Kapahda Peh Lelepek Kan Ni Kapakap
“I kin men aramas koaros wasa koaros en kapakap, oh kapahda peh lelepek kan ni soh lingeringer de akamai.”—1 TIMOTY 2:8, New World Translation.
1, 2. (a) Iaduwen 1 Timothy 2:8 kin kadoadoahkong sapwellimen Siohwa aramas akan me kin pid kapakap? (b) Dahme kitail pahn koasoiapene met?
SIOHWA kin kasik me sapwellime aramas en lelepek ong ih oh pil ong emen emen irail. Wahnpoaron Pohl kin kapahrekiong irairen lelepek oh kapakap ni ahnsou me e ntingihdi met: “I kin men aramas koaros wasa koaros en kapakap, oh kapahda peh lelepek kan ni soh lingeringer de akamai.” (1 Timoty 2:8, NW) Ahpw, e sansal me Pohl kin koasoia duwen kapakap mwohn wehi pokon “wasa koaros” me Kristian akan kin tuhpene. Ihs me pahn wiliandi sapwellimen Koht aramas akan oh kapakap nan mihding en mwomwohdiso kan? Ihte ohl akan me sarawi oh pwung, oh ohl akan me kin nantiong song en kapwaiada ahr pwukoah kan ong Koht nin duwen me ntingihdi nan Paipel. (Eklesiasdes 12:13, 14) Irail anahne en mwakelekel ni pali ngehn oh tiahk oh pil poadidi ong Siohwa Koht.
2 Keieu kesempwal iei me elder kan nan mwomwohdiso en ‘kapahda peh lelepek kan ni kapakap.’ Arail kapakap kan sang nan mohngiongarail kan ki Sises Krais kin kasalehda lelepek ong Koht oh kin sewese irail en liksang lingeringer de akamai. Ni mehlel, ohl kan koaros me kin ale pwais kaselel wet en wiliandi mwomwohdiso en Kristian oh kapakap mwohn wehi pokon sohte pahn wia aramas kalapw lingeringer, ahpw e kin wia aramas lelepek ong Siohwa oh sapwellime pwihno. (Seims 1:19, 20) Ia pil ekei kaweid kan ong irail akan me kin ale pwais kaselel en wia kapakap mwohn wehi pokon? Oh ia ekei iren Paipel kan me kitail anahne doadoahngki ni ahnsou me kitail kin wiahda pein atail kapakap kan oh kapakap en peneinei kan?
Medemedewe Dahme Komw Pahn Kapakapki
3, 4. (a) Dahme kahrehda e pahn konehng kitail en medemedewe dahme kitail pahn kapakapki mwohn kitail pahn wia atail kapakap mwohn wehi pokon? (b) Dahme Paipel kin koasoaiahki duwen ia uwen reirei kapakap kan en wiawi?
3 Ma emen peki rehtail en wia kapakap mwohn wehi pokon, e konehng ma kitail kak medemedewe mwowe dahme kitail pahn kapakapki. Met pahn sewese kitail en kapakapki ire kesempwal kan oh en dehr wia soangen kapakap me reirei oh sohte pidada ire kesempwal kan. Oh pil, ni ahnsou me kitail kelepw wia pein atail kapakap kan, e kak wiawi ni ngihl tikitik. Sohte lipilipil ia uwen reirei pein atail kapakap ahnsou me kitail kelepw. Mwohn Sises pilada sapwellime wahnpoaron 12, e kapakap ong Siohwa ni pwong ehu pwon. Ahpw, ni ahnsou me e padahkiong sapwellime ko iaduwen re pahn wia Katamanpen sapwellime pwoula, e wia kapakap mwotomwot kan ong pilawa oh wain. (Mark 14:22-24; Luk 6:12-16) Oh kitail wehwehki me Koht pil kin pwungki kapakap mwotomwot kan en Sises.
4 Iaduwen ni ahnsou me kitail ale pwais kaselel en wiliandi peneinei ehu oh kapakap mwohn kitail pahn mwenge? Kapakap pwukat kak wiawi ni mwotomwot—ahpw kitail anahne kalahnganki mwenge. Ma kitail kin wia kapakap mwohn wehi pokon mwohn de mwurin mihding en Kristian kan, kitail sohte anahne wia kapakap reirei oh koasoia duwen ire tohto. Sises kin kauwe Sounkawehwehn Kosonnedo me kin ‘liliosohski wia kapakap reirei.’ (Luk 20:46, 47) Emen me kin poadidi ong Koht sohte men wia met. Ahpw ekei ahnsou, kapakap mwohn wehi pokon kak ekis reirei ni ahnsou me konehng. Karasepe ieu, emen elder me pilipilda en wia kapakap ni kaimwseklahn kapokon pahn anahne medemedewe mwowe dahme e pahn kapakapki oh e kak koasoia duwen ekei ire kesempwal kan me re sukuhlikidier. Ahpw, kapakap ong soangen ahnsouwo pil sohte konehng en uhdahn reirei.
