Tehk Kanahieng Wiewia Kaselel kan en Koht
1 Ni ahnsou me kitail pokonpene ni Kapokon en District en “Aramas akan me kin Kapwaiada Mahsen en Koht,” kitail kin sohpeila sang kapwunod kan en mour oh sohpeiong wiewia kaselel kan en Siohwa. Prokram en kapokono wiawihda pwehn kakehlail atail pwoson Koht oh sapwellime Mahsen, oh pwehn kakehlail atail nanpwung mwahu reh oh pil en kalaudehla atail ngoangki kalohk. Iaduwen kitail pahn ale kamwahu kan sang dahme kitail sukuhlikier?—Sohn 13:17.
2 Peneinei kan Peikiong Mahsen en Koht: Padahk kan me oaralap koasoia “Peikiong Sapwellimen Koht Mahsen” kin sewese kitail en kasawihada irair en pali ngehn en atail peneinei. Seri kan kin perenki sukuhl. Ihme kahrehda, kangoang kin kohwong pahpa oh nohno kan me kin papah Koht en wiahda poahsoan en peneinei kehlail ni amwail kin onop Paipel nin duwen peneinei ehu. Tapwin peneinei tohto kin onop brochure me oaralap koasoia Ke Kak Kompoakepahnki Koht! rehn neirail seri kan. Met pahn sewese irail en kakairada nanpwung mwahu rehn Siohwa. Kumwail, pahpa oh nohno kan, padahkiong noumwail seri kan iaduwen re kak nsenohki sapwellimen Koht pepehm kan. En kasalehda sang ahmw lokaia kan me ke kin poakohng Ih oh kalahnganki dahme e kin wia. (Melkahka 103:2) Doadoahkpene pwehn koasoanehdi oh lel amwail mehn akadei en pali ngehn kan oh pil wia uwen me kumwail kak pwehn papah Siohwa.
3 Mahsen en Koht kin Kamarainih Atail Ahl: Kitail pil perenki ale pwuhk kapw me oaralap koasoia Isaiah’s Prophecy—Light for All Mankind (Volume I). Ke tepidahr wadek pwuhk kapw wet? Pwuhken Aiseia kin kohpada duwen kadeik laud me pahn kohwong wehi kan me sohte kin kaudokiong Siohwa oh pil pwuhken Aiseia kin koasoia kapai kan me pahn kohwong sapwellimen Koht aramas akan erein Wehin Koht. (Aiseia 34:2; 35:10) E pil kin kekeirada atail pwoson oh likih Siohwa oh sapwellime ahl.—Aiseia 12:2-5.
4 Ni ahnsou me ke wadek Isaiah’s Prophecy I, ke pahn mwadang kilang iaduwen Aiseia kin kolokolete eh lelepek ong Siohwa mendahki suwed kapilpene ih. Ahnsou me luhk kohwong Aiseia en wiahla meninkeder en Koht, Aiseia sapeng oh mahsanih: “Iet ngehi, Maing, komwi ketin poaroneiehla.” (Aiseia 6:8) Ma kitail doudouloale duwen Aiseia oh eh ngehn en tounmetei, met pahn kangoange kitail en nantihong kalohki Rongamwahu, oh wia uwen me kitail kak pwe “kadehde en mie ong aramas koaros.”—Madiu 24:14.
5 Atail tehk kanahieng sapwellimen Siohwa wiewia kan pahn kalinganada mwaren Koht. Eri, kesempwaliki atail pwais kaselel en kapwaiada Mahsen en Koht!