Koakon En Peidek
◼ Ihs pahn kak wiliandi mwomwohdiso oh kapakap?
Kapakap ahnsoun tuhpenehn mwomwohdiso kin wia mehkot me kisehn atail kaudok. En wiliandi mehteikan oh kapakap kin wia pwais kaselel oh pwukoah toutou ehu. Pwehki kapakap kin inenen kesempwal, elder kan anahne doadoahngki arail loalokong ni ahnsou me re pahn pilada ihs me kin wiliandi mwomwohdiso oh kapakap ni ahnsoun mihding kan. Brother kan me papidaislaier me kin wiliandi mwomwohdiso oh kapakap kin wia brother kan me mah ni pali ngehn oh wia mehn kahlemeng mwahu oh tohnmwomwohdiso kan kin wauneki ih. Arail kapakap akan me wiawi ni elen wahu pahn kasalehda arail nanpwung mwahu rehn Siohwa Koht. Artikel me oaralap koasoia “Praying Before Others With a Humble Heart” (“Kapakap Mwohn Mehteikan ni Elen Aktikitik”) me mihmi nan Watchtower (lokaiahn wai) en May 15, 1986, kin kasalehda kaweid kesempwal kan me irail me kin wiliandi mwomwohdiso oh kapakap kak tamataman.
Elder kan sohte pahn mweidong brother men me sohte kin tiahk mwahu de mehteikan kin sehse ma e kin tiahk mwahu de soh en wiliandi mwomwohdiso oh kapakap. Elder kan sohte pahn pilada soangen brother kan en kapakap: brother kan me kin kalap nsensuwed pahn mehteikan de emen me kin kasalehda ah nsensuwed pahn mehteikan ni ahnsoun kapakap. (1 Tim. 2:8) Mendahki brother pwulopwul men papidaislahr, elder kan pahn kilang ah irair en pali ngehn oh pahn kilang ma e konehng ih en wiliandi mwomwohdiso oh kapakap.—Wiewia 16:1, 2.
Ekei pak, ahnsoun mihding en tuhpene ong kalohk, emen sister me papidaislahr pahn anahne wiliandi pwihn en kalohk oh kapakap ma sohte emen brother me papidaislahr mihmi pwehn wiliandi irail oh kapakap. Sistero pahn doadoahngki likou konehng pwehn pwaindi moange. Ma elder kan ese me sohte brother me pahn iang kalohk ni ekei mihding en tuhpene ong kalohk, re pahn kihong emen sister me konehng en ale pwukoah en kihpeseng pwihn en kalohk.
E pahn mwahu me brother me wia “Chairman” ong Mihding Ong Wehi Pokon en tepkihda mihding wiliandi mwomwohdiso oh kapakap. Ahpw, ni mihding en mwomwohdiso teikan, ni ahnsou me elder kan kak pilada sang ekei brother kan pwehn wiliandi mwomwohdiso oh kapakap, elder kan kak pilada emen likin brother me kin tepida koasoi ahnsoun mihding pwehn tepkihda oh imwikihla mihding wiliandi mwomwohdiso oh kapakap. Ahpw, sohte lipilipil ahnsou me emen brother pahn wia padahk, elder kan pahn kehsehki brother duwen kapakapo me e pahn wia pwe brother me pahn wia padahko pahn kak kaunopada ah madamadau kan ong dahme e pahn nda. Ma met kin wiawi, eri, brothero kak wia padahk ehu me sansal oh pahn kasalehda me e ngoangki oh utungada koasoandi en Siohwa me pid mihdingo me e kapakapki.
Kapakap pwukat sohte pahn nohn reirei. Ni ahnsou me brother kin kapakap mwohn wehi pokon, e pahn mwahu ma e pahn kesihnenda, ngihl laud oh ngihl sansal. Met pahn kahrehong koaros me kohpene en rong kapakapo oh kak nda “Amen” mwurin kapakap nek!—1 Kronikel 16:36; 1 Kor. 14:16.