Kasalehda Wahu ong Koht Ni Ahnsoun Kapakap
5. (a) Dahme kitail en tamanda ni ahnsou me kitail kin wia kapakap mwohn wehi pokon? (b) Dahme kahrehda kitail en wia atail kapakap ni elen wahu?
5 Ni ahnsou me kitail kin kapakap mwohn wehi pokon kitail anahne tamanda me kitail sohte kin koasokoasoiong aramas akan. Ahpw, kitail en tamataman me kitail wie aramas soh unsek kan oh kitail wia atail pekipek kan ong Kaunepen Lahng oh Sampah, Siohwa. (Melkahka 8:3-5, 9; 73:28) Ihme kahrehda, kitail anahne kasalehda wahu ni atail lemmwiki Koht oh kasalehda met sang ni atail pahn kanahieng atail lokaia kan oh mwomwen atail kin koasoi. (Lepin Padahk 1:7) Sounmelkahka Depit koulki: “Eri a, pwehki sapwellimomwi limpoak lapalap, I kak patohdo nan tehnpasomwi; I kak kaudok nan Tehnpasomwi sarawi oh poaridi ong komwi ni wahu lapalap.” (Melkahka 5:7) Ma kitail kin ahneki soahngen lamalam wet, ia pahn mwomwen atail koasoi ni ahnsou me aramas peki rehtail en kapakap ni ehu mihding en Sounkadehdehn Siohwa kan? Mehlel, ma kitail kin koasoiong nanmwarki aramas men, kitail pahn kasalehda wahu. Atail kapakap kan soh pahn pil kasalehda wahu laudsang wahu me kitail kin kasalehong aramas akan, pwe kitail kapakap ong Siohwa, “Nanmwarki soutuk”? (Kaudiahl 15:3) Ni ahnsou me kitail pahn wia atail kapakap kan, kitail en liksang soangen lokaia kan me duwehte met: “Menseng mwahu, Siohwa,” de “Se kadaralahng Komwi aht limpoak,” de “Kaselehlie.” Nting kan en Paipel kin kasalehda me sapwellimen Koht ohl Iehros, Sises Krais, sohte kin doadoahngki soangen lokaia pwukat ong Seme nanleng.
6. Dahme kitail en tamanda ni ahnsou me kitail pahn ‘keiong mpen mwoahl kalahngan en Koht’?
6 Pohl mahsanih: “Eri, kitail keiong mpen mwoahl kalahngan en Koht ni saledek en koasoi.” (Ipru 4:16, NW) Kitail kak keiong mpen Siohwa ni “saledek en koasoi” edetehn kitail aramas dipan akan pwehki kitail kin pwoson tomw meirong en Sises Krais. (Wiewia 10:42, 43; 20:20, 21) Ahpw, “saledek en koasoi” sohte kin wehwehki me kitail pahn kin koasokoasoi ong Koht duwehte atail kin koasoi ong aramas; oh pil e sohte konehng kitail en nda mehkot me sohte kin kasalehda wahu ong Siohwa. Ma atail kapakap kan mwohn wehi pokon pahn kaperenda Siohwa, kitail anahne wia atail kapakap kan ni wahu, oh e pil sohte konehng en wia pakair kan, kaweidih aramas akan, de kapahrekong sounrongorong kan nan atail kapakap kan.
Kapakap ni Karakarahk
7. Iaduwen Solomon kasalehda lamalam en aktikitik ni ahnsou me e wie kapakap ni en kasarawi en sapwellimen Siohwa Tehnpas Sarawi wiawi?
