“Koahiekla Ni Soangen Wiewia Mwahu Koaros”
1 Sapwellimen Siohwa aramas kan rahnwet kin paiekihda mwengehn ngehn tohto. (Aiseia 25:6) Mie pwuhk en sawas en Paipel tohto me re kin paiekihda sang pein arail onop Paipel oh onop en peneinei oh sang ni mihding en mwomwohdiso kan, oh kapokon kan. Ahpw kitail kin isaneki koasoandi pwukat ni atail kin medemedewe en “kak wia oh koahiekla ni soangen wiewia mwahu koaros”?—2 Tim. 3:17.
2 Medemedewe duwen mwengehn ngehn me kaunopadahng pahro 1998, me kereniengehr imwisekla! Sang ni mihding en mwomwohdiso en ehu ehu wihk, kitail onopki ekei ire kesempwal kan en pwuhk 23 en Pali Nting Sarawi en Krihk, oh kitail pil kousapahlih ire kan me diarek nan pwuhken Insight on the Scriptures me pid moure en aramas 49 nan Paipel, oh kitail kin pil onopkilahr pali 138 nan pwuhken Proclaimers. Kitail pil onopki silikis ehu en pwunken Knowledge, oh kerenieng kanekehla pwuhken Mour Kohkohlahte oh pwuhken Peneinei pwon. Patongete met, kitail kin karosonkihda issue 12 en neitail doaropwehn Atail Doadoahk Ong Wehio, oh iangahki artikel en onop en Kahn Iroir 52, oh pil kapahrek kan me pid padahk en Paipel kan. Kapataiongete met iei kapokon kan. Ia uwen met kin wia mwengehn ngehn tohto me kaunopadahng kitail!
3 Kalahnganki Koasoandi kan me Siohwa Ketikihda: Pwehn kak paiekihda unsek koasoandi pwukat, kitail anahne kalahnganki kahrepen Siohwa ketikihda soangen mwengehn ngehn tohto pwukat. Atail kangkang soahng mwahu pwukat pahn kalaudehla atail pwoson oh kekehlailla atail nanpwung mwahu reh. (1 Tim. 4:6) Ahpw, mwengehn ngehn pwukat sohte kin wiawihda ongete kaweidpatail. E kin kamwekidih kitail en ehukihong meteikan padahk mehlel oh kakoahiekihkitailla en lipwalipw ni atail wia met nin duwen sounkalohk en rongamwahuwo.—2 Tim. 4:5.
4 Kitail en dehr pohnsowehla atail anahn en pali ngehn, ahpw ahnsou koaros kekeirada inengieng koasoandi tohto kan oh kansenamwahu ni pali ngehn me kohsang tehpel en Siohwa. (Madiu 5:3; 1 Piter 2:2) Pwehn paiekihda unsek, kitail anahne koasoanehdi ahnsou itar ong soangen ire kesempwal kan me duwehte pein onop kaukaule oh onop en peneinei kaukaule oh iang towehda mihding kan kaukaule. (Episos 5:15, 16) Kapai kaperen en wia met pahn pahrekiong mehn kangoang sarawio me Pohl ntingkiwohng Kristian en Ipru lelepek kan me kilelehdi nan Ipru 13:20, 21.