Komw Kin Kilangete Pali Liki?
1 Nin doken atail kin wia atail doadoahk en kalohk, atail kin tepin kilangada ekei aramas ele kin kahrehong kitail en pweiek sang ehukiohng irail rongamwahuwo. Karasepe ehu, dahme ke pahn wia ma emen ohl me mas lemei kin ahnsou koaros kangkakil uhk ni ahnsou me ke kin kohla tuhwong mehn mpe men me kin perenki rong padahk mehlel? Emen sister me kin iang doadoahk en pioneer lelohng met oh lemehda en tuhwong ohlo oh koasoiong ih. Ni ngilen lemei, ohlo rahnmwahuwih sistero. Ahpw, e kapwuriamwei pwe, ohlo rong dahmw sistero koasoia duwen Pwuhk Sarawi oh, ni peren, pwungkihda me e men onop Paipel. Pwehki sistero sohte kin kasawihte mwomwen ohlo pali liki, met ritingada elen ohlo oh ah pwoudo en sukuhlki padahk mehlel.
2 Emen sister masakada mwomwen emen pwutak me piten moang reirei ni ahnsou me e tepin tuhwong pwutako ahpw e kaukaulehte kalohkohng pwutako ni mwotomwot ahnsou me pwutako kin kohla nan sidowa me sistero kin doadoahk. Mie wahn en sistero nannanti, oh pwutako ahnsou wet wialahr emen Sounkadehde papidais. Dahme pahn pere kitail en dehr kin mwadang lemeleme me soahngen aramas pwukat sohte pahn men rong?
3 Kahlemengih Mehn Kalimeng Mwahu en Sises: Sises mwahngih me e pahn ketikihda moure wiliandi aramas koaros. Ihme kahrehda, e sohte kin mweidohng mwomwen pali likin aramas en kauhdi ih sang sewese irail. E pohnese me pil irail kan me ahdsuwed pwehki arail tiahk samin ele pil kak wekila ma sawas pwung kin kohieng irail. (Madiu 9:9-13) E kin song en sewese me kepwehpwe kan oh me semwehmwe kan koaros. (Madiu 11:5; Mark 10:17-22) Kitail en dehpa kadeikada aramas kan me kitail tuhwong nan kalohk sang ni mwomwerail pali liki, kahrehong kitail en sohte kak kilang me irair en mohngiongarail pil kakete mwahu. (Madiu 7:1; Sohn 7:24) Dahme kak sewese kitail en kahlemengih mehn kalimeng mwahu en Sises?
4 Sang ni atail onopki Paipel, kitail kin kalahngkiehr me sapwellimen Koht Mahsan kin ahneki manaman en wekidala lamalam, wiewia, oh irair en aramas. (Episos 4:22-24; Ipru 4:12) Ihme kahrehda, kitail en ahneki lamalam en ehi ni atail pahn kalohk ong aramas koaros oh pwilikihdi soahng koaros nan limen Siohwa, Meno me kak mwahngih nan mohngiong en aramas.—1 Sam. 16:7; Wiewia 10:34, 35.
5 Atail soh lipilipilki ehukiohng soahngen aramas koaros rongamwahuwo, mendahki ia mwomwerail pali liki, en sewesehda doadoahk lap en rahk nan imwin rahn pwukat.—1 Tim. 2:3, 4.