Siohwa Kak Ketikihong Kitail Kehl
1 Ia ahmw madamadau duwen wahnpoaron Pohl? Ni atail kin wadek pwuhken Wiewia, kitail kin wehwehki oh kalahnganki me e kin inenen pwerisek nan doadoahk en papah Siohwa. Iaduwen Pohl e kin wia met? E mahsanih: “I kakohng mehkoaros sang ni manamano me Ih kin ketikihong ie.” (Pilipai 4:13, New World Translation) Kitail pil kak paiekihda kehl me Siohwa kin ketikihda. Iaduwen? Ni atail kin ale kamwahupen soahng weneu me Siohwa kin ketikihda pwehn kakehlailih aramas akan ni pali ngehn.
2 Mahsen en Koht: Duwehte kitail kin mwenge pwehn kakehlail paliwaratail, kitail pil anahne kakehlailih pali ngehnatail ni atail pahn wadek Mahsen en Koht, doudouloale oh kapwaiada kaweid me mihmi loale. (Madiu 4:4) Paipel kin ketikihong kitail kehl me kak kakehlail kitail. Ma kitail ngoangki padahk mehlel oh mwahuki padahk mehlel en teng nan mongiongatail, kitail anahne wia pein atail onop Paipel oh doudouloale rahn koaros ma kak.—Melkahka 1:2, 3.
3 Kapakap: E kesempwal en karanih Siohwa, keieu nan ahnsoun apwal akan. Ni e kin kadarodo sapwellime ngehn sarawi, e kak kakehlailih irail me peki reh ni kapakap. (Luk 11:13; Episos 3:16) Pwuhk Sarawi kin kangoange kitail en “poadidiong kapakap.” (Rom 12:12) Ke kin wia met?
4 Mwomwohdiso: Kitail kin ale kehl oh kangoang sang mihding kan en mwomwohdiso oh sang atail miniminiong riatail brother oh sister kan. (Ipru 10:24, 25) Ni ahnsou me kitail kin nsensuwed, riatail brother oh sister kan kin sewese kitail oh kangoange kitail.—Lepin Padahk 17:17; Ekl. 4:10.
5 Kalohk: Ma kitail kaukaule iang kalohk, met pahn sewese kitail en rapahki mahs Wehio oh kapai kan me kin kohsang met. Kitail kak perenda ni atail pahn sewese meteikan sukuhliki duwen Siohwa. (Wiewia 20:35) Kitail koaros sohte kak kosoula oh kalohk wasa kan me anahn mie de iang doadoahk en Regular Pioneer de soahng pwukat, ahpw kitail kak kalaudehla atail ahnsou nan kalohk.—Ipru 6:10-12.
6 Kristian Sounapwalih kan: Kitail kak paiekihda kangoang oh sawas me kin kohsang elder kan. Siohwa ketin kapwukoahkin irail en apwalih sapwellime sihpw kan. (1 Pit. 5:2) Irail brother kan me kin wia Sounapwalih kan oh kin mwemweit rehn mwomwohdiso kan kin kangoange tohnmwomwohdiso kan, duwehte Pohl pil kin wia nan eh ahnsou.—Rom 1:11, 12.
7 Mehn Kahlemeng Mwahu en Irail me Lelepek kan: E kin inenen kaperen en medemedewe duwen mehn kahlemeng mwahu en riatail me lelepek kan, irail me kin memour mahs oh rahnwet. (Ipru 12:1) Ni ahnsou me ke pehm me ke anahne kangoang, dahme ke soh wadek nan makisihn kan duwen irail brother oh sister kan me koasoia arail mour, de wadek ekspiriens kangoang kan nan Pwuhken Pahr (Yearbook), de ekspiriens kaperen kan me ntingdi nan pwuhken Proclaimers me koasoia duwen poadoapoad en Sounkadehdehn Siohwa kan nan atail ahnsou?
8 Emen brother me mahki sounpahr 90 samwa iangala padahk mehlel ahnsou me e pwulopwul. Ni ahnsou me e wie pwulopwulte, eh pwoson lelohng kasongosong. Keieu, ekei irail me iangala padahk mehlel uhd kesehla padahk mehlel. Mwurin mwo, re tepida wia doadoahk en kalohk ihmw-lel-ihmw oh doadoahk wet inenen apwal ong ih en wia. Ahpw, mendahki met, e kin ahnsou koaros mweidohng Siohwa eh kahpwal akan. Mwurin mwo, e tepida perenki kalohk. A iaduwen rahnwet? Mendahki a luluwetla oh soumwahula, e wie kisehn peneinei en Brooklyn Bethel, oh e kin wie kisehn Governing Body. E sohte kin koluhkihla eh tengdiong sapwellimen Siohwa pwihn.
9 Emen sister me kin iang wia kisehn peneinei en Bethel nan Britain papidaisla ahnsou me e sounpahr 13. Ih oh rie pwutak tepida pioneer pahr mwurin eh papidaisla oh pahr mwurin mwo, eh pahpa selidi nan imweteng pwehki e sohte pahn iang sounpei nan Mahwen Keriau en Sampah. Ahpw, e kin peki rehn Siohwa en kihong ih kehl, oh e nantihong papah Koht mehlelo. Mwurin mwo, e pwoudkihda emen brother lelepek oh ira koaros kin nannanti wie kupwuren Siohwa. Re pwopwoud sounpahr 35 oh mwurin mwo, eh pwoud mwadangete mehla. E pwurehng peki rehn Siohwa en kihong ih kehl, kahrehda e kak doula nan eh papah Siohwa lao lel rahnwet, oh e kin koapworopworki me e kak papah Siohwa kohkohlahte oh wiahte kisehn sapwellimen Siohwa peneinei nan sampah.
10 Siohwa kin sewese oh kakehlailih sapwellime ladu lelepek kan. “E kin ketin kakehlahda me luwet oh me pwangadahr kan.” Kitail kak paiekihda utupen kehl wet ni atail pahn ale kamwahupen soahng weneu me kileledi nan artikel wet. Tamataman: “Irail kan me koapworopworki Kauno [“Siohwa,” NW] pahn onehda sapahl ar kehl. . . . Ni ar pahn tang, re sohte pahn pwangada; ni ar pahn kin alu, re sohte pahn luwetala.” (Aiseia 40:29-31) Pohl kin mweidong Siohwa eh kahpwal kan oh kitail pil kak wia met.