Ke Kak Kalohk Wasa kan me Re kin Anahne Sawas?
1 Mie pak me ke medemedewe me ke men kosoula wasa kan me re kin anahne sawas en sounkalohk kan? Ma mie me luhke iuk en “kohdo . . . oh sewesei kiht,” ke pahn mwekidki luhk wet duwehte wahnpoaron Pohl wia? (Wiewia 16:9, 10) Nan mwomwohdiso tohto, mie anahn ong peneinei kan me mah ni pali ngehn, pioneer kan me kak kalohk nan wasahn kalohk kan, elder koahiek kan oh ministerial servant koahiek kan pwehn kak apwalih mwomwohdiso. Mwomwohdiso kan me anahne sawas—arail wasahn kalohk kan kin kalapw kisin kahnimw tikitik kan me dohpeseng. Pali laud en ahnsou, Kingdom Hall me kin mihmi wasa pwukat mwein kin mihmi wasa doh. E kin kalap apwal en diar doadoahk en mwohni nan wasa pwukat. Mwein pil irair en nan wehwe sohte kin nohn mwahu. Ke kak sewese mwomwohdiso kan me ahneki soangen anahn pwukat? Ke kak pweida ni ahmw pahn sewese mwomwohdiso kan me ahneki soangen anahn pwukat?
2 Pwoson oh Likih Siohwa me Anahn: Pwehki Koht kaweidki Eipram en wia met: Eipram eri mweselsang uhdake, Ur, oh seiloaklahng Aran, me mwail 600 doh sang Ur, oh kahre eh pwoud, nein rie oh pil eh pahpa me mahlahr, Tera. (Sen. 11:31, 32; Neh. 9:7) Mwurin Tera mehla, Siohwa kehkehlikiong Eipram, me ahnsowo mahki sounpahr 75, en mweselsang Aran, iangahki eh peneinei, oh seiloakla wasahkis me Koht pahn kasalehong ih. Eipram, Sarai, oh Lohd “eri tepiada seiloak.” (Sen. 12:1, 4, 5) Mehlel, Eipram sohte kosoula pwehki re anahne sounkalohk wasao. Ahpw, e anahne mehkot ma eh kosou en pweida. Dahme e anahne?
3 Eipram anahne pwoson oh likin Siohwa ma e pahn pweida ni e pahn wia mehkot laud duwehte met. Ni mehlel, eh madamadau oh mour anahne wekila. E anahne kohkohsang nsenamwahu en mihmi rehn eh peneinei kan. Ahpw, e likih Siohwa pwe e ese me Siohwa pahn kak apwalih ih oh eh peneinei. Aramas tohto rahnwet kin kasalehda arail likih Siohwa ni ahlohte.
4 Kohla Kalohk Wasa Pwukat Ahnsou Mwotomwot: Mie pak me ke ale pai kan me kin kohsang kalohk nan wasa kan me sounkalohk kan sohte kin kalohk de sohte kin kalap kalohk? Pahr me ahpwtehn nek, nan wasa 10 me mihmi pahnangin epwelpen Rahn Ohpis en Guam, mie sounkalohk 2,000 samwa sang mwomwohdiso 26 me kin kalohki Rongamwahu nan deke kan en Micronesia. Ahpw, miehte deke tohto me sounkalohk kan sohte kin kohla kalohk ie de sounkalohk kan sohte kin kalap kohla wasa ko. Ahpw, ma sounkalohk kan men kalohk ni deke pwukat, re anahne seiloak wasa doh pwukat. Arail nannanti pahn imwila mwahu?
5 Sounkadehde tohto me mihmi nan Micronesia kin ale arail ahnsou mwahu en kalohk ong aramas me kin mihmi nan deke pwukat oh ehukihong irail padahk mehlel en Pwuhk Sarawi. Ni ahnsou me emen sister nan Dekehn Mahsel ale doadoahk en sounpadahk nan ehu deke liki en Mahsel me adaneki Jaluit, e diarada me ih kelepw me wia Sounkadehde wasao. E ngoangki kalohk ong aramas koaros wasao, onop Paipel rehn aramas duamen oh koasoanehdi mihding kan ong irail oh wia mihding kan. Ni ahnsou me emen Ministerial Servant sang Majuro kohla wasao nan April 2000 pwehn wia kapahrek en Katamanpen Kamatalahn Krais, aramas 175 iang towehda ahnsowo. E sansal me sister menet luhke aramas koaros me e kak pwehn iang towehda Kataman kesempwal wet. Pwehki re men sewese aramas akan me kin mihmi wasao en kekeirada ni pali ngehn, brother me wia kapahrek en Kataman oh eh pwoud kosoula wasao oh mwurin mwo, re wiahda mwomwohdiso wasao.
6 Ma kitail pahn ale luhk wet en kohla wasa kan me re anahne sawas, mie pil ehu kamwahupen met. Irail me pahn mwemweitla wasa pwukat kak tehk soahng kan me anahn pwe ma re men uhdahn kosoula wasahkis re pahn kak “mwohndi mahs oh medemedewe uwen pweine” mwohn re pahn kosoula.—Luk 14:28.
7 Siohwa kin ketin kupwurki Rongamwahu en lohkseli “wasa koaros nin sampah” mwohn imwin sampah pahn kohdo. (Madiu 24:14) Ma ke wehwehki met, ke kak kosoula wasa kan me re kin anahne sawas? Wasa tohto kin anahne sawas.
8 Kosoula Wasa kan me Re kin Anahne Sawas: Ke kommoal sangehr doadoahk? Mie noumw mwohni me ke kin alehdi sounpwong koaros? Ma soh, ke kak koasoanehdi doadoahk ong pein kowe? Ke kin doadoahk sang wasa sohte lipilipil ma mie noumw telephone de computer? Ma pein kowe sohte kak kosoula oh kalohk wasa kan me re kin anahne sawas, ke kak sewese emen sang ahmw peneinei en wia met?
9 Ma ke kapakap oh ke pehm me ke kak kosoula wasa kan me re kin anahne sawas, koasoiong ahmw peneinei oh elder kan nan ahmw mwomwohdiso duwen ire wet. Mwurin mwo, wiahda kisinlikou oh kihong elder kan pwe ren kak kilang noumw kisinlikou oh re pahn wiahda pein neirail kisinlikou oh kadaralahng Rahn Ohpis.
10 Dahme ke pahn ntingihdi nan noumw kisinlikou? Ke pahn ntingihdi ahmw sounpahr, rahn me ke papidaisla, ahmw pwukoa nan mwomwohdiso, ma ke pwopwoud de soh, oh ma mie noumw seri kan me kin mihmi rehmw de soh. Kasalehda mehnia wasa me ke men kohla, oh pilipil wet pahn poahsoankihda ahmw anahn akan. Karasepe ieu, ke kak mihmi wasa kan me karakar? De ke kak mihmi wasa kan me e inenen kopou ahnsoun kopou? Ke kak mihmi wasa kan duwehte nahna ileile kan? Ke ese ekei lokaia kan likin pein ahmw lokaia?
11 Mie ahmw ngoang oh ke men tiengala mwowe oh kosoula wasa kan me re kin anahne sawas? Ahmw irair kan kin mwahu pwe ken kak kalohk wasa pwukat? Ma iei, menlau kilang me Siohwa pahn ketikihda kapai tohto ong irail me kin likih Ih oh kasalehda ngehnin tounmeteiki pein irail!—Mel. 34:8; Mal. 3:10.