Kahlemengin Siohwa—Doadoahngki Kopwungpwung Oh Wiewia Pwung
“Ngehi, Siohwa, ei limpoak oh kadek oh lelepek me poatopoat, oh I kin wia dahme pwung oh mehlel. Ih mepwukat me I kin kupwurperenki.”—SEREMAIA 9:24, New World Translation.
1. Koapworopwor kaselel dahieu me Siohwa ketikihong kitail?
SIOHWA inoukihdahr me ehu rahn aramas koaros pahn esehla Ih. Ki sapwellime soukohp Aiseia, E mahsanih: “Sohte meninkau de mehkot suwed pahn mie nan Saion, sapwellimen Koht dohl sarawio. Pwe sampah pahn direkihla kupwurokong en Kauno [“Siohwa,” NW], duwehte madau eh kin direkihla pihl.” (Aiseia 11:9) Met wia koapworopwoar kaselel ieu!
2. Esehla Siohwa kin pidada dah? Dahme kahrehda?
2 Ahpw, ia wehwehn en esehla Siohwa? Siohwa kasansalehong Seremaia dahme kesempwal: “En ese oh dehdehkin ie, ngehi, Siohwa, ei limpoak oh kadek oh lelepek me poatopoat, oh I kin wia dahme pwung oh mehlel. Ih mepwukat me I kin kupwurperenki.” (Seremaia 9:24, NW) Eri, en esehla Siohwa kin wehwehki me emen pahn esehla iaduwen E kin doadoahngki kopwungpwung oh wiewia pwung. Ma kitail pahn doadoahngki irair pwukat, E pahn kupwurperenki kitail. Iaduwen kitail kak wia met? Nan sapwellime Mahsen, Pwuhk Sarawi, Siohwa ketin nekinekid ni nting sapwellime wiewia kan ong aramas soh-unsek kan sangete mahs. Ni atail pahn onopki Pwuhk Sarawi, kitail pahn kak esehla sapwellimen Siohwa elen kopwungpwung oh wiewia pwung oh kahlemengih Ih.—Rom 15:4.
Kopwungpwung Ahpw Kadek
3, 4. Dahme kahrehda Siohwa pwung ni E kasorehla Sodom oh Komora?
3 Kadeik me kohsang powe me kohwong Sodom oh Komora kin wia karasaras mwahu ieu me kin kasansalehda ekei irair akan en sapwellimen Siohwa kopwungpwung. Siohwa sohte ihte kaloke aramas akan me konehng ale met, ahpw e pil ketkihda ehu elen komour ong aramas kan me warohng met. E pwung en kasorehla kahnimw pwukat? Pwehki Eipraam sohte nohn ese duwen ia uwen deilahn en Sodom suwed, e lemeleme me e sapwung en kasorehla kahnimw wet. Ahpw, Siohwa kamehlele ong Eipraam me ma aramas pwung ehk me diarekda nan kahnimwo, e sohte pahn kasorehla kahnimwo. E sansal me sapwellimen Siohwa kopwungpwung sohte kin karuwaru de soh-mahk.—Senesis 18:20-32.
4 Keseu me tohnleng riemen wiahda kasalehda duwen ia uwen suwed kahnimw en Sodom. Ni ahnsou me ohl akan en kahnimwo, “me pwulopwul oh me mah kan,” esehda me ohl riemen kodohng pweidi rehn Lohd, re kapilpene ihmwo oh song en kauwehla wenihmwo pwe irail men angkehlailiong ohl riemen. Ahr tiahk suwed inenen suwedla mehlel! Sohte peikidpe, sapwellimen Siohwa kadeik ong kahnimwo me pwung.—Senesis 19:1-5, 24, 25.
5. Iaduwen Koht doarehla Lohd oh eh peneinei sang Sodom?
5 Mwurin wahnpoaron Piter ah kalekehki aramas akan me pid ohlahn Sodom oh Komora pwehn wia mehn karasepe, e uhd ntingihdi: “Kauno [“Siohwa,” NW] ketin mwahngih kapitasang me poadidi kan nan ar apwal akan.” (2 Piter 2:6-9) Mehlel, e sohte pahn pwung ma ohl pwung men, Lohd, oh eh peneinei iang kisehn aramas suwed kan en Sodom ahnsou me re kamwomwala. Ihme kahrehda, sapwellimen Siohwa tohnleng kan padahkiong Lohd duwen kamwomwala me pahn wiawi ni ahnsou keren. Ni ahnsou me Lohd peikasahlda, tohnleng ko “pwehki sapwellimen Siohwa mahk” alehte pehn Lohd, pehn eh pwoudo, oh pehn nah serepein ko, oh kahreirailieisang nan kahnimwo. (Senesis 19:12-16) Kitail kak kamehlele me Siohwa pahn pil nsenohkin aramas pwung kan ni kasohralahn koasoandi suwed wet.
