Peki Sawas
1 Lepin lokaia kan me Ngehn Sarawi kamwekid wahnpoaron Pohl en ntingdi: “ahnsou apwal ekei” kin kawehwe mwahu duwen atail ahnsou. (2 Tim. 3:1) Eri, dahme ke kak wia ma ke pahn lelohng kahpwal kan me kak kaluwetala ahmw pali ngehn oh ke apwalki powehdi kahpwal pwukat?
2 Ke lemeleme ke kak tuhwong emen me mah ni pali ngehn nan mwomwohdiso? Ekei pahn pehm me re sohte kak wia met pwe re namenek, de re sohte men kedirepwe irail, de re sehse ma emen kak sewese irail. Mehlel, kitail pahn wia uwen me kitail kak en apwalihala atail pwukoah kan koaros, ahpw, ma kitail anahne sawas ong soahng kan me pid atail pali ngehn, kitail en dehr namenek en peki sawas.—Kalesia 6:2, 5.
3 Iawasa Ke Kak Tepida: Ke kak tuhwong mahs brother me kin wia Pwuhk Study en Mwomwohdiso oh idek reh ma ke kak iang ih nan kalohk ehu rahn. Ih ahnsowo me ke kak ndaiong ih me ke men kekeirada ni pali ngehn. Ma ih emen Ministerial Servant, ke kak kehsehkin ih duwen ahmw anahn akan en pali ngehn oh e pahn idek rehn elder kan en sewese iuk. De ke kak tuhwong emen elder oh ndaiong ih duwen ahmw kahpwal kan oh ahmw anahn akan.
4 Soangen sawas dah kan me ke anahne? Mie mehkot me kaluwetala ahmw ngoangki kekeirada ni pali ngehn? De komwi emen nohno de pahpa me sohte eh pwoud oh ke kin nantihong sewese noumw seri kan en karanih tohnmwomwohdiso? De komwi emen me mah me anahne sawas? De mie kahpwal ieu me kaluwetala komwi? En kehlail ni pali ngehn nan ahnsou apwal pwukat kin inenen apwal—ahpw, kitail kakete kehlail ni pali ngehn. Mie sawas me kitail kak alehdi.
5 Iaduwen Ohl Mah kan Kak Sawas: Elder kan kin nsenohki kitail. Re pahn rong kanahieng ma kitail pahn kasalehda atail kahpwal kan. Ma sounkalohk teikan kin pil lelohng soangen kahpwalohte, elder kan pil pahn tamataman met ni arail pahn apwalih oh padahk nan mwomwohdiso. Nin duwen aramas me kin wia “kahlemengihpen pwihn sihpw,” re kin men sewese kitail pwe koaros en doadoahkpene ni peren. (1 Pet. 5:3) Ma kitail pahn rong kanahieng brother pwukat ni arail kawehwe ong kitail iaduwen kitail kak doadoahngki iren Paipel kan nan atail mour, kitail pahn koahiekla nan doadoahk en kalohk oh pil kak kamwahuiala soahng teikan nan atail mour.—2 Tim. 3:16, 17.
6 Sises ketikihong kitail “kisakis kan me mih rehn ohl akan.” (Episos 4:8, ftn.) Met wehwehki me elder kan men sewese kitail. Ihme kahrehda, Pwuhk Sarawi kin mahsanih me elder kan: “amwail.” (1 Kor. 3:21-23) Eri, ke dehr pweiek en koasoiong irail. Peki sawas ma ke anahne.