kak nda: “Mwein ke kin ese kapakapo me Sises padahkiong nah tohnpadahk ko, oh eh kapakapki Wehin Koht en pweida. Mie pak ke medemedewe dahkot Wehin Koht?” Pakalahng iren mehn kasukuhl 6 nan brochure Kupwurki, oh wadek peidek kan ni tepin wasao. Mwurin mwo, wadek parakrap 1 oh kasalehda ia pasepeng en keieun peideko. Kawehwehda me peidek teikan kin mengei en pasapengla ni arail pahn wadek oh medemedewe parakrap ko. Idek rehn tohnihmwo ma e men naineki brochure, koasoia duwen koasoandi en sawas, oh kasaleiong tohnihmwo me ke men pwurala reh pwehn pousehla ahmwa koasoi duwen Wehio.
◼ “Aramas madamadau tohto kin tepiada medemedewe me pelian lamalam kan me kin kihong aramas kahpwal, re sohte kin sewese aramas. Dahme komw kin medemedewe duwen ire wet?” Mwurin ahmw rong madamadau en tohnihmwo, kasalehda mehkot sang nan makasihn kapw kan me e men rong me kin pid iaduwen pelien lamalam sohte kak sewese aramas de kin pil pid ohlahn pelien lamalam kan ni ahnsou kohkohdo. Idek rehn tohnihmwo ma e men wadek makasihn wet. Ndaiong ih edomw oh idek reh ede oh ndaiong ih me ke men pwurala pwehn kawehwe me kaudok mehlel uhdahn kak sewese aramas. Ahnsou me konehng, kawehwe duwen koasoandi en sawas.
◼ “Ahnsou me ke kin kilang diren kahpwal nan peneinei en rahnwet, ke kin medemedewe dahme anahne pwe peneinei en nsenamwahu?” Mweidong tohnihmw en sapeng, oh kawehwe me nan Pwuhk Sarawi Koht kasalehda iaduwen peneinei kan kak anehki nsenamwahu. Mwein ke kak wadek Aiseia 48:17. Mwurin mwo pakalahng ni iren mehn kasukuhl 8 nan brochure Kupwurki, oh kasalehda ekei iren Paipel kan me ntingihdi nan brochure me kin sewese emen emen tohnpeneinei. Wadek peidek kan me mihmi ni tepin iren mehn kasukuhl. Idek rehn tohnihmwo ma e men wadek pasepeng kan. Ma iei, kihong ih brochure oh kawehwe me mendahki brochure sohte isepe, kitail kin ale sawas kan me aramas men kihda pwehn utungada doadoahk en kalohk sampah pwon. Ndaiong tohnihmwo me ke men pwurala reh pwehn kasaleong ih mehn sawas kan me Paipel kin audaudki ong peneinei kan pwe ren kak diarada nsenamwahu mehlel.
6 Pali 3 lel 6 nan Atail Doadoahk Ong Wehio en sounpwong wet kin kangoange kitail en anehki eimah en pwurala rehn aramas akan. E kin kangoange kitail en doadoahngki brochure Kupwurki pwehn tepiada onop en Paipel rehn aramas, ma kaidehn ahnsou me ke tepin tuhwong aramas, ahpw mwein ahnsou me ke pwurehng pwurala rehrail. Ahn aramas anahn laud iei en sukuhliki dahme Koht kupwurki kitail en wia oh mwurin mwo, aramas anahne uhd wia dahme Koht kupwurki. (Kol. 1:9, 10) Kitail kak en sewese mehteikan nan May oh June ma kitail pahn padahkiong irail dahme kitail ese duwen anahn akan me Siohwa kin padahkiong kitail ma kitail men kamourla.—1 Kor. 9:23.