En Wia Onop Paipel Rehn Aramas Me Kin Kekeirada oh Pweida
1 Iaduwen emen nurs nan Tanzania, oh emen peinakapw nan Argentina, oh emen nohno nan Latvia kin duwehpenehte? Pwuhk en pahr 1997 (pali 8, 46, oh 56) ripohtki me irail silimenet kin kekeirada mwadang. Ehu kahrepe re kekeirada mwadang iei arail men onop Paipel pak riau nan wihk ehu. E pahn mwahu ma kak, ma sounkalohk kan pahn kanokehla ehu irelaud ahnsou me re kin onop rehn aramas pak ehu nan wihk ehu. Ahpw, ekei pahn diarada me met apwal. Mehlel, iren mour en aramaso oh soangen aramas dah ih pahn kamwekid aramas en kekeirada de soh, ahpw iet ekei mehn sawas kan me sounpadahk koahiek kan kin doadoahngki pwehn sewese aramas en kekeirada mwahu oh pweida.
2 Ke anahne sewese noumw tohnsukuhl en kaunopada ong amwa onop. Sangete nin tepio, e pahn mwahu en kawehwehda iaduwen e pahn kaunopada oh ken wia kamwomwada. Kasalehong noumw tohnsukuhl pein noumw pwuhken Mour Kohkohlahte. Ke kak sewese ih kaunopada irelaud ehu. Sewese ih en rapahkihda pasepeng en peidek kan me ntingihdi oh mwurin mwo lainihla pasepengo. Ekei sounpadahk kan kin kihong neirail tohnsukuhl kan pein neirail pen (highlighting marker) pwe ren doadoahngki. Kangoange irail en kilang iren Paipel kan koaros ahnsou me irail kin kaunopada arail onop. Ni ahl wet, ke kak pil sewese irail en sukuhliki iaduwen irail pahn kaunopada ong Pwuhk Study en Mwomwohdiso oh Onop en Kahn Iroir.—Luk 6:40.
3 Sounpadahk mwahu men pahn wia peidek kan me pahn kahreong tohnsukuhl men en kasalehda pein eh madamadau oh pepehm kan oh sounpadahko sohte pahn nohn koasoakoasoi. E sohte pahn koasoia ni oaritik duwen ire kan me sohte kesempwal. E sohte pahn kalap koasoia duwen ire kan me sohte kin pid onopo. Ahpw, e pahn kasalehda ni sansal mour en onopo. Ekei sounpadahk kan kin kihong neirail tohnsukuhl pwuhk kan me pid eh peidek kan likin oaralap me ira onopki pwe tohnsukuhlo kak rapahkihda pasepeng en eh peidek kan. Oh pil, ma tohnsukuhl pahn iang towehda mihding kan, met pahn sewese ih en sukuhliki Paipel ni oaritik.
4 Ke sohte anahne kilang iren Paipel koaros me ntingihdi nan pwuhko. Ekei pak tohnsukuhl pahn koledi mour en parakrapo sang iren Paipel kan me ntingihdi nan parakrapo. Ahnsou me ke kousapahlih amwa onop, ke pahn pwurehng kasansalehda iren Paipel me kesempwal oh kangoange noumw tohnsukuhl en tamataman iren Paipel pwukat.
5 Ia Uwen Reirei En Amwa Pahn Onop?: Amwa ahnsou en onop sohte anahne lel awa ehute. Ekei tohnihmw kan kin pisek oh anehki ahnsou laud oh mwein irail men onop reirei sang awa ehute. De tohnsukuhlo men onop pak tohto sang pak ehute. E pahn mwahu ma tohnsukuhlo mwahuki koasoanehdi en onop pak riau de siluh nan wihk.
6 Nin duwen Aiseia 60:8 kasalehda, rahnwet sounkapinga Siohwa kapw kid kid kei “tangatang kohdo likamwete depwek kei, likamwete mwuroi kei me pipihr pwurupwurodohng nan pasarail kan” oh pidelong nan mwomwohdiso kan en sapwellimen Siohwa aramas. Kitail koaros anahne wia uwen me kitail kak en miniminiong Siohwa nin duwen e pahn kamwadangala doadoahk en kihpene irail sihpw kan.—Aiseia 60:22.