6. Dahme kahrehda kitail en dehr nohn pwunodki duwen kasohralahn koasoandi suwed wet ni ahnsou kohkohdo?
6 Mendahki imwin koasoandi wet iei ahnsoun “kopwungpwung en pweida,” kitail sohte anahne en nohn pwunodki dahme pahn wiawi. (Luk 21:22, NW) Kadeik me Koht pahn wia ni ahnsoun Armakedon pahn “pwung.” (Melkahka 19:9) Nin duwen me Eipraam sukuhliki, kitail pil kak likih ni unsek sapwellimen Siohwa kopwungpwung, me deilahsang pein atail kopwungpwung. Eipraam idek: “Sounkopwung en sampah pwon soh pahn wia dahme pwung ni sapwellime wiewia kan?” (Senesis 18:25, NW; pil kilang Sohp 34:10.) De nin duwen me Aiseia ntingihdi, “Ihs me kak padahkiong [Siohwa] elen kopwungpwung?”—Aiseia 40:14, NW.
Wiewia Pwung Ehu ong Doarehla Aramas
7. Iaduwen sapwellimen Koht kopwungpwung kin dokedoke sapwellime mahk?
7 Sapwellimen Koht kopwungpwung kin sansalda kaidehn ihte ni ahnsou me e kin kaloke aramas dipan kan. Siohwa kin kasalehda pein ih nin duwen “Koht pwung men oh Sounkomour men.” (Aiseia 45:21) E sansal me sapwellimen Koht pwung de kopwungpwung kin dokedokehte sapwellime kupwur en doarehla aramas akan sang lipwen dihp. Pwuhken The International Standard Bible Encyclopedia en 1982, kasalehda me “Sapwellimen Koht kopwungpwung kin rapahki ahl mwahu kan pwehn kasansalehda sapwellime mahk pwe sapwellimen Koht komour en kak pweida.” Met sohte kin wehwehki me sapwellimen Koht kopwungpwung anahne en kamaterekihla mahk ahpw irairen mahk kin wia kisehn irairen sapwellimen Koht kopwungpwung. Sapwellimen Koht sawas en ketikihda tomw ong aramas akan pwehn kak komourirailla wia mehn kahlemeng kaselel en sapwellimen Koht kopwungpwung.
8, 9. (a) Ia wehwehn “wiewia pwungo”? Dahme kahrehda? (b) Dahme Siohwa kin kupwurki kitail en wia?
8 Pweinen tomwo—me iei mour kesempwal en sapwellimen Koht Ohl, Iehros, Sises Krais—kin wia pweipwei kesempwal ehu, pwehki sapwellimen Siohwa koasoandi kan kin oarepene audepen lahng oh sampah, oh pein Ih kin kapwaiada. (Madiu 20:28) Mour unsek ehu, mouren Adam, salongala, ihme anahnepen mour unsek en pwainsapahldo mour en kadaudoken Adam kan. (Rom 5:19-21) Wahnpoaron Pohl kawehwehda sapwellimen Sises lelepek, iangahki pwainen tomwo nin duwen “wiewia pwungo.” (Rom 5:18, footnote) Dahme kahrehda? Pwehki sang nin sapwellimen Siohwa kupwukupwure, tomwki aramas akan iei wiewia pwung oh konehng ieu me anahne wiawi, mendahte ma e pahn wiawi ni ahl ehu me pahn pweilaud ong pein Ih. Kadaudok en Adam kan kin rasehng “ahlek pu pwoat me ohla,” me Koht sohte men kauwehla, de rasehng “lamp me pahn kunlahr,” me Koht sohte kupwurki en kakunla. (Madiu 12:20) Koht kamehlele me ohl oh lih lelepek tohto pahn kohsang kadaudok en Adam.—Pil kilang Madiu 25:34.
9 Iaduwen kitail pahn mwekidki wiewia kaselel en limpoak oh pwung wet? Mehkot me Siohwa kin kupwurki kitail en wia iei met: “kitail en wiahda me pwung.” (Maika 6:8) Iaduwen kitail kak wia met?