7 Mendahki kitail kin wia atail kapakap mwohn wehi pokon de kelepw, iren Paipel kesempwal ehu en tamanda iei me kitail anahne kasalehda karakarahk ahnsoun kapakap. (2 Kronikel 7:13, 14) Nanmwarki Solomon kin ahneki lamalam karakarahk ni ahnsou me e wie eh kapakap mwohn wehi pokon ni ahnsoun kasarawien sapwellimen Siohwa Tehnpas Sarawi nan Serusalem. Solomon apwtehn kauwada ihmw akan me keieu kaselel nin sampah. Ahpw, ni lamalam karakarahk e kapakapki met: “Ahpw ia duwe, Maing Koht, sampah kak itarohng komwi? Pwe pahnlahng mwokon tikitikiong komwi. Eri, ia duwen Tehnpas Sarawi wet me I kauwadahr eh pahn kak itar?”—1 Nanmwarki 8:27.
8. Ia ekei elen lamalam aktikitik me pahn sansalda nan kapakap mwohn wehi pokon?
8 Duwehte Solomon, kitail anahne ahneki lamalam karakarahk ni ahnsou me kitail kin wiliandi mehteikan kapakap mwohn wehi pokon. Edetehn kitail pahn song en liksang soangen ngihlen aramas me kin mwomwehda me irail me sarawi, lamalam karakarahk kak sansal ni ngihlatail. Kapakap kan me kin wiawi ni karakarahk sohte kin doadoahngki ngihl laud me nohn daulihla de kala. Wiewia pwukat kin kahrehong aramas akan en medemedewe duwen meno me wia soahngen lokaia ahpw kaidehn Koht. (Madiu 6:5) Karakarahk pil kin sansalda sang audepen atail kapakap kan. Ma kitail kin wia atail kapakap ni karakarahk kitail sohte pahn doadoahngki soangen ngihl ehu me kin mwomwen idingkihong Koht en wiahda mehkot me kitail kin nseneki. Ahpw, kitail pahn peki rehn Siohwa pwehn wiahda dahme pahn utungada sapwellime kupwur kan. Sounmelkahka kin kasansalehda lamalam pwung ni ahnsou me e wia pekipek wet: “Komw ketin doareikitala, Maing Kaun, komw ketin doareikitala! Maing Kaun [“Siohwa,” NW] komw ketin kupwurei kiht pwe se en pweida!”—Melkahka 118:25; Luk 18:9-14.
Kapakap Sang Nan Mongiongatail
9. Mehnia kaweid kaselel me Sises kihda me diarekda nan Madiu 6:7, oh iaduwen kitail kak kapwaiada kaweid wet?
9 Pwehn kaperenda Siohwa, atail kapakap kan mwohn wehi pokon oh ahnsou me kitail kelepw anahne kohsang nan mongiongatail kan. Eri, kitail sohte pahn pwurpwurehng doadoahngki ehu kapakap oh sohte medemedewe dahme kitail kin nda. Nan sapwellime Kapahrek en Pohn Dohl, Sises ketikihda kaweid wet: “Kumwail dehr kin pwurehng doadoahngki lokaia kan nan amwail kapakap akan, duwehte me rotorot akan kin wia, me kin lemeleme me Koht pahn kupwure irail pwehki ar kapakap reirei.” Mahsen en Sises wet pil kin wehwehki: “Dehr kin doadoahngki lokaia mwahl tohto; dehr pwurehng doadoahngki lokaia mwahl akan.”—Madiu 6:7; NW, footnote.
10. Dahme kahrehda e pahn konehng en pwurehng kapakapki mehkot me kitail kapakapkiehr pak tohto?
10 Ni mehlel, kitail ele anahne pwurpwurehng kapakapki duwen mehkot. Met sohte pahn wia sapwung ehu pwehki Sises kangoange: “Kumwail peki, kumwail ahpw pahn ale; kumwail rapahki, kumwail ahpw pahn diar; kumwail letelet, e ahpw pahn ritidahng kumwail.” (Madiu 7:7) Ele mwein mie anahnepen Kingdom Hall kapw pwe Siohwa kin kapaiada doadoahk en kalohk nan wasao. (Aiseia 60:22) E pahn konehng en pwurpwurehng wia pekipek wet ni ahnsou me kitail kelepwla kapakap ong Siohwa oh pil ni ahnsou me kitail kin wia kapakap ong wehi pokon nan mihding en sapwellimen Siohwa aramas akan. Atail kin wia met sohte kin wehwehki me kitail kin ‘pwurehng doadoahngki lokaia mwahl akan.’
