Dahme Komw Pahn Koasoiaiong Emen Muslim?
1 Mie pak me ke koasoiong emen Muslim? Ma iei, mwein ke kilang me irail Muslim kan kin uhdahn kamehlele Koht. Ahpw, re sohte nohn wehwehki me sampah pahn wiahla paradais ehu rahn nin duwen sapwellimen Siohwa soukohp kan kohpadahr, oh koapworopwor wet kitail men kawehwe ong irail. (1 Tim. 2:3, 4) Dahme ntingihdi nan artikel wet pahn sewese kitail ni atail pahn kalohk ong irail.
2 Irail Muslim kan kin kamehlele Allah, de Koht, oh re kamehlele me Muḥammad wie sapwellimen Koht soukohp. Neirail pwuhk sarawi kin adaneki Koran, oh eden arail pelien lamalam iei Islam, me wehwehki “uhpahiong.” Neirail pwuhk sarawi, Koran, kin kasalehda me lokaia likamw oh kaudokiong dikedik en eni oh sansal kan kin sapwung, oh pil Koht mehtehman, oh Koht sohte wie emen me kisehn Trinity. Oh pil, re kin kamehlele me “soul” en aramas sohte kak mehla, oh aramas suwed kin lokolongki kisiniei en ehl oh paradais mihmi nanleng. Irail Muslim kan kamehlele me Paipel iei Mahsen en Koht ahpw Paipel en ahnsouwet weksang tepin nting en Paipel. Ahpw re kin kamehlele me neirail pwuhken Koran, sohte wukila pwe e mihmihte ni lokaiahn Arabia sangete ahnsou me e tepin ntingihdi lel ahnsou wet.
3 En Kadek, Doadoahngki Lokaia Konehng oh Mwahu, oh Kanahieng Dahme Ke Pahn Nda: Ni ahmw pahn koasoiong emen Muslim, ken kadek oh doadoahngki lokaia kan me konehng oh mwahu. (Lepin Padahk 25:15) Tamataman me dahme irail Muslim kan kin kamehlele me inenen teng oh re kin wadlikihla arail tiahk kan. Oh pil, kitail en tamataman me re sohte kin medemedewe loal duwen dahme kahrehda re kin kamehlele padahk kan en arail pelien lamalam oh re sohte anahne kasalehong pein irail ia kupwuren Koht ong irail. (Rom 12:2) Pwehn sewese irail Muslim kan, kitail en nantihong wehwehkin irail oh kanengamah.—1 Kor. 9:19-23.
4 Ken dehr doadoahngki lokaia kan de koasoi kan me pahn kahrehong irail Muslim kan en lemeleme me komwi kisehn Kristendom. Ken kasalehda me ke sohte iang Kadolik de Prohs, oh ahmw pelien lamalam weksang pelien lamalam pwukat. Ahnsou me ke men koasoia duwen Paipel, doadoahngki lepin lokaia pwukat “Mahsen en Koht.” Pwehki Muslim kan sohte kin men koasoia duwen “Sapwellimen Koht Ohl,” e pahn mwahu ma ke sohte pahn doadoahngki lepin lokaia pwukat de koasoia duwen ih lao lel aramaso kekeirada mwahu ni pali ngehn. Ahpw, ke kak koasoia duwen Sises, ahpw ke pahn koasoia me Sises iei sapwellimen Koht soukohp de menin keder. Ken dehr akamaiong irail. Ma ke kak kilang me tohnihmw tepida lingeringerda, ken kohkohsang rehn tohnihmwo ni ahl kadek ahpw mwadang.
5 E pahn mwahu en koasoiong emente, kaidehn pwihn ehu. E pil kin mwahu ma sister kan koasoiong lih kan oh brother kan koasoiong ohl kan. Mehlel, ekei pak sister kan kak koasoiong ohl kan oh brother kan kak koasoiong lih kan, ahpw kitail koaros en kanahieng. Oh pil, pali laud en Muslim kan kin tehk kanahieng duwen likou oh kapwat en lih kan oh kin tehk ma e konehng de soh. Sister kan pil pahn tehk duwen soahng pwukat.—1 Kor. 10:31-33.
6 Soahng kan me Ke Kak Koasoia: Koasoia duwen uwen lapalap en Koht oh sapwellime limpoak. Ken dehr pweiek en nda me komwi emen tohnkaudok en Koht oh me Koht mehtehmen (kaidehn kisehn Trinity), oh kaudokiong dikedik en eni de sansal kan kin sapwung. Ke kak koasoia me sampah dirkihla suwed rahnwet—mahwen kan, nanpwung suwed nanpwungen aramas akan, liaktohrohr, oh aramas tohto me kin iang sarawi kin mwalaun.
7 Brochure me oaralap koasoia: The Guidance of God—Our Way to Paradise kak kihda oaralap kan me ke kak doadoahngki ahnsou me ke pahn koasoiong Muslim kan. Brochure wet wiawihda pwehn kahrehong Muslim kan en perenki rong oh mwekidki dahme re rong ma re mihmi nan wasahkis me re kak onop Paipel.
8 Nin duwen padahk ehu, ke kak nda:
◼ “I men tuhwong irail akan me Muslim. I wia wadwadek duwen ahmw pelien lamalam oh kamehlele me ke pahn pwungki me kumwail Muslim kan kin kamehlele me Koht mehtehmen oh kumwail pil kin kamehlele soukohp koaros. [Mweidong en sapeng.] I men koasoiaiong komwi duwen kokohp me wiawi mahs mahsie me kin kohpada iaduwen sampah pahn wiahla paradais. I kak wadek ong komwi dahme soukohp wet ntingihdi? [Wadek Aiseia 11:6-9.] Kokohp wet kin katamankin ie duwen mehkot me kohsang Koran me ntingdi nan brochure wet.” Pakalahng brochure en Guidance of God, pali 9, wadek dahme ntingihdi wasao ni nting toantoal, me kin koasoia duwen aramas mwahu kan pahn sohsohki sampah. Ma tohnihmwo perenki rong, ke kak pousehla oh koasoia parakrap 7 lel 9. Kihdi brochure, oh koasoanehdi pwehn pwurehng pwurala rehn tohnihmwo.—Ma ke men kilang pil ehu padahk, kilang Atail Doadoahk Ong Wehio en March 1998, pali 6, parakrap 27.
9 Ni ahmw pahn luhke emen me kumwa en koasoiapene brochure en Guidance of God, e sohte pahn mwahu en ndaiong tohnihmwo me kumwa wia onop en Paipel, ihte ke pahn nda me kumwa koasoiapene brochure. Ni amwa kanokehla brochure, ke kak onopkihong aramaso brochure Kupwurki de pwuhken Knowledge. Doaropwe (tract) me oaralap koasoia How to Find the Road to Paradise oh pil booklet me oaralap koasoia The Time for True Submission to God pil wiawihda keieu ong irail Muslim kan.
10 Ni ahmw pahn wehwehki duwen dahme irail me iang Islam kin kamehlele oh soahng kan me re kin nsenohki, kitail kak doadoahngki atail loalokong ni atail pahn pilada soangen brochure de doaropwe (tract) de booklet dahieu me kitail pahn kasalehong irail Muslim kan oh pil dahme kitail pahn koasoia ni atail pahn kalohk ong irail. Kitail anahne sapwellimen Siohwa sawas ni atail pahn nantihong sewese soangsoangen aramas en likweriong mware oh ale komourparail.—Wiewia 2:21.