Rapahki Kopwungpwung, Nantiong en Pwung
10. (a) Ia ehu ahl me kitail kak doadoahngki kopwungpwung? (b) Iaduwen kitail kak rapahki mahs sapwellimen Koht pwung?
10 Keieu, kitail anahne kawukihla atail mour oh peikiong sapwellimen Koht kosonned akan. Pwehki sapwellimen Koht kosonned kan kin pwung, kitail kin doadoahngki kopwungpwung ni ahnsou me kitail kin mourki atail mour pwehn pahrekiong sapwellimen Koht kosonned akan. Ih me Siohwa kin kupwurki sapwellime aramas akan en wia. Siohwa padahkiong mehn Israel akan en “esehla wia me pwung; ngoangki pwe pwuhng pahrek en mie.” (Aiseia 1:17) Sises pil kihong aramas akan me kin rongorong eh Kapahrek en Pohn Dohl kaweidohte, ni ahnsou me e kaweidkin irail en ‘rapahki mahs Wehin Koht oh sapwellimen Koht pwung.’ (Madiu 6:33, NW) Pohl kangoange Timoty en “nantiong audaudkihda pwung.” (1 Timoty 6:11) Ni ahnsou me kitail kin mour pahrekiong sapwellimen Koht kosonned kan me pid tiahk mwahu oh pwuhriong irair en aramas kapw, met kin wehwehki me kitail men kasalehda kopwungpwung oh wiewia pwung. (Episos 4:23, 24) Met kin wehwehki me kitail kin rapahki kopwungpwung ni atail kin kapwaiada kupwuren Koht.
11. Dahme kahrehda oh iaduwen kitail anahne en peiong dihp?
11 Kitail wehwehki me e sohte mengei ong aramas soh-unsek kan en wia dahme pwung. (Rom 7:14-20) Pohl kangoange Kristian akan nan Rom en peiong dihp, pwe irail en kak mweidohng Koht paliwararail inouda kan nin duwen “tehtehn wiewia pwung,” oh met pahn katapan ong Koht pwehn kapwaiada sapwellime kupwur kan. (Rom 6:12-14) Ni ahlohte, ni atail onop oh kapwaiada Mahsen en Koht, kitail kak sukuhliki “lamalam en Siohwa” oh ‘kaiahn ni pwung.’—Episos 6:4; 2 Timoty 3:16, 17.
12. Dahme kitail en liksang ma kitail kin wiaiong mehteikan me kitail men Siohwa en wiaiong kitail?
12 Keriau, kitail kin doadoahngki kopwungpwung ni ahnsou me kitail kin wiaiong meteikan me kitail men Siohwa en wiaiong kitail. E mengei en wiahda ong pein kitail koasoandi riau—koasoandi mengei ong pein kitail ahpw koasoandi kakos ong aramas teikan. Kitail kin mwadang mweidala pein atail sapwung kan, ahpw kitail kin mwadang kauwe sapwung kan en meteikan, ahpw mwein arail sapwung kan me tikitik sang atail. Sises wiahda ehu peidek: “Dahme ke kin tehngki diper me mi nan pwoaren mesen riomw men, a ke ahpw sohte kin nsenohki lepin tuhke me mi nan pwoaren mesomwen?” (Madiu 7:1-3) Kitail en dehpa manokehla me kitail koaros sohte pahn kak kesinenda ma Siohwa kin ketin kilelehdi dipatail kan. (Melkahka 130:3, 4) Ma sapwellimen Siohwa kopwungpwung kin mweidong Ih en mahkong riatail brother kan, mie atail pwung en kadeikada riatail kan?—Rom 14:4, 10.
13. Dahme kahrehda emen me kin wia dahme pwung pahn pehm me e pwukoahki kalohki rongamwahu en Wehio?
13 Kasiluh, kitail kin doadoahngki kopwungpwung sarawi ni ahnsou me kitail kin ngoangki iang doadoahk en kalohk. “Ahnsou koaros me ke kak, sewese irail kan me kin anahne sawas,” Siohwa kaweidkin kitail. (Lepin Padahk 3:27) E sohte pahn konehng en koledihte loalokong en komour ong pein kitail me Koht ni kadek sapan ketikihong kitail. Ni mehlel, aramas tohto kin soikala atail padahk kan, ahpw erein Koht kin kasakasalehdahte sapwellime mahk ong irail, kitail en perenki mweidong irail ahnsou mwahu “en koluhla.” (2 Piter 3:9, NW) Oh duwehte Sises, kitail kin perenda ni ahnsou me kitail kin sewese emen en wia dahme pwung. (Luk 15:7) Met iei ahnsou mwahu ehu en ‘padokedi pwung.’—Oseia 10:12.
