“I Pahn Kosoula Wasakis?”
1 Sapwellimen Siohwa ladu tohto mwekidki kehkehlik en Sises en “kohwei . . . padahkiong tohn wehi kan koaros; pwe re en wiahla nei tohnpadahk,” oh ihme kahrehda, re kosoula ekis wasa pwehn kak kalohk nan wasakis me sawas me anahn. (Madiu 28:19) Re kin kahlemengih Pohl, me mwekidki luhk wet: “Kohdo Masedonia oh sewesei kiht!” (Wiewia 16:9) Iaduwen kitail kak wia met ni ahl me mwahu?
2 Sewese Wasa Keren kan Mwohn Ke Pahn Kosoula Wasa Doh: Mie wasahn kalohk kan nan ahmw mwomwohdiso me anahne sawas? Ma iei, ke kak kalohk nan wasa pwukat. Mwohn ke pahn pilada en kohla wasa tohrohr pwehn kalohk, e pahn mwahu en koasoi ong elder kan pwehn tehk rehrail ma re lemeleme ma e pahn mwahu en kosoula wasakis. Ke kak pil idek rehn Sounapwalih en Circuit me kin mwemweitla rehn ahmw mwomwohdiso me e kin ese duwen mwomwohdiso me karanih ahmw wasahn kousoan pwe ken kak kohla wasao oh sewese irail. Ni pali teio, mwurin ke “mwohndi mahs oh medemedewe uwen pweine,” mwein ke pahn pilada en kosoula nan ehu kahnimw nan pein ahmw wehi de nan ehu wehi tohrohr. Ma ke men wia met, kowe iangahki pwihn en elder kan kak ntinglahng rahn ohpis me ke men kohla ie, oh ke pahn kasalehda duwen iahd ke sukuhliki padahk mehlel oh ahmw kekeirada kan (de kohkohdi kan) mwurin mwo. E pil pahn wia elen loalokong ma ke pahn mwemweitla wasao mwohn ke pahn wia ahmw pilipil ma ke pahn kosoula wasao de soh.
3 Kanahieng Ahnsou Me Ke Kosoula: Irail riatail brother oh sister kan me kin kosoula ekis wasa kin wie tohtohla pwehki re men kohla wasakis me pahn mwahu ong irail en apwalih arail peneinei ni pali war de re men pitsang kalokolok. Ahpw, ekei pak, brother oh sister pwukat kin lohdi pahn widing en aramas akan me kin mwomwehda me re men sewese irail en soandi nan wasa kapw ahpw aramas pwukat, ni mehlel, kin pitih irail oh brother oh sister kan kin luhs neirail mwohni oh aramas widing pwukat kin keseirailla. Ekei pak, aramas widing pwukat kin songen idingkihong brother oh sister kan me kosoula nan wasa kapwo pwe ren wia tiahk suwed (karasepe: nenek oh kamwahl). Ahnsou me re pahn kahng wia soangen tiahk suwed pwukat, wehi kapwo me re mihmi loale pahn kak wia soahng koaros me re men wia ong irail. Ihme kahrehda, irair kapwo me re mihmi loale kakete suwed sang irair en wasa me re kohsang ia. Ahnsou me brother oh sister pwukat kin anahne sawas, re kin kohla mihmi rehn brother oh sister kan wasao de re kin pekihda sawas, ahpw met kin kapataiong kahpwal toutou kan ong brother oh sister me miehier pein arail kahpwal kan. Ekei pak, pwehki ekei kin kosoula mendahki mehteikan sohte pwungki arail kosoula, ekei tohnpeneinei kan tohrohrpeseng, de ekei tohnpeneinei kan luwetla ni pali ngehn.—1 Tim. 6:8-11.
4 Ma ke men kosoula pwehn kamwahuwihala ahmw irair en mour, tamataman me sohte lipilipil wasa kan me ke kousoanla ie, mie kahpwal kan. E mengei en kamwahuwihala kahpwal kan nan wasakis me ke wehwehki arail lokaia oh tiahk sang kamwahuwihala kahpwal kan nan wasao me ke sehse.