Koakon En Peidek

◼ Iaduwen attendant kan kak sewese pahpa/nohno kan pwehn sewese neirail seri kan en tiahk mwahu ahnsoun mihding kan?

Ni mehlel, seri kan kin perenki mwekimwekid oh tangseli oh re kin apwalki mwomwohd ahnsou werei. Mwurin mihding, seri kan kin lemeleme me arail ahnsoun mwomwohd nekier oh re kak tangseli oh pwakih seri teikan nan Kingdom Hall oh pil likin Kingdom Hall (nan wasahn sidohsa oh wasahn alu). Ihme, e pil pwung dahme Lepin Padahk pil koasoia: ‘Ma seri men pahn mweimweiong pein nsene, e pahn kanamenekihala ine.’​—Lepin Padahk 29:15.

E kin kansensuwed pwe ekei pak seri kan kin loiong riatail kan me mahlahr oh re kin ohla pwe re pwupwudi. E pahn mwahu ma seri kan sohte pahn tangseli nan Kingdom Hall oh likin Kingdom Hall pwehn dehr loiong mehteikan de kahrehda kahpwal kan en pwarada.

Pahpa/nohno kan kin pwukoahki kaiahne neirail seri kan pwehn kesempwaliki atail wasahn kaudok. (Ekl. 5:1a) Nan mihding en Kristian kan, kaweid kin kohwong attendant kan pwe ren tehk me “soahng koaros pahn soandi mwahu” oh “minimin pahn mie.” (1 Kor. 14:40; Kol. 2:​5, New World Translation) Attendant kan pahn tehk pwe soahng koaros en soandi mwahu mwohn, erein oh mwurin mihding wiawi, nan Kingdom Hall oh likin Kingdom Hall. Ma seri men wia tangseli de kin ketihwo, attendant kak kauhdi serio ni kadek, oh e kak kawehwe ong serio dahme kahrehda e sapwung. E pil pahn mwahu ma attendant menet pahn ndaiong ahn serio pahpa/nohno dahme serio wia oh ndaiong ira en menlau kaweidih neira serio. Pahpa/nohno kak kasalehda me re kalahnganki dahme attendant wia.

Kitail koaros wehwehki me ekei pak seri kan kin sengiseng oh ketihwo ahnsoun mihding kan. E pahn mwahu ma attendant kan pahn leledohng Kingdom Hall minit 20 mwohn mihding pahn tepida, oh re kak koasoanehdi me sehr kan me mihmi mwuri pahpa/nohno me mie seri tikitik en mwohndi nan sehr pwukat. Tohnmwomwohdiso me sohte naineki seri tikitik kak sewese koasoandi wet ni atail pahn mwohndi mwowe nan Kingdom Hall.

E kin kaperen en kilang seri kan, sohte lipilipil irail sounpahr depe, me kin iang mihding kan oh kilang arail tiahk mwahu nan Kingdom Hall oh likin Kingdom Hall. (1 Tim. 3:​15) Ma re pahn kesempwaliki sapwellimen Siohwa koasoandi kan ong kaudok, re pahn wauneki Siohwa oh tohnmwomwohdiso koaros pahn kalahnganki irail.