“Soupeidi kan en Kopwungpwung”
14. Ia pwukoah en elder kan me kin pid irairen kopwungpwung?
14 Kitail koaros anahne keid nan elen pwung, ahpw elder kan nan mwomwohdisohn Kristian me kohwahki pwukoah tohrohr ehu. Sapwellimen Sises kaunda nin duwen Soupeidi men kin ‘poahsoankihda pwung oh pwuhng pahrek.’ Ihme, elder kan pil anahne doadoahngki koasoandi en sapwellimen Koht kopwungpwung. (Aiseia 9:7) Re kin medemedewe duwen kokohp ehu me kawehwehda nan Aiseia 32:1, NW: “Ahnsou ehu nanmwarki men pahn mie me inenen inen oh pwung, oh sapwellime soupeidi kan pahn kin kakaun ni kopwungpwung.” Nin duwen sounapwalih en mwomwohdiso me sapwellimen Koht ngehn sarawi idihada, de ‘sapwellimen Koht tohndoadoahk kan,’ elder kan anahne kapwaiada sapwellimen Koht kosonned akan.—Taitus 1:7, NW.
15, 16. (a) Iaduwen elder kan kin kahlemengih silipen sihpw lelepek men nan karasaras en Sises? (b) Ia pepehm en elder kan ong irail akan me salongala ni pali ngehn?
15 Sises kasansalehda me sapwellimen Siohwa kopwungpwung me kin kadek, mahk, oh pwung. Keieu, e kin nantiong sewese irail akan me kin lelohng kahpwal akan oh “komourala me salongalahr akan.” (Luk 19:10) Duwehte silipen sihpw nan karasaras en Sises me nantiong raparapahki nah sihpw me salongala lao e diarada, elder kan pil kin rapahki irail akan me peila ni pali ngehn oh nantiong kahre irail en pwurodo nan pelin sihpwo.—Madiu 18:12, 13.
16 Sohte konehng elder kan en kauwe irail akan me kin wiahda dihp laud kan, ahpw elder kan kin men sewese en kaloalamwahuiahla oh sewese irail en koluhla. Re kin perenkihda sewese emen me salongala. Oh ni ahnsou me aramas dipan men sohte men koluhla, met kin kansensuwediala elder kan. Eri, sapwellimen Koht kosonned pwung kan kin kaweidkin elder kan en piskensang emen me sohte men koluhla nan mwomwohdiso. Ahpw, duwehte semen pwutako me salongala, re koapworopworki me aramas me wiahda dihp pahn ‘koluhla nan kapehde.’ (Luk 15:17, 18) Ihme kahrehda, elder kan kin nantiong tuhwong ekei me pisekensang nan mwomwohdiso pwehn katamankinirail duwen iaduwen re kak pwurodo nan sapwellimen Siohwa pwihn.a
17. Mehn akadei dahieu elder kan men akadeiong ni ahnsou me re kin tenekih emen me wiahda dihp, oh irair dahieu me pahn kak sewese irail en lel mehn akadei wet?
17 Elder kan anahne kahlemengih sapwellimen Siohwa kopwungpwung ni ahnsou me re kin tenekih ire kan me pid aramas me wiahda dihp. Aramas dipan akan kin “keiong mpen” Sises, pwehki re ese me E kak wehwehkinirail oh sewese irail. (Luk 15:1; Madiu 9:12, 13) Ni mehlel, Sises sohte kin mweidong de pwungki dihp. Ehu ahnsou, Sises iang Sakies, emen lipirap ndand, mwenge, oh met kamwekidada Sakies en koluhla oh kapwungala kahpwal akan me e kin wiaiong meteikan. (Luk 19:8-10) Elder kan nan rahnpwukat kin ahneki mehn akadei ohte nan arail mihding en tenekih iren dihp kan—en sewese aramaso me wiahda dihp en koluhla. Ma elder kan pahn wia pwe aramas en mengeiki tuhwong irail duwehte aramas kin mengeiki tuhwong Sises, tohto me kin wiahda dihp pahn kin mengei peki sawas sang rehn elder kan.
18. Dahme pahn kak sewese elder kan en wia duwehte “wasahn ruksang kisinieng”?
18 Ma elder kan kin ahneki mohngiong limpoak, met pahn sewese irail en kasalehda kopwungpwung sarawi me sohte kin lemei de sempoak. Esra kaunopada pein eh mohngiong, kaidehn ihte eh madamadau, pwehn kak padahkiong mehn Israel kan duwen kopwungpwung. (Esra 7:10) Ma elder kan kin ahneki mohngiong me kin wehwehki irair en aramas, re kak sewese meteikan ni arail doadoahngki iren Paipel konehng kan oh re pahn pil medemedewe duwen irairen emenemen. Ni ahnsou me Sises kamwahuiala liho me kohwahki soumwahu en mehn warmwowi, E kasalehda me sapwellimen Siohwa kopwungpwung kin wehwehki mouren Kosonnedo. (Luk 8:43-48) Elder kan me kin doadoahngki kopwungpwung ni kadek, pahn kak rasehng “wasahn ruksang kisinieng” ong irail kan me kin lokolongki pein ahr luwet akan de sang koasoandi suwed wet.—Aiseia 32:2.
19. Iaduwen emen sister mwekidki sapwellimen Koht kopwungpwung?
19 Emen sister me wiahda dihp toutou sukuhliki duwen sapwellimen Koht kopwungpwung. Sister menet koasoia, “Ni mehlel, I masak tuhwong elder kan. Ahpw re kasalehongie kadek oh wahu. Elder kan kin rasehng sahm akan ahpw kaidehn sounkopwung kakos kan. Re sewese ie en wehwehki me Siohwa sohte pahn soikiehla ma I pahn nantiong en kapwungala ahi mour. I pein sukuhliki iaduwen E kin kihda kaiahn nin duwen Sahm limpoak men. I koasoaiong Siohwa sang mohngiongi, oh likih me E pahn rong ahi pekipek kan. Ni ahi tamanda ahnsouwo, ni mehlel, I kak nda me ahi tuhwong elder kan sounpahr isuh samalahro wia kapai ehu sang rehn Siohwa. Sang ni ahnsouwo lel met, ahi nanpwungmwahu rehn Siohwa kin wia kehlailla.”
Doadoahngki Kopwungpwung oh Wiewia Pwung
20. Ia ekei kapai kan en wehwehki oh doadoahngki kopwungpwung oh wiewia pwung?
20 Kitail kak kalahnganki me sapwellimen Siohwa kopwungpwung wehwehki laudsang ihte kihong aramas koaros dahme re warohng. Sapwellimen Siohwa kopwungpwung kamwekid Ih en ketikihong aramas akan me pwoson mour soutuk. (Melkahka 103:10; Rom 5:15, 18) Koht kin wia met pwehki sapwellime kopwungpwung kin tehk duwen pein atail irair akan, oh e men doarehla atail mour ahpw kaidehn en kadeikada. Ni mehlel, ni ahnsou me kitail kin wehwehkihla mwahu duwen sapwellimen Siohwa kopwungpwung, met kin kahrehong kitail en karanih Ih. Oh ni ahnsou me kitail kin nantiong kahlemengih irair wet en sapwellime irair kan, mouratail kan oh pil meteikan pahn ale kapai laud. Samatail nanleng sohte pahn pohnsowehla atail nantiong en doadoahngki kopwungpwung. Siohwa inoukihong kitail: “Kolokol kopwungpwung, kumwail aramas akan, oh wia dahme pwung. I pahn mwadang doareikumwailla oh ahi pwuhng pahn sansalda. Meid pai aramaso me pahn kapwaiada met.”—Aiseia 56:1, 2, NW.
[Nting tikitik me mi pah]
a Pil kilang The Watchtower (lokaiahn wai) en April 15, 1991, pali 22-23.
Komw Tamanda?
◻ Dahme kasohralahn Sodom oh Komora kin padahkiong kitail duwen sapwellimen Siohwa kopwungpwung?
◻ Dahme kahrehda tomw kin wia kasalepen sapwellimen Koht kopwungpwung oh limpoak?
◻ Ia ahl siluh me kitail kak doadoahngki kopwungpwung?
◻ Ni ahl tohrohr dahieu elder kan kak kahlemengih sapwellimen Siohwa kopwungpwung?