Tamanda Kalahngan oh Kaping
11. Iaduwen Pilipai 4:6, 7 kin kadoadoahkong atail kapakap kan mwohn wehi pokon oh ni ahnsou me kitail kin kelepw?
11 Aramas tohto kin kapakap ihte pwehki irail men peki mehkot sang rehn Koht, ahpw atail limpoak ong Siohwa Koht pahn anahne kamwekid kitail en kasalehong Ih atail kalahngan oh kapinga Ih ni atail pahn wia kapakap mwohn wehi pokon oh ni ahnsou me kitail kelepw. Pohl ntingihdi, “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pilipai 4:6, 7) Ei, likin atail pekipek kan, kitail anahne kasalehda atail kasapahlkalahngan ong pai ni pali ngehn oh ni paliwar me Siohwa ketkihong kitail. (Lepin Padahk 10:22) Sounmelkahka koulki: “Omw meirong ong Koht en kin mihmi ni kapingkalahngan, oh ke en patohwanohng Wasa Lapalap soahng koaros me ke inoukidahr.” (Melkahka 50:14) Oh en Depit koul en kapakap ehu kin oarepene mahsen pwukat: “I pahn kapingahki Koht apwoat koulen; I pahn lohkiseli sapwellime roson lapalap ni ei pahn kapikapinga.” (Melkahka 69:30) E soh konehng kitail en pil wia met ni ahnsou me kitail kin wia atail kapakap mwohn wehi pokon oh ni ahnsou me kitail kin kelepw?
12. Iaduwen Melkahka 100:4, 5 pweida nan rahnpwukat, oh soahng dah kei kitail kak kalahngan oh kapingahki Koht?
12 Sounmelkahka menet kin koulki duwen Koht: “Kumwail pedokihlong nan kelen Tehnpaso amwail koulen kaping; kumwail patohlong nan sapwellime mwoahl sarawi ni kapingkalahngan. Kumwail patohwanohng amwail kapingkalahngan oh kapikapinga.” (Melkahka 100:4, 5) Kitail kak kapinga oh kasalehda atail kalahngan ong Siohwa pwehki nan rahnpwukat, sang nan wehi koaros aramas akan kin pedolong nan Sapwellimen Siohwa kelen Tehnpaso. Ke kin kasalehda omw kalahngan ong Koht pwehki Kingdom Hall nan pein ahmw wasa oh pil kasalehda omw kalahngan ni omw kin kaukaule iang pokonpene wasao rehn irail akan me kin poakohng Ih? Ni ahnsou me ke kin iang towehda mihding kan, ke kin sang nan mongiongamwail kan koulki kaping oh kalahngan ong Samatail nanleng me limpoak?
Dehr Namenek en Kapakap
13. Dahme ntingihdi Paipel me kin kasansalehda me kitail anahne peki ngidingid ong Siohwa mendahte ma kitail lemeleme me kitail sohte warohng pwehki kadeikpen loalatail kin kadeikada kitail?
13 Mendahte kitail lemeleme me kitail soh warohng pwehki kadeikpen loalatail kin kadeikada kitail, kitail anahne ngidingidki kapakap ong Koht. Ni ahnsou me mehn Suhs akan wiahda dihp pwehki arail pwoudkihda mehn liki kan, Esra kelehpwikihdi oh kapahpeseng peh lelepek ko oh kapakap ong Koht ki lamalam aktikitik: “Maing Koht, I namenek sarada mwohn silangomwi. Dipat akan koasoakoasoakdahr oh ileilesangehr moangat akan; re leldawohngehr pahnlahng. Sang ni mwehin at papah kahlap ako leledo met, kiht, sapwellimomwi aramas, wiadahr dihp lapalahpie. . . . Mehndahte mehkoaros me pweidahr reht pwehn wia kalokepen dipat akan oh at sapwung kan, se patohwan ese me komwi, at Koht, ketin kalokei kiht tikitik sang me se konehng ale oh ketin mweidohng se en momourte. Eri, ia duwen at pahn kak pwurehng pohnsehsehla sapwellimomwi kosonned kan oh pwoudikihda soangen aramas suwed pwukat? Ma se pahn pwurehng wia met, komwi uhdahn pahn engiengda kowahlap oh pahn ketin kamwomwkitala douluhl oh sohte ketin mweidohng emen en mourla. Maing Kaun [“Siohwa,” NW], Koht en Israel, komwi me pwung, ahpw komwi ketin mweidohng se en mourla. Se patohwan sakarkihda dipat akan mwohn silangomwi; se sohte tungoalenki pwung en patohdo mwohn silangmwi.”—Esra 9:1-15; Deuderonomi 7:3, 4.
14. Nin duwen me wiawiehr ni mwehin Esra, dahme kitail anahne wia pwehn ale sapwellimen Koht mahk?
14 Kitail kak ale sapwellimen Koht mahk kalahngan ma kitail wehkada dipatail kan oh pil “wiahda tiahk kan me pahn kasalehda amwail koluhlahr oh wiliakapwalahr.” (Luk 3:8; Sohp 42:1-6; Aiseia 66:2) Ni mwehin Esra, irail koluhlahr oh pil nantiong song en kapwungala ahr sapwung kan sang ni ahr kin mweisang ahr pwoud mehn liki kan oh kadarirailla. (Esra 10:44; pil kilang 2 Korint 7:8-13.) Ma kitail kin men ale sapwellimen Koht mahk ong dihp toutou me kitail wiahda, kitail anahne wehkada dihpo oh kapakap ni lamalam aktikitik oh wiahda tiahk kan me pahn kasalehda me kitail koluhlahr oh wiliakapwalahr. Ngehn en koluhla oh ineng en men kapwungala sapwungo pahn pil kamwekid kitail en rapahki sawas sang rehn elder kan en Kristian.—Seims 5:13-15.
Ale Mehn Kamweit Sang Kapakap
15. Iaduwen dahme Ana wia pahn kak sewese kitail en diarada mehn kamweit sang atail kapakap kan?
15 Ni ahnsou me kitail kin nsensuwedki mehkot, kitail pahn kak diarada mehn kamweit sang ni atail pahn kin kapakap. (Melkahka 51:17; Lepin Padahk 15:13) Ana, emen lih me lelepek, kin wia met. Ni ahnsouwo, peneinei laud kan tohto mie nan sahpwen Israel, ahpw Ana sohte neitik. Eh pwoud, Elkana me naineki pwutak kan oh serepein kan sang rehn eh pwoud teio, Penina. Oh Penina kin kaloke oh kasarowe Ana pwehki e sohte neitik. Ana ngidingidki wie eh kapakap oh inoukihda ma e pahn naineki pwutak men, e pahn ‘kihong Siohwa nah pwutak nan erein eh mour unsek.’ Ana me ale mehn kamweit sang eh kapakap oh pil sang mahsen kan en Samworo Lapalap, Ilai, oh met kahrehda me Ana “nsenamwahulahr.” E naitikihada kisin pwutak kis, ih eri kihong ede Samuel. Ahnsoukis mwuri, e wahlahng ih pwehn papah Siohwa nan Tehnpase. (1 Samuel 1:9-28, NW) Sang ni eh kalahnganki sapwellimen Siohwa kupwurkalahngan ong ih, e wia kapakap en danke—kapakap ehu me kasalehda kaping ong Siohwa oh kasalehda me Siohwa siksang mehkoaros. (1 Samuel 2:1-10) Duwehte Ana, kitail kak ale mehn kamweit sang kapakap oh kak likih me Koht pahn sapengla atail pekipek kan koaros me kin pid duwen sapwellime kupwur kan. Ni ahnsou me kitail kin kasalehda atail pepehm kan ong Ih, kitail en “nsenamwahulahr,” pwe e pahn kihsang atail toutou kan de sewese kitail en dadaurete.—Melkahka 55:22.
16. Nin duwen me wiawi ong Seikop, dahme kahrehda kitail anahne kapakap ni ahnsou me kitail kin masapwehk de pwunodki mehkot?
16 Ma kitail lelohng irair ehu me kahrehdong kitail masapwehk, de nsensuwed, de pwunod, kitail en dehr manokehla en sohpeiong Koht ki kapakap pwehn ale mehn kamweit. (Melkahka 55:1-4) Seikop masepwekada ni ahnsou me e pahn tuhwong rie ohl, Esau. Ahpw, Seikop wie e kapakap: “Maing Koht en semei Eipraam, Koht en semei Aisek, komw ketin karonge ie! Maing Kaun [“Siohwa,” NW], komw ketin mahsanihongieier, ‘Pwurowei nan sapwomw rehn kisehmw kan, I ahpw pahn kupwuramwahuwihiuk.’ I sohte warohng kalahngan koaros oh loalopwoat poatopoat me komw ketin kupwurehki sapwellimomwi ladu menet. I kotelahr Pillap Sordan sohte wa mehkot ihte sokon pwoat, a met I pwurodohr kahre pwihn riau wet. Komw ketin doareiesang ni manaman en riei Esau. I perki ni eh patopatohdo pwe ede uhwong kiht oh kauweikitala koaros, iangahki lih akan oh pil seri kan. Komw kupwukupwure sapwellimomwi inowo me mahsanih, ‘I pahn kupwuramwahuwihiuk pwe mehkoaros en pweida rehmw, oh I pahn kihong uhk kadaudokomw ngedehrie me soh kak wadawad. Re pahn tohto duwehte pihken ni oaroahr akan.’” (Senesis 32:9-12) Esau sohte mahweniong Seikop oh ienge kan. Eri, Siohwa me “kupwuramwahuwih” Seikop ni ahnsouwo.
17. Pwehn kapwaiada Melkahka 119:52, iaduwen atail kapakap kan kak wahdong kitail mehn kamweit ni ahnsou kitail kin nsensuwed?
17 Ni ahnsou me kitail kin wia atail pekipek kan, kitail kak ale mehn kamweit sang ni atail pahn tamanda dahme kitail wadek nan sapwellimen Koht Mahsen. Nan melkahka ehu me keieu reirei—kapakap kaselel ehu wiawiong ni koul—mweinte Soupeidi Esekaia me koulki met: “Maing Kaun [“Siohwa,” NW], I kin tamanda sapwellimomwi kadeik en mahs ako, eri ihme kin kansenamwahuwihiehla.” (Melkahka 119:52) Ni ahnsou me kitail kin lelohng kasongosong laud ehu, ni atail pahn kin kapakap ni lamalam en aktikitik e pahn kak sewese kitail en tamanda ehu koasoandi de padahk nan Paipel me pahn kak sewese kitail en keid nan ahl me pahn kaperenda Samatail nanleng.
Aramas Lelepek kan kin Poadidiong Kapakap
18. Dahme kahrehda Pwuhk Sarawi mahsanih: ‘sapwellimomwi aramas loalopwoat kan koaros en kapakapohng komwi [Koht]’?
18 Koaros me kin lelepek ong Siohwa Koht pahn “poadidiong kapakap.” (Rom 12:12) Nan Melkahka 32, mweinte Depit me wiahda koul wet mwurin e wiahda dihp rehn Padsihpa, e kawehwehda duwen eh pwunod pwe e sohte wehkada dipe kan oh pil duwen eh nsenamwahu ni ahnsou me eh koluhkihla dipe kan. Depit koulki: “Eri, [pwehki sapwellimen Siohwa mahk kalahngan kin kohwong koaros me kin koluhla mehlel] sapwellimomwi aramas loalopwoat kan koaros en kapakapohng komwi ni ahnsou apwal.”—Melkahka 32:6.
19. Dahme kahrehda kitail anahne kapahda peh lelepek kan ni kapakap?
19 Ma kitail kin kesempwaliki atail nanpwung mwahu rehn Siohwa Koht, kitail pahn kapakapki sapwellime mahk kalahngan me poahsoanda pohn tomw en meirong en Sises. Ni pwoson, kitail kak keiong mwoahl kalahngan en Koht ki saledek en koasoi pwehn ale sapwellime mahk oh sawas. (Ipru 4:16) Mie soahng tohto me kitail en kapakapki! Eri, kitail en “poadidiong kapakap”—ki lokaia kan me kohsang mohngiongatail me kin kapinga oh kasalehda atail kalahngan ong Koht. (1 Deselonika 5:17) Ni rahn oh ni pwong, kitail en kapahda peh lelepek kan ni kapakap.
Iaduwen Komw Pahn Sapeng?
◻ Dahme kahrehda e pahn konehng kitail en medemedewe dahme kitail pahn kapakapki mwohn kitail pahn wia atail kapakap kan mwohn wehi pokon?
◻ Dahme kahrehda kitail anahne kapakap ni elen wahu?
◻ Soahngen irair dahieu me kitail anahne kasalehda ni ahnsou kitail kin kapakap?
◻ Ni ahnsoun kapakap, dahme kahrehda e konehng kitail en tamanda en kapinga oh kasalehda atail kalahngan ong Koht?
◻ Iaduwen Paipel kasansalehda me kitail kak ale mehn kamweit sang atail kapakap kan?
[Kilel nan pali 15]
Nanmwarki Solomon wia eh kapakap ni karakarahk ni ahnsou e kapakap mwohn wehi pokon nan kasarawien Sapwellimen Siohwa Tehnpas Sarawi
[Kilel kan nan pali 16]
Duwehte Ana, ke kak ale mehn kamweit sang kapakap