Kahlemengih Sapwellimen Siohwa Irair en Kopwungpwung
1 “Siohwa kin poakohng irair en kopwungpwung.” (Melkahka 37:28, New World Translation) Ihme kahrehda, mendahki E koasoanehdi me sampah suwed wet pahn sohrala ehu rahn, E pil ketin koasoanehdi pakairpe en wiawi mahs. (Mark 13:10) Met kin kihong aramas ahnsou mwahu en kak koluhla oh ale komourparail. (2 Pit. 3:9) Kitail kin nantihong en kahlemengih sapwellimen Siohwa irair en kopwungpwung? Kahpwal oh lokolok en aramas akan kin kamwekid kitail en ehukihong irail duwen koapworopwor en Wehin Koht? (Lepin Padahk 3:27) Ma kitail poakohng irair en kopwungpwung, met pahn kamwekid kitail en ngoangki kalohk.
2 Kalohk Ong Aramas Sohte Lipilipil: Ni atail kin kalohk ong aramas sohte lipilipil duwen kupwuren Koht, met kin kasalehda me kitail kin “kasalehda irair en kopwungpwung.” (Maika 6:8) Kitail en dehr mweidohng atail soh-unsek en kahrehiong kitail en kadeik meteikan sang mwomwarail. (Seims 2:1-4, 9) Siohwa “kupwurki aramas koaros en ale komourparail oh marainkihla me mehlel.” (1 Tim. 2:4) Mahsen mehlel en Koht kin wekidala mour en me tohto ni ahl kapwuriamwei kan. (Ipru 4:12) Atail wehwehki duwen met pahn kamwekid kitail en pwarek rehn aramas sohte lipilipil ni eimah, mehnda ma mahs irail sohte kin men rong kitail.
3 Emen sister me kin doadoahk nan sidohwa ieu kin ekis masak mwomwen emen ohl me kin kalap netinet nan sidohwa me e kin doadoahk ie. Ahpw, mendahki met, ni ahnsou me sistero lemeleme me ahnsouo e mwahu en kalohk ong ohlo, ih eri kalohkihong ohlo duwen sapwellimen Koht inou en Paradais. Ohlo, ni lokaia lemei, ndaiong sistero me e sohte kin kamehlele soi likamw akan oh e pil kasalehda me ih emen “hippie” oh e kin doadoahngki wini en kasahliel. Ahpw, sistero men pil ehu kalohk ong ohlo. Ehu rahn, ohlo idek rehn sistero dahme e medewehki piten moangeo a reirei, eri sistero, ni ahl kadek, kawehwe dahme Paipel kin mahsanihki duwen ireo. (1 Korint 11:14) Mandahn rahno, sistero pwuriamweila pwe ohlo seiseila mwahu piten moange oh mwomw mwakelekella! Ohlo peki rehn sistero ma e kak tepida onop, oh sistero koasoanehdi pwe emen brother en onop rehn ohlo, oh ohlo kekeirada ni pali ngehn oh inoukihong Siohwa ah mour oh papidaisla. Duwehte ohl menet, aramas tohto me papah Siohwa rahnwet kin kalahnganki brother oh sister kan me kalohk ong irail pwehki irail kin ngoangki kalohk ong aramas sohte lipilipil.
4 Ni ahnsou keren, Siohwa pahn kasohrala irail me suwed kan sang sampah. (2 Pit. 3:10, 13) Eri, erein ahnsou mwotomwot wet, kitail en kahlemengih sapwellimen Siohwa irair en kopwungpwung ni atail pahn kalohk ong aramas sohte lipilipil oh kihong aramas arail ahnsou mwahu en pitsang kasohralahn ahn Sehdan koasoandi suwed wet.—1 Sohn